Wq/skr/یعنی اے جمہوریت اے

یعنی اے جمہوریت ہے، سوال تھئے زرادری صاحب، پارٹی کون چلیسی، جواب ملیے میڈے بعد بلاول یا آصفہ زرداری پارٹی دی قیادت کریسن۔ مرحوم امین فہیم توں گھن کے خورشید شاہ اعتزاز حسن قمر زمان کائرہ قائم علی شاہ، اے او لوک ہن جنھیں ایں پارٹی ءچ زندگی گزاری ہے جنھیں ہر ڈکھ سکھ ءچ ساتھ ڈتے مگر ایں جمہوریت دی وجہ نال پارٹی قائد نیں بنڑ سگیے کیونکہ جمہوریت ہے ،میڈا سوال جمہوریت پسند طبقے کنیں ہے اگر اے جمہوریت ہے ? ول بادشاہت کیا بلا دا ناں ہے، بادشاہ مرسی یا کرسی دی جان چھوڑیسی اوندی جاہ تے اوندا پُتر کرسی سنبھلیسی ۔تاریخ پڑھوں، تاں ہر بادشاہ دے وزیر انتہائ قابل ہوندے ہن مگر کوئ باشاہ سلیکٹ نہ تھیندا اگر کوئ زور مسائیں بغاوت کر کے بنڑ گئے تاں او بی گال ہے۔ مسلم لیگ نون، کوں ڈیکھ گھنو، پارٹی چونکہ ن دے لوظ کنیں شروع تھیندی ہے جیندا مطلب نواز شریف ہے لہزا ایں پارٹی دا مستقبل وی نواز خاندان جمہوریت واسطے انتہائ ضروری ہے بے شرمی دی انتہا ڈیکھو یا جمہوریت دے مونھ تے چاٹاں ڈیکھو شہباز شریف جھئیں بندے کوں چھوڑ کے صرف نواز شریف دی دھی کوں پارٹی دے سر تے مسلط کیتا گئے تاکہ جمہوریت قائم راہوے، راجہ ظفر، شہباز، وغیرہ سارے دفع دور اگر جمہوریت قائم رکھنڑی ہے تاں فضل الرحمان، جمیعت دے ساتھی وی ناراض نہ تھیون متاں سمجھو کل کوں جمیعت دی قیادت غفور حیدری۔مولانا شیرانی، یا کوئ بیا سنبھلیسی نہ سرکار تھاڈا قائد وی جمہوریت دا علمدار ہے ایں وجہ توں پُتر کوں سیاست ءچ گھن آئے تاکہ جمہوریت کوں فائدہ تھیوے اور کل کوں پارٹی دی قیادت سنبھالے جیوے میڈا شیر۔ چلو میڈے وسیب واسی ڈیکھ گھنو کھوسے دریشک لغاری ۔خواجگان،قریشی ہاشمی، عوام دے وسیع تر مفاد کیتے انھائیں کوں ہر دفعہ ہر پارٹی دا ٹکٹ ملدے کیونکہ جمہوریت ملک واسطے انتہائ ضروری ہے ۔ میڈے بھراوو جمہوریت دی تسبیح پڑھ کے شُوکے مارنڑ آلو ایکوں جمہوریت نیں آمریت آھدن بادشاہت آھدن ضروری نیں ضرف فوجی آمر ہووے اے سارے وی آمریت دے نقش قدم تے چلدے پئین، پہلے پارٹی ءچ تاں جمہوریت گھن آؤ پچھیں میں تھاڈے نال رل کے آمریت مردہ باد دا نعرہ لئیساں فلحال تاں اینجھی جمہوریت تے چار حرف۔