Wp/tun/Rɔwashi

Rɔwashi (Latini: Sassafras albidum; Ingrasa: sassafras; Pilanchi: bois de filé)

Rɔwashi rihku tohku tahta kichu ahak’ihch tarku hotushi raku. Tihikashi, kata wishi namu arahch, tika panu rawishtuku. Uhktɛrashki, uhktahkishi, ɔshka hotu rina shiriku. Rɔwashi tɛrashki amari enihku nahku poku: kɔrasha, uhkenrahpuninahku, utu enihku. Rɔwashi tɛnakɔla tohku kayisha. Uhkelu ɔshta kunasha ahak’ihch meli.

Tachalakiku Tachahtak’ɔma rɔwashi ɔshkahta wishiyimohku kɔrakata. Rɔwashi ɔshka wishiyimohku tayishi nuhk’utashtuku. Kaku uhkrok’ɔtahch, Takushatiku rɔwashi tɛrashkihta yimohkucha mashuku. Tayoroniku rɔwashi tɛrashki mak’ama samahkuta. Kaku uhktahkishi yasha yatihch, hɛkuhta uwitahki puhtihkuta. Tayoroniku Tachahtak’ɔma yukiwan rɔwashi tɛrashki sihu kirihkunta.