Wq/pnb/منیر نیازی
منیر نیازی (1928-2006) پنجابی تے اردو دے پاکستانی شاعر سن۔
فراق دی اک رات
- لمی رات فراق دی
- جیویں ٹھنڈی سِل
- چڑھیا چن اسمان تے
- کنبن لگا دِل
سوچن دی سزا
- مرجاواں تے فیر کی ہووے
- جیوندا رواں تے فیر کی ہووے
- ایسی سوچ چ سال مہینے
- چُپ چُپ لنگھدے جاندے نیں
- اکھ وِچ پھردیاں سب تصویراں
- لہو وچ رنگدے جاندے نیں
اِک کُڑی
- پیار کرن توں کافی پہلے
- کنی سوہنی لگدی سی
- اپنے مرن توں کافی پہلے
- کنی سوہنی لگدی سی
سویر ویلے
- ہولی جئی چُوڑا چھنکایا
- چُونڈی وڈھ کے مینوں جگایا
- میں ویکھاں تے اکھ نہ ملاوے
- چوری چوری ہسدی جاوے
جدوں جنگل وچ ہووو
- سِخر دوپہر نوں جاندیاں جاندیاں
- جے کوئی پچھوں بلاوے
- پچھے مڑ کے کدے نہ ویکھو
- لکھ اوہ منتاں پاوے
اک اُجاڑ شہر
- سارے لوکی ٹُر گئے لے گئی نال قضا
- گلیاں ہوکے بھر دیاں روندی پھرے ہوا
- کندھاں سُنج مُسنجیاں کوٹھے وانگ بَلا
- کُوکاں دین حویلیاں ساڈے ول نہ آ
- اُجڑے پئے مدان وچ بادشاواں دے رتھ
- قبراں دے وچ سوں گئے مہندیاں والے ہتھ
وقت توں اگے لنگھن دی سزا
- آدمی کلا رہ جاندا اے
اپنے آپ وچ رہن دا سُکھ
- مست رہواں میں اپنے آپ وچ دُکھ نئیں کسے مجبوری تے
- سورج چڑھدا ڈھلدا رہندا میرے ہوش توں دوری تے