Wp/tun/Ɛchara

Ɛchara (Latini: Sabal minor; Ingrasa: palmetto; Pilanchi: latanier)

Ɛchara atolunilihchashi raku. Tarkushi yanɛra rɔhpant, tam’ɛma kichu raku. Hali riyu kichu, kata wishi hɛntohku arahch, ɛchara rawishtuku. Wɛhatahani ɛchara rihkunahku raku, wɛhatahani ostayi uhkar’aha. Uhktɛrashki tika, tawihunahku pokati. Tɛrashkitɛpan choku yuhki namu homɔtashtuku. Ɛchara uhktɛnakɔla tohku rɔwa. Ɔshka hayishihta akuhpani raku. Ɛchara uhkelu tohku, tolu, kayi kunasha ahak’ihch meli.

Tayoroniku ɛchara tɛrashkihta uhkri pohkuku. Tihikatɛpan, Nihkirhipu Tayoroniku-Halayihkuku yukatihch, ɛchara ritohku ili kal’urana. Tahumaku ɛchara ɔshka kuchawihch, uhkwishihta ushtosu yuri lapu yaku. Tahumaku ɛchara ɔshkahta wishiyimohku mashuwihch, uyiti ushiratol’ɔma lapu yawan kɔraku. Tahumaku ɛchara ɔshka pohtu samahkutahch, sakuku.