Wq/ug/ماقال-تەمسىل:ئابدال

ئۇيغۇر خەلق ماقال-تەمسىللىرى

• ئابدال ئاتقا مىنسە باي بولدۇم دەر، چامغۇر ئاشقا كىرسە ماي بولدۇم (دەر).

  بۇ، تۇرمۇشتا ئاز - تولا مەنپەئەت، راھەتكە ئېرىشىپ، بۇرۇنقى رىيازەتلىك، غۇربەتچىلىك كۈنلىرىنى ئۇنتۇغان كىشىلەرنىڭ ماختانچاقلىقىنى بىلدۈرىدۇ.

• ئابدال تەكىبىدە، ھاجى مەككىدە

  بۇ ھەركىم، ھەر نەرسە ئۆز خىلى، ئۆز دائىرىسىدە، ئۆزىگە مۇناسىپ كېلىدىغان ئورۇندا تۇرۇش لازىملىقىنى بىلدۈرىدۇ.

• ئابدالغا كەپسەن بەرسە، جىڭىڭ راستمۇ، دەپتۇ.

  بۇ، بىراۋنىڭ خالىسانە ياردىمىگە مىننەتدارلىق، رازىمەنلىك بىلدۈرۈشنىڭ ئورنىغا بەزى كىشىلەرنىڭ ئىنساپسىزلىق قىلغانلىقىنى بىلدۈرىدۇ.

• ئابدالنىڭ دوستلۇقى كەنت كۆرۈنگىچە

  بۇ، بىر كىمگە ھاجىتى چۈشۈپ، ئىشىنى پۈتكۈزىۋالغاندىن كېيىن ئۇنىڭدىن يۈز ئۆرۈپ، ئۆزىنى قاچۇرىدىغان كىشىلەرنىڭ يۈزسىز، نامەردلىكىنى بىلدۈرىدۇ.