Wp/yrk/Хадуна’’ тэвравы’’ сер’’
Ӈахы’ похот нянэй ненэця’’ илевадо’ тэхэт миӈа’’. Не’’ надурць тенева’’, ханзер’’ пенам’, сую’ хобам’, тай, вэрам’ наць толада’’.
Пени мэядамбава, напава
[edit | edit source]Ты’ пенахат илева’ тяхад ненэй не’’ ӈоб’’, пиби’’ сэдыби’’. Пена’’ ӈоб’ тарем’ хобадарев’ напада’’, мэядамбада’’, мюмдебада. Лэнда нид ха’’авравы пенам’ нензумбада, тадтикад няданда перена ӈамзанда’ пеля’’ хархана варабада’’. Тадтикад ӈаябэхэндо’ сид’’лад, тет’’лад, тарето’ мюня’ ӈэсь, падӈэ ӈобт’ сэдалпада’’. Тарем’ сэлмы’’ тырабтамба ти’ ни’ ӈыдабада’’. Ханяӈэхэна тамна мат’’лад лабтёйӈэ сэдалкая, ӈаябэй пена’’ ӈу’ тяхана тырабтамбада’’. Тарем’ сэдалмы си’’ив яля’ тыранана’’. Нарма’ няна пихина хано’’ ниня’ пывхана ӈоб’’ тарем’ тырабтамбада’’. Сававна тыравы, наманзь таславым’ cяй’ вэбахана ябтарамбада’’, пихиня’ нярито’ ябтёй ян’ сядоць ябтарамбада’’. Ябтанана пени’’ вардо’ талбэйӈэ нива хаёва’ е’’эмня, нимняндо’ ӈамгэвахана ютламбада’’. Ябтёй пени тикарихина минха’ напада’’. Пена’’ мэядир’’, хоба’’ мэядир’’ то’’олха. Пили’’ нерде’ нензода ха’’аврамбада, тадтикад юритата миӈа, сэламада. Тарем’ насо’’махад, пили’’ пуда’ сянди ян’ вэнкая, нярпой, тадтикад ямбаданда сер’’ мэятабцяӈгана пэрта. Мэятабця невхы ненэця’’ луцахат хомбасетавы’’, нохо’’, тёня’’ хобавна, харта неблюйвана тадабавыдо’. Мэятабцям’ иняхад ӈун’ сярхая, няби маламда ян’ палкая, пенида’’ не тарем’ мэядаӈгуда. Маядабцяӈгана мэядавы пена сянди ян’ харта вэнаӈга. Тарем’ сававна мэядавы, намы пена’’ сэдыбава то’’олхари’’. Мэяда’’махад тамна пурад’ тухуна ти’ ниня’ сямдарамбада. Сямдаравы пена хурина пива ӈылдаӈэ мэта. Пена’’ таславы сэдора мэта ядко’ ниня напада. Тарця яд надорцяӈгад ӈамгэ’ пирувна хэм’, тыя. Пенам’ напада не ӈамдёрця’ ниня ӈамдё’’ манзара. Яданда тю’’уй мал пулыхэданда пере, няби малда яхад пакалмы. Пена’’ ядалабць’ хоб’’ напа мэтахат ӈамгэ’ мянувна есьдо’ тыямбой’’, ямбарка’’, сидя няд силмы’’. Ӈоб’’ тарем’ еся яӈго’ ӈынхад сертабада’’.
Сую’’
[edit | edit source]Сую’, тандая’ соявы су’’ляко’ хоба’ няра ӈули’’ нянзи’’, сянхана ӈаркавна нэкалма’ няд ӈадаӈгана. Ӈадьбата суикоця ӈударихина мэядамбада, нярада нянотахав’ тамна есяда латака’’я хоба’ ядалабцяӈгана напда. Сую’ хоба мюмдева’ нерцюна ӈобтарем’, ха’’нюй икна пюваркая, ябтарамбада. Ябтарамбава’ ёльцяӈгана сабе вэлкабтамба вэва, ӈаркавна санибтевы суи минханда ӈадода. Ябтёй’’ ӈэдаханда, нензода янабовна ныкалпахая, минха’ ӈударихина пыибада. Нензонда ха’’ам’’махад ӈобтарем’ юритембада, тадтикад сомбовна хасванда’ ёльцянд’ ӈани’ пыибада. Мэяда’’махад пад’ мюня’ сюраӈгу, тадтикад ӈацекы’ панэӈэ, харта саваӈэ пэрта.
Тай, вэра мэядир’’
[edit | edit source]Илева’ тяхад ты’ таё, вэри ненэй ненэця’’ пибито’ ӈылдаӈэ мэйдо’. Ӈопой тай хасава’, тадтикад ӈацекы’’ пиби’’ ӈылдаӈэ мэта, нехэна ты’ тайм’ ӈылдо’’ма хэвы. Ты’ тайм’ ӈэвэйтянда лэхэд ха’’аврамахад, сававна лехебтахая, сянхав яля’ ӈу’ тяхана тырабтамбада. Ханяӈэхэна, ӈока тай таняб’’, ӈобт’ тет’’, мат’’ мянувна лабцёйӈэ сэдалпада’’. Тадтикад ӈу’’ тяхад тырабтамбада’’. Тыра’’махадандо’, cай’ вэбахана ябтарахая, пена’ ядалабцяӈгана напда’’. Нензомда нерде’ ха’’аврамахад юритембада, тадтикад пи’ тяха’ ӈамгэвахана ниданда ютлахая, юритё тарем’ хаебада. Ӈани яляхана, юритата тасла насо’’махад, тадтикад ӈу’ тяха’ мэхэя, харта ти’ ни’ ӈыдахая, сэлабада. Сэла’’мамда мэ’’махад пили’’ пуда’ пенадарев’ сян ёӈорэй нярпой, ямб’ сер’’, нюлкакоӈэ хэванда’ ёльцянд’ напада. Тай’ хавна хасава’ пива вэрахана ӈылдамбада. Вэра’’ пенито’ ниня мэядамбада’’. Ханяӈы не’’ вэри ӈаябэхэто’ пенахат маторкая, сянлад ӈобт’ сэлкая, лабцёйӈэ тырабтамбидо’. На’’ма’ нерцюна халя’ тяркана, халя’ евэйхана масаркая вэра’’ ӈоб’’ яля’ ябтарамбада’’. Тадтикад сомбовна халэ’’ тяро’’ парсо’’махад не минханда надорць теберӈа. Пили’’ пуда’ вэра мэятабцяӈгана мэядамбада. Тарем’ мюмдебадан’ вэра’’, тай’’ вэндурӈа’’, нюлкакоӈэ ханӈa’’. Мэядавы вэрахат, сидя хэвдо’ пена’ пеляхана нядахая, пива’’ ӈылдо’ сэдыби’’. Вэра’ ӈылад тикарихина тай’ тотрев’ нялеӈгана ни ӈа’’, пон’ тарта переӈгу. Хусувэй хойхана илена’’ не’’ сэдорась теневана’’ ӈэбнанда тара. Сэдъя манзаям’ теневана мята’ тер’’ сыра сяхаӈгарт ни ханьтаӈгу’’, мэта ембдяродо’ мел’’мана на’’мы’’ хобахад, пенахад мэё’’ ӈэӈгу’’.