Wp/vmw/Mwaha wa Oroka

Mwaha wa Oroka

Aari mulopwana ni amwaara awe. Awosa yaanimuhuwa mwaana mmosa ooroka nnthaapu a omosi waathiyana. Wa khula etthu aavahiwaawe ntoko mathaapa owo aamuroka okhalaka wiira tonaavya. Nto nihikunnlo, amulamu awe aamukuxa orowa oxaya. Nuuvenya, aaphwanya mwiithe wa ekhala nto emuruma mmiravo ole wiira athipe. Ole aanithipa akorokotaka, nto okorokonte ikwaha  piili, yaneeraru ekhala yoomuluma owo mmphaka opharelela omwiitheni weyiwe. Va oonaawe ovoreya, aaninla iiraka:

-Amulamu koolummwa aaye (2x)

-Amulamu koolummwa aaye koolummwa aaye

-Moono woolopwana aaye

-Moono woolopwana aaye woolopwana aaye.

Nto mulamu awe waakhulela iirale:

-Opuha ori oleloo!!!

Nuuvenya mulamu awe ole oottimaka orowa owaani ohimya wiira atthu nrowe yamwiiwelele mmiravo ole nsipo oniipaawe nootepa oreera nnlo, maxi atthu yaavinyaka yaattakele para wiina. Atthu ootheene aarowa onwiriyana. Ephiyakaru, mmiravo oottikela wunla iiraka:

-Amulamu koolummwa aaye (2x)

-Amulamu koolummwa aaye koolummwa aaye

-Moono woolopwana aaye

-Moono woolopwana aaye woolopwana aaye.

Atthu yiiwakaru yiirale: -Yeeeee!!!! Nto mulamu a mutthu ole oolavula iiraka atthu khansuwela waakhulela yiireke: -Opuha ori olelooo!! Mmiravo ole anlaka siisaale, ookhuma naxuulu mmosa iira atthu aniinaru, owo iniira oroolummwa omwiitheni iwe aakattaiyewo. Voowii siiso, atthu ale aamukumihawo moono awe omwiitheni ephwanya ntata nootheene ninyaanyeen’yeene. Atthu akina ale yiina mphaka omaala wiina.

Ethoonyeryo

Ehantisi ela enihimya wiira yavakhaani nimphwanyaahu nixukhureleke.