Wp/tzm/Tasniremt

Tga tesniremt yat tmazzagt izerrwen ismawen n tɣawsiwin neɣ n tmiḍranin nna ttusemrasnin g kra n taɣult n tmesna d twuri-nnsen g tutlayt n tyuwnin tisnirmanin, ar tzerrew awed imukrisen n usuɣel, win ussurtey d ussentem nna qqennin ɣer usentel-a. Da nettini tasniremt awed i tegrumma n yirmawen, ttusenmelnin s usenɣed, nna izdin d kra n tussna, d kra n tetiknit, neɣ zdin d kra n taɣult iẓlin n umussu anefgan.

Da isenmal ulugen ISO 1087 tasniremt mas tga « azraw ussnan n iwengimen d yirmawen ttusemrasnin g tutlayin n tmazzagt ». S wawal n Eugen Wüster, yan g imesnulfa n tmazzagt-a, irem iga yat tyuwent emm sin wudmawen, yan illa dig-s yisem (g kra n tutlayt ayenna tra teg-t) ittgensasen yan uwengim (yat tyuwent emm tɣara tamiḍrant).

Tettgenses tesniremt g uzraw n ustay d uzraw n ussemres n yirmawen yamun g umawal n tmazzagt, nna s nɣey ad ten-naf g taɣulin-akk° n tmesna: Tasenselkimt, tajerrumt, tasnilest, tusnakt, Tafiluẓufit, tasnijjit, aẓawan... maca ɣyen ad ilin awed g tutlayt tagamant, ayenna ten-ittajjan ad ilin s yat tikkelt g yan ubanek n tesniremt, ɣef ttmagalen imesnirmen, ilin awed g mesmunawal n tutlayt issaren (tagamant), nna s ttmagalen imseknawalen. S umedya, irem tadabut yamu g tesniremt n ifetran maca yamu awed g tesniremt n tsenselkimt.