Wp/vmw/Mwali ooreera

Mwali ooreera

Aari mulopwana aamuyanre mwaana awe mmosa ootepaxa oreera. Okhala wiira ekhalayi ele, atthu yaaniiwanana ni muluku ni yaahikhala esiiri, nihioku nlo yaahoorwa alopwana araru wuurya owannyawe nto vayiye eemwiira atthu ettike meelo makaaripi. Alesa erowakaru, paapa aahihala ni amwaara awe ekohanakasa wiira:

-Hiyo nimuyanre muthiyana mmosa ni alopwana yaaruuye wuurya ari araru. Nto va, niireke hayi? Axitiithi alesa, yeemwiira weeso niroweke waamuluku nakohe miruku. Ephiyakaru wa amuluku, muluku ohiira: -Va mwaarowaka mukuxe ekuluwe eyo ni mwalapwa owo. Mwaphiya, okathi mwali owo onrowaawe orupa ohiyu, mwaakuxe axinama ala yarupe ni mwali yoowo ni mwaakhuneela. Mulopwana ole iirakaru hiihaale, ohiyu eriyari oopacerya wiiwa:

-Yuwo muxoveryeke iwo

-Ni nyuwo tho muxoveryeke iwo.

Okathi oxiiyaaya, yaaphwannye axinama ale elikanaka ni mwaana aya nto ehinamusuwela oratteene mwanayaxa eekeekhayi maana ooraaru yaamulikanasa ethoni. Nuumala okathi vakhaani, yaahirwaasa alipa oowuurya. Awosa yaahinnyiwa khula mutthu mwaara awe ni makhumelo a vale, wa khula mutthu a yaale yaahivalaana emakkaasa ilapo soovirikana.

Nuuvira miyeeri vakhaani, axitiithi a aximwali aalaka ekwahaaya wiira yaaxekurye anaaya. Aarowasa wa mwaana aya aakhala elapo yoopacerya nto owo awaakhelelaka aanitthapa iiraka:

-Huurrr huurrr, amaama.

-Huurrr huurrr, amaama.

Okathi anamayari akonnhaaya ihaali, mutthepa aya ohaakhula wiira:

-Nno vakhaani vakhaani. Amwaara aka ala oliima, hata mmatta kinimwaavenxamo wiira nnowe owaani. Maxi etthu emosa ankinyoonyihaaya. Yapheela omuthipa macookhwa khammuthipa vanreerelaawe. Awo anoomukhulasa paahi wa khula vatthu.

Mahiku vakhaani, axitiithi ale aattikela owaani enaleelihana wiira mwaara aka moosuwela wiira mwanihu ole ekuluwe yeele? Khiriwa aayo, ti yeele. Mweeri woottharelana, aavinyasa tho orowa wa mwaana aya mukina. Ephiyakaru, owo onnaatthapela iiraka:

-Wuw wuw, amaama.

-Wuw wuw, amaama.

Axitiithi okoha ihaali, mutthepa eemwiira:

-Nno khetempe. So amwaara aka ala oxaya, mathaapa khanaattha, makina ekhuuraka ekhuuraka. Maxi nniiha niiwananaka.

Axitiithi ettikelakaru owaani, enaleelana wiira akhweya mwaana ahu ti ole mukina, maana iwe naaryaahu tiyoole aari mwalapwa. Mweeri wookiserya, enarowa wa mwaana aya aneeraru. Ephiyakaru, atthu ale otthapeliwa vaalupale. Nto makaaripi, axitiithi aakoha murettele. Mutthepa ohaakhula wiira:

-Nno mureettele khonthowa. Khiyaavo enniinyiinya, hiyo ninniiwanana oratteene. Nalayihana ovara etthu, ninvara oothe.

Nto axitiithi ale tasuwenlyaaya wiira mwaana aya ekeekhayi ti yoole. Okhala wiira athiyana ale yaahiyarihiwasa, nto tanviyaaya anamwane a waakuluwe, a waamwalapwa ni a waamutthu enathelana yaaworusa, ntoko a waakuluwe othela wa amutthu akina waamwalapwa, okhuma vaavale nloko nnavinya neettaka.

Mwali ooreera

Ethoonyeryo

Ehantisi ela enihimya wiira hiyo mulaponi mu nootakaaheryeya. Woonaka hiyo naphiya vattokoni, mwaha wa mukhalelo wa khula mutthu, hiyo nniira ale khare okhala mwalapwa, wala ankhala ntoko kuluwe. Eyo ti eyo, mwaha woowii atthu akina yaakhumme waamwalapwa, akina waakuluwe ni tho akina waamutthu. Olelo va nsina nla na omutthu nihuulaana ni axinama eene. Hata hiyo ninnoona mahiku ala marattha ethataanne nto hiyo naweha nniira: -Hii, mwaaweheke atthu aroothataana, arimwiiwanana vale, maxi ale ehikhanle atthu. Yawehaka Joana