Wp/yrk/Мяˮ

From Wikimedia Incubator
< Wp‎ | yrkWp > yrk > Мяˮ
Chum Siberia.jpg
2012-07-06 Чум на закате..jpg
Чум.jpg
Чумы на берегу Кары.jpg
Стойбище ненцев.jpg

Мяˮ. Ненэй ненэця’’ илева’ тяхад иле мэтидо’, мякнандо’ таранидо’ нянадо’ мюсьлембидо’. Теда лахана, сянди ёнар’’ по’ хэмяхад ненэй мяд’ то’’олха едэйвана ӈадимдевы иле’’ мэта мяд’ тэнз ханяхартана яӈгу, Ненэй мя’’ хурина едейвана мярвада, хавравада хубта ни ӈа’’. Хурина мяд’ мюй тюмярихид хэвняд тода мядонда минханда сэвхата таслаӈгуда: таняна ӈамгэ’ то’’олха ненэцяи’’ илевам’ , ненда ӈамгэ’ то’’олаха ӈэвам’.

Пяныд сер’’ мярвы мякна ӈамгэхэрт ӈылека, выварта ӈарка хад сер’’ ни ӈа’’, хэ’ мерця ӈэбта ӈэя’’, ненэй ненэць’ мя’’ тиканда сер’’ нуӈгу. Сававна тасла, пяныд сер’’ мивы мя’’ ӈута’’ сарвахат мерця харта салэртарха ӈэӈгу. Ямидхы сидна’’ сомтавы хаданана’’, иринана’’ ненэй мяд’ мярыдм’ ӈамгэ’ тотрев’ тасласадо’ , тев’ тенад тикым’ нёда ненэй ненэця’’ не’’ мядодо’ мярыбидо’. Ет’ ӈамгари хад ӈэмяхад ненэй мя’’ ӈута’ сарва’’ ёльцянт’ хунахарт ни тоход’’. Сыра ӈыльня’ макода’ сихит тахъё’’ ёльцянд’ мяд’ сер’’ харта хаморӈа. Илева’ ямбан’ хуркари сата мерця тохартаб’’, сававна мярвы мя’’ тиканда сер’’ паллаӈгу, хунахарт ни хаваӈгу’’. Нензей ян’ ямдава’ ёльцяӈгана сямян мяд’ ӈанэдяр’’ таславы хан’ ниня пэнёда’’. Нензэй ян’ ӈэсомахад мято мярыба мяд’ тер’’ малӈэ варемдо’ мэ’’ӈа’’. Нерде’ мяд’ мюӈэ таславы ян’ не тюмямда паӈг’ ни мэхэя ӈамтаӈгу, тадтикад тюмя’ сидя хэван’ латда лехэбтаӈгу. Тиканда пуд ва’’аванда ӈэбця яӈэ таславэнда ян’ ху’’ неро лехэбтаӈгу. Ху’’неро лехэбтамахад ӈутос’ нид ӈудо хаврахая мято минхандо’ ӈобнзер’’ мярыба тебаӈгуд’’. Пили’’ нерде’ мядм’ мярыбада ненэця’’ сидя ӈобкад сярда макодаха’ ян’ палта’’. Тикы’ пуд макода’ сидя хэвувна ӈани ӈудо’ палта пяӈгу’’. Ӈокдаханда тет юд’ мян ӈухуд ненэй мя’’ палпада. Ӈархандо’ ӈудо’ палсомахадандо’ мюйкодо’ есеӈгу’’. Хурина ет’ ӈамгари ея сидя тю’’уй малхананда сидя пад халакахаюда таняӈаха’. Есянава’ ёльцяӈгана тикы падкоця’ мюмня есянабця’ мал паклемби’’. Халак’ мю’малди паклевы сидя есянабцяӈгана есенана ненэця’’ еи тю’’уняю’ макода’ син’ наволпидо’. Ея’ сидя идэн’ сянхав иня’’ сэлмы’’, тикы ея’ маӈгад’’. Тикахат ея’ иды’’ мюня’ ӈухут сяры’’. Тадтикад ея’ халакаха’ няд ӈани ямбка’’я сидя сяям иня сэлмы. Тикы сяймаха’ мядм’ пэбта сярыбадаха’. Тарем’ мэйравы ея’’ хунахарт ӈыльня’ ни хэӈгадаӈгу’’, пилипон’ пэврёда’’.

Тахарув’ вади[edit | edit source]

Ссылки[edit | edit source]