Wp/vmw/Namarokolo ni Namanriya

Namarokolo ni Namanriya

Aari namarokolo apakanne opatthani Namanriya. Nihiku nlo, namarokolo eemwiira mwaapara nrowe narukule maape nikhutteye. Mwaapara awe aakhulela wiira nrowe, erukulasa ekhutteya mulittini. Ewehereryakasa ottokotta, namarokolo ohiita arowa aphwanya maape ole alyavo ahimuleenle mwaapara awe ni anyavo akhuneela anarowa owaani.

Nihiku nikina, nthamwene awe namarokolo oorowa oweha maape yaakhutten´yaayasa, okhunulavo omphwanya mavyi eemwiira anyiiyevo anaaka yaale owaani iwe. Ole arowa owaani aaphgwanyakaru anaawe aamanasa. Nto okhumme namarokolo aniipa:

-Munimpwa siiyo ene (2x)

-Maape kinlya kinyelavo (2x)

Nthamwene awe namarokolo oolavula wiira anaaka arookinturuxari. Awosa alyiiye maape naakhutten´yaahu nit ho enyavo. Namarokolo eemwii voo? Kinoorowa kawehevo. Ole aahittikela waamana anaawe, aamanaka hiihaale namarokolo aahittikelatho wiipa iiraka:

-Munimpwa siiyo ene (2x)

-Maape kinlya kinyelavo (2x)

Vano ole aamana anaawe amwiiwakaru namarokolo wiipa eemwiira attuva ti nyuwo mulyiiyevo maape ahu ale ni munyavo? Moosuwela khamukhanle saana!? Taape, miyo kooxukhuru ni koorowa.

Ehantisi ela enihimya wiira olosowelana wala owokana khonreera.

Fausia Alberto

Aari mulopwana mmosa ni awaara awe. Awosa yaahikhalano anamwane aya. Nihiku nlo, ole ni amwaara awe yeemwiira:

-Anamwane va, hiyo ninrowa omatta mwaana owo aanlaka mmuruuhe omatta nno. Muhiiwa?

Asiruuxi yaakhulela wiira: -Aayo.

Anamayari ale erowakaru omatta, owaani mwaana ahalakaru oopacerya wunla. Nto mwaaruuxi oomukuxa mwaana ole anamuhoola omatta. Vano mphironi ohaaphwanya atthu annceene ethukumanneene enamukoha wiira mwaaruuxi munrowa woowi? Ole anaakhula iiraka:

-Kimmuhoola mwaana omatta

-Kimmuhoola mwaana omatta, mwaana omatta

-Kiriye kimmuhoola mwaana omatta

-Aanlaka kimmaaliheeke

Atthu ale yeemwiira nvireke, ole anavira. Ohoolo tho oomphwanya mutthu mukina anamukoha wiira nyuwo munirowa woowi? Mwaaruusxi le anaakhula:

-Kiriye kimmuhoola mwaana omatta

-Kimmuhoola mwaana omatta, mwaana omatta

-Kiriye kimmuhoola mwaana omatta

-Aanlaka kimmaaliheeke

Ole ahiiwa ovira. Nto ohoolo waya aahimphwanya naxuulu anamukoha wiira mwaaruuxi munirpwa woowi ni nmwaana? Ole anaakhula:

-Miyo kimmuhoola mwaana omatta

-Kimmuhoola mwaana omatta, mwaana omatta

-Kiriye kimmuhoola mwaana omatta

-Aanlaka kimmaaliheeke

Nuuvinya, naxuulu ole ohaamiryasa anamwane ale. Amaama aya epherakaru olima avinre ephira ekinaaku erowaka owaani. Nuuphiya owaani, anamwane khanaaphwanya waakoha anamwaatthamanani aya enaakhula wiira yaahoolanasa omatta mwaaryaanyu. Athiyana ale aakuxa elaamina aya enarowa ephira ya omatta, yaaphwanyaka atthu ale yaakohaka wiira mwaana aka moomoona? Awosa yiira nvireke nvireke, ale eviraka. Ohoolo erowa yamphwanya naxuulu yoole nto yeemwiira taata, erukulu ela khereere otepa wuunuwa, mukileela vari anaaka? Muthiyana ole arowa amphula mutthu ole mphaka waaphwanya anamwane yaale yaamiryiwe enakhuma.

Ethoonyeryo

Ehantisi ela enihimya wiira hiyo annatiithi nihinaaruma anamwane mukwaha wootthayiva ehisuwelaka ephira.