Wt/azb/همزه نین قیرآتی آپارماسی کوراوغلوداستانی
همزه نین قیرآتی آپارماسی کوراوغلوداستانی
[edit | edit source]
آنا آنلاتیم
- همزه نین قیرآتی آپارماسی کوراوغلوداستانی
بولو بَيین باشینا گلن ایش بۆتون پاشالاری، خانلاری، بَيلری قورخويا سالمیشدی. تا ائله کی، گئجه‌لر ياتا بیلمیردیلر. قوچ کور‌اوغلونون آدی گلنده قورخودان سیچان دئشیگی آختاریردیلار کی، گیزلنسینلر. خوتکار اؤزو ده قورخويا دۆشموشدو. اودو کی، يئنه بۆتون پاشالارا نامه گؤندرمیشدی کی، کیم کور‌اوغلونو تۇتسا، يا اؤلدورسه اونو دۆنيا مالیندان قانی ائيله‌يه‌جک، اؤزونو ده بؤيوک منصبه چاتدیراجاق. توقاتلی محمود پاشا خوتکارین بۇ نامه‌سینی آلیب اوخوياندان سونرا، بیر مجلیس قۇردوردو، وزیرلری، وکیللری، بَيلری، خانلاری، تاجیرلری او مجلیسه چاغیرتدی. آداملار جمع اولاندا محمود پاشا اۆزونو اونلارا تۇتوب دئدی: – کور‌اوغلو گئتدیکجه گۆنو-گۆندن تۇغيان ائله‌يیر. بئله گئتسه چوخ چکمز کی، بیزی ده جامال پاشانین گۆنونه سالیب يئریمیزده تۇرپ اکه‌جک. سیزی بۇرايا جمع ائله‌مکده مقصدیم بۇدو کی، دئيین گؤرک نئجه ائله‌يک کی، بۇ بلانی باشیمیزدان دف ائله‌يک.
- وزیرلر، وکیللر دئدیلر:
- – پاشا ساغ اولسون، کور‌اوغلونون نه کی هۆنری وار، هامیسی قێراتدادی.
- گرک قێراتی اله کئچیرک.
- پاشا دئدی:
- – قێراتی اوندان نئجه آلماق اولار؟
- وزیر دئدی:
- – نمر، پۇل، مال وئرسه‌نیز بلکه اؤزونه اۇمودو گلنلردن بیری
- گئدیب کور‌اوغلونون قێراتینی گتیره بیله.
- محمود پاشا دئدی:
- – منیم يۇردوما، يۇواما صاحب اولان، گؤزومون آغی، قاراسی بیر
- قێزیم وار. هر کیم گئدیب چنلیبئلدن کور‌اوغلونون قێراتینی گتیرسه،
- قێزیم دونا خاتونو اونا وئریب، اؤزونو ده دۆنيا مالیندان قنی ائده‌رم.
- محمود پاشا بۇنو دئيیب، بیر جام شراب دولدوروب الینه آلدی، اۆزونو
- مجلیسده‌کیلره تۇتوب اۇجادان بیر ده دئدی:
- – کیمین اؤزونه گۆمانی گلیر آياغا دۇرسون، آلسین بۇ شرابی ایچسین،
- گئتسین کور‌اوغلونون قێراتینی گتیرسین.
- مجلیس اهلی هامیسی باشینی آشاغی تیکدی. جێققیرتیسینی چێخاردان اولمادی.
- محمود پاشا بیر ده دئدی. يئنه سس چێخاردان اولمادی. مجلیسین آلت طرفینده
- همزه آدلی سايیلمايان، اۇروات اولونمايان بیر کئچل اوتورموشدو.
- آياغا قالخیب دئدی:
- – پاشا ساغ اولسون، اير راضی اولوب وعده‌‌نیزه دوغرو چێخسانیز، من
- گئده‌رم، کور‌اوغلونون قێراتینی گتیره‌رم.
- کئچل همزه بۇ سؤزو دئينده مجلیسده‌کی آداملار چاخناشیب بیربیرینه
- ديَدیلر. هامی کئچلده‌کی بۇ جۆرته مات-مهتتل قالدی. محمود
- پاشانین قێزی دونا خاتون پنجره‌نین آغزیندا دۇروب بۇنا قۇلاق
- آسیردی. گۆلوب اؤزو-اؤزونه دئدی:
- – من اؤلوم، قوچ کور‌اوغلونون قێراتینی گتیرنه بیر باخ. گئدیب
- باشی‌نین کئچه‌لی‌نین دردینی چکمیر، گؤر نه قلتلر ائله‌يیر.
- – محمود پاشا سؤزونو بیر ده تکرار ائله‌دی. يئنه ده کئچل همزه‌دن
- ساوايی گئدیرم دئين اولمادی. محمود پاشا آخیردا چاره‌سیز قالیب
- راضی اولدو. کئچل همزه ایره‌لی يئریدی، آلدی شرابی ایچدی، دئدی:
- محمود پاشا، منه بیر آي وعده وئر. کور‌اوغلونون قێراتینی گتیره
- بیلمه‌دیم، هئچ، گتیره بیلدیم، اوندا سؤزوموز سؤزدو.
- محمود پاشا دئدی:
- – گئت، گتیره بیلسن دونا خاتون سنیندی.
- کئچل همزه اوردان چێخیب، ائولرینه گلدی. بیر پارچا چؤرک گؤتوروب
- بیر دسمال ایله بئلینه باغلايیب يولا دۆشدو. پاي-پیيادا، گۆنه بیر منزیل
- نئچه گۆندن سونرا خبر آلا-آلا گلیب چنلیبئله چێخدی.
- کئچل همزه گلمکده اولسون، سنه کیمدن خبر وئریم، کور‌اوغلودان.
- کور‌اوغلو بیر قايانین باشیندا دۇروب يولا باخیردی. گؤردو کی، بیر آدام
- بۇدو اۆز قويوب چنلیبئله گلیر. او قدر گؤزله‌دی کی، کئچل همزه
- گلدی، يئتیشدی. کور‌اوغلو قايادان ائنیب، اونو قاباقلادی کی:
- – اوغول، نچیسن؟ هارادان گلیب، هارايا گئلیرسن؟
- کئچل همزه دئدی:
- – ایلخیچیيام. پاشانین آتینا گئدیردیم. يئددی ایل اونا آت اوتاردیم، آخیردا
- حاقیمی دا وئرمه‌يیب، قاپیسیندان قووالادی. ایندی چنلیبئلده سنی دئيیب
- گلمیشم. ال منیم، اتک سنین، گرک منی دولاندیراسان.
- کور‌اوغلو کئچل همزه‌نی گؤتوروب چنلیبئله گلدی. دلیلر همزه‌نی
- گؤروب دئدیلر:
- – آي کور‌اوغلو، بۇنو هارادان تاپیب گتیردین! کئچللر فندگیر
- اولورلار. بۇنون گؤزلری اۆچ‌تپه ساغساغانی‌نین گؤزلری کیمی قايیر-قايیر
- قاينايیر. هئچ عمللی آداما اوخشامیر. رد ائله، گئتسین.
- خانیملار دا دلیلرین سؤزلرینی تسدیقله‌دیلر.
- کور‌اوغلو خانیملاری، دلیلری بیر تهر ساکیت ائله‌يیب، دئدی:
- – گؤرورسونوز يازیغین بیریسیدی. سیزه نه ائله‌يه‌جک. قويون سۆفرمیزین
- قێریق-قۇروغوندان يئيیب، قاپیدا، باجادا دولانسین.
- کئچل همزه قێریخ-قۇروخدان يئيیب، قاپی-باجانی سۆپوروردو.
- خانیملار، دلیلر نَيه بۇيوروردولارسا گئدیردی. گئتدیگی ایشی ده ياخشی ياریدیردی.
- بئله زیرکلیگینه گؤره دلیلرین، خانیملارین يانیندا کئچل همزه‌نین
- حؤرمتی آرتدی.
- کور‌اوغلو کئچل همزه‌نین دیری‌باشلیغینی گؤروب، اونون آدینی ديَیشدیریب
- کالوغلان قويدو.
- گۆنلرین بیر گۆنو کور‌اوغلو کئچل همزه‌نی يانینا چاغیریب سوروشدو:
- – کالوغلان، آتا مۇغايات اولا بیلرسنمی؟
- کئچل همزه دئدی:
- – الیمدن گلر، ياخشی باخا بیله‌رم.
- تؤيله‌ده بیر يۆک يابیسی وار ایدی. او قدر يۆکله‌میشدیلر کی، سۆموکلری
- چێخمیشدی. کور‌اوغلو اونا باخماغی کئچل همزه‌يه تاپشیردی. کئچل
- همزه يابیيا مۇغايات اولماغا باشلادی.
- آخشام تۇمارلايیر، سحر تۇمارلايیر، يابیيا بیر جان ياندیریردی کی،
- گل گؤره‌سن.
- دلیلرین گؤزلرینی اوغورلايیب، تؤيله‌ده‌کی او بیری آتلارین اوتوندان،
- آرپاسیندان گؤتوروب يابی‌نین قاباغینا تؤکوردو. يابی ائله کؤکلمیشدی کی،
- دریسینه سێغمیردی. بیر گۆن کور‌اوغلو تؤيله‌يه آتلارین يانینا گلمیشدی.
- يابیيا باخیب مات-مهتتل قالدی، دئدی:
- – آي کالوغلان، سن آتا ياخشی مۇغايات اولورموشسان. ایندی کی، بئله آتا
- باخماق الیندن گلیردی، نیيه مندن گیزله‌دیردین؟ آفرین سنه!
- کئچل همزه چوخ حؤرمته مینمیشدی. هانسی ایشه بۇيوروردولار
- ياریدیردی، هانسی آتا مۇغايات اولماغی تاپشیریردیلار، بئش گۆنده دریسینه
- سێغماز ائله‌يیردی. آخیردا کور‌اوغلو دۆراتا باغماغی کئچل همزه‌يه تاپشیردی.
- بۇ ایشه خانیملار، دلیلر راضی اولمادیلارسا دا، کور‌اوغلو اونلارا قۇلاق
- آسمادی. کئچل همزه بیر نئچه گۆن دۆراتا چوخ ياخشی باخدی. ائله کی، بیر
- نئچه گۆن کئچدی، آتین آرپاسینی خێرپادان کسدی. دۆرات باشلادی آریقلاماغا.
- کور‌اوغلو ایشی بئله گؤروب بیر گۆن همزه‌دن سوروشدو:
- – آي کالوغلان، بۇ آت نیيه بئله گۆنو-گۆندن دالا گئدیر؟ اولمايا
- ياخشی باخمیرسان؟
- کئچل همزه دئدی:
- – من الیمدن گلنی ائله‌يیرم، آمما آت گئجه-گۆندوز ایچریده
- باشیندان آخورا باغلی، آياخلاری دا بۇخوولو. ائشیک اۆزو گؤرمور، چوخ گۆمان
- کی، اوندان سێنیخدیر.
- قێرات ایله دۆرات بیر تؤيله‌ده باغلانیردی. آتلارین ایکیسی‌نین ده آياغیندا
- بۇخوو وار ایدی. اؤزلری ده آيری-آيری آچارلارلا آچیلیردی. کور‌اوغلو چێخارتدی دۆراتین
- آچارینی کئچل همزه‌يه وئردی. خانیملار، دلیلر بۇنو ائشیدیب دئدیلر:
- – آي کور‌اوغلو، سن نه ائله‌يیرسن؟ تانیمادیغین، بیلمه‌دیگین بیر
- آداما اعتبار ائله‌يیب دۆراتین بۇخوو آچارینی وئریرسن؟
- کور‌اوغلو يئنه ده خانیملاری، دلیلری ساکیت ائله‌دی کی، قورخمايین، هئچ
- زاد اولماز. کئچل همزه بیر نئچه گۆنده دۆراتی دریسینه سێغماز ائله‌دی.
- کئچل همزه بۇرايا گلنی آز قالمیشدی کی، بیر آي اولسون. اونون
- محمود پاشايا وئردیگی وعده تامام اولوردو. کئچل همزه گئجه‌لرین
- بیرینده آياغا قالخیب اؤز-اؤزونه دئدی: – من بیر ایل ده بۇرادا قالسام
- کور‌اوغلو قێراتین نه مئهترلیگینی، نه ده بۇخووونون آچارینی منه وئرمه‌يه‌جک.
- توقات شهرینده نه تانیيیرلار کی، قێرات هانسیدی، دۆرات هانسیدی.
- ائله بۇنو آپاریم، پاشانی آلدادیم، قێزی آلیم، بئش گۆن بۇ دۆنيادا
- کئف چکیم.
- کئچل همزه بۇنو دئيیب، گئجه خلوتجه دۆراتی میندی. آستا قاچان
- نامرددی، بیرباش قاچدی. صاباح آچیلدی، مئهترلر يئرلریندن قالخیب،
- آتلارا آرپا-سامان وئرمک اۆچون تؤيله‌يه گلدیلر. گؤردولر کی، نه دۆرات
- وار، نه ده کئچل همزه. باشی لوولو کور‌اوغلونون يانینا گلیب دئدیلر:
- – نه دۆرات وار، نه ده کئچل همزه.
- دلیلر چاخناشیب بیر-بیرینه ديَدیلر. خانیملار دا بیر ياندان دۆشدولر
- کور‌اوغلونون اۆستونه، باشلادیلار اونو مذمّتله‌مه‌يه. تاخسیرکار
- اولدوغوندان کور‌اوغلو نه دلیلرین، نه ده خانیملارین تؤهمتینه دینمه‌دی.
- کیریگیب قالدی. آمما دلیلر ساکیت اولمايیب دئيیردیلر:
- – بیز سنه دئمه‌دیکمی، تانیمادیغین آداما اعتبار ائله‌يیب آتی تاپشیرما.
- ایگیدین آتینی آپاردیلار يا آروادینی، ایکیسی ده ناموسدان سايیلیر. بیزیم
- قورخوموزدان قۇش قۇشلوغو ایله چارداخلی چنلیبئلین هندورینه گله
- بیلمیر. قوچ کور‌اوغلونون، چنلیبئلین، دلیلرین آدی گلنده پاشالار،
- بَيلر تیر-تیر تیترگیر. بیر کئچل گده‌نین بیریسی گلیب بۇرادان آت آپارسین.
- ایندی بۇ خبر اطرافا يايیلاجاق، دۆشمنلر اۆستوموزه آياق آلاجاق. اؤزون
- اؤز الینله ائله ایش ائله‌دین کی، عالم يێغیلسايدی، ائله‌يه بیلمزدی. ایندی دئ
- گؤروم دۆراتی هارادان تاپاجاقسان، نئجه گتیره‌جکسن؟
- کور‌اوغلو دئدی:
- – دۆرات گئدیب، قێرات دۇرور، مینیب گئدیب تاپیب گتیره‌رم. آز منی
- مذمّت ائله‌يین.
- کور‌اوغلونون حیرصی تۇتاندا يانینا گئدیب اونو دیندیرمک اولمازدی.
- دئيیرلر کی، بئله واختلاردا بیر اۆزو اۆسته، ایکی-اۆچ گۆن ياتاردی، آجیغی سويوياردی.
- ایندی ده کی، کور‌اوغلونون حیرصیندن، غضبیندن تاي دانیشما،
- گؤزلری قانلا دولموشدو. آجیغیندان آز قالیردی دمیر گمیرسین. نئجه کی،
- اۆزو اۆسته دۆشدو دۆز ایکی گۆن-ایکی گئجه آج-سۇسوز ياتدی. اۆچونجو گۆن يۇخودان
- آيیلیب، ائيوازی سسله‌يیب تاپشیردی کی، بیر آيریلیق مجلیسی قۇرسون.
- ائيواز مجلیس قۇردو. تکجه کور‌اوغلويا يئددی باتمان دۆيونون پلووونو،
- يئددی قويون شاققاسی، يئددی تۇلوق شراب حاضیرلاتدی. يئدیلر، ایچدیلر،
- کور‌اوغلو بێغلارینی ائشدی، قۇلاقلاری‌نین دالیندا بۇردو. آلتدان گئيینیب
- اۆستدن قێفیللاندی، اۆستدن گئيینیب آلتدان قێفیللاندی، آخیرینجی باده‌نی بێغلاری‌نین
- آلتیندان اؤتوروب آياغا قالخدی. قێراتی ایفچین يهرله‌يیب، قاباغینا
- چکدیلر. خانیملارلا، دلیلرله حالاللاشیب سێچرادی قێراتین بئلینه میندی.
- دۆراتین اۆچ گۆند گئتدیگی يولو قێرات بیر گۆنده گئدیردی. کور‌اوغلونون ائله
- بیرجه قێراتا میندیگی گؤروندو. آت ائله بیل کی، قۇش کیمی قاناد آچدی.
- داغلاری، داشلاری دۆز ائله‌دی، ایلدیریم کیمی چاخیب گؤزدن ایتدی. قێراتین ناللاریندان
- قێغیلجیم قالخیردی. يولو باشینا گؤتورموشدو. ائله گئدیردی کی، ائله
- بیل بیر اوخ ایدی کاماندان قۇرتارمیشدی، سۆزوردو.
- کور‌اوغلو گئتمکده اولسون، او طرفدن کئچل همزه ده اۆچ گۆن، اۆچ
- گئجه ایدی کی، جانی‌نین قورخوسوندان بیر يئرده دۆشوب دینجلمه‌يیب آت سۆروردو.
- يولون اۆستونده قێرخ دَ‌يیرمانلار دئيیلن بیر يئر وار ایدی. اورايا چاتماغا
- آز قالمیشدی کی، همزه دؤنوب گئری باخدی کی، يولدا توز-دۇمانا قاریشیب،
- دۇمان توزا. بیر ده دقت ائله‌ينده گؤردو بۇدو کور‌اوغلو قێراتین اۆستونده
- ائله گلیر، ائله گلیر کی، لئي کیمی. کئچل همزه‌نین تۆپورجيی آغزیندا
- قۇرودو. ها اۇدقوندو گؤردو يوخ، آغزی‌نین سۇيونو اۇدا بیلمیر. چۆنکی اؤز
- ایشینی بیلیردی. بیلیردی کی، کور‌اوغلو يئتیشن کیمی اونونکونو اونا وئره‌جک.
- دۆراتی قامچیلايیب، اؤزونو تئز قێرخ دَ‌يیرمانلارین قاپیسینا سالدی. آتدان
- دۆشدو، آتی دَ‌يیرمانین قاپیسینداکی دیره‌يه باغلايیب تله‌سیک چاغیردی:
- – آي دَ‌يیرمانچی، بیر تئز ائشیيه چێخ!
- دَ‌يیرمانچی تئز ائشیيه چێخیب سوروشدو:
- – قارداش، نه ایسته‌يیرسن؟
- همزه دئدی:
- – باخ او يول ایله گلن قوچ کور‌اوغلودو، چنلیبئلدن گلیر. ایلخیسینا
- قوتور دۆشوب، دَ‌يیرمانچی بئينی آختاریر کی، آتلارینی قوتوردان قۇرتارسین.
- تئز باشینا چارا تاپ. يئتیشسه عؤمرونو تامام ائله‌يه‌جک.
- دَ‌يیرمانچی دیلی تۇتار-تۇتماز دئدی:
- – آي قادان آلیم، بس من نه ائله‌يیم؟ اونون الیندن نئجه قۇرتاریم؟
- همزه دئدی:
- – سويون پالتارینی منه وئر، من گئيیم، منیم ده پالتاریمی سن
- گئي، گئت دَ‌يیرمانین دونوزلوغوندا گیزلن. من کور‌اوغلونون آغزینی
- يانا سالا بیلسم سالمیشام، يوخ سالا بیلمه‌سم اوندا قوي منی اؤلدورسون،
- سن يازیقسان.
- دَ‌يیرمانچی تئز پالتارینی چێخاردی، اونا وئردی، همزه ده پالتارینی دَ‌يیرمانچیيا
- وئردی. دَ‌يیرمانچی قاچیب دونوزلوغا گیردی. همزه دَ‌يیرمانچی‌نین
- پالتارینی گئيینیب دَ‌يیرمانین ایچینه گیردی. اؤزونو گۇپپادان اۇنلوغون
- ایچینه سالیب اۆزونو-گؤزونو او کی وار اۇنا بۇلادی، اۇن کۆرگینی ده الینه آلیب،
- اۇنلوغون قاباغیندا داياندی. او طرفدن کور‌اوغلو اؤزونو آلیجی قۇش کیمی
- دَ‌يیرمانین قاپیسینا يئتیریب چێغیریب دئدی:
- – آي دَ‌يیرمانچی، تئز گل بۇ آتی تۇت!
- کئچل همزه دیيرمانچی پالتاریندا قاپیيا چێخیب دئدی:
- – نه بۇيورورسان؟
- کور‌اوغلو دئدی:
- – ایندیجه منیم قاباغیمجا بۇرايا گلن آتلی نئجه اولدو؟
- کئچل همزه دئدی:
- – اودو، ایچریده دَ‌يیرمانین دونوزلوغونا گیریب گیزله‌نیب.
- کور‌اوغلو تئز آتدان دۆشدو. قێراتی همزه‌نین يئده‌يینه وئریب اؤزو
- دَ‌يیرمانا گیردی. آغزینی دونوزلوغا تۇتوب دئدی:
- – ايه، آي کئچل، بئله چێخ!
- دَ‌يیرمانچی داها دا قورخوب دئدی:
- – هارايا چێخیم؟ منیم سنین ایلخی‌نین قوتورونا درمان اولاسی
- بئينیم يوخدو. اؤلسم ده چێخمارام.
- کور‌اوغلو دئدی:
- – ايه، آي کئچل، قوتور ندی، بئيین ندی، بئله چێخ سنینله ایشیم
- چوخدو.
- کور‌اوغلو گؤردو کی، دَ‌يیرمانچی اؤز خوشونا دونوزلوقدان چێخماق
- ایستمیر، ایره‌لی يئریدی. دَ‌يیرمانچی قورخوب چکیلدی. کور‌اوغلو بیر آز دا ایره‌لی
- يئریدی. دَ‌يیرمانچی يئنه ده او طرفه چکیلدی. بیردن دَ‌يیرمانچی‌نین
- باشی دَ‌يیرمانین پرینه کئچدی. پر يازیق دَ‌يیرمانچینی بیرجه دقیقه‌ده
- اؤلدوردو. کور‌اوغلو ایره‌لی يئریگیب گؤردو کی، کئچل همزه نه گزیر، اؤلن
- دَ‌يیرمانچیدی.
- کئچل همزه چنلیبئلده دۆراتا باخدیغی زامان قێراتین دا يانيؤره‌سینه
- هرله‌نیب اؤزونه مهریبان ائله‌میشدی. بیر ده قێراتین بئله بیر
- خاصيتی وار ایدی کی، کور‌اوغلو اونون يۆيه‌نینی کیمه تاپشیرسايدی، اونا
- اۆزنگی وئرردی. اودو کی، کور‌اوغلونون باشی ایچریده دَ‌يیرمانچیيا مشغول
- اولاندا کئچل همزه قێراتی میندی. کور‌اوغلو دَ‌يیرماندان چێخیب باخدی
- کی، کئچل همزه قێراتین بئلینده، اؤزو ده دَ‌يیرماندان بیر آز آرالی
- دۇروب هردن بیر ده آتی قامچی ایله وۇروب اینجیدیر. کور‌اوغلو ایندی باشا
- دۆشدو کی، کئچل همزه اونو آلدادیب. بیر غضبلندی، میسری قێلینجی چکیب
- هۆجوم ائله‌مک ایسته‌دی. آنجاق باخدی کی، بۇندان بیر فايدا اولماياجاق.
- بیلمه‌دی کی، نه ائله‌سین. بیر ده باخدی کی، اینصافسیز هم ده قێراتا ائله بیر
- قامچی وۇردو کی، آز قالدی اود چێخسین. اۆرگی يانیب آلدی، گؤرک نه دئدی:
- جانیم همزه، گؤزوم همزه!..
- همزه، اینجیتمه قێراتی!..
- بۇدو سنه سؤزوم همزه،
- همزه، اینجیتمه قێراتی!..
- قێراتدی منیم دیرگیم،
- اریير، قالماز اۆرگیم.
- سن اولاسان دۇز چؤرگیم،
- همزه، اینجیتمه قێراتی!..
- ائشیدر پاشالار، بَيلر،
- شادلیق خبرینی سؤيلر،
- کور‌اوغلو ایلتیماس ائيلر،
- همزه، اینجیتمه قێراتی!
- کئچل همزه دئدی:
- – کور‌اوغلو، ائله آدین وار ایمیش. بیر آي سۆفره‌نین قێریق-قۇروغوندان
- يئدیم، ایندی اونو دا دیلینه گتیردین، باشیما چالدین. اؤزون کاروانلار سويورسان،
- مال-دؤولت آلیرسان، ایندی بیر آت ندی کی، اوندان اؤتری بۇ قدر يالواریر،
- ياخاریر، يانیب هايیفسیلانیرسان؟
- کور‌اوغلو دئدی:
- – من اوندان اؤتری هايیفسیلانمیرام. اونا يانیرام کی، سن قێراتی
- آپاریب ساخلايان، مینن دئيیلسن. گل آتی اؤزومه سات. بۇنو ائله‌مه‌سن
- ايلن، اوندا قێراتین قیيمتینی دئيیم، آللانیب اۇجوز ساتما!
- آلدی کور‌اوغلو:
- ايلن، دئيیم قێراتین قیيمتینی،
- سکسن مین سرکرده مالا دا وئرمه!
- سکسن مین آغ تۆکلو قمر اؤيه‌جه،
- سکسن مین خزینه پۇلا دا وئرمه!
- سکسن مین ایلخیيا، سکسن مین آتا،
- سکسن مین ماهالدان گلن باراتا،
- سکسن مین کوتانا، سکسن مین جۆته،
- سکسن مین کوتانلی کالا دا وئرمه!
- کور‌اوغلو دؤولتین ائندیرسین دۆزه،
- ساي گؤتور هامیسین سکسن مین يۆزه.
- سکسن مین گلینه، سکسن مین قێزا،
- سکسن مین ارگنه، دۇلا دا وئرمه!
- کئچل همزه دئدی:
- – کور‌اوغلو، آرخايین اول، قیيمتینه ساتارام.
- کور‌اوغلو گؤردو کئچل همزه قێراتی وئرمه‌يه‌جک، دئدی:
- – باری قۇلاق آس دئيیم، آتی نئجه ساخلاماق لازیمدی. آلدی الوستو،
- گؤرک نه دئدی:
- همزه، آتی ياخشی ساخلا،
- آت ایگیدین قارداشیدی.
- گۆنده مۇغايات اول يوخلا،
- آت ایگیدین قارداشیدی.
- ياز اولاندا داغا يوللات،
- ياي اولاندا ایفچین ناللات،
- قێش اولاندا مخمر چۇللات،
- آت ایگیدین قارداشیدی.
- آتی سئویب بسله کؤرپه،
- هايقیراندا چێخسین سارپا.
- هر يئينده قێرخ تاس آرپا،
- آت ایگیدین قارداشیدی.
- اۇزاق-اۇزاق يوللارینان،
- بئله ایپک چۇللارینان،
- هوققا ياریم ناللارینان،
- آت ایگیدین قارداشیدی.
- مجلیس قۇردوم چوخلارینان،
- داوا ائتدیم اوخلارینان،
- قارا پولاد مێخلارینان،
- آت ایگیدین قارداشیدی.
- سرین-سرین يۇ سۇيونان،
- قۇيروغو باغلی مۇيونان،
- قوچ کور‌اوغلو چوخ اؤيونن
- آت ایگیدین قارداشیدی.
- کئچل همزه دئدی:
- – کور‌اوغلو، نه زامان قێراتین دالینجا توقاتا گلسم اؤزوم اۆزنگینی
- باسیب سنی میندیره‌جه‌يم. آمما ایندی هئچ اۆز وۇرما، آتی وئرمه‌يه‌جه‌يم.
- گرک آپاریب محمود پاشايا وئریب، دونا خاتونو آلام.
- کئچل همزه بۇنو دئيیب، قێراتی سيیرتدی، گؤزدن ایتدی. کور‌اوغلو
- دۆراتی قايتارماغا گلمیشدی، قێراتی دا الیندن وئردی. اونا بۇ هامیسیندان
- آغیر گلدی، دَ‌يیرمانین قاپیسیندا يئره اوتوردو، آلدی گؤرک نه دئدی:
- چۆنکی اولدون دَ‌يیرمانچی
- چاغیر گلسین دن کور‌اوغلو!
- وئردین قێری، آلدین دۆرو،
- دؤي باشینا، يان کور‌اوغلو!
- قێرات الدن گئتدی، باری،
- جاندا قالدی اینتیظاری.
- اۆيود آرپا، بۇغدا، داری،
- آل شاهادین سن، کور‌اوغلو!
- اۇجا داغلاردا دؤشلتدین،
- آغیر آلايلار بوشلاتدین،
- يۆز ایل لوتولوق ایشلتدین،
- آخیر اولدون خام، کور‌اوغلو!
- اؤزون آللاتدیردین بۆيون،
- سینه‌مه چکیلدی دۆيون،
- گئدین دلیلره دئيین،
- ایشه دۆشدوم من کور‌اوغلو!
- کور‌اوغلونون اؤزو آج ایدی، آتی دا آرپاسیز. آخشام دۆشدويوندن دَ‌يیرمانا
- گلن ده اولمادی. کور‌اوغلو آج-سۇسوز ياتدی. ائله کی، صاباح آچیلدی بیر ده
- باخدی کی، بۇدو بیر کیشی قاباغیندا ایکی يۆکلو اؤکوز گلیر. کیشی گلیب يئتیشدی.
- بیر کور‌اوغلويا باخدی، بیر پالتار-مالتارینا، شست-بستینه باخیب دئدی:
- – آ قارداش، هانی دَ‌يیرمانچی؟
- کور‌اوغلو دئدی:
- – دَ‌يیرمانچی يوخدو، ایندی دَ‌يیرماندا من دۇرورام.
- کور‌اوغلو اؤزو اؤکوزلرین اۆستوندن چۇواللاری دۆشوردو، دَ‌يیرمانا
- آپاردی، سونرا کیشیدن سوروشدو:
- – قارداش، بۇنلارین ایچینده هئچ آرپا وارمی؟ منیم آتیم آرپاسیزدی،
- قورخورام داماغ اولا، بیر آز اونا آرپا وئریم يئسین.
- کیشی دئدی:
- – چۇواللارین ایکیسی آرپادی، ایکیسی بۇغدا.
- آرپا چۇواللاری ياریمچیق ایدیلر. کور‌اوغلو باغلامالاری بیر-بیرینه بوشالتدی،
- بیر چۇوال ائله‌دی، دۆراتین قاباغینا قويدو. کیشی ایسته‌دی کور‌اوغلويا
- مانع اولسون، کور‌اوغلو گؤزونو ائله برلتدی کی، کیشی قورخودان چێققیرینی دا
- چکه بیلمه‌دی، چکیلیب بیر طرفده دۇردو. گؤردو يوخ، بۇ او دَ‌يیرمانچیلاردان
- دئيیل، بیر آز دا او يان، بۇ يان ائلسه چکیب جرجنه‌يینی آيیراجاق.
- کور‌اوغلو اؤزو ده يامان آج ایدی. دۆرات آرپاسینی يئينه قدر بۇغدا
- چۇواللارینی تؤکوب اۆيوتدو. اۇنلوغا دا سۇ بۇراخیب خامیر قايیردی. چکیب
- دَ‌يیرمانین بیر طرفینی سؤکدو، پردیلردن اوجاق چاتدی، خامیری چؤرک
- بیشیردی. اؤکوزون ده بیرینی کسدی، سويدو، جمعديی‌نین ياریسینی کاباب
- چکدی، ياری چیي، ياری بیشمیش يئيیب توققانین آلتینی برکیتدی، سونرا دۇروب
- دۆراتی مینیب، اۆزونو چنلیبئله چئویردی.
- بیر ده باخدیلار کی، بۇدو کور‌اوغلو گلیر. گلیر آمما نئجه گلیر...
- هامی باشینی آشاغی سالدی. نه بیر سلام، نه بیر صاباح. هئچ کئيفین، حالین
- دا سوروشمادیلار.
- کور‌اوغلو آتدان دۆشدو. ائيواز اونون قاباغینا چێخدی، آلدی گؤرک نه دئدی:
- تزه سؤوده‌ير اولوبسان،
- سؤودان دا مۆبارک اولسون!
- آلیش-وئریش اؤيره‌نیبسن،
- سؤودان دا مۆبارک اولسون!
- نیيه گیردین دَ‌يیرمانا،
- بیزی قويدون يانا-يانا،
- آتی وئردین کالوغلانا،
- سؤودان دا مۆبارک اولسون!
- سن ائيوازی قويدون خسته،
- گئت جومرددن مطلب ایسته،
- دئ بیر نئچه وئردین اۆسته؟
- سؤودان دا مۆبارک اولسون!
- کور‌اوغلو نئچه-نئچه لره گئتمیشدی، آمما هئچ اولمامیشدی کی،
- قايیداندا دلیلر بئله ائله‌سینلر. آمما بۇ دفعه خانیملار اونون اۆزونه
- باخمیردی، دلیلر سلام وئرمیردی. آخیردا کور‌اوغلو آلدی، گؤرک نه دئدی:
- کئچر دؤوران بئله قالماز،
- شاد اول کؤنول، نه ملولسان؟
- دلیلریم سلام وئرمز،
- شاد اول کؤنول، نه ملولسان؟
- گئيدیگیم ایگید کۆرکودو،
- دۆنيا سۆلئيمان مۆلکودو،
- دؤولت کی وار ال چیرکیدی،
- شاد اول کؤنول، نه ملولسان؟
- کور‌اوغلويام دئيیم سنه،
- اود تۇتوب آلیشدی سینه.
- آشیقلیغیم بسدی منه،
- شاد اول کؤنول، نه ملولسان؟
- بۇ سؤزدن دلیلر اینجیدیلر کی، چوخ ياخشی ایش گؤروبسن هله دانیشیرسان
- دا کی، “آشیقلیغیم بسدی”. ایندی کی بئله اولدو، ایندی کی سن بیزی هئچه
- سايیرسان، اوندا بیز ده چێخیب گئدیریک.
- کور‌اوغلو چوخ غضبلی ایدی. بیر طرفدن قێرات الدن گئتمیشدی، بیر
- طرفدن ده همزه کیمی کئچه‌لین بیری اونو آلداتمیشدی. اؤز دردی اؤزونه
- بس دئيیلدی، ایندی ده دلیلر بئله دئيیردیلر. ائله کی، دلیلر دئدیلر بیز ده
- چێخیب گئدیریک، کور‌اوغلو غضبی‌نین گۆجوندن اؤزونو ساخلايا بیلمه‌يیب
- بیردن قايیتدی کی:
- – اشی گئدین ده، نه ائله‌يیم گئدیرسینیز!
- بۇ سؤز دلیلری گؤتوردو. تاي اونلارین قاباغینی ساخلاماق چتین ایش ایدی.
- هامیسی ولوله‌يه دۆشدو. هامی گئتمک اۆچون حاضیرلاشماغا باشلادی.
- نیگار ایشدن خبر تۇتوب دلیلرین قاباغینی کسدی، اونلاری گئری قايتاردی.
- نیگارین دلیلر آراسیندا او قدر حؤرمتی وار ایدی کی، اونون بیر سؤزونو ایکی
- ائله‌مزدیلر. هامی قايیدیب اوتوردو. نیگار دا اونلارین آراسیندا اوتوروب
- اۆزونو ده او يانا چئویردی. کور‌اوغلو باخدی کی، نیگار دا اوندان اۆز چئویردی.
- بۇ، کور‌اوغلويا هامیسیندان برک يئر ائله‌دی. سازی دؤشونه باسیب گؤرک
- نیگار خانیما نه دئدی:
- آلا گؤزلو نیگار خانیم،
- اۆزون مندن نیيه دؤندو؟
- سنه قۇربان شیرین جانیم،
- اۆزون مندن نیيه دؤندو؟
- قويون اوتلار قۇزو ایله،
- آياغی‌نین توزو ایله.
- مۆخننتین سؤزو ایله
- اۆزون مندن نیيه دؤندو؟
- ایگیدین ياتماسین باختی،
- يانا چئوریلمه‌سین تاختی،
- کور‌اوغلونون ملول واختی،
- اۆزون مندن نیيه دؤندو؟
- نیگار هئچ بیر سؤز دئمه‌يیب سازی کور‌اوغلونون الیندن آلدی. سمرقند
- کاغیذی کیمی آغ سینه‌سی اۆستونه باسیب دئدی:
- بینادان گؤزل اولمايان
- تئلین قدرینی نه بیلر؟
- چؤلده گزن بوز سرچه‌لر،
- گۆلون قدرینی نه بیلر؟
- کال قوشوب کوتان اکمه‌ين،
- نانین سۆفره‌يه تؤکمه‌ين،
- آرینین قهرین چکمه‌ين
- بالین قدرینی نه بیلر؟
- اۇتان، قوچ کور‌اوغلو، اۇتان!
- داغلارین دامنین تۇتان!
- سنین کیمی باشا چاتان
- ائلین قدرینی نه بیلر؟
- نیگار سازلا دئدیگی کیمی سؤزله ده دئدی:
- – سن کی دلیلره بئله سؤز دئدین، داها منیم ده سنینله ایشیم يوخدو.
- دئيیرلر کی، کور‌اوغلو هئچ بیر سؤز دئمه‌يیب دۆز دۇروب گئتدی. اۆچ گۆن،
- اۆچ گئجه تامام آج، سۇسوز آغزی آشاغی دۆشوب ياتدی. بیر ده يۇخوسوندا گؤردو
- کی، توقاتدادی. قێرات دا آلتیندا. دیکسینیب قالخدی. باخدی کی، ائيواز باشی‌نین
- اۆستونده اوتوروب آغلايیر. کور‌اوغلونون اۆرگی آلیشدی، سازین گؤتوروب دئدی:
- ائيواز، مندن نه ایسترسن
- جاندیمی، باشدیمی، ندی؟
- آخیدیرسان آلا گؤزدن
- قاندیمی، ياشدیمی، ندی؟
- مجلیسده دولانمیر ساغین،
- سینم اۆستدن گئتمز داغین،
- تؤکولوبدو قاش-قاباغین،
- بورانمی، قێشدیمی، ندی؟
- دايان، قوچ کور‌اوغلو، دايان!..
- سؤزلرینی ائله بَيان.
- ياتیبسان قفلتدن اويان،
- گؤردويون دۇشدومو، ندی؟
- ائيواز قالخدی، گئنه بیر مجلیس قۇردو. خانیملار، دلیلر هامیسی کور‌اوغلونون
- باشینا يێغیشدیلار. يئدیلر، ایچدیلر، کئفلری کؤکلدی، داماقلار
- چاغالدی، اینجیکلیک ياددان چێخدی، اولکی کیمی شیرین دوست، مهریبان يولداش
- اولدولار. بۇ زامان کور‌اوغلو سازی سینه‌سینه باسدی آلدی گؤرک نه دئدی:
- اللهی چاغیریب دۆشه‌رم يولا،
- بۇ دردی سینمده قالا قويمارام.
- قێراتیم حسرتله يولوم گؤزله‌يیر،
- دۆشمنین الینده قالا قويمارام.
- آه چکرم هردن کؤيسوم اؤتوررم،
- يولا دۆشوب مطلبیمی بیتیررم،
- يا اؤله‌رم، يا قێراتی گتیررم،
- آيی دولانسا دا، ایله قويمارام.
- کور‌اوغلويام، قوچ اوغلويام، قوچام من،
- چتیندی کی، مرد مئيداندان قاچام من،
- هاوادا دؤور ائدن ترلان قۇشام من،
- سارلار شیکاریمی آلا قويمارام.
- کور‌اوغلو آلتدان گئيیندی، باشدان قێفیللاندی، باشدان گئيیندی، آياقدان
- قێفیللاندی، میسری قێلینجی باغلادی، قالخان آسدی، عمود گؤتوردو، داوا لیباسی‌نین
- اۆستوندن، بیر کۆرک گئيیندی، چیينینه ده بیر ساز کئچیردی، تک باشینا پايیپیيادا
- توقاتا طرف يولا دۆشدو. آز گئتدی، چوخ داياندی، چوخ گئتدی آز داياندی،
- گئجه‌نی گۆندوزه قاتدی، گۆندوزو گئجه‌يه قاتدی، اؤزونو توقات شهرینه
- يئتیردی. باخدی کی، هاوا قارانلیقلاشیر. بیر قاری‌نین قاپیسینی دؤيوب دئدی:
- – آي قاری ننه، بۇ گئجه‌لیيه منی قوناق ائله‌يرسنمی؟
- قاری دئدی:
- – نیيه ائلمیرم.
- کور‌اوغلو قاریيا بیر قدر پۇل وئریب دئدی:
- – ائله ایسه آل، منه يئمک حاضیرلا.
- قاری پۇلو چوخ گؤروب سوروشدو:
- – پۇلون قالانینی نئيله‌يیم؟
- کور‌اوغلو دئدی:
- – قالانی ندی، هامیسینا آل.
- قاری سوروشدو:
- – تک باشینا بۇ قدر شئيی نئينیگیرسن؟
- کور‌اوغلو گۆلوب دئدی:
- – قوناغیم وار، اون آداملیق خؤرک بیشیر.
- کور‌اوغلو ایچری گیریب، اوتوردو. قاری تئز آياغا دۇروب بازارا اۆز قويدو.
- ياغدان، دۆيودن، اتدن آلیب گتیریب اون آداملیق خؤرک حاضیرلادی.
- ائله کی، خؤرک حاضیر اولدو، قاری گلدی کی:
- – ياخشی، خؤرک حاضیردی، سنین ده يولداشلارین گلمه‌دی، نه ائله‌يک؟
- کور‌اوغلو دئدی:
- – اونلار تاي گلمه‌يه‌جک. چک، گتیر بۇرايا.
- – ائله هامیسینی؟
- – ائله هامیسینی.
- قاری اولجه اینانمادی. سونرا گؤردو يوخ بالام بۇ ائله دئيه‌سن
- جدی دانیشیر. فیکیرلشدی کی، ياخشی چکیب آپارارام. بۇ تاي اژداها-زاد
- دئيیل کی، بیر قارینی وار دا، يئدیگینی يئير، قالانی دا قالار. بۇ ائله منیم
- اون بئش گۆنومه بسدی.
- غرض، قاری اورتالیغا يئکه بیر میس مجميی قويوب پلووو چکدی. مجميی
- تپه کیمی قالاندی. يازیق قاری نه قدر هێققاندی، مجمه‌يینی يئردن
- گؤتوره بیلمه‌دی. کور‌اوغلو ایشی بئله گؤروب دۇروب گلدی، مجمه‌يینی اؤزو
- گؤتوروب ائوه گتیردی. پلووو اورتالیغا قويدو، قوللارینی چێرمايیب ايلشدی. قاری
- فیکیرلشدی کی، منیم اوتوروب بۇنونلا بیر يئرده يئمه‌يیم ياخشی دئيیل. او
- يئير، دويار، اونسوز دا قالانی منه قالاجاق. کور‌اوغلو قارینی چاغیردی کی:
- – قاری ننه، گل.
- قاری دئدی:
- – سن يئ، من آج دئيیلم.
- کور‌اوغلو دئدی:
- – نه يئمیسن کی، آج دئيیلسن؟ گل، سونرا پئشیمان اولارسان.
- قاری ناز ائدیب دئدی:
- – يوخ، سن يئ. من پلووون ایگیسی ایله دويموشام.
- کور‌اوغلو بیر ده دئدی:
- – قاری ننه گل، باخ سونرا پئشیمان اولارسان ها...
- کور‌اوغلو ایلیشدی پلووا، بیرینجی تیکه‌ده پلووون اۆرگی اۆزولدو. ایکینجی،
- اۆچونجو، قاری گؤردو بۇ بیر-ایکی تیکه ده وۇرسا، مجميیده بیر شئي قالماياجاق،
- دۆشدو قارین آغریسینا کی، پلوودان شیشه‌جه‌يم. آنجاق تاي بیر دفعه
- يئمیرم دئمیشدی، دۆشموشدو بوينونا دئيین ياخینلاشا دا بیلمیردی. ائله
- بۇ فیکیرديدی، کور‌اوغلو بیر ده دئدی:
- – قاری ننه، گل... پئشمان اولارسان.
- قاری ائله بۇ سؤزه بند ایدی. تئز چؤکدو مجميی‌نین باشینا. غرض
- يئدیلر، ایچدیلر. کور‌اوغلو بیر دۆزلدی، پله بێغلارینی ائشدی، قاری اورتالیغی
- يێغیشدیردی، ايلشیب صؤحبته باشلادیلار.
- قاری سوروشدو:
- – آي قوناق، دئ گؤروم سن کیمسن؟ هارادان گلیب، هارايا گئدیرسن؟
- کور‌اوغلو دئدی:
- – قاری ننه، من آشیقام. چنلیبئلدنم، بس سیزین شهرده نه
- وار، نه يوخ؟
- قاری سوروشدو:
- – اوغول، ياخشی واختیندا گلیب چێخیبسان. کئچل همزه کور‌اوغلونون
- قێراتینی گتیرندن سونرا پاشا اونا بَيلیک وئریب. بۇ گۆن پاشا قێزینی دا
- اونا وئریب توي ائله‌يیر. ایندی تويدو، آشیق آختاریرلار. صاباح گئدر اوخويار،
- بوللوجا نمر يێغارسان.
- کور‌اوغلو دئدی:
- – آي ننه، ایندی همزه‌نین گتیردیگی قێراتی هارادا ساخلايیرلار؟
- قاری ننه:
- – محمود پاشانین تؤيله‌سینده. آمما آي قوناق، بیر ده منه ننه
- دئسن سندن اینجیيه‌رم. من قوجا ها دئيیلم. دیشلریمی نۇزلا تؤکوب.
- کور‌اوغلو او گئجه قاری‌نین ائوینده قالدی، صاباح قالخیب کئچل همزه‌نین
- تويونا گئدنده دئدی:
- – آي قاری، من گئدیرم، بلکه بۇرايا قايیدا بیلمه‌دیم، گؤروشه
- بیلمه‌دیک، سنه بیر نئچه کلمه سؤزوم وار، اونو دئيیم باری اۆرگیمده
- قالماسین.
- آلدی کور‌اوغلو دئدی:
- بیر قاریيا قوناق اولدوم،
- نه يامان جامخاناسی وار.
- دؤولتینی خبر آلدیم،
- بیر اینک، بیر داناسی وار.
- قاری گلیر بیزه ياووق،
- ال-آياغین تۇتوب سويوق،
- چئشده‌لیيه بیر جۆت تويوق،
- آخشاما قايغاناغی وار.
- قاری دئينده توزلانیر،
- گلین دئينده نازلانیر،
- قاباقدا قارپیز گیزله‌نیر،
- دالیندا توپخاناسی وار.
- کور‌اوغلونون هديان ایشی،
- قووغادان آچیلمیر باشی،
- دۆشوب اوتوز ایکی دیشی،
- بیر کؤتوک نیشاناسی وار.
- کور‌اوغلو سؤزونو قۇرتاریب قاریيا بیر آز دا پۇل وئردی، ساز دا چیينینده
- گلیب، محمود پاشانین ایمارتینه چاتدی. باخدی کی، بیر تويدو، بیر تويدو
- کی، گل گؤره‌سن. اوتاق پاشا، بَي، خان، تاجیرلرله دولودو. ائشیتدیلر کی، آشیق
- گلیب، هامی سئویندی... کور‌اوغلونو چکیب مجلیسه آپاردیلار. باخدیلار کی،
- بۇ آشیق هئچ اونلار گؤرن آشیقلاردان دئيیل. بويو اۇجا، کۆرکلری ائنلی،
- سۆکسونو کال سۆکسونو کیمی، بوينونون اتی کیردین-کیردین، بێغلاری بۇرولوب
- کئچیریلیب قۇلاقلاری‌نین دالینا. سۆروندن-صیفتیندن زهم تؤکولور. قورخودان
- اۆزونه باخماق اولمور. مجلیسده‌کی پاشالاردان بیری دئدی:
- – آشیق، هارا آشیغیسان؟
- کور‌اوغلو دئدی:
- – چنلیبئل آشیغیيام.
- پاشا دئدی:
- – قوچ کور‌اوغلونو تانیيیرسانمی؟
- کور‌اوغلو دئدی:
- – ياخشی تانیيیرام. بیر نئچه ایل اونون يانیندا آشیق اولموشام.
- توقاتین پاشاسی محمود پاشا دئدی:
- – بۇ گۆن دلی کور‌اوغلونون قێراتینی گتیرن همزه بَيین تويودو.
- قێراتی گتیردیگینه گؤره بَيلیک آلیب. دونا خاتونو دا اونا وئرمیشم. ایندی
- سن ده بۇ تويدا بیر آز دلی کور‌اوغلودان اوخو، قۇلاق آساق.
- کور‌اوغلو قێراتین آدینی ائشیتجک ائله بیل کی، اۆرگی‌نین باشینا اود دۆشدو.
- سازی سینه‌سینه باسیب، آلدی گؤرک نه دئدی:
- جانیم قێرات، گؤزوم قێرات؟!
- يارب، قێرات دۇرورمو اولا؟!
- محمود پاشا مئهترلری،
- اوتون، سۇيون وئریرمی اولا؟!
- قێراتا خلت بیچنده،
- اۆستونده باده ایچنده،
- شئشپر يالماندان کئچنده
- سرخوش-سرخوش يئریرمی اولا؟!
- قوچ کور‌اوغلو، هانی، هانی؟
- دوستونلا دۆشمانین تانی!
- قێرات ایله ائيواز خانی،
- بیر ده گؤزوم گؤرورمو اولا؟!
- محمود پاشا دئدی:
- – آشیق، دلی کور‌اوغلونو چوخ هۆنرلی دئيیرلر. ایندی دئ گؤروم کور‌اوغلو
- ایگیددی، يا من؟
- کور‌اوغلو دئدی:
- – پاشا، اونون ایگیدلیگی، مردلیگی دیللرده ازبر اولوب، عالمه يايیلیب،
- هامی ائشیدیب، من ده بیلیرم. آمما سنی ایندی گؤرورم. ایزین وئر، ایگیدلیگین
- نیشانینی سندن خبر آلیم، بیلیم، سونرا دئيیم.
- گؤتوردو کور‌اوغلو، گؤرک نه دئدی:
- اۇجا-اۇجا داغ باشیندا،
- يئل کیمی اسدیگین وارمی؟
- اللی، آلتمیش آتلی ایله
- بیر اوردو باسدیغین وارمی؟
- نامرد سیررینی بیلنده،
- مۆخننت اۆزه گلنده،
- ياغی دۆشمان گۆج گلنده،
- مئيداندان قاچدیغین وارمی؟
- قێزیب گزنده مئيدانی،
- قێرارام سۇلطانی، خانی،
- اوووج-اوووج دۆشمان قانی،
- دولدوروب ایچدیگین وارمی؟
- ارین قۆووتی قولومدا،
- دلیلر ساغی-سولومدا،
- ائيواز تک اوغول يولوندا،
- جانیندان کئچدیگین وارمی؟
- کور‌اوغلونون يوخ اینصافی،
- داوا گۆنو اولماز لافی،
- میسری قێلینج، دمیر قاپی،
- ائندیریب کسدیگین وارمی؟
- مجلیسده‌کی پاشالاردان بیری دئدی:
- – آشیق، ياخشی اوخويورسان، آمما ائله برک باغیریرسان کی، سسین آز قالیر
- قۇلاقلاریمیزی دلسین. سؤزونو بیر آز آلچاقدان دئ. بیر ده سن محمود
- پاشادان ایگیدلیگین نیشانه‌سینی خبر آلدین، هئچ اؤزون دئمه‌دین گؤرک
- ایگیدین نیشانی ندی. سؤيله گؤرک سیزین يئرین ایگیدلری نئجه اولور؟
- آلدی کور‌اوغلو:
- بیزیم ائلین دلیلری
- گیرر مئيدانا مرد اولو.
- اؤلونجه مئيداندان قاچماز،
- گیرنده مئيدانگرد اولو.
- سارپ قايالاردا يۇرد اولماز،
- مۆخننته سؤز درد اولماز،
- چاققال انیگی قۇرد اولماز،
- يئنه قۇرد اوغلو قۇرد اولو.
- دلیلریم فووجو-فووجو،
- آت مینیب دۆشمان قوووجو،
- بئلینده میسری قێلینجی،
- کور‌اوغلو کیمی مرد اولو.
- محمود پاشا دئدی:
- – آشیق، سن دئدین کی، دلی کور‌اوغلونو تانیيیرسان، اونون قێراتینی دا
- گؤروبسن. هئچ آتین خاصيتیندن، نیشانیندان بیلیرسنمی؟ بیر آز دئ،
- قۇلاق آساق.
- آلدی کور‌اوغلو:
- پاشا، سنه نیشان وئریم قێراتی،
- ابریشین ایپکدن يالی گرکدی.
- بیر مینا بويونلو، اۇجا ساغریلی،
- بیر ياریم هوققادان نالی گرکدی.
- بیر آلما دێرناقلی، هۆندور بويونلو،
- مئيدانا گیرنده يۆز مین اويونلو،
- دَ‌يیرمان مده‌لی، آج قۇرد يئيیملی،
- اورتاسی قولونا دولو گرکدی.
- قارانلیق گئجه‌ده يول چاشیرمايان،
- دۆشمن قاباغیندا ار دۆشورمه‌ين،
- اۆستونده ال-آياق يێغشیریلمايان،
- کور‌اوغلونون آتی دلی گرکدی.
- محمود پاشا دئدی:
- – آپارین آشیغی يئدیریب، ایچیرین.
- ساقی کور‌اوغلونو شراب اولان اوتاغا آپاردی. قاباغینا بیر قاب شراب
- قويدو. کور‌اوغلو قابی بیر خورتومدا بوشالدیب دئدی:
- – بئله شئي منیم آغزیمی دا ایسلاتماز. وئریرسن وئر عمللی-باشلی
- ایچک، وئرمیرسن گئدک اؤزوموزه گۆن آغلاياق.
- اوتاقدا اۆچ تۇلوق ياریم شراب وار ایدی. ساقی کور‌اوغلونو اورادا قويوب
- ایری قاب گتیرمه‌يه گئتدی. ساقی چێخجاق کور‌اوغلو اؤزونو وئردی تۇلوقلارین
- يانینا. بیر، ایکی، اۆچ، بیر هوووردو اۆچ تۇلوق ياریم شرابی ایچیب، بوش تۇلوقلاری
- بیر طرفه تۇللايیب، اورادان کئچدی آشخانايا. آشباز بیر سینی آش چکیب
- قويدو کور‌اوغلونون قاباغینا. گؤزونه دؤنوم کور‌اوغلو، ایکی شاپالاقدا
- بیر سینی آشی قارا بێغی‌نین آلتیندان اؤتوروب دئدی:
- – آشباز قارداش، بۇ منیم بیر کۆنجومده قالدی، آش وئر اوتوردوغوما
- گؤره دويونجا يئيیم.
- آشباز بیر يئکه سینی ده چکیب آشی کور‌اوغلونون قاباغینا قويدو،
- کور‌اوغلو اونو دا آشیردی. بیر ده ایسته‌ينده آشباز دئدی:
- – آي بالام، حرامی دئيیلسن کی، ایکی سینی آشلا دويمادین؟
- کور‌اوغلو دئدی:
- – يئددی باتمان دۆيونون آشی، يئددی قويونون ياری شاققاسی، منیم
- بیر دفعه‌‌مین خؤرگیدی. بئله شئيلر منیم حراما چاتاجاق؟
- آشباز ایسته‌دی کی، کور‌اوغلونو آشخانادان چێخارتسین. کور‌اوغلو بیر الی ایله
- آشبازین بوغازیندان تۇتوب، بئلیندن ایکی قاتلايیب بوش قازانلاردان بیری‌نین
- ایچینه سوخدو، آغزینا دا بیر سینی چئویریب اۆستونده اوتوردو. ياواشجا قوللارینی
- چێرمالادی، آش قازانلارینی قاباغینا چکیب بیر اوتورومدا يئددیسینی
- آشیردی. ائله کی، قۇرتاردی، پله بێغلارینی ائشدی، قۇلاقلاری‌نین دالیندان کئچیردی،
- گیردی مجلیسه، مجلیسده‌کیلر دئدیلر:
- – آشیق، يئدین دويدون، ایندی اوخو، قۇلاق آساق.
- آلدی کور‌اوغلو گؤرک نه دئدی:
- مۇرادبيلی دئرلر بیزه،
- مئيداندا مردلیک ایشله‌نی.
- قوچ ایگیددن اوغول تؤرر،
- دۆشمان گؤزونده بئشله‌نی.
- اۇجا داغلاردا دۇرارام،
- چکیب بزیرگان وۇرارام،
- گۆنده اۆچ ایچکی قۇرارام،
- يۆز مین تۆمنلر خرجله‌نی.
- هاي دئينده هايلاریم وار،
- هوي دئينده هويلاریم وار،
- قۇردلاریم وار، آيلاریم وار،
- هاي وۇرسام شهرین بوشلانی.
- پاشالار کور‌اوغلونو تانیمامیشدیلار. اونلار ائله بیلیردی کی، بۇ دوغرودان
- دا آشیقدی.
- کئچل همزه چنلیبئلدن قێراتی گتیرندن بری آت نئچه مئهتری
- تلف ائله‌میشدی. هئچ کس آتین يانینا گئده بیلمیردی. محمود پاشا باخدی
- کی، بۇ آشیق دئيه‌سن قێراتی ياخشی تانیيیر. اوندان سوروشدو:
- – آشیق، بۇدو نئچه مدتدی کی، قێراتی گتیرتدیرمیشم، آمما ورم
- ديَمیش هئچ کسه ال وئرمه‌يیر. سن اونو ایپه-ساپا اؤيره‌ده بیلرسنمی؟
- کور‌اوغلو بۇنو ائشیتجک آز قالدی رۇحو بدنیندن اۇچسون. تئز دئدی:
- – بلی.
- محمود پاشا امر ائله‌دی، کور‌اوغلونو قێراتین يانینا سالدیلار.
- قێرات کور‌اوغلونو گؤرن کیمی تانیدی. برکدن کیشنه‌دی. کور‌اوغلونون
- کؤنلو آچیلدی. اۆرگی جوشوب تئل-تئل اولدو. آلدی گؤرک نه دئدی:
- چنلیبئلدن سنی دئيیب گلمیشم،
- آلما گؤزلوم، قێز بیرچکلیم قێرات، گل!
- دمیر لیباس، پولاد گئيیب گلمیشم،
- آلما گؤزلوم، قێز بیرچکلیم قێرات، گل!
- ازلدن بیليدیم سنین حالینی،
- اشرفیدن کسدیرردیم نالینی،
- يۆز گؤزله توخوداردیم چۇلونو،
- آلما گؤزلوم، قێز بیرچکلیم قێرات، گل!
- قاباقدا قالیرمی آرپان سحره؟
- اۆزنگیلر نه ياراشار يهره...
- دلیلر سالمیشدی منی قهره،
- آلما گؤزلوم، قێز بیرچکلیم قێرات، گل!
- بیر آتیم وار آتیم-آتیم آتیلیر،
- قۇلاقلاری قارغی کیمی چاتیلیر،
- اۇجوزلوقدا مین تۆمنه ساتیلیر،
- آلما گؤزلوم، قێز بیرچکلیم قێرات، گل!
- مرد ایگیدلر بئله باخماز آتینا،
- سنسیز گئتمک اولماز ائل باراتینا،
- آند وئریرم کور‌اوغلو قێرياتینا،
- آلما گؤزلوم، قێز بیرچکلیم قێرات، گل!
- قێرات کور‌اوغلونون سسینی ائشیدنده ائله کیشنه‌دی کی، يئر تیتره‌دی.
- کور‌اوغلو ایره‌لی يئریگیب قوللارینی دولادی قێراتین بوينونا. اۆزوندنگؤزوندن
- اؤپوب، يالینی-يالمانینی تۇمارلادی، ایفچین يهرله‌يیب تؤيله‌دن
- چێخارتدی. کئچل همزه تؤيله‌نین قاپیسیندا حاضیر دۇرموشدو. ایره‌لی گلیب
- قێراتین اۆزنگیسینی باسدی، دئدی:
- – کور‌اوغلو، من دَ‌يیرمانداکی وعده‌‌می يئرینه يئتیردیم.
- کور‌اوغلو قێراتی مینندن سونرا اينینده‌کی کۆرکو چێخارتدی، میسری
- قێلینجی‌نین دسته‌سیندن ياپیشدی. تاي پاشالاردان، خانیملاردان، بَيلردن
- سوروشما. هامی بیر-بیرینه ديَدی.
- آلدی کور‌اوغلو گؤرک نه دئدی:
- میندیم قێراتین بئلینه،
- کاش کی، دۆشمان يۆز اولايدی.
- چکنده میسری قێلینجی،
- دره، تپه دۆز اولايدی.
- آتی میندیم گزدیرمه‌يه،
- دۆشمان باغرین ازدیرمه‌يه،
- دونا چايی اۆزدورمه‌يه،
- قێرات بیر قوواس اولايدی.
- وئرین يئددی ایللیک خارجی،
- پاشالار گتیرسین باجی.
- کور‌اوغلو چکیب قێلینجی،
- دۆشمن اۆزبوز اولايدی.
- محمود پاشا حؤکم ائله‌دی، قوشون يئربيئردن آتلانیب کور‌اوغلونون
- اۆستونه يئریدی. کور‌اوغلو محمود پاشانین بئله حؤکم وئرمه‌يینی گؤرنده،
- آلدی گؤرک نه دئدی:
- لاف ائيله‌مه، دلی پاشا،
- آغیر-آغیر ائللریم وار،
- بیر تاماشا ائيله‌يه‌سن،
- قێلینج چالان قوللاریم وار.
- اۇجا داغلاردان داشلانی،
- آغیر آلايلار بوشلانی،
- گلسه‌لر داوا باشلانی،
- ایگید-ایگید دللریم وار.
- من آنادان مرد اولموشام،
- او چنلیبئلدن گلمیشم،
- کور‌اوغلويام، آت مینمیشم،
- يۆز مین بئله فئللریم وار.
- کور‌اوغلو قوشونا هۆجوم ائله‌يیب، مردانه قێلینج وۇرماغا باشلادی.
- دۆشمن چوخ ایدی، کور‌اوغلو تک. يالقیزلیق کور‌اوغلويا ال وئردی. آلدی گؤرک
- نه دئدی:
- آي حضرات، آي جاماعت،
- هئچ ایگید يالقیز اولماسین!
- اتیم يئيیب، قانیم ایچن،
- نامرده مؤهتاج اولماسین!
- هاشا آ بَيلر، هاشادان،
- قورخمارام خاندان، پاشادان،
- اسره رییب چێخسا مئشه‌دن،
- آسلان دا يالقیز اولماسین!
- کور‌اوغلونون داش قالاسی،
- عرشه چکیلدی نالاسی،
- اؤردک ایله قاز بالاسی،
- گؤللرده يالقیز اولماسین!
- قوشون کور‌اوغلونو آرالیغا آلمیشدی. قێزغین داوا ایدی. کور‌اوغلو عمود
- وۇرور، جیدا اوينادیر، شئشپر آتیردی. هانسی يانا اۆز چئویریردی دۆشمانی قاتیمقاتیم
- قاتلايیردی. باش کسیردی، قول قێریردی، قانی سۇ کیمی آخیدیردی. قێرات دا
- ایشی ایله، چچیگی ایله قوشونو دیدیب تؤکوردو. کور‌اوغلو قێراتین هۆنرینی گؤروب،
- آلدی ال اۆستو:
- جئيرانا بنزر قاچیشین،
- آددیملا، قۇربان قولونا!
- ترلانا بنزر اۇچوشون،
- ال چاتماز ایپک يالینا!..
- کسدیررم گۆموشدن يهر،
- تۇمارلارام آخشام، سحر،
- گؤتور بۇردان قاچ بیر تهر
- سیکه وۇردوررام نالینا!
- کور‌اوغلويام، گۆمان بئله،
- دئمه‌يینن گلمز دیله،
- منی چێخارت چنلیبئله،
- قوتاز دۆزدوررم چۇلونا!
- قوچ کور‌اوغلونون دلی نره‌سی دۆشمانی قورخوتموشدو. هامی‌نین الی
- داوادان سويوموشدو. کور‌اوغلو ساغدان وۇردو، سولدان چێخدی، سولدان وۇردو،
- ساغدان چێخدی، دۆشمانی شیل-کۆت ائله‌يیب بیر طرفدن اؤزونه يول آچیب قوشونون
- آراسیندان چێخدی.
- محمود پاشا يوللاری تنابلارلا نئچه يئردن کسدیرمیشدی کی، بلکه
- کور‌اوغلو کئچیب گئده بیلمه‌سین، تۇتسونلار. قێرات تنابلارین يئددیسینی بیر
- ائله‌يیب سێچرايیردی.
- کور‌اوغلو هر يئردن کئچیب چنلیبئله يول باشلادی. آز گئتدی، چوخ گئتدی،
- بیر ده گؤردو چنلیبئل طرفدن گؤيون اۆزو ایله اؤتوشه-اؤتوشه بیر قاتار
- دۇرنا گلیر. چنلیبئل کور‌اوغلونون يادینا دۆشدو.
- آلدی، گؤرک نه دئدی:
- گؤينن گئدن بئش دۇرنالار،
- بیزیم ائللر يئریندمی؟
- بیر-بیریندن خوش دۇرنالار،
- بیزیم ائللر يئریندمی؟
- صؤحبت اولوردو سازینان،
- اؤردک اولوردو قاضینان،
- نئجه اینجه‌بئل قێزینان،
- تۇتی دیللر يئریندمی؟
- سئویب، سئچیب بَيندیگیم،
- صداسیندان اوياندیغیم،
- آرخاسیندا داياندیغیم،
- چنلیبئللر يئریندمی؟
- بزیرگانا ساتاشدیغیم،
- قۇماشینا بۇلاشدیغیم،
- دؤنوب بوينوندان آشدیغیم،
- چنلیبئللر يئریندمی؟
- هردن ایشوه-قمزه ساتان،
- منیمله ایختیلات قاتان،
- گلنده آتباشی تۇتان،
- شۇخ گؤزللر يئریندمی؟
- چالخالانیب دؤيوندويوم،
- آرخا وۇروب سؤيوندويوم،
- قووغا گۆنو اؤيوندويوم،
- نر دلیلر يئریندمی؟
- کور‌اوغلو هئچ دئمز يالان،
- توقاتا سالمیشام تالان،
- جۆمله دلیلر، ائيواز خان،
- ایگید ارلر يئریندمی؟
- کور‌اوغلو اۇزاق يوللاری کئچیب گلدی چنلیبئله يئتیشدی. قێرات چنلیبئله
- چاتاندا ائله کیشنه‌دی کی، داغلار، دره‌لر دیله گلدی. دلیلر تؤکولوب قاباغا
- گلدیلر. قێراتی تۇتدولار. کور‌اوغلونون قێراتی تاپیب ساغ-سلامات گلمه‌يینه
- هامی سئویندی. شادلیق مجلیسی قۇردولار، يئدیلر، ایچدیلر، کئفلر
- کؤکلدی. کور‌اوغلونون کئفی ساز، داماغی چاغ ایدی. باده‌نی باده‌نین دالینجا
- قارا بێغلاری‌نین آلتیندان اؤتوروردو. نیگار خانیم دلیلره گؤز باسیب
- کور‌اوغلويا دئدی:
- – کور‌اوغلو، ایگیدلیگینه سؤزوم يوخدو، آمما بئله صیفتدن چوخ قاراسان
- ائي...
- کور‌اوغلو سازینی سینه‌سینه باسیب، آلدی گؤرک نیگار خانیما نئجه جاواب
- وئردی:
- منه قارا دئين گؤزل،
- قاشلارین قارا دئيیلمی؟
- تؤکولوبدو دال گردنه،
- ساچلارین قارا دئيیلمی؟
- حؤکم ایله اوتوروب دۇرما،
- مۆژگانین سینه‌مه وۇرما،
- آلا گؤزه سیياه سۆرمه،
- چکیبسن قارا دئيیلمی؟
- کور‌اوغلو وئردی سلامی،
- دولاندی جۆمله عالمی،
- قۆدرتین گؤهر کالامی،
- يازیسی قارا دئيیلمی؟
- هامی گۆلوشدو. نیگار کور‌اوغلونون بۇ حاضیر جاوابینا شاد اولدو.
- مجلیس تزه‌دن قێزیشدی...
قایناق‌لار
- Azadliq . org