Wq/skr/پراڈو گݙی، راڈو کھڑی

پراڈو گڈی راڈو گھڑی کرنڈی دے جوڑے ہزاراں دی جُتی جدی پشتی رئیس زادے ہتھ پیر کپاہ وانگوں چٹے۔ نازک بدن نازک مزاج منرل واٹر پانڑی ۔برگر غزاء ۔ داد ڈیو ساکوں، جانوریں نال ہکے ٹوبھے تے پانڑی پی کے ہک ادھ ٹائم دی رُکھی سُکی روٹی کھاونڑ آلے ۔کاہی بیلچے ہتھ ءچ پاء کے سرادر دے شہر ءچ مفتی وکاونڑ آلے ۔ تھر ءچ بُکھ توں مردے لال تس توں مردے فرشتے۔بُلھے شاہ دی نگری قصور ءچ مظلوم زینب دا لٹیا پٹیا قافلہ ساہیوال ءچ بچیں دے سامنڑیں واقعہ ء کربلا دا منظر ماڈل ٹاؤن ءچ ماواں بھینڑیں کوں اکھیں نال لُٹیندا ڈیکھ کے ۔غریب دی گاں زردار دے رقبے ءچ پیٹھی ہے غریب دا سارا گھر تھانڑے ءچ حاضر ہا جی ہا ساکوں داد ڈیو ۔ انھیں ساریں جرمیں دے کرتے دھرتے جیرھے ہن ۔او ساڈے لیڈر ہن ساڈے قائد ہن ۔ ساڈے ڈکھ آپڑیں ساڈے سُکھ سانجھے ۔جیویں اساں ہر ڈکھ سکھ ءچ سانجھے ہوندے ہیں ایویں اشرافیہ صرف ہک ڈوجھے دے ڈکھ سکھ ءچ سانجھ ہن ۔ایندا مطلب اے ہے اساں بی مخلوق ہیں او بی مخلوق ہن ۔

اُنھیں دے قومی غدار کوں ہیرو بنڑا کے جیل ءچ ہر سہولت ڈتی ویندی ہے ۔ساڈے ہک عام مجرم کوں تھرڈ کلاس ٹارچر کنیں گزار کے زندگی دی ڈُور چھکی گھدی ویندی ہے تساں اساں صرف ڈیکھ نسے سگدے نتاں انھیں تے ساڈے ءچ ڈینھ رات دا فرق ہے ۔اساں ٹشو پیپر مخلوق جیکوں استعمال دے بعد بُھکا ڈتا ویندے ہیں ۔ایں وجہ توں اُنھیں دے نک وڈے تھی گئین ۔اساں جُتی بنڑیے ہیں تاں اُنھیں دی قد اُچی تھئ ہے ۔اساں بے لباسے تھئے ہیں تاں انھیں کرنڈی بوسکی پاتی ہے ۔جڈاں ساڈیں عزتیں دے فیصلے گودے دی جاہ تے تھئیں اساں بے عزتے تھئے ہیں ۔ساڈی بیعزتی دے سر تے گودے دی پگ کوں کلف لگے ۔ساڈی ہر محرومی ساڈی ہر لاچاری بے وسی دے زمے وار اے مخلوق ہے جیندی گڈی تے پھل ودے سٹیندے ہیں جیکوں مرد حُر ۔شیر ۔کپتان ۔مولانا۔گریٹ۔سردار گودا ۔مرشد۔سڈیندے ہیں ساکوں ڈیکھو ساڈے سربراہ ڈیکھو داد تاں بنڑدی ہے مارو تاڑیاں ۔