Wp/tun/Chuhkimili

Chuhkimili (Latini: Quercus rubra; Ingrasa: red oak; Pilanchi: chêne rouge)

Chuhkimili, rihku hariya, leyuta raku. Chuhkimili uhkhayitihch, uhktahkishi hotushi na’ara. Uhkhotushi kɔtashtohku. Uhktɛrashki tika: utu tayihku ahak’ihch tohkusahku na’ara. Sinkutulehe tini. Tihika ili pir’akihch, chuhkimili elu sam’aki. Uhkelu tawohku, ɛsa na’ara. Kata halimura pikatishtihki ahak’ihch tasapashtihki na’arahch, chuhkimili lapuya raku.

Oni tashkirupamili yatihch, oni ushohu yuri yatihch, oni ɔruhchohu yasha yatihch, Tachalakiku chuhkimili tahkishi uhksoluwan mari chuku. Ɔkasinima ɔpataha yatihch, pitatashtuk’ɔhɔhch, Talibamaku chuhkimili uhktahkishi wishiyimohku mashuwihch, tɔkasinima sinkyuwaku. Tachalakiku, chuhkimili rihku, lɔhka mashuwan mari chuku. Chuhkimili uhktɛrashkihta muchitohtaya mohtuku.