Wq/skr/ابن کلیم
سئیں ابن کلیم [1] احسن نظامی شاعر ادیب و صحافی دی ہِک لوک نظم۔
ساکُوں آپݨیاں گھانڑِیں وَات ݙِتےِ
اَسَاں قیدی تخت لہور دے نِیں!
ملتان ٻہُوں ذِیشان ہِے
اِیندا اللہ ءِی نِگہبَان ہِے
ڄیڑھے وَݙکے راکھے اِیندے ہِن
اُنہاں دِی کجھ توصیف دے وِچ
ہِک نظم عجب تعریف دے وِچ
حق سچ دے اَکھراں ءِچ سُݨو!
اِتھّوں دِے کُجھ تھنبھ ٹَٻر
انگریزاں دے منظور نظر
اِیندے ہَر فائدے تےِ قابض ہِن
کیا پُوندا اُنہاں کُوں فرق ہِے پِیا
بھانویں شہراد ٻیڑا غرق ہِے پِیا
ٻَس ووٹ گھِنَݨ اِتھ آندے ہِن
ہر پاسے تاݨ تنزلی اِے
اے شہر کنڈر ڄِینویں اَزلی اِے
تعمیر اِتھاں ݙکھلاوے دِی
ترٹی چَور ڄو تھَئی پَئی اِے
دَھرتی دے وَاسِی لوکاں دِی
ساݙے لیڈر چُپ غڑُپ ہِن پَئے
غریب عَوام تے مَہر دِی چھَاں
اِے بݨدے نِیں کہیں سانگے وِی
ٻَس کر کدی دُھپ ہِن پَئے
اِتھ فنکاراں کِیتے کوٹ قِلعے
منصوبہ "آرٹس کونسل" دا
چار کروڑ توں وَدھ دَا ہِے
کئی ٻئے اینجھیں منصُوبیاں تے
"فلوس" وݙا ءِی ڳالیا اِے
ڄے حِصّہ کجھ "فلوس" دا
اتے سچّے ءِی خلوص دا
مرمّت تےِ بَازاراں دِی
بہبُود اُتے فن کاراں دی
ڄݙاں لڳ ویندا
تَر جگ ویندا
وسیب دے لوک وِی آکھِن ہا
ساݙے آپݨے لیڈر مخلَص ہِن
ڄے قدر نہ تھئی انساناں دِی
رَہ سُنڄ ویسن سب کوٹ قِلعے
اِیں دور عوامی دے وچ وی
غریباں ٻیلی اَللہ ہِے
اَتے سچّے قلمکار سئیں
وسیب دا ہِن سنگھار سئیں
درویش طبع فنکاراں دِی
ڄڈاں آپݨی وِی قدر نہ کرِن
کیا سمجھے کوئی اغیار سئیں
قِلعے بند نہ راہندے ہُو!
اخلاص،اخوّت،اُلفت دَا
ڄیڑھے جگ کُوں سبق سِکھیندے ہِن
اِنہاں سانگے چانݨ سِجھ دَا اِے
اِے ڳانڈھے چَن چکور دے نِیں
ملتانی جدّی سَتّی ہیں
ساکُوں مِلّے لیڈر ڈِھلّے ہِن
اَساں لَڑ لڳدے مُنہ روز دے نِیں
ساکُوں آپݨیاں گھانڑِیں وَات ݙتےِ
"اساں قیدی تخت لہور دے نِیں
ٻِیا ݙیکھو
[edit | edit source]حوالہ جات
[edit | edit source]- ↑ از: کتاب: "ہٻڑاس" (سرائیکی وِچ موضوعاتی تے مزاحمتی نظماں)۔ شاعر: ابن کلیم احسن نظامی۔ چَھپَّݨ دا سال: جنوری ١٩٩٦ء۔ نشر کرݨ آلے: گُلِ رعنا ادب سوسائٹی ملتان۔
ٻاہرلے جوڑ
[edit | edit source]
ونکی:سرائیکی لوک ادب
ونکی:سرائیکی لوک شاعری
ونکی:سرائیکی وِچ موضوعاتی تے مزاحمتی شاعری
ونکی:ابنِ کلیم دا سرائیکی لوک ادب وِچ کَم
ونکی:سرائیکی لوک ادب اَتے ابنِ کلیم
ونکی:گُلِ رعنا ادب سوسائٹی دے سرائیکی لوک اَدب وِچ اشاعتاں
ونکی:ہٻڑاس سرائیکی لوک ادب دی پوتھی