Wp/vmw/Mwaha wa wootha

Aari mulopwana aari ni amwaara awe. Nihiku nnlo, aahiteka mukuso awe ni areya miraakho, okathi aaronwaawe woota amuheya naahe amukapatta anarowano owwaani eettaka mphironi aaniiwa wunliwa ikuttho mwaha woowi mwatto anvanre mwali a waanamwaattamanani awe. Okathi attimakelaawe ikuttho iye  ampwannye mwatto anvanreene mwali. Vano mwatto, oomwiirela mulopwana ole wiira iwo yaphiya iwo anrowaaya wo yaaneene khenhimmwa.

Mulopwana ole aphiyakaru oleeliwa wiira mwatto onvanre mwali nto vaiye oolavula iiraka mwatto ene kookumanano mphironi amukunxeene soo nkaasuwela aamukumihaawewo. Atthu ale yeemwiira nrowe nimutthareke ottuli. Mwatto ole osuwelakaru wiira mulopwana ole oohimya oomukuxa mwali ole ompweha nipuro mulopwana ole aamuttukutthenryaawe vo  naahe ni amukuxa naahe anarowa. Mulopwana ole aaleela atthu ale wiira naahe owo kikumanneno vaava, ni miyo naahe aka karonnwaaka omoota kimuttukutthenrye iwe. Nto atthu yeemwiira nrowe weiwo amuttukutthennryaya wo naahe. Ephiyakaru naahe khamphwanye, amphanye mwali yoole aavariwe ni mwatto. Atthu aakhuwela yiiraka  entawu nyuuwo mmwiivale mwali ola mwaathatunwe mwatto munoothererya wiira avarinwe ni mwatto mureene nyeenyu. Avariwa mulopwana ole eepettiwa mphaka olapha niitho atthu akina yaanikhuwela yiiraka namutthukwelihe mukhatteya akina yeemwiira nnaari, ola nimuroihe omatta yaalimeke weiwo.

Apiihiwakaru omatta owo oopacerya wuuha ni uuhaka siisaale ootthokolela yeele mwatto aahimmyaawe wiira yaaneene khenhimwa. Nxekuwa mwatto ohaaphwanya amulopwana ale omatta anaakoha wiira mwinnreni? Mulopwana ohaakhula wiira ookhala mutthu aavariwe mwatto nto miyo kirowa kahimya wiira mwaatto tonvanre nuumala mwatto ole anvanre naahe kanvaryaaka, vano mutthu ole aaphwanyiweene vaavvale kampwenhakavo naahe. Mwatto eemwira iwoo kaahaaleela wiira yaaneene khenhimmwa   nto vo ahoona  ankukhumuwa naani yaakhala wiira iwo khakihimye kiyawiraneela ela.

Ethoonyeryo

Ehantisi ela enihimya wiira moona yamukhwiinyu mmaale, mwalaleya meelo enimoorukunuwelani.