Wp/vmw/Mwaha wa Onthamwene

Mwaha wa Onthamwene

Aari Mulema ni Muluku, apakana onthamwene. Nihiku nnlo, mulema aahikhuruwa otheka amwiittanela muluku wiira nnthamwene owaani iwe kookhururuwa otheka aka wiira koovaheeni ntoko nthamwene aka. Muluku aakhulela wiira aayo kihiiwa. Nto, muluku aahirowa waaleela amwaara awe wiira nihiittaniwa wa anthamwene wiira nawurye otheka. Vano, aathiyana ale niwiiwaa, awo aathita muluhu aaya amvara mulyakhu aaya ni ahiittokiha oratteene, nto enavinyasa erowaka wa amulema. Atthu ale ephiyakaru wa amulema, ahaakeleliwa oratteene, aaroyihiwa mmpaani va saala, ehaataliwa etteere ni aaruuheliwa ekhali ya otheka yoovahiwa aya. Atthu ale aawurya otheka ole, omalakaru, amuluku ni amwaara aya yeemwiira: -Iyo nootepa ottapela ni oxukhurela vannceene anthamwene, va nnii niroweke owaani.

Mulema ohaakhula wiira aayo miyo kihoona oreera tho, maxi va nthamwene muluku, yookhala ettu emosa kimpheelaaka wooleelani ni woovekelani.

Muluku ohaakhula iiraka: -Nkakileeleni. Mulema oolavula iiraka: -Miyo mitano nkire wuuha. Nto, kinoovekela wiira mwaapaceryaka orupiha epula mukileele. Muluku ohiira: -Khuuu, va nto kaarweela wooleelani yeeyo. Mulema eemwiira: -Vo? Muluku aakhula wiira: -Aayo! Maxi, nkinrowa orwa mmansaka. Kinrowa waaruma anna aka orwa wooleelani. Vano mwawoona anamwane eruuyeene, musuweleke wiira anthamwene wu ahanle okolomowa orupiha epula. Mulema ohaakhula iira: -Uuuh! Miyo kihiiwa.

Muluku ni amwaara awe anarowa. Muluku aphiyakaru owannya awe, oolavula iiraka mwaara aka anthamwene amulema khiyaareere onooniha oreera nihiku nnle. Nto va, kinoovekelani wiira muthite musoro ni mukhuruwe otheka. Nihiyo nipake ntoko anthamwene ale niwiihane. Amwaara a muluku aathita, aakhuruwa otheka ni aaruwa exiima. Nuuvenya muluku ohaalattula anthamwene awe amulema wiira erwe yiirele mmpantta niira nle. Mulema ni amwaara awe aarowa. Ephiyakaru ahaakheliwa ntoko yaawaakhelenlyaaya owannyeya. Awo yaahivahiwa ekhali ya otheka ni murama aya. Atthu ale elyaakaru ahiira hiyo nooxukhurela, maxi va nimpheela nittikeleke mmattuli! Muluku ohiira: -Aayo, miyo kootepa oxukhurela. Maxi va, miyeeri sinnimanana. Nto munookoona miyeeri saphiya kaarumaka anamwane. Mulema aakhula wiira: -Aayo, va hiyo noorowa.

Vano, nuuphiya okathi, muluku oopaceriha etteku woopa. Nto atthu ale yaasuwela mmawaani wiira woopacerya ophiya okathi wa epula, yaaniryherya ipa sa aya, yaanikweha imatta sa ya. Vano mulema oniira: -Mmmh, atthu ala  khareere ocokareya. Miyo nthamwene aka onimwaaruma anamwane awe orwa okileela. Maxi atthu ale vatho yaamoonaaya muluku averunyaka yaanivalakela nakhuwo aya, maxi mulema khaiseeteteela nlelo awehererya oleeliwa ni muluku ni yeena empa awe khaatthunenle nnakhala ematta awe khakwenhe. Vano, nuuphiya okathi muluku oorupiha epula enceene mphaka empa ya amulema ophweeya. Nuumala, mulema sommphwanya isara mphaka orowa wa anthamwene awe amuluku emwiira: Nyuwo nthamwene khimwiira mwaamwaaruma aniinyu orwa okileela, nto anamwane ene ti avi? Muluku eemwiira anamwane nyuwo khamonne etteku? khamonne overunya? Vano amulema ari mwi ttulami, yiiraka nyu nthamwene mookihorahorela. Muluku eemwiira taapo, okhala wiira nyuwo khamunleeleya, okhwa wa anyu muhikhalanne empa. Woonaka amulema ni anaaya ene eriki ottulama.  

Ethoonyeryo

Ehantisi ela enihimya wiira hiyo amwaavano nalattuliwa ettiyanxa nihinahalela, maana nookhala oottottelaka muraarelo sinhimwa muttiyanxani mmo.