Wp/vmw/Onthamwene
Onthamwene[edit | edit source]
Aari khapa ni ohala epakana onthamwene. Okhala wiira khapa omusivela oviilu, aahirowa mutakhwani aphela oviilu asara mmurupani mwa awe. Arowaka owaani mphiironi oopwanya mwiri woorakama omonreene okutthelela epwiro, ni okhala wiira khaawerya otupha mwiri ole, owo oohiya murupa awe vale anatthara mwiri mphaka omalenlyaayawo. Vaavale voowi atthikele murupa awe wiira apwaheke ophwannye okuxiweene ni nthamwene awe Ohala. Vano khapa ohiira nthamwene owo murupa aka kihin’ye vo kirowaka oweha mwiri ola omalenlyaayavo.
Ohala aahaakhula wiira: - mutthu etthu awe khanhiya otthuli, ola khahiyo murupa anyu miyo kirootthottha. Nuuvenya Ohala anapwaha ni murupa ole. Okathi khapa ophin’ yaawe owaani ohaaleela amwaara awe wiira miyo kaahipela oviilu masi anthamwene aka Ahala takivunse masi miyo kihaamaalela. Okhala wiira ohala omusivela ikhala, nihiku nlo oorowa omuro aphwanya mwiithe wa ekhala anakurukuta. Akurukutaka, oovolowa mmwiitheni erutthu yootheene ohala mwiila ota. Okathi owo aanivira khapa akunxeene ekatana awe nto nuuweha mwiila wa hala wiiraka koontto, koontto ota owo oophwata iiraka: - Oreeriwa ti wenno. Vano ahala yonnaaya wiira yookhala kiiriwaaka otthuli nno ookhumamo mmwiitheni amphwanya nthamwene awe avarenleene mwiila aphwantaawe.
Ohala ohiira:- anthamwene akinre heeno? Mwiila aka owo aphwantaaya kaatthekenleni?
Khapa ohaakhula: - Mwiila aya? Mutthu kiira etthu awe khanhiya otthuli? Miyo kirootthottha. Ole apiihakaru owaani iira: - Mwaaraka mwaaneele.
Vano ahala arowa okaxari wa makhulupale. Elenpwa ewarakha yaahimya wiira nnimoorwa owannyinyu wiira niphuke mulatthu. Atthu ephiyakaru, ehaakunve ophuka mulatthu khapa ohiira atthu ehaakuve opacerya kaatthuna wiira niwehererye eyoolya nto nikeleliheke ohoolo mulatthu ola. Atthu yaakhulela “aayo”.
Eruuwakaru exima, atthu ale aavahiwa enalya, elyaaka siisale amukhulupale ahiira mathaapa ala asinve mwaani! Enama xeeni ela nihinatoko ahu orerya? Nto khapa ohaakhula wiira:- Mwiila yoowo wa anthamwene awo. Vano a mukhulupale tariyaaya va iwo yaakaxari esivaka? Haya yoomoliwe! Atthu ohiya exima enamoomola ohala mphaka ovariwa ni yookotthiwa ekawaniwa mwaha wa osiva waya.
Ethoonyeryo[edit | edit source]
Ehantisi ela enihimya wiira hiyo natthottha etthu nimwiiwa mukhwihu ariki ti yaawawe, nimunnyeke maana hiyo meelo ninnilipelela omoriwa.