Wp/vmw/Mulopwana mulavilavi aavenle oxaya
Mulopwana mulavilavi aavenle oxaya
[edit | edit source]Aari mulopwana ni amwaara awe yaakhalasa vattokokoni. Mulopwana ole aanirowa muttakhwani oxaya amwiiva namarokolo ni inama ikinaaku, onaroyiha owannyawe. Nto nihiku nlo, oovela orowa oxaya iira: -iih! Olelo koovela orowa oxaya, mahiku ootheene miyo kinooxaya olelo nkinrowa.
Nuuvira mahiku vakhaani, ole oottikela orowa oxaya amwiiva retthe amukuxa ampera anvara mwetto anarowano owaani anlaka. Nto amaathi awe enwehakaru yaahimwaakuvela omukoha wiiar: - Exeeni?
Mulopwana aahaakhula wiira: -Kaata mwiri nto okiivulaliha mwetto, “aayi kiookhwa vo”! Aathiyana yoowmiira: iyaka khamureere ovulala! Masi mulopwana ole aaniwerya tho orowa oxaya siisaale. Wa mahiku ootheene, aathiyana yaanivekela orapiha mwetto haayiyeya, maxi owo aamikhoottiha. Nraparala ele naari vamwettoni vawe naanipacerya wuutta ni wuunkha.
Amwaara awe yaahivekela tho wiira eraphihe mwetto ole, masi owo aanithipelela okhoottiha iiraka: -Mwarapiha mwetto aka onoomora, mukihiye siisa.
Nihiku nlo, ole avariwa arapihiwa mwetto ole ahipenle, exapala ele yaari va mwetto yiiha esaren’yeene miyuuku ni wuunkha. Vano, atthu ale yaahiweya wiira khinaakhanlevo nikhwatta, ole aapenre exapala ya retthe awara va mwettoni.