Wq/tt/Фәнис Яруллин

Фәнис Яруллин - атаклы татар шагыйре һәм язучысы.

Өзекләр

А

Авылның йөз күзе бар. Аннан берни яшерә алмыйсың.

Акны ак дип әйтергә дә Батырлык кирәк кайчак.

Б

Батыр булыр өчен, җанда шәфкать кирәк, Батыр була бары мәрхәмәтле йөрәк.

Батырлык! Нәрсә соң ул батырлык? Газинурлар, Матросовлар шикелле күкрәгең белән дошман амбразурасын каплаумы, әллә үзең ач чакта соңгы сынык икмәгең белән бүлешүме? Кешеләр төрле-төрле булган кебек, батырлык та күптөрле шул. Көч һәм батырлык яуда гына кирәк дигән кешеләр бик нык ялгышалар. Тып-тыныч тормыш та кешедән гел батырлык сорый. Кайчагында кешегә, хакыйкатьне әйтер өчен дә, зур батырлык кирәк.

К

Кеше, гадәттә, я бәхете ташып торганда, я күтәрә алмаслык кайгы килгәндә, я юлын югалтканда, туган якларына кайта. Бәхетле кешенең үз бәхете белән бераз мактанасы, кайгылының кайгысын таратасы, юлын җуйганнарының юл табасы килә.

Кеше күңеле өчен туган як кирәк. Еракка китсә – сагыныр өчен, картайса – балалыгына кайтыр өчен, дошман керсә – яклар өчен. Ерак җирләрдә йөргәндә, кеше читтәге матурлыкны әнә шул үзенең туган ягы белән чагыштыра. Туган ягы аңарга биеклеккә сикерү ноктасы, гүзәллек үрнәге булып хезмәт итә.

• Кеше үзенең тамырын, үткәннәрен онытмаска тиеш. Ә кешене узганнары белән тел бәйли.

М

Мәхәббәт - артык мәшәкать.

C

Сугыш - акылсыз кешеләрнең акылсыз эше.

Т

Туган туфрак беркемне дә кире какмый ул. Туган якның туфрагы да җиңел дип, картайгач үләр өчен, тикмәгә генә кешеләр туган-үскән җирләренә кайтмыйлар.

Туган ягына һәркемнең җиңүче булып кайтасы килә. Авыл бөркетләр оясы. Ул үз балаларын еракка, биеккә очыра да читтән генә күзәтә: я, синең хәлләрең ничек? Оча аласыңмы? Тормыш давыллары канатларыңны сындырмадымы? Безнең йөзгә кызыллык китермисеңме?

Ю

Юләрләр хакимлек иткәндә, Инсаннар әйләнә сарыкка.