Wp/wep/Mönster

Mönster (hoochdüütsch: Münster) is en kreisfre’e Stadt in’t Mönsterland in’t düütsche Bundsland Noordrhien-Westfalen un was bet to’n tweten Weltkrieg de Hööftstadt vun de preußsche Provinz Westfalen. Se hett de Ökelnaam Westfalenmetropole, ofschoonst in Baukem, Düörpm, Builefeld un lange Tiet ok Gelsenkiärken mehr Minschen leven. Mönster is de gröttste düütsche Stadt ahn ene Stadtschnellbahn oder Stratenbahn un hett 296.599 Inwahners (31. Dezember 2012). Een vun de öllste School in Düütschland steiht hier, dat Gymnasium Paulinum. Fröher sünd fast aolle Schöler van dat Paulinum Pastörkes worden, un noch vandaage kann man up dese Schoole Latien un Greeksch lehrn. Mönster hett siet de Karolingertiet en Bischop. En Attraktion för de Touristen, de Mönster vandage besöökt, is de Allwederzoo, en graute Deerpark met wilde un exotische Beester. Mönster liggt mittmang in de mönsterlännsche Bucht, so dat dat Land hier platt is, un de hööchste Platz, de Horsteberg blots een paar Meters över’n Rest is. Man seggt, dat man al an’n Maandag weet, welkeen an’n Sünnavend to Beseuk kümmt, so platt is dat Land üm Mönster rüm. In’n Dörchsnitt liggt Mönster 62 m över NN. Dörch dat Stadtrebeet (1975 sünd de neigsten Dörper dorto kamen) geiht de Aa un de Werse . Mönster hett ok en Haven an’n Düörpm-Ems-Kanal, de bi Grieben över de Ems geiht. Stadtdelen sünd:

Albachten
Angelmuë
Ammelsbürn
Cöer
Gelmer
Gievenbeck
Handuorp
Hiltrup
Kinnerhus
Mauritz
Mecklenbeck
Nienberg
Rauksel
Sudmöhle
Spraokel
Wolbiäk