Wp/wym/Wymysoü

Herb fu Wymysoü

Rynk y Wymysoü

Cacha: «Skiöekumt y Wymysoü»

Wymysoü (pönyś: Wilamowice) ej a śtod y Pöłn, wu hota dy łoüt fun fremda łendyn gymoht. Wymysoü höt agia kultür. Y Wymysoü wönt 2 813 łoüt (2007).

Gyśicht fy Wymysoü

Dy Wymysöjyn zajn ym 1250 jür fum öwyt, dos hast fu Doüćłond oder Flamondyn uf Pöłn gykuma. Dos wiöe a fulk dos zich myt faldot bysieftigt höt. Zy hota jyr śpröch di nö hojt łowt, dos ej a gymiśty śpröch myt doüć, englyś an ołddoüć. Dy bowa hota siejny kładyn di mon nö hojt kon osiojn. Dy jyśta Wymysöjyn hon zich y Wymysdüf ufgyhołda, śpyter his dos Ołdwymysoü, eta hast zy Stara Wieś. Düt go ja der pönysiy fiyśt a śtyk łond cy byota, s wiün düt grusy pyś, hejwułn an gyzympa. Fir dy łoüt wiöe dos ny dy besty woł, dos wiöe myt świerer ot ferbunda. Nö ar cajt gingia zy weter kam miügia. Düt wiös beser, z łond wiöe fłoch s wiün grusy pysia oder uny gyzympa. Düt siofta zy a nojy üdsioft di zy Wilmesau hisa, felajcht fum noma fum fürstejer. Zy hota dö oj świery ot mytum biöm feła. Zy müsta feła do zy oker kunda mocha, fu dom müsta zy łowa. Yms jür 1327 ejwernom z Fjyśtatüm Ojswynca der Chechysiy kyng Johanes Luksemburg. Fu dor cajt wiüda dy pojyn mitłikia uf jyn faldyn, zy müsta ym hier ymazyst ota, ołys gychüt ym kyng. Dos tojyt azu bys cym 1808 jür. Y dom jür kojfta dy Wymysöjyn dos güt fum byzycer Katol Psarski fir 30 000 gułda. Fu dor cajt zajn zy siun frajy łoüt. Dy ot wiüd fertalt under oły pojyn.

Internetyś zajd

• https://web.archive.org/web/20121018113516/http://miasto.wilamowice.pl/