Wp/zai/Yíz

Nayîz o yîz

Mbay náya ná rè men nayîzà rê men bà nakap nak yek men, naxí yek men, naxí lazo’ men, nayîz bé’l men, nayîz dìb men o kwan ndyak men, nzo zêb men, jwa’ná nak nayîz men zá, ngénta gan lazo’ men naxte men, ngénta gan lazo’ men kê men zí’n, kwa’n men jwa’n wá men, nax men lô dán men, nzo men le’n xabyis men.

Per ¿kwan lìy nayîz mená? Nayîz por lô xgàb mená, por lô yanan chá’n mená, lô xyan chá’n mená lô yalblìnoy, lô yalbreznoy, por rê jwa’n nzilì men liz men, jwa’nà nak yîz lô men, jwa’ná nchalal yîz lô men. Nanakta men gáb na’ kwê men wên, kwê men nawé, kwê men naxut kon ngôl men, kon rê xi’n men, kon rê má’n men. Le’ga rê dí’s ndryo’ rò men, rê jwa’n ndlí men, jwa’n mbez men, jwa’ná nak yîz lô men, nayîz men, nayîz yek men zá ndoja’ mbeznu men rê má’n men, rê chá’n men, ngénta paséns men, rê men yá men nayîz.

Ná tadibá nchalà men lô yîz tís ndlì men tib xgàb mal, nzo xgàb la’n lazo’ men, jwa’ná nchalal yîz lô men, tak nzoy lazo’ men nangotet mená jwa’ná nchalalá yîz lô men. Xgàb la’n nak rê xgàb mal nak ngosa’ men lád le’n, xgàb la’n nak tís ngi’ nu men tà men, nakap ngwi’ men tà men, rê jwa’ná nak xgàb la’n, ná le’ga jwa’ná nchalal yîz lô men, nchalal yîz lô xi’n men.

Le’ tadibá nak rê men tè, nchalal yîz men tís ndyola’z men, tís mbiz komíd o mda men mas bro yej o mda men bro má’ mbay na nangaltay ngwa tadib men, jwa’ná ndyola’z men, mbay na jwa’ná nchalal yîz lô men, nchalalá bo lô men. Rê jwa’ná nak yîz lô rê men tè. Mbay na tís tant nakap nak yek men, nakap nak lazo’ men lô jwa’ná nchàj men, lô jwa’ná nchàj xi’n men, nchàj má’n men, nchalà yîz men, lô yalguj por lô yalkè chá’n men, por lô xyan chá’n men.

Yîz ndelèy tís ndyen yîz men, plôn men ndyen yîz, ndyak men xlyé, nchow yek men, nchow lazo’ men, ndyak men chi’d, ndyak men wá’b, ndyak men mbi, ndyòb mbi ní men, ndyòb mbi xis men, per por lô rê jwa’n ndlí men, jwa’n nak men tyá ndryo’ yîz.

Mbay na nzo rolka’ yîz ndé por lô rê jwa’n ncha men, náya ndobe jwa’n tûb kímiko nzo, ncha men ngíd la’s, nchà men pur ngò la’s, ncha men maruch, ncha men takis, sabritas, totis, nitos, nchu’ men yogur, pur yîz fyer ngo’ rê jwa’ná, le’y ngo’ ren asuk, le’y ngo’ nchò ngud le’n men. Náya tûb yîz nak rê chá’n men, zá ór ngo men nít lô wan, ngo men pastî nzòb, pur yîz ngo’ rê jwa’nà, lál ngo’y yîz lô men, ngo’y yîz lô rê má’n men ná ngo’y yîz lô rê wan, jwa’ná zá ndyen bzin chá’n men, tyá ndryo’ rê yîz tâ naxyén wênta rê chá’n men, rê jwa’n bìn nxe’n men, jwa’ná zá naxyén wênta yal men, nagak wênta yal men. Jwa’ná zá ndablo men kenap men lazo’, kenap men rê chá’n men zá natyák yîzta men.

Mbay na tadibá ndyak yîz men zá ngi’s men yèd chá’n rê Dios, tís mko’ zén men yal ná mdí’s yèd men chá’n Ndòb do’ jwa’ná ngo’y yîz ndyak men, mbay na tís ngonu men mbèd rò yó’ o ngwà men rò bén ná mdí’s yèd men chá’n Mzya’n, ngo’gà yîz tyá, mbay na ngo’y yîz tís ngí’s yèdka’ men zá ndo men god o zá ndo men nobén chá’n god o chá’n xa’ ngùj rê jwa’ná ngo’ yîz ndyak men; mbay na ndyak yîzka’ men zá ngo xa’ dí’s yá’ izyò, yá’ rê Mdan do’ ndo lô izyò, tyá nchalà men lô yîz, tak nzo dí’s lô yá’ xa’. Le’y tís mzyebka’ men, ngolà men lô zêb, tyá mbyá’n xwi’n men, jwa’ná nchalal yîz lô men, axta kè ryo’ zêb zá mbere xwin men tigób.

Mbay na nuga’ Mdan tâ nabáná ngo’ yîz tís kwan mblì nu men xa’, le’ xa’ ngo’ dê, le’ xa’ ngo’ malay, maldít, maldisyón, jwa’ná nchalal yîz lô men, lô xi’n men, axta kè yó god jwa’ná zera’ nawé kwê men. Rê nak jwa’ná nak yîz lô rê men tè.