Wp/vmw/Mulavilavi

Mulavilavi

Aari mulopwana ni amwaara awe yaakhalasa vattokoni. Ekhalasaka siisaale, yaahaayara anamwane aya alopwana ni athiyana. Anamwane ale yaahinnuna mphaka ophiyerya otheliwa ni othela.

Nihuku nimosa, aahoorwa mulopwana mmosa vattokoni vale wiira amuurye muthiyana mmosa, masi axipaapa awe yaahimwiirela mulopwana ole wiira: -Mulopwana ontthuna omuthela mwaana aka ola ohaana omutekela empaawe ya nluko vamwala woowi mukhaleke ni yoowo.

Mulopwana ole aahaakhulela wiira: -Aayo, miyo kinoowerya oteka empa vamwala. Okathi opacenryaawe othipa, owo waanimulipelavo vamwala vale, aaheererya ikwaha sinceene mphaka wooceela. Aahoorwa tho mulopwana mukina omuurya muthiyana ole, vano axipaapa awe yaahimuhimeerya wiira: -Ontthuna omuthela mwaana aka ola, owo ohaana omutekelaka empa ya nluko vamwala.

Mulopwana ole oomwii: -Miyo kinoowerya. Owo orowa othipa vamwala vale ooceelavo. Nave tho yaanoorwa alopwana anceene yaapheela omuthela muthiya ole masi khaavo aawenrya omutekela empa ya nluko vamwala. Mulopwana mukina aahirowa omurya muthina ole aleeliwa etthu yeele axipaapa awe muthina ole yaapheelaaya wiira khula mulopwana onpheela omuthela muthiya ole ovara. Vano, mulopwna ole aahaakhula iiraka: -Miyo kinoorowa, aphiyakaru aaheererya othipa ohnathipeyavo. Nto, owo aahihiyererya anarowa oxana, avara ekhaka awe amunnya mulamu awe ni amuleela wiira mukuxe ekhaka ela mwaannye amurokorinyu yaapeye ni ekhuuriweke enama yootheene, masi miyo  waaneeliwe muhusi paahi kihiyeriwe.

Enama ele yaahireryiwa yootheene masi atthu ale yaahivelavela mananna woowaaneela muhusi ole. Mutthepa ole opiyakaru waamaathi awe, aahikoha ihaali. Atthu ale yaahimwaakhula: -Nirookukhumuwa muteko mwaaruminhaanyu khoreere ovila, hiyo khaninwenrye waaneela muhusi. Vano, mulopwana ole aahaakula iiraka: -Woovila? Khonaaneeleya? Ni miyo wookivila oteka empa vamwala vale nkinlikanano, atthu yaahiweryake waaneela muhusi owo ni miyo nkinwerya oteka empa vamwala. Okhuma vaavale, mulopwana ole aahithelihiwa muthiyana ole.