Jump to content

Wt/azb/جیز اویونو

From Wikimedia Incubator
< Wt‎ | azb
Wt > azb > جیز اویونو

جیز اویونو[edit | edit source]

آنا آنلاتیم

  • چمبر (دایره) بیر جیز چکیلیر. بو جیزین بؤیوک‌لوگو اویون‌چولارین ماراغی ایله ایکی ارشین‌دن اوچ ارشینه قدر بلکه ده آرتیق اولور. جیزین اورتاسیندا چمبر شکلینده، بیر-ایکی قاریش بویوندا آیری بیر جیز چکیلیر. بو جیزین آدی چیرتدیق‌دیر. هر بیر اویون‌چو چیرتدیق دئییلن جیزا بیر آشیق قورور. دوز بیر جیزین اوستونه قورولان بو آشیق‌لارا اویون‌چولار هَنه دئییرلر. هَنه قوران اویون‌چولار، اولا بیلر تک- تک اولالا‌ر، یا ایکی یا اوچ یا... دسته‌لره بؤلونه‌لر. سونرا بیرینجی کیم یوخسا هانسی دسته باش اولوب باش‌دان آشیق‌لارا ساققا آتما‌لی اولاجاغینی بلله‌مک اوچون، ساققالاری (ساققا: جیزین ایچینده اولان آشیق‌لاری وورماغا بیر ساغلام و بؤیوک آشیق) بیر-بیرینه قوشوب گؤیه آتیرلار. کیمین ساققاسی شک دورسا او و اونون دسته‌سی بیرینجی‌دیر.آردی و قالان‌لاری بل‌لی اولونجا بو ایش داوام ائتدیریلیر.
  • اویونو باشلاماق واختی چاتیر. بیرینجی باش اولان باش دئییلن یئردن (باش: جیزدان بیر آز آرا‌لی بللنمیش یئردن) جیزین ایچینده قورولان آشیق‌لارا ساققاسینی اؤزل شکیلده توشلاییب آتیر. ساققا آشیق‌لارا دیَرسه، آشیق‌لاردان بؤیوک جیزدان چیخانی ساققا آتان اویون‌چونون‌ اولور. بیردنه‌دن آرتیق جیزدان چیخاندا مئهیشت دئییلیر. مئهیشتین اولوب- اولماماسی اویون‌دان اؤنجه اولان دانیشیغا باغ‌لی‌دیر. ساققاسی دایانان یئردن بیر داها آتماق حاقی وار، اما چیرتدیق‌دان چیخیب و قالان اویون‌چولار واسطه‌سی‌ایله چیرتدیق سئچیلن آشیق‌لارا آتا بیلمز. قالان آشیق‌لارا ساققاسینی آتیر. ساققاسی چیرتدیغین ایچینده قالسا اوردا اولان هنه‌لری چیرتماقلا، ساققاسی اوردان چیخینجا جیزدان چیخارا بیلر ساققا بوشا کئچرسه یا دَیدیگی آشیق جیزدان چیخماسا سیرا او بیری اویون‌چویا کئچیر. سیرادا اولان اویون‌چو چیرتدیق سئچیب‌دیرسه، جیزین قیراغیندا دایانا‌راق اوزانیب اونو چیرتما‌لی یوخسا دایانا‌راق وورما‌لی‌دیر. ووردوغو آشیق چیخماسا یا ساققاسی دیمه‌سه، سیرا او بیری اویون‌چویا کئچیر. اویون‌چو او یئردن کی، گرک ساققاسینی آتا، اونو بیر آز تاپداسا دئیرلر حارام باسدین، ساققاسی دَیمیش اولسا گرک آیری‌دان ساققا آتا بئله‌لیکله آشیق (هنه) جیزدان قوتارینجا سیرا آردیجیل دولانیر.
  • یئنی اویون باش‌لاناندا سیرا بئله اولور: سونونجو هنه‌نی اودان اویون‌چو باش اولور، ایلک اویوندا زیران (هامی‌دان سون) اولان اویون‌چو آرد اولور، باش اولان اویون‌چو زیران اولور و قالان اویون‌چولار بیر نؤوبت یوخاری قالخیرلار.قئید ائتمک لازیم‌دیر کی، جیزدا اولان آشیق‌لارین یئرینه جینقیر (قوز)دا قورولور. هر حالدا جیزا قورولان نه اولورسا اولسون هنه آدلانیر. اویون‌چولارین هنه‌لری بیتدیک‌دن سونرا، یوخسا اویون‌چولارین راضیلیغی‌ایله اویون سونا چاتیر. اویونون قایدا‌لارینی بیله‌رک‌دن گؤزلمه‌ین اویون‌چویا داغال دئییلیر.بو اویون اَيلنجه‌‌لی اولدوغو حالدا اویون‌چولاری سورک‌لی آیاق اوستده و حرکتده اولدوغو اوچون فیزیکی باخیم‌دان گلیشدیریر. اجتماعي و یولداش‌لیق حسّینی ده گوجلندیریر.

آنلام‌لار

  1. cız oyunu .

قایناق‌لار

  1. milmugan.blogfa.com