Wt/azb/کوراوغلوینان بیلر
کوراوغلوینان بیلر
[edit | edit source]
آنا آنلاتیم
- کوراوغلوینان بیلر
* کور‌اوغلو بیر گۆن دلیلرینه دئيیر:
- – دلیلریم، منیم سفریم وار.
- دلیلر دئيیر:
- – هارا گئدیرسن؟
- کور‌اوغلو دئيیر:
- – نه ایشینیزه، بۇدو بۇ خنجری ده آسیرام دیواردان، هرگاه خنجرین اۇجوندان قان دامسا منی اؤلموش بیلین.
- کور‌اوغلو قێراتینی مینیب بیر نئچه منزیل يول گئدندن سونرا گلیب
- چاتدی بیر چمنگاها. گؤردو بۇردا بیر باغ وار گل گؤره‌سن. دۆنيادا
- هر جۆر آغاجدان اولان بۇ لالزار باغدا گۆل بۆلبولو، بۆلبول گۆلو چاغیریر.
- بنؤوشه‌لر آچیب، آغاجلار يارپاقلانیب.
- کور‌اوغلو بۇ باغی دولانا-دولانا دقتنن تاماشا ائله‌يیردی. بیر ده
- گؤردو باغین ایچینده جئيران میثاللی بیر قێز ساللانا-ساللانا يۆز نازقمزه
- ایله باغی سئير ائدیر. قێز نه قێز. قاشلار قارا، گؤزلر قارا، بالدان
- شیرین لبلری، سینه‌سی شاهداغی‌نین قاری کیمی آغ، ممه‌لری کؤينه‌يین
- آلتیننان شاماما کیمی باش وئریبدی.
- کور‌اوغلو قێزدا بۇ گؤزللیگی گؤرن کیمی چاشیب قالدی، اؤزو-اؤزونه دئدی:
- “ائي دیلی قافیل، دۆنيادا بئله ده گؤزل وارمیش”. بۇنون اۆستن آلیب سینسازین
- گؤرک نه دئدی:
- آچیلیب باغیندا لاله، نرگیزلر،
- قؤنچه‌سین ایيله‌يیب، گۆلون دررلر،
- آلیب اونو ایپک اۆسته سرللر،
- گؤزل قێز، گل منه، من آلیم سنی.
- کور‌اوغلو بئله دئينده قێزین گؤزلری خۇمارلاندی، قێيقاجی کوروغويا
- باخدی. قێز بئله باخاندا کور‌اوغلو سؤزونه داوام ائتدی:
- قۇربان اولوم قارا گؤزون مستینه،
- نه دۇروبسان بۇ جانیمین قستینه،
- الیم وۇروم تر ممه‌نین اۆستونه،
- گؤزل قێز، گل منه، من آلیم سنی.
- کور‌اوغلو دئر: گزمه آهی-زارینان،
- گۆل-بۆلبولو اويناتما سن خارینان،
- قونوشگینن منیم تکین يارینان
- گؤزل قێز، گل منه، من آلیم سنی.
- کور‌اوغلو اؤزونو نیشان وئرن کیمی قێز کور‌اوغلونو تانیدی. بۇ دا وار
- کی، جلیل پاشانین قێزی دینمز خانیم اؤز قارداشی اوغلو بَيلره نیشانلی
- ایدی. دینمز خانیم هم ده کور‌اوغلونون جلیل پاشاينان آراسی‌نین
- يوخلوغونو ائشیتمیشدی. بۇنو دا بیلیردی کی، دفعه‌‌لرنن کور‌اوغلو بَيلری
- اؤزونه دلی آپارماق ایسته‌يیب، آمما گۆجو چاتمايیب.
- دینمز خانیم کور‌اوغلونو گؤرن کیمی تانیيیب، بیر سئهر-جادو اوخويوب،
- کور‌اوغلونو سالدی تیلسیمه، ال-آياغینی باغلايیب، تئز آتاسینا خبر گؤندردی
- کی، بس دۇرماسین گلسین.
- جلیل پاشا آدام گؤندریب، کور‌اوغلونو تۇتوب سالدیردی زیندانا.
- کور‌اوغلو زینداندا قالماقدا اولسون، آل خبری دلی حسننن.
- دلی حسن گئجه-گۆندوز ياتمايیب کور‌اوغلونون يولونو گؤزله‌يیردی،
- بیر ده گؤردو کی، خنجرین اۇجوندان قان دامیر، تئز دلیلری چاغیریب دئدی:
- – آماندی، دلیلر، کور‌اوغلو زینداندادی، گرک تئز دادینا يئتیشک.
- دلیلر هئچ بیری يئریندن ترپنمه‌ينده، دلی حسن بیر ده سسلندی.
- بۇ بئله دئينده ائيواز دئدی:
- – هاچانا کیمی بیز کور‌اوغلونو اؤلومدن قۇرتاراق، جانی چێخسین تک
- گئتمه‌سین.
- ائيواز بئله دئينده دلی حسن عرباتی مینیب، بینا قويدو يول
- گئتمه‌يه. نئچه منزیل يول گئدیب، گلیب چاتدی بیر شهرین کنارینا،
- گؤردو بیر قاری يئردن چؤپ يێغیر.
- دلی حسن خبر آلدی:
- – قاری ننه يئردن يێغدیغین ندی؟
- قاری دئدی:
- – قادووو آلسین قاری، چؤر-چؤپ يێغیرام.
- دلی حسن دئدی:
- – قاری ننه چؤر ندی، چؤپ ندی؟
- قاری دئدی:
- – چؤر يئره اۇزانان، چؤپ ده دیک داياناندی.
- دلی حسن دئدی:
- – قاری ننه نه اوخويورسان؟
- قاری دئدی:
- – آي اوغول، آچیل باشیمنان.
- دلی حسن دئدی:
- – سن دئ، من سنین دردینه علاج ائله‌يیم.
- قاری:
- – آي اوغول، کور‌اوغلو دئيیلن بیر نفری جلیل پاشا تۇتوب سالیب زیندانا.
- صاباح بوينو وۇرولاجاق، اونونچون آه-زار ائدیرم.
- دلی حسن بۇنو ائشیدن کیمی:
- – نه دئدین، قاری ننه؟ او زیندانی منه گؤستر.
- قاری زیندانی دلی حسنه گؤستردی. دلی حسن زیندانا طرف
- گئتمکده اولسون، سنه کور‌اوغلودان دئيیم.
- کور‌اوغلو زینداندا اوتوروب دلیلری‌نین يولونو گؤزله‌يیر، آه-ناله ایچینده
- اونلاری هارايینا چاغیریردی. دلی حسن ده بۇ طرفدن گلیب چاتدی زیندانا.
- زیندانین دال طرفیندن داما چێخیب، کور‌اوغلونو گؤرمک ایسته‌دی.
- گؤردو کور‌اوغلو سازی الینه آلیب دلیلرینی هارايا چاغیرماقدادی.
- دلی حسن دینمه‌يیب کور‌اوغلونون سؤزلرینه قۇلاق آسماقدا اولسون،
- گؤرک کور‌اوغلو نه دئدی:
- کور‌اوغلويام، سالینمیشام زیندانا،
- بۆتون دلیلریم يانیمدا گرک.
- سوراغیم دۆشوبدو بۇ گۆن هر يانا،
- بۆتون دلیلریم يانیمدا گرک.
- گؤمگؤي چمنلرده اوتلايیر قۇزو،
- قارا زیندان قويمور گؤروم اۇلدوزو.
- چاغیررام ایمدادا ایگید مۇرتوزو،
- دمیرچیوغلو بۇ گۆن يانیمدا گرک.
- آخیتدیلار بَيلر، خانلار قانیمی،
- زیندان اۆزگون ائتدی شیرین جانیمی،
- آپارا بیلمه‌دیم دینمز خانیمی،
- ائيواز بالام بۇ گۆن يانیمدا گرک.
- کور‌اوغلو بئله دئينده دلی حسن دئدی:
- – ائي داد، آردیيجان گلن من، هئچ منیم آدیمی چکمیر.
- دلی حسن آجیق ائيله‌يیب گئتمک ایسته‌يیردی کی، کور‌اوغلو سؤزونه داوام
- ائتدی:
- مرد ایگیدلر، مرد اولارلار داوايا،
- مردین باشی دۆشر قالا-قووغايا،
- خبر چاتسین چنلیده‌کی حالايا،
- حالايپوزان قوچوم، يانیمدا گرک.
- قێراتیما داها يئته بیلمه‌دیم،
- شیرین جانی اونا قێيا بیلمه‌دیم،
- دینمز تکی يارا چاتا بیلمه‌دیم،
- دلی حسن بۇ گۆن يانیمدا گرک.
- کور‌اوغلو سؤزون تامام ائله‌دی.
- دلی حسن آتیلیب دامدان يئره دۆشدو. اؤزونو زیندانچی‌نین اۆستونه
- آتیب اونو اؤلدوردو. زیندانین قاپیسینی قێریب کور‌اوغلونو زینداندان چێخارتدی.
- کور‌اوغلو زینداندان چێخیب، تئز اؤزون يئریتدی دینمز خانیما. دینمز
- خانیم ائيواندا دايانمیشدی. کور‌اوغلونو گؤرن کیمی بیر جادو اوخويوب
- اونو سالدی تیلسیمه.
- کور‌اوغلو باخیب گؤردو کی، يئریيه بیلمیر. ال آتیب سازینا دینمز خانیما
- دئدی:
- اۇجا داغلارین باشیندا،
- لپه-لپه قار گؤرونور،
- منیم بۇ سێنیق کؤنلومه،
- قارا گؤزلو يار گؤرونور.
- دینمز خانیم هئچ دیللنمز،
- تامام تاری-مار گؤرونور،
- پری، سننن هئچ ايلنمز
- دۆنيا باشا دار گؤرونور.
- اۇجا-اۇجا قارلی داغلار،
- کؤنلوم اینتیظار گؤرونور.
- آچیلماز هئچ گۆللو باغلار،
- دینمز خانیم خار گؤرونور.
- دلی حسن باخیب گؤردو کی، کور‌اوغلو جانیندان اؤترو يالواریر. اؤزؤزونه
- دئدی: “ایگیت ده بیر قاشیق قاننان اؤترو يالوارارمی؟”
- کور‌اوغلو دئدی:
- اۇجا-اۇجا داغ باشیندان،
- يئنیب گلدیم، گؤزل ياریم.
- وۇرولموشام ياي قاشیندان
- اسیب گلدیم، گؤزل ياریم!
- قارا قاشین يايدی سنین،
- گۆل جامالین آيدی سنین،
- ایشین آهنان وايدی سنین،
- اسیر دۆشدوم، گؤزل ياریم!
- کور‌اوغلو ياری دینمزدی،
- دینمز خانیم لاپ دینمزدی،
- ياریم گۆلوب دانیشمازدی،
- اسیر دۆشدوم، گؤزل ياریم.
- دینمز خانیم ایشی بئله گؤرنده، کور‌اوغلونو تیلسیمنن چێخارتدی. بۇ
- طرفدن ده دلی حسن دینمز خانیمی گؤتوروب قاچدی.
- ایندی سنه خبری بَيلردن وئریم.
- بَيلره خبر گئتدی کی، کور‌اوغلو دینمز خانیمی گؤتوروب قاچدی.
- بَيلر قێلینج باغلايیب، يۆيوروب چاتدی کور‌اوغلويا.
- کور‌اوغلو گؤردو بَيلر گلیر، تئز ساری کۆرکونو چکیب اينینه، اۇزون
- بێغلارینی ساللايیب، اۆز-گؤزونو تورپاغا سۆرتدو، بئلینی قوز ائله‌يیب اوتوردو
- يئرده.
- بَيلر گلیب چاتدی کور‌اوغلونون يانینا، اونو تانیمادی. بَيلر کئچیب
- گئتمک ایسته‌يیردی کی، کور‌اوغلو اؤزونو سیلکله‌يیب بیر نره چکدی، بَيلر
- نره‌نی ائشیدن کیمی دالا باخدی. بَيلر گؤردو کی، بۇ، کور‌اوغلو دئيیل، يئنه
- گئتدی. بیر نئچه قدم گئتمیشدی، کور‌اوغلو يئنه بیر نره چکدی. بَيلر
- دالا دؤنوب ياپیشدی کور‌اوغلودان، ایسته‌دی اونون باشینی کسه، کور‌اوغلو آلدی،
- گؤرک نه دئدی:
- ایسته‌يیرسن سن آلاسان جانیمی،
- بَيلر بَيی، قوچ کور‌اوغلو دئيیلم،
- کئچیب گئدن گؤردوم دینمز خانیمی،
- بَيلر بَيی، قوچ کور‌اوغلو دئيیلم.
- بَيلر دئدی:
- – کور‌اوغلوسان. کسه‌جه‌يم باشینی.
- کور‌اوغلو دئدی:
- – ایزن وئر، بیرین ده دئيیم.
- کور‌اوغلو:
- سالماگینن بۇ ایشی گل انگله،
- بَيلر بَيی، قوچ کور‌اوغلو دئيیلم،
- نه چێخیبسان منله قێلینج-خنجله،
- بَيلر بَيی، قوچ کور‌اوغلو دئيیلم.
- آدام اودو، شیرین دیلنن دیندیرن،
- بَيلر بَيی، قوچ کور‌اوغلو دئيیلم،
- گل سن اولما من يازیغی اؤلدورن،
- بَيلر بَيیر، قوچ کور‌اوغلو دئيیلم.
- بَيلر کور‌اوغلونو بۇراخدی. کور‌اوغلو قاچیب چێخدی بیر داغین باشینا.
- تئز سويونوب پالتارینی ديَیشدی. ائله بیر نره چکدی کی، بَيلر قورخوب
- گئری دؤندو، گؤردو کی، کور‌اوغلودو.
- کور‌اوغلو بَيلره دئدی:
- – بَيلر، گل منه دلی اول، دینمز خانیمی سنه وئریم.
- بَيلر دئدی:
- – اولمارام. گل دؤيوشک.
- بئله دئينده کور‌اوغلو سازی آلیب، گؤرک بَيلره نئجه حربه-زوربا
- گلدی.
- کور‌اوغلويام، هئچ واخت قورخمارام حربدن،
- هریفسنسه اگر، بۇ مئيدانا گل.
- اول خنجلنن، سورا جنگینن،
- هریفسنسه اگر، بۇ مئيدانا گل.
- آلدی بَيلر:
- نه چێخیبان اۇجالاردا دۇرموسان،
- ایگیدسنسه ائنیب بۇ مئيدانا گل.
- يازیق-يازیق سن بوينونو بۇروبسان،
- ایگیدسنسه ائنیب بۇ مئيدانا گل.
- کور‌اوغلو:
- دوو ائدیبن نئچه‌لرین دیندیررم،
- دۆشمنلری شاد ائلیگیب گۆلدوررم،
- ائنیب پارا-پارا سنی اؤلدوررم،
- هریفسنسه اگر، بۇ مئيدانا گل.
- آلدی بَيلر:
- آرزو-کامی قويما شیرین جانیمدا،
- اؤلدورمه‌يه جۇش ائله‌يیب قانیمدا
- دلیلرین يێغیلیب دۇروب يانیمدا،
- هریف ایسن دۇروب تک مئيدانا گل!
- کور‌اوغلو:
- بَيلر بَيی، منه دلی اولگینن،
- دینمز خانیم يئنه قوي سنین اولسون.
- قبول ائله منه دلی اولگینن،
- توي ائله‌يیم دینمز قوي سنین اولسون.
- بیلیرسنمی قوچ کور‌اوغلو زوروننان،
- آزماگینن حاقین دوغرو يولوننان،
- مۆژده وئریم سنه دینمز تويوننان،
- سن دلی اول، دینمز قوي سنین اولسون.
- کور‌اوغلو دئر قیسمت حاقی يازیمدی
- توزلو مئيدان، تاجی-تاختیم، تاجیمدی،
- بۇنو بیل کی، دینمز منیم باجیمدی،
- سن دلی اول، دینمز قوي سنین اولسون.
- کور‌اوغلو سؤزون تاماملادی. بَيلر باخیب گؤردو کی، دلیلر ده گلیب
- يئتیشدی، راضی اولماسا دینمز خانیم الیننن چێخاجاق. علاجی کسیلیب راضی
- اولدو.
- کور‌اوغلو بَيلری قاتدی دلیلرینه. چنلیبئلده يئددی گۆن، يئددی گئجه
- توي ائله‌دی، دینمز خانیمی وئردی بَيلره.
قایناق‌لار
- Azadliq . org