Wt/arz/ويكشينارى مصرى: طريقة الكتابه

From Wikimedia Incubator
< Wt‎ | arz
Wt > arz > ويكشينارى مصرى: طريقة الكتابه
مناقشه طريقة الكتابه فى ويكشينارى مصرى مفتوحه, دوس هنا علشان تقرا و تشارك فى المناقشه

طريقة الكتابه فى ويكشينارى مصرى, اقتراح النسخه المصريه من Wiktionary, مكتوبه باللغه المصريه الحديثه اللى بيتكلمها المصريين و مكتوبه زى ما بيكتبوها فى جواباتهم لبعضيهم و فى حياتهم اليوميه. المصريين بيكتبو المصرى فى الروايات, و المسرحيات, و القصايد الشعبيه و كمان فى المجلات الكوميدى و الإعلانات و شوية جرانين.

مبادئ عامه[edit | edit source]

  1. خد راحتك فى الكتابه طالما مش بتتحيز.
  2. حاول تحط المصادر اللى جبت منها كلامك.
  3. اكتب, عدّل, ترجم, بس ما تهينش حد.
  4. اكتب بالشكل اللى يعجبك, بس القاهريه هيه الطريقه المشهوره لكتابة الكلام المصرى, المهم يفهمها المصريين.
  5. حاول تكون محايد.
  6. ما تشهّرش بحد.
  7. ما تنقلش مواد ليها حقوق نشر محفوظه.
  8. حاول تسجل دخولك علشان مساهماتك تتسجل باسمك مش باسم عنوان الIP بتاعك, و ماتنساش تمضى بـ~~~~ فى صفح المناقشه.
  9. الغلطات الاملائيه هاتحصل هاتحصل, مافيش مشكله, لأن كل واحد من اليوزرات ممكن يصلحها.
  10. حاول دايما تشرح سبب تعديلاتك وبالذات سبب استرجعاتك لتعديلات واحد من اليوزرات التانيين.
  11. حاول تشجع و تساعد المساهمين الجداد.
  12. ويشينارى هى موسوعه مفتوحه ممكن تعدّل و تزوّد فيها, و لو شايف حاجه غلط, صلّحها, طالما مش بتتحيز.

نصايح[edit | edit source]

اختار الطريقه اللى تعجبك, و التزم بيها.

  • لو اخترت تكتب فى صفحه بطريقة املا معينه, لو سمحت التزم بنفس الطريقه فى باقى الصفحه.
  • ما ينفعش يتكتب بكزا طريقه فى صفحه واحده و فى نفس السطر, و ماينفعش تتكتب كلمه واحده بكزا طريقه فى نفس الصفحه (الا لو اتوضّح انها بتتكتب بكزا طريقه فى الاول).
  • لو سمحت ماتغيّرش فى طريقة الاملا فى الصفح, طول ما الصفحه كلها مكتوبه بطريقة املا واحده. و لو عاوز تزوّد عليها, اكتب بنفس طريقة الاملا بتاعتها.
  • ممكن تستعمل الحروف دى فى العناوين: ا أ إ آ ب ت ث ج ح خ د ذ ر ز س ش ص ض ط ظ ع غ ف ق ك ل م ن ه ة و ي ء ى.
  • ممكن تستعمل حروف بتوضّح النطق جوّا الصفح, زى پ چ ڤ.
    اكتب فيفا او ڤيڤا. اكتب ايفا او ايڤا, مافيش مشكله.

اهم حاجه تلتزم بطريقة املا واحده فى كتابة الكلام فى نفس الصفحه. بص تحت على الكتابه بالألف-به اللاتينى.

الحروف[edit | edit source]

  • ق: لو فيه كلمه من أصل عربى فيها حرف <ق>, يتساب زى ما هو.
  • ث: لو فيه كلمه من أصل عربى او أى لغه فيها حرف/نطق (ث) و بيتنطق \س\, يتساب زى ماهو. و لو بيتنطق \ت\ يتكتب <ت>.
  • ذ: لو فيه كلمه من أصل عربى او أى لغه فيها حرف/نطق (ذ) و بيتنطق \ز\, يتساب زى ماهو. و لو بيتنطق \د\ يتكتب <د>.
  • الهمزات: مافيش همزات قطع و لا همزات وصل كلهم <ا> (الا لو فى نص و اخر الكلمه), بس لو عاوز تكتب همزة قطع جوّا المقاله, مافيش مشكله.
  • ى: مافيش <ي>, فيه <ى>; لإن <ى> مكتوبه زى ما بيكتبوها المصريين, لكن لو عاوز تكتب <ي> مافيش مشكله لإن <ي> و <ى> حرف واحد.
  • ته التأنيث: ته التأنيث بتتكتب حسب النطق ياإما \ة\ او \ه\, يعنى تتكتب <انا رايح المكتبه> و تتكتب <انا رايح مكتبة الكليه>.
  • ادوات الجر و ادوات العطف: كتابة ادوات الجر و ادوات العطف اوضح و اسهل لو تتكتب مفصوله عن الكلمه اللى بتيجى وراها. مثلا: <فى اوروبا> او <ف اوروبا> اوضح و اسهل للقرايه من <فاوروبا>.
  • علامات التشكيل: علامات التشكيل ساعات بتكون مهمه لو نفس الكلمه كان ليها كزا معنى لو اتنطقت بكزا طريقه.

النقطه و الفصله[edit | edit source]

النقطه و الفصله مهمين جدا. ياريت تاخد بالك من النقطه و الفصله, علشان الواحد مايتوهش وسط الكلام. و بيتكتبو لازقين فى الكلمه اللى اتكتبت قبلهم, و بعدهم مسافه.

الصفح بالألف-به اللاتينى[edit | edit source]

شوف كمان: w:arz:ويكيبيديا:ملاحظات ع الكتابه اللاتينى

فيه شوية صغيره من صفح فى ويكشينارى مصرى منها نسخ بالألف-به اللاتينى لإن كان فيه اقتراح من سنة 1948 لكتابه المصرى بالحروف اللاتينى, و رغم ان اغلبية المصريين مش متعوّدين ع الألف-به اللاتينى, فيه مواد قليله جداً فى ويكشينارى مصرى بحروف لاتينى (الفرانكو) للى عاوز يكتب بيها.

الكلام اللى باللغه العربى[edit | edit source]

نصايح على العربى[edit | edit source]

الكلام اللى بالعربى الكلاسيكى او العربى القياسى الحديث:

  • الهمزات: بنفس القواعد العربى القياسى الحديث.
  • ى: <ى> من غير نقط زى ما بتستعمل فى مصر.
  • ته التأنيث: بنفس قواعد العربى القياسى الحديث.
  • ادوات الجر و ادوات العطف: بنفس قواعد العربى القياسى الحديث.
  • علامات التشكيل: علامات التشكيل ساعات بتكون مهمه لو نفس الكلمه كان ليها كزا معنى لو اتنطقت بكزا طريقه.