Wp/vmw/Owokana

Yaari axilopwana annli yaapakanne onthamwene. Nto mmosa a yaale ootakhala erooho ahimwiirela nnthamwene awe wiira: -Nthamwene murowe mwawiive ameyanyu wiira nithaaciri. Nthamwene awe ole eemwiira kawiive amaama? Hayi hayi vaavo? Namuthakhala erooho ole athipelela omwiirela wiira mwiire siiso voowii niphwanye muhakhu munceene. Nihiku nnlo, namuthakhala erooho ole aahimukoha wiira: _Ah, nthamwene moowiiva amama anyu? Mulipa oowokiwa aahiira wiira nlelo! Miyo kinoowiiva, maxi koosuwela wiira nyuwo nthamwene munookiwoka. Vano mulipa oowokiwa aahikhalano mwaapalame awe aamuleela itthu soohoolo sooreera wala soonanara, ntoko  ethoonyiheryo, mwaapalame ole aahimuleela mulipa oowokiwa wiira weyo ohiwiive ameyawo, nthamwene awo ole onimoowoka. Namutakhala erooho va aamoonaawe ole opisa owiiva ameyawe ni iokhala tho wiira aahisuwela wiira ole ookhalano mwaapalame awe ommuleela itthu soohoolo sooreera ni soonanara, vano owo aahaavya murette woomwwiive nthamwene awe ole wiira ahalane mwaapalame ole. Okathi okhummyaawe ni murette awe ole arowaka wa nthamwene awe, mwaapalame ole oopacerya wiipa iiraka:

-Mwammiravo wee, niiye niiye niiye (2x)

-Yookhala eneetta, niiye niiye niiye

-Eneetta erwaaka, niiye niiye niiye      

-Varuttuni wa anyu, niiye niiye niiye

Mmiravo ole ohiikoha: uh, exeeni eyo enrwa? Ole ookhuama orowa weetakasa ni oottika. Mwaapalame ole oottikela wiipa:

-Mwammiravo wee, niiye niiye niiye (2x)

-Amwaapara anyu, niiye niiye niiye

-Ahaavya murette, niiye niiye niiye    

-Wiira ewiiveeni, niiye niiye niiye

-Ehale ni miyo, niiye niiye niiye

-Maxi, khannhala, niiye niiye niiye

Anthamwene ale yonnaaya wiira nkiwiivale amaama vano ampheela tho ekiive yoomi?

Ayiiwakaru, apacerya oheetta saana ni anthamwene awe. Namawoka ahittokiha eyoolya owannyawe ni amulattula nthamwene awe. Vano nthamwene awe ayiwakaru olattuliwa, mwaapalame awe aahiipa iiraka:

- Mwammiravo wee, niiye, niiye, niiye (2x)

-wa anthamwene anyu, niiye, niiye, niiye

-omeelo muhirowe niiye niiye niiye

- wookhala murette, niiye, niiye, niiye

- oheliwe muximani, niiye, niiye, niiye

- ni mwalya muhookhwa, niiye, niiye, niiye

Amalihakaru wiipa, namalattula aahoorwa olattula ni attikelakaru owannyawe mwaapalame ahalakaru ohiipa amuleelaka mmiravo ole wiira:

- Mwammiravo wee niiye, niiye, niiye (2x)

- wa anthamwene anyu niiye, niiye, niiye

-Munirowanyuwo niiye, niiye, niiye

-Munoophwanya iparatho niiye, niiye, niiye

-Soovirikana niiye, niiye, niiye

-Sookhuneeliwa niiye, niiye, niiye

-vasulu oheliweene vo ekoopho niiye, niiye, niiye

-Muhilye niiye, niiye, niiye

-Mwalya muhookwa niiye, niiye, niiye

Vaxaakaru, ole oovinya oorowaka oniirani, aphiyakaru oophwanya yeele mwaapalame awe yaamulelawe yiiren’yeene. Tthiri eyoolya yavahiwaawe ekhuneeliweene yaahiheliwa ekoopho osulu. vano, mmiravo ole, ahaakunve olya ahiipakiha ovoreiwa mmirimani voowi ahilye eyoolya ele, ni ahirowa owaani. Vano namalattula wahimunyoonyavo  mwaha woohilyiwa eyoolya ele. Nto, owo, ahaavya makhalelo makina oomookotta nthamwene awe. Ahaavya murette wa maasyeene nto ahimwiirela nthamwene awe ole  wiira meelo mukihoole mukwaha aka. Ni okatheene yoowo aalattuliwawe, mwapalame iiha ahuleliweene wiira alye okhala wiira nihiku na miiravo ole naahiphiya. Vaxakaru namalattula ole aahinvirela nthamwene awe wiira nnrowe vookixela. Nto, yena ohaakhula iiraka: maxi mukaalitte, mwaapalame aka arwe avolowe kinwalele. Namukwaha eemwiira nnaari, so muhule ekeelo eyo muhiye siiso nrowe aarwaaka avoloweke, miyo vookixela. Okhala wiira nihiku naahiphiya, mmiravo aahimwiiwelela enarowasa. Ephiyakarusa, ole aahikumiha eyoolya ni maasi ale elyaasa. Nto mmiravo ole alyaakaru erooho yoopacerya onvoreya ni orapheyasa. Mmiravo eemwiira kinrowa owaani, vano nthamwene awe ole ohiira ni miyo kinrowa owaani maxi kinvira ephiro ekla nno. Vo khaamuhoonle oovaka wootheriwa wiira tomwiivale nthamwene awe. Mmiravo ole aphiyakaru owannyawe, oomphwanya mwaapalame awe ni anamuleela:

-mulopwna nyuwo niiye niiye niiye (2x)

-muhookhwa vo niiye, niiye, niiye

-mwaakunve ovenya niiye, niiye, niiye

- kihiruuye niiye, niiye, niiye

-ekwaha khimwaarowa niiye, niiye, niiye

Noovenya mmiravo ole oorwa mpaani orowa orupa. Maxi mwaapalame ole aanithipelela omuleela iiraka:

-mulopwna nyuwo niiye niiye niiye (2x)

-vankhwaanyu niiye, niiye, niiye

- ni miyo koorowa niiye, niiye, niiye

-nthamwenwene anyu niiye, niiye, niiye

-to wiivaleni niiye, niiye, niiye

-khanhala ni miyo niiye, niiye, niiye

- ni miyo koorowa niiye, niiye, niiye

-mwaakikunxaanyuwo niiye, niiye, niiye

Vano mmiravo ole ohookhwa ni mapalame oorowa.

Ethoonyeryo

Ehantisi enhimwa wiira hiyo nakhalano nthamwene ahu nihinawookana nipheelaka waakhana ele nirinaahu maana khuuvo onsuwela mananna niphwannyaahu.