Wp/vmw/Naawookwo, Namarokolo ni Nreyi
Naawookwo, Namarokolo ni Nreyi
[edit | edit source]Aari naawookwo, namarokolo ni nreyi epakana onthamwene. Namarokolo eemwiira mwaapara aka nnrowe nnlime etthima ahu wiira nimwaale namuruwa ahu, macookwa ahu wiira nimulyeke. Nreyi aakhula iiraka:
-Mwaapara aka, miyo olima iwo nnkinlikanano. Kinweryaaka va opwanya ovariwe murale, olimmwale ixuwaari khiyalya seyiwo.
Nto vale, namarokolo aahi himya wiira: -ihh, maxi mwaapara aka itthu iyo inookhalakhala imalamale, okhale okathi nyuwo muniiraanyu mmphaveleke itthu soolya sa mmattha iniira nto iyo siimaleene ni ikhomaalalyeene mutthu ovilela ohiweryaka.
Okhala wiira amwaapara awe khiyaapheela omutthariha, yena ohaahiya, oorowa olima ematthan awe mukherekhere wa muro amwaala namuruwa awe ni iima oratteene, amwaapara awe voohisuwela. Nihiku nnlo, nreyi oovira mmattha mme ni oonwehaka namuruwa ole mananna iimalyaawe. Nihiku noottharelana, nreyi ole oottikela ovira mmattha mme onweha namuruwa ole ohinvilela, ni naawookwo iiha aryeene phanaana veexani mmattha memme aawehaka anreyi ale ni naawookwo ole aanilavula ni murima iiraka: -Ale kinimwaamaalela ni nkinoohimya sootheene iye anivaraaya.
Nihiku na neeraru, nreyi ootthikela mmattha mme ohiira: -Koovilela koolamwa, olelo nnto enikiira ekiire, murale ni ixuwaari iiye kaalyaaka soomala. Nto olelo vaa, kinoompacerya omukaaxa namuruwa ola mmosa mmosa. Nreyi ole oomukaaxa namuruwa ole oomulya ni ootthikela omukaaxa oomulya. Vano, ohiira: -iihh, va koovona, kihiiyaxeke onyoonya ovariwa.
Nto, namarokola ohiira iihh va kinrowa omattha. Ophiyakaru omattha, ompwannye naawookwo iiraka wuru-wuru wuru-wuru. Namarokolo ole ohiikoha iiraka: -Namuruwa aka oomala, ale ti anaawookwo, anivara exeeni vaavale? Kinimwaarowela. Amphanyakaru oonwahula iiraka ti nyuwo munimmaliha namuruwa aka ola?
Vano, naawookwo aahipacerya wiipa:
-Ti mii ti mii kiiviwe elimwe (2x), maxi yiiriwaka kinkwela mmattha mmee! Ti mii ti mii kiviwe elimwee.
Namarokolo ootthikela tho onwaxula naawookwo ole. Naawookwo ootthikela tho wiipa: -Ti mii ti mii kiiviwe elimwe (2x), maxi yiiriwaka kinkwela mmattha mmee! Ti mii ti mii kiviwe elimwee.
Namarokolo ootthikela owaani. Okathi vakhaani, nreyi ohoorwa mmattha mme anamukaaxa namuruwa oowuuma ni oowiithoopa anamulya. Avonakaru oorowa owaani. Nto, naawookwo ole oothanana iiraka: -Ale ahoorwa tho otthikela okiiviha meelo!!? Taa po, kooxukhurela.
Vaxaakaru voosiisu, namarokolo oopeherya ookuxa ekatana ni ehipa awe anarowa omattha. Aphiyakaru ommpwanya tho naawookwo mmattha mwa awe ni eemwiira ala nave aakiveliha olelo kinaakuxerya mwiri kaawahulele. Wwahu…!!!
Naawookwo ohiipa:
-Ti mii ti mii kiiviwe elimwe (2x),
-Maxi yiiriwaka kinkwela mmattha mmee!
-Ti mii ti mii kiviwe elimwee(2x).
Vano namarokolo ohiira va kintthikela owaani kakohe miruku ni kaakuxe anaxuulu kaaruuhe mapuro ala va etthu ele yookiveliha, vammanelyaaka yeeyo enihimya wiira kiniiveliwa emattha yeela. Aphiyakaru owaani ohaakuxa Ohano iiraka nnrowe yookhala etthu eri omattha wa aka iwe kayiwihiwe. Atthu yeemwiira nyu munimootha, mu khakhannle anaakwiitthi aniipa nnsipo. Namarokolo eemwiira atthu nnrowe ekitthare yaywelele. Atthu ale ephiyakaru omattha iwe, namarokolo oommana naawookwo ole ni ohaaleela atthu ootheene wiira emaale ewiriyaneke. Nto, naawookwo ootthikela wiipa iiraka:
--Ti mii ti mii kiiviwe elimwe (2x),
-Yiiriwaka kinkwela emattha ela!
-Kiviwe elimwee(2x).
Nuumala, okhumme naxuulu mmosa-mmosa a atthu yaale eemwiira: mwaatthu, ommaniwaru ola onnihimya wiira itthu iya yena khahiyo tommaliha, ammaliha ti ampatthani aya anamarokolo. Atthu yeemwiira nyu munonnyakula, wala ohiiwa wa anyu weyiwo variwe munaamwaareyiwa ni nnsuwa ori wuuluvala wa nyu. Atthu ale aamutthikela tho ommana naawookwo ole. Naawookwo onathipelela iiraka:
-Ti mii ti mii kiiviwe elimwe (2x),
-Yiiriwaka kinkwela emattha ela!
-Kiviwe elimwee(2x).
Vano, okhumelela nanntthompe mmosa vaavale eemwiira khuuu!!! Etthu eyo kihiiwa xaxa, owo oniira ommaniwaru itthu iyo khahiyo toniiya orookhala hiihaale kwaarata. Ola oyivinwe elimwe apwehiwa mmattha mu anakhala muumu. Ammaliha wiiya ipyo mmattha mu ti annreyi annthamwene aya anamarokolo.
Ethoonyeryo
[edit | edit source]Ehantisi ela enihimya wiira: Ti vo hiyo hata nirowaka wa khuta mwiri ntoko wa mukhacu waatthottho akoroxo nto nimmpwanya naawookwo mmukhacuni mme atthawaka, owo oniiha asuwelaka wiira vayiye oowoonani, maana yena ohiiwale okwaarata.