Jump to content

Wt/azb/چیلینگ آغاجی

From Wikimedia Incubator
< Wt‎ | azb
Wt > azb > چیلینگ آغاجی

چیلینگ آغاجی[edit | edit source]

آنا آنلاتیم

  • بو اویون آغاجلا اوینانان اویونلارداندیر. 4 نفر یا چوخ تعداد شخص ایکی بولومه بولونورلر. تقریباً بیر متر یا هشتاد سانتی متر اندازه‌سینده «توخماغ» آدلانان آغاج، بیر قاریج اندازه‌سینده «چيلینگ» آدلانان آغاج و سایی هر گروهون تعدادی ایله برابر اولان ال‌آغاجی لازیمی وسایل‌لردیر. اویون بیر هامار یئرده اوینانیر. اوردا دابانلا «هبه» آدیندا بیر بالاجا چالا دوزه‌لیر. اویونچولار هانسی گروهون اویونو باشلاماسی اوچون پوشک آتیرلار. بو اویون اوچ مرحله ده اوینانیر ؛ «توخماغ» ،«قره‌یانی» و «آغ‌یانی».
    • «توخماغ» مرحله‌سینده اویونچو توخماغی اوجو باش‌ بارماغین یانیندا و قالانی الین آشاغاسیندان یئره ساللاناراق گؤتورور، بیر آیاغی هبه‌ده اولاراق چیلینگی گؤیه آتیب و او شکلده دوزونه وورور . مقابل گروهون نفرلری ده اللرینده اولان آغاجلا چیلینگی گویده وورماغا چالیشیرلار. وورا بیلمه‌سه‌لر، هبه باشیندا دوران اویونچو توخماغی هبه‌نین اوستونه قویور و باشدا اولان اویونچولاردان بیر نفر چیلینگی توخماغا ساری آتیر اگر چیلینگ توخماغا دَیْسه او نفر سیرادان چیخیب باشقاسی گلیر و اگر دَیْمه‌سه اویونا دوام ائدیر. چیلینگی هبه اوستونده اولان توخماغا ساری آتاندا اگر توخماغ دوز چئلینگی آتانا ساری اولماسا ، چئلینگ آتان نفر چیلینگی قولاغینا قویوب و دئییر؛ « اَیری قولاغ دوز قولاغ » و هبه‌یه طرف یورویوب یاخینلاشیر و هبه اوستونده اولان گرک توخماغی دوزلده، عکس حالدا چیلینگ هبه‌یه چاتیب توخماغی وورور. توخماغ ووراندا اگر چیلینگی آتیب وورا بیلمه‌سه دئییرلر «بی پیت» و اگر متوالی اوچ دفعه اولسا اویون اوینایان سیرادان چیخیر. اوچ دؤنه ویرسا و یانماسا «قره‌یانی»یا چیخیر.
    • «قره‌یانی» مرحله‌سینده توخماغین اوجو جولو بارماغا ساری و اوزونو باش بارماغا ساری قالاراق، آغاجی یاندان توولایاراق بئش دفعه چیلینگی آتیب وورور، مقابل گروهون نفرلری اگر چیلینگی گؤیده آغاجلا وورسالار او نفر یانیب و سیرادان چیخیر اما وورا بیلمه‌سه‌لر چیلینگ هارا دوشوب اوردان بیر نفر اونو هبه‌یه طرف آتیر ، اگر چیلینگ هبه‌یه بیر توخماغ اندازه‌سینده یاخینلاشسا اویونچو اویوندان چیخیر عکس حالدا اویونا دوام ائدیر، یا اگر چیلینگ آتیلان زمان دوز هبه‌نین ایچینه دوشسه «هبه چوش» اولدو دئییرلر و هبه‌ده اولان بوتون اويونچولار يانير و سيرا دييشيلير. اویون سیراسیندا اگر چیلینگی آتیب وورا بیلمه‌سه دئییرلر بیر «ایاغ اوستی» و باشدا اولان اویونچولاردان بیری چیلینگی دوشدویو یئردن گؤتوروب، ایاغی اوستونه قویوب و هبه‌یه طرف آتیر اگر چیلینگ هبه‌نی کئچسه گروه نفرلری هامیسی یانیب و اویون دیشیلیر او سیرا دا قره‌یانی اوینایان گرک چیلینگین هبه‌دن سوووشماغینا مانع اولا. قره‌یانی ووران اولجه چیلینگی ووراندا دئییر؛ قره‌یانی‌نین بی قولاغی و ایکینجی‌سینده دئییر؛ قره یانی‌نین ایکی قولاغی و اوچونجوسونده دئییر قره یانی‌نین اوچو و دوردونجوسونده دئییر؛ دؤردی-مؤردی چوبان الله‌وئردی یاغلادی ایچینه وئردی «بوردا منظور کره یاغین چؤرک اوستونه یاخیب یئمکدیر» و بئشینجی‌سین ووراندا دئییر؛ قره‌یانی‌نین بئشی. اگر بئش دفعه چیلینگی ووروب و یانماسا آغ‌یانی مرحله‌سینه کئچیر و اوچ دفعه چیلینگی آتیب یان طرفدن وورور اگر اوچ دفعه ده یانماسا دای او نفر آغ‌یانی‌یا چیخیر (همه‌شه یانی اولور) و اویوندان چیخان یولداشلارین دا اویونا قایتارا بیلیر. ائل آراسیندا بیری‌نین هئچ کیمسه‌دن احتیاجی اولماسا دئییرلر دای دئیه‌سن آغ‌یانی‌یا چیخدین». آغ‌یانی اوینایاندا اگر ووران نفر چیلینگی آتیب وورا بیلمه‌سه و بوشا کئچیرسه، دییرلر؛ بیر «قیچ آلتی» و مقابل گروهدان بیر نفر چیلینگی دوشدويو يئردن گؤتوروب قیچی‌نین آلتیندان هبه‌یه طرف آتیر اگر چیلینگ هبه‌نی کئچسه تمام گروهون نفرلری اویوندان خارج اولوب و یئرلری دییشیلیر. آغ‌یانی‌یا چیخان نفر اویوندان چیخمیش یولداشلاریندان بیرینی اویونا گتیرمک ایسته‌سه، گرک اوچ دفعه چیلینگی یاندان آتیب و وورا، اول کی چیلینگی ووراندا دئییر، «یولداشیمین بی قولاغی»، اگر یانماسا ایکینجی‌سینده دئییر؛ «یولداشیمین ایکی قولاغی» و اگر یانماسا اوچونجوسونده دئییر «دَندیری دانا دیری، من اؤلسم یولداش دیری» و اگر اونون چیلینگین گؤیده وورسالار دا یولداشی اویونا دوام ائده بیلیر.
  • بو اویوندا هبه‌ده اولماق اوستونلوک ساییلیر. باشدا اولانلار چیلینگین دالییجا قاچماقلا یورولورلار. اونا گؤره چیلینگی اوزاغا ووران اویونچو «لوققو-لوققو ...» دئمکله طرفی اینجیدیر. همه‌شه یانی‌یا چیخان اویونچو بعضاً باشدا اولانلارا لطف ائتمک ایسته ینده، چیلینگی یانلارا وورماق یئرینه ووروب هاوایا قالدیریر و دئییر «پاکی‌دو پاکییییییی».

آنلام‌لار

  1. çiling ağacı .

قایناق‌لار

  1. milmugan.blogfa.com