Wq/skr/بدلدا ویلا

ہک وقت ہائی جڈاں سارا کم دھندا انسان ہتھ نال خد کردا ہائی پیو ڈاڈے ڈسیندے ہِن زمیندار وڈلے وختو جوڑا جکڑ کے بانگاں دے ٹیم نکلدا ہائی تے شامی ڈینھ لتھے واپس آندا ہائی سارا ڈینھ لنگھ ویندا ہائی زمیندار دا زمین وچ محنت کردے کردے شام پئے ویندی ہائی۔ میں تاں او دور نی ڈٹھا لیکن باؤں چنگا تے سوہنڑاں ویلا ہائی لوکاں وچ پیار محبت اتفاق اتحاد ہائی تڈاں مسیتاں کچیاں ہوندیاں ہن تے نمازی پکے ہوندے ہن غرض ہر ہک شے بدل گئی اے۔ اجکل مسیتاں پکیاں سنگِ مر مر تے چپس ماربل دیاں اندر کارپٹ تے اے سی لگے اوئے لیکن نمازی کوئی کونی۔ ایہا حال زمیندارے دا ہے اجکل کیوں برکتاں چائیاں گئیاں ہِن؟؟؟ بیماریاں ودھ گئیاں ہِن؟؟؟ اس دی وجہ ایہا ہے جو اساں ہتھ نال کم کرنڑ چھوڑ دتا ہے پہلے قت وچ سنڑدے ہاسے فلانڑے بندے دی فلانڑے دیہاڑے ونگار ہے تے دعوت نامے بھیجے ویندے ہَن ہنڑ سکے بھراء کوں پتہ نی ہوندا تے کمپین راتیں آ کے بھراء دے مربعاں تے کھلوتی کڑنک کپ کے اس دے گھر پہچا کے لگی ویندی اے۔ اے حالات ہِن پہلے دور وچ انسان مل جل کے کم کردے ہَن اتفاق پیار ہوندا ہائی۔ لیکن آجکل او حالات نی رہ گئے۔ سپرے کھاد دا استعمال ہونڑ نال ماکھی تک ساڈے علاقے چھوڑ کے دور چلے گئے ہِن اس توں علاوہ میکوں چنگی طرح یاد اے میڈے علاقے وچ بے تحاشا سیئڑ یعنی خرگوش پائے ویندے ہَن کالے تتر چٹِےتتر سب کجھ ہائی بھلا اج کوئی شے نی لبھدی ساڈی ند قسمتی اس توں وڈی ہور کے ہوسی کہ میاں آلی دے ہر دیہات ہر قصبے دی دوکان تے شار وچوں منگوائے گئے فارمی انڈے تے ددھ دے پیکٹ وکدِے پئے ہِن تے ہک دور ہائی انہائی دیہاتاں توں دیسی انڈے تے خالص ددھ شار وچ بھیجے ویندے ہَن کڈِے گئے او دور؟؟؟ اے سب یاد کر کے رونڑ آندا اے۔ اے حالات ہِن اساں دیہات وچ راونڑ والاں دے۔ کڈے گئی ثقافت دیہاتاں دی، کڈے گئے او دور پرانڑے۔۔ ہکے جھاء تے سارے راہندے ہَن، ہکے جھاء تے پکدے کھانڑے۔۔ لگدیاں ہَن محفلاں چوپلاں تے، وگدے ہَن خشیاں دے گانڑے۔۔ ودا لبھدا ہاں میں گزرا دور ،،سعد،، کڈے چھوڑ گیا اللّٰہ جانڑے۔ سعد آہیر، کوٹ بیلیاں پائی خیل ضلع میانوالی۔