Wp/vmw/Chipene

Chipene ni emakhuwa oniitthaniwa oxiphene, elapo emosa enikhala onikhuma epheyo, wala okasikasini wa edistrito ya omwempa. elapo eyo ennivaha nkano ni elapo ya akaapu telekatu, ni muro muulupale oniitthaniwa Luuli. elapo ela, nsina na oxiphene nsina na muro ophattun'we mulaponi memmo, ni onirowa ohelana ophareya ya Osirissa. woopacerani oxiphene nno wiithaniya elapo ya Mwaaliya, okhala wiira mwene aya oniithaniwa mwaaliya. okathi akolono waaryaaya mmosampiiki, mwwliya ahiphukiha otheka owannyawe, khwaalattula atthu khamosakhamosa wiira yahakalaleke. okothi ene yoowo wavuriwaaya otheka, owo ahinyakulihana ni mulamu awe, anapacerya owana. onto okhara wiira Mwaaliya aari ootupaxa, ahimmana mulamu awe mpaka omwiiva. makolono yahimurweela khumpakhira mukaaroni mwaya kumuroyiha. mpaka olelo khosuweliwe waaroyihiwaawe mwene ole. Okathi musatoro orimeelalyaawe, elapo ela yaahihala yaattihiwaka ni mwene Nkittakhulu, no oxiphene nno onapacera wiitthaniya wankittakhulu, okhanle mwene a elapo yo waattamana ni nihimo nimosa na mwene Mwaaliya. Vamanlyaaya ekhotto ya renamo ni frelimimo, nkittakhulu ootthikela elapo awe, vano oxiphene nno onatthapeliwa: otthapeliwa onihiya ottikhiwa, mwene mukina okelelaka mpaani: oothuuwa nsina na mutthu okwin'ye, ohalanaka sootheene saarinaawe, ntoko amwaarawe, anaawe, ni sooreera soothene saarinaawe nsina na Mwaaliya.