Wp/wls/Kusitino TOA

Ne'e kau Kusitino Poloto TOA i te 'u tagata ma'uhiga o te ma'uli fakafenua, fakapolitike, faka'ekonomika mo fakakautahi o 'Uvea nei.

Ne'e tupu Kusi i Vailala pea ne'e ko 'ana mātu'a ko Soana Patita mai Kafanaume mo Valelia mai Vaitupu. Ne'e 'ohoana Kusi mo Epifania pea ne'e ko 'anā ki'i fānau e 5.

Ne'e ko he tagata ne'e aoga ki te tu'ulaki o te 'u gaue lagafenua pea ne'e kau ki te fakaha'ele o te fakatau'aga magisi o Aka'aka i te 1986 pea mo te laga o te fakatau'aga ika o Vailala i te 1991.

Ne'e hoa gaue kia Silino PILIOKO i te temi ae ne'e pelesitā ai i te kautahi o te kau gaue kele, gelu mo faga'imanu o te telituale (CCIMA) i te 2010.

Ne'e kau Kusi i te falefono fakatelituale mai te ta'u 1987 ki te 1992 pea ne'e toe fua kavega i te ma'uli fakafenua o Utumaka mai te 1994 ki te 2000.

I te 'aho 21 o Novepeli 2000, ne'e finegalo e Lavelua Tomasi KULIMOETOKE ke fakanofo Kusitino o 'Uluimonua, hili te maliu a Atonio Sako. Ne'e fetogi leva Kusi i te tu'ulaga 'Uluimonua i te 'aho 18 o Novepeli 2003 e Soane Vegi TUISE.

Ne'e toe gaue fakamalotoloto ia Kusitino i te atu kautahi ne'e kau ai mai te kautahi tauhi o te 'u aga fakafenua o Vailala ki te fakatahi'aga puipui o te 'ulufenua, te kautahi a te kau gaue kele mo te kau tautai, te kautahi puipui o te feo pea mo te komite fakaekonomika mo sosiale.

Ne'e ko he tagata ne'e faiga mo fetau ki te ma'uli lelei o te haha'i mālalo mo te ekenaki o te tokalelei.

Ne'e ma'uhiga kia Kusitino tana aga'ifenua mo te taupau o te 'u koloa fakafenua o 'Uvea nei.

Ne'e mavae Kusi mo tātou i tona ta'u 58 i te 'aho 8 o Maio 2012.