Wp/tun/Rayi

Rayi uhktɛrashki uhkel'ɔma

Rayi (Latini: Morus rubra, Morus spp.; Ingrasa: red mulberry; Pilanchi: mûrier)

Rayi, rihku hɛntohkusha. Tahta kichu rakuman tarku hotushi raku. Uhktɛrashki tahɛsaninahku. Kata ɔshka hayishi nisara kalina’arahch, uhktɛrashki hayihta, utu na’ara. Rayi uhkhuma atoluni raku. Samatihch, uhkelu ɔshta ahak’ihch mili. Samɔtutihch, uhkelu, ɔshta kunasha humanahku yati. Wista panu lisukati. Haliriyu ahak’ihch sapara yatihch, hishtahahki rayi rawishtuku. 

Tonisɛma rayi uhkhuma sakukata. Uhksih’ɔntahch, rayi huma sam’akihch, lapuya sakutak’ahcha. Kaku lapuya woluwishtuk'ɔhɔhch, Tamaskokiku Talibamak’ɔma rayi ɔshka mari chukata. Hinyatihch, wishiyimohku mashukata. Uhksoluwan uhkkɔrahkanta. Tamaskokiku, rayi ɔshka wishiyimohku ruhuwan kɔraku. Rayi uhktahkishi talu mari chu’ɔnasitihch, Tashihkalpalkaku, Tachahtaku, Tayoroniku tira mash'ɔ'ɔnta.