Wp/vmw/Ohikupalana

Ohikupalana

Arri muthuiyana mmosa ahayiwananeya ni aiyawe. Aiyawe yaareya itapha omwaako yahopha enama owaani yaapiha metto miraru mmosa ole hooye. Nto amwaara awe enakoha wiira nto mwetto mmosa ori woowi? Munooraruwela? Wakhuta oxaya munruuha metto miraru paahi!

Mulopwana ohiira nnari mwaaraka muxukhureleke seiyo kinruuhaaka. Nto nihiku nlo, aathiyana ahiira olelo kinootthana kawehe metto owo ommalelaayawo. Moolopwana emwiira mwaara aka muhikithare nto okhala wiira athiyana ale yaaninyesererya ole ohaahiya etthaanaka omwaako. Athiyana ale khiyaasuwela wiira mwetto mmosa onvahiwa mwatto aaphwanyiwa va muraakhoni. Ephiyakarusa amphwanya mwatto va murakhoni nto emwiira mulopwana olelo enama eyo ehinnuwa olelo nooreeriwa. vano mulopwa ohaakhula iiraka ala ti amwaaraka. Mwatto anakhootta iiraka: nthamwene wakhuta enama enrwa va nnookawana awo vo enamahu.

Mulopwana ookhala ooxanka ni amwaara awe mwayeele aaleelyaawe wiira muhikitthare. Vano ohoorwa mulema anarukurerya vaavale akohaka wiira exeeni eniiraneya va?

Mulopwana aakhula wiira miyo kiinreya miraakho sa aka nto amulopwana ala kinaaphwanya vamuraakhoni nto eniira mukiinnele mweeto mmosa voowi kihookhureni miyo kinaameela masi metto mikina kapiha owaani amwaara aka anookikoha wiira mwetto nkina ori woowi? Munooraruwela?

Nto miyo kiniira nnaari okhala wiira khiyaakikupali enakithara va, vano mwatto ola oniira nikawane amwaaraka ala. Mulema eemwiira kihiiwa kinoophuka amukohaka mulopwana ole wiira: moosuwela evirela weiwo?

Mulema oomwiirela mwatto wiira mwahiiye alopwana ala erowele  evirela weiwo eruuhe eyo tennuuwe  ni taniiraaya ekhuure epuhe maana athiyana ala khareere oyeva. Mwaatto aakhulela wiira eroweliweke. Mulopwana ole oovenya orowela evirela weiwo nuumala ahusuwelaka. Va aapisaawe otthika, mulema oomwiirela mwatto wiira mulopwana ole khanwerya oteexa meekhaawe nto kiniira mukinnye amwaara awe yamukhaliherye oteexa. Mwaatto eemwiira eroweke maxi atthu yaakuveke. Athiyana ale enarowa waattimakela aiyeya khuluyi ni mulema emphwanyakaru mulopwana ole mulema ohaaleelasa wiira atthu va eroweke owaani ole mwatto ole onimookhuurani ni mwaphiya owaani muthaamewo.

Vano mulema ole ootthikela wa mwatto eemwiira atthu ale muhawehererye  nto mwatto oomuleela mulema wiira nyuwo nihiku muniiraanyu mweemele vatthi va kinimookhuurani, mulema aakhula wiira nkinkhalakhala kimorelaka vatthi vaawo mphaka nihiku na khiyaama.