Wq/tn/Munachi Abii
Munachi Gail Teresa Abii Nwankwo ke seopedi sa moopelo wa rapper/hip-hop artist, ke mokwadi wa dipina , Motsamaise wa lenaneo la sethswantsho sa motshikinyego, mmabontle, le modiragatsi wa Nigeria ya dirisang leina la Muna. Ke mofenyi wa Mosetsana yo montle go gaisa kwa Nigeria (MBGN) ka ngwaga wa dikete tse pedi le metso e supa 2007. Ke mosadi wa Mo-Igbo yo o tswang kwa Imo state.
Dikinolo
[edit | edit source]- Go rata go diragatsa toro nngwe le nngwe e ke kileng ka nna le yone ke gone go go dirang gore ke tswelele pele. Gape go monate go bonwa.
- Mongwe le mongwe o na le tsela e a tlhaloganyang lefoko "katlego" ka yone. Mo go wena, katlego e ka raya go nna le dipina tse di tumileng, mo go nna katlego e ka raya go kgona go feleletsa pina e e feletseng ya me kana ya motho yo mongwe.
- Ke ne ke se kitla ke dira sepe sa dilo tse ke di dirang fa ke ne ke sa di bone di kgotsofatsa. Mokgele/porojeke nngwe le nngwe e na le boikaelelo jwa yone.
- Ke ne ka rotloediwa ke tikologo e ke neng ke nna mo go yone. Mmino o ke neng ke o reetsa o ne wa ntlhotlheletsa. Mmè o ne a ntlhotlheletsa.
- Ke ithutile go le gontsi ka go amogelwa ke batho. Ga go na ope yo o go rutang gore o ka dira dilo tseno jang mme gone o kgona go di itshokela, go sa kgathalesege gore go direga eng. Ga ke ise ke fetoge fa dingwaga di ntse di feta. Ka dinako tse dingwe, ke a tle ke galefe, ke ritibale kgotsa ke tsenwe. Ke sa ntse ke le nna e bile ke godile, mme seno ke sone se se dirang gore go nne le diphetogo.
- Fa o sa dikologwe ke batho ba ba molemo o simolola go ikutlwa o sa sireletsega. Ke kafa mongwe le mongwe a leng ka teng fano. Ka metlha ba leba batho ba bangwe go na le go tlhoma mogopolo mo go se ba tshwanetseng go se dira.
- Re tshwanetse go amogela mefuta yotlhe ya mmino. Ga re ka ke ra tlhoma mogopolo otlhe mo botshelong jwa maemo a a kwa godimo ka gonne ke jone jo bo busang gone jaanong. Go siame go nna le pina e le nngwe kgotsa di le pedi tsa hi-life le go di dira gore di se ka tsa felelwa ke nako mme a re direng mefuta e mengwe ya mmino.
- Go itshepa ke selo se se rategang, e seng boikgogomoso. Go na le pharologano e nnye thata fa gare ga boikgogomoso le go itshepa. Fa o itshepa, o lebega botoka, o ikutlwa botoka, o kgona go buisana botoka, mme mongwe le mongwe o rata seo. Fa o sa itshepe o tla nna o hutsafetse e bile o galefile ka dinako tsotlhe mme banna ga ba rate seo . Ga se fela ka tsela e motho a lebegang ka yone. Go sa kgathalesege gore o mogolo kana o monnye go le kana kang, go itshepa ke gone go go gogelang mongwe le mongwe yo o gaufi le wena.
- O o se ka wa tsaa tshwetso fa o tlaletswe ka gonne seo ke phoso e bontsi jwa rona re e dirang.
- Ka gonne fa o batla go atlega mo botshelong, ga o tlhoke go nna le segakolodi mme fa o na le segakolodi ga o kitla o dira sepe. Mme ga ke reye gore o tshwanetse go nna bosula, ke raya gore o tshwanetse go kgona go tshela botshelo jwa gago. Fa o tshaba go tsaya botshelo, go tla nna thata mo go wena mme o tla bo o seyo. Ka jalo fa e le gore o itse se se go siametseng, tshela botshelo ka botlalo ka gonne ga go na ope yo o itseng gore go tla diragala eng ka moso.
- Ke rata monna yo e leng ene ka boene; yo o sa lekeng go nkgatlha. Ke kgatlhwa thata ke moya wa motho go na le mmele wa gagwe; ke one o nnelang ruri. Ke akanya gore re kgatlhegela batho ka mabaka a a farologaneng. O ka nna wa kgatlhegela mongwe ka ntlha ya madi mme ga ke bone go na le sepe se se phoso ka seo. Batho ba ba farologaneng ba na le maikaelelo a a farologaneng.
- Ke tshela botshelo jwa me letsatsi le letsatsi. Le fano gape, ke rata go nna ka kagiso le go tlotla batho botlhe ba ke kopanang le bone.
- Ga go na sepe se se itiragalelang fela. Sengwe le sengwe se ke leng sone gompieno, ke ne ke ntse ke eletsa go se fitlhelela.
- Fa ditiro tsa gago di tlhotlhelediwa ke lorato, ga o kitla o ineela. Mme ka dinako tse dingwe, maitemogelo ano a kwalwa e le ditshwantsho tse di takilweng.