Wp/yua/Isaac Esaú Carrillo Can

Isaac Esaú Carrillo Can.

Isaac Esaú Carrillo Can (1983 - 23 ti' noviembre tu ja'abil 2017).

Síij tu kaajil Peto, Yucatán. Tu xokaj licenciatura en Educación Artística tu najil xook Normal Superior de Yucatán, ku ts'o'okole' tu xokaj Técnico en Creación Literaria en Lengua Maya tu najil Escuela de Creación Literaria ti' Centro Estatal de Bellas Artes.

Tu ja'abil 2010, tu k'amaj u noj chíimpolalil Premio Nacional Nezahualcóyotl de Literatura en Lenguas Mexicanas. Tu náajaltaj xan Premio Nacional de Literatura Maya “Waldemar Noh Tzec” 2007 yéetel Premio “Alfredo Barrera Vázquez” tu ja'abil 2008 ichil u payalt'aanil VII Juegos Literarios Nacionales Universitarios tu najil xook Universidad Autónoma de Yucatán. Tu k'amaj u yáantaj Programa Jóvenes Creadores ti' FONCA tu ja'abilo'ob 2011, 2013 yéetel 2016 utia'al u ts'íib ich máasewal t'aan.

U láak' ba'ax tu beetaje' u ts'íibtik yéetel u ts'áak cha'antbil balts'am, beeyxan u meyajilo'ob u táakmuk'ta'al miatsilil; ichil u ya'abil u ts'íibe' ku ye'esik u chíikul u ch'i'ibal maaya kaaj.

Tu ts'íibtaj áanalte'ob je'el bix “U yóok’otilo’ob áak’ab”, (“Danzas de la noche”) jóok'sa'ab tumeen CONACULTA tu ja'abil 2011. Táakpaj yéetel u láak' kantúul Aj maaya tsíibo'ob ichil jump'éel áanalte' tu k'aaba'taj “Kuxa’an t’aan, Voz viva del mayab” jóok'sa'ab tumeen SEDECULTA Yucatán yéetel UNAM. Tu molts'íibtaj u ts'íib junjaats Aj ts'íibo'ob ts'a'ab k'aj-óoltbil ti' jump'éel áanalte' tu k'aaba'taj “Kan il’ti’ili” jóok'sa'ab tumeen Ayuntamiento de Mérida, tu ja'abil 2012.

Tu sutaj ich maaya jejeláas ts'íibo'ob, ichil le je'elo'oba' jump'éel ku k'aaba'tik “¿Lo ignoraba usted?”, yáax ts'íibt'an ich kastlan tumeen Yum Alfredo Barrera Vázquez, ba'ax jóok'sa'ab ichil Colección Biblioteca Básica de Yucatán tumeen Secretaria de Educación del Gobierno del Estado.

Tu bonaj xan jejeláas ba'alo'ob bey je'ex le ts'a'ab k'aj-óoltbil bey “Uj” tu kúuchil “Fredric Jameson Gallery”, tu noj najil xook Universidad de Duke North Caroline tu winalil mayo tak agosto tu ja'abil 2014, beeyxan tu galeríail Huret & Spector Art Gallery tu kaajil Boston, Massachusetts, febrero 2015, beeyxan junjaats u boono'ob “Leti’” ts'a'ab k'aj-óoltbil tu winalil junio tu ja'abil 2015 tu najil xook Universidad Distrital Francisco José de Caldas tu kaajil Bogotá, Colombia. Táakpaj ya'ab u téenel ichil junmúuch' paax u k'aaba' “Agua y miel” yéetel áantajnaj ichil jump'éel meyaj u k'aaba' “Kanules del Mundo Maya”.

Isaace', meyajnaj Centro Estatal de Bellas Artes, beeyxan ichil jump'éel kúuchil u k'aaba' Unidad Editorial de la Secretaría de Educación del Gobierno del Estado de Yucatán, tak tu k'iinil kíimik.