Wp/wls/Ta'ovala

Ko te ta'ovala ko he koloa mo he teu fakafenua o 'Uvea e faka'iloga aki takita 'aga faka'apa'apa.

Higoa

E toe higoa'i te ta'ovala ko te:

Tau'aki
Kie fau

Ha'u'aga

E mahino mai te talatuku ko te ta'ovala ne'e ko he koloa fakafenua mai Toga. Ne'e faka'aoga'i e te kau Toga lolotoga te temi ne'e nonofo ai i 'Uvea (sēkulo 14-16). Ne'e toe mafola tona faka'aoga i te 'u motu ne'e nonofo ai te kau Toga o hage ko te 'u motu o Lau i Fisi.

Fatu'aki

I 'Uvea nei, ko te lau fau ae ne'e faka'aoga'i māhani mai ki te fatu'aki o te ta'ovala.

E kita 'alu o ta'aga te 'ulu fau o vau pea tata'o lolotoga vaha'a e lua pe tolu.

E faka'aoga'i tāfito te fau hina kae toe lelei pe foki mo te fau kula.

E kita faka'aoga'i te fau liliki pe ko te fau fua lalahi kehe pe ke malu feauga te kie fau ki tona gaue'i.

E hae te lau fau, tohotoho fakaveliveli pea lalaga o hiki.

I te 'aho nei, kua toe faka'aoga'i mo te lau'akau 'uvea, te pulu, te kafa mo te palasitike kae tologa pe te lau fau ia, tāfito te fau 'uvea i te fau tahisi.

E toe faka'aoga'i mo te pena ki te 'u ta'ovala ke lanu kehekehe.

Fa'ahiga

Ko fa'ahiga ta'ovala e 3 e fai i 'Uvea nei:

Fakatonutonu (he'e lanu)
Lanu
Fakatoga (mole fulufulu'i i te 'u tapa)

Faka'aoga'i

I tona kamata mai, ne'e ko te ta'ovala ne'e ko he koloa fakataputapu ne'e faka'aoga'i pe ia e te kau 'aliki i 'Uvea nei, i te 'u fono faka'aliki mo te 'u 'avaifo.

I te 'u ta'u kua hili mai, kua hoko faka'aoga'i leva e te haha'i fuli ki te 'u to'oto'oga fakafenua mo fakalotu mai te 'u misa ki te 'u fai 'ohoana mo fai komunio. Mole kei gata ki te kau 'aliki tona faka'aoga'i pea ko he fakahā o takita 'aga faka'apa'apa.

E vala te ta'ovala pea ha'i aki he mo'i kafa pe ko he kilipipi.

Taupau

Ko te ta'ovala ko he koloa fakafenua fakapelepelegesi. E pala pe kai e manu pea vave tona popo mo maumau.

E ma'ua ke kita pelupelu fakalelei o tata'o i he mutu'i fala pe i te lalo palepale.

E lava tona tala'a o hage pe ko te 'u fala.

Matapuna

'Uvea mo Futuna 'Uluaki: Ko te ta'ovala (12/03/2017)