Wp/tig/ዐሰብ

ምን አስመረ፡ እብ ምድር እት ነሳፈት 705 ኪሎምትር እንክር ግብለት ምፍጋር ጸሓይ ክም ሄረርከ፡ ዓሲመት አቅሊም ግብለት በሐር ቀየሕ ላተ ሚነት ዐሰብ ትረክብ። እለ ሚነት እለ፡ ካልኣይት ባብ በሐር ወምድር ምስል ድወል ለተአትራክብ፡ ስትራተጅያይ ዶር እቅትሳድ ደውለትና ተ። እት ዮም 7 ዲሰምበር ምስል መስኡል እዳረት ወማልየት ምዴርየት ዐሰብ አሰይድ ብርሃኔ ኪዳኔ እንዴ ትዋጅሀነ፡ እብ ክሱስ ከደማት እጅትማዕየት ሃድጋም ዐልነ። ከእንዴ አትሌነ፡ ወራታት ዐማር ወከደማት እጅትማዕየት ምዴርየት ዐሰብ ወክሱሰን መዲነት ዐሰብ እግል ንርኤ ቱ፡ ቅራአት በኪተት።

ዐሰብ ሐቴ ምነ 4 ምዴርያት አቅሊም ግብለት በሐር ቀየሕ እት ገብእ፡ ሰለስ እዳረት ደዋዬሕ ዲበን ትትካፈል። ለዳሕያተ ህዬ፡ ሸኻይቶ፡ ዐሰቡይ ወብሌንኮማ ልትበሀለ። መዲነት ዐሰብ 12 አልፍ ለገብእ ሸዐብ ነብረ። ክም ሚነት ወለዐቤት መዲነት ግብለት በሐር ቀየሕ ህዬ፡ ምነ ብዕድ ድዋራትለ አቅሊም ለሔሰት ሐረከት ተጃረት፡ ሓለት ጀው ሰኔት ወብንየት ትሕትየት ለትመልክ መዲነት ተ።

ምን ብንየት ትሕትየት እት ክዳማት ምን እንረኤ ህዬ፡ ኩሉ ከደማት ተለፉናት፡ 24 ሳዐት ከህረበት፡ መዋሰላት በር ወምድር፡ ከደማት ተዕሊም፡ ዓፍየት፡ ባንኪ፡ ጀማርክ ወብዕድ ለበ፡ እግል ትንበረ ለትትሸነህ መዲነት ተ። መዲነት ዐሰብ እት መደት ደርግ፡ መስተዕምረት እብ KC ለትትበሀል መአሰሰት፡ ለአሽቀዉ እለ መሽሮዕ ማይ ዐለ። ሰበት አበረ ህዬ፡ እትለ መደት ጎነ እብ እዳረት አቅሊም ወዴሽ ዐማር ጀብሀት ምፍጋር ጸሓይ ኩሉ እንዴ ሰነ፡ ምን 16 እት ሐርሲሌ ለሀለ ዐወሊ ለልትበገስ 500ሚሊሚተር ሰጣር ለቡ ዐነድር፡ እት ባስከት

ሐቴ ምን መዳርስ ዐሰብ መርከዝ ተውዜዕ ማይ-ሲቶ ክዳማት በረድ ዐባይ መልእ፡ ሐቆሀ ዲብ አካን አትጫራይ (Treatment) እንዴ በጽሐ፡ ሽሙይ ልትናደፍ ወዲብ ብዕደት ባስከት ልትገለል። እሊ ለትጻረ ማይ፡ እብ ሒለት ዲናሞ እብ ዐነድር ምግባይ ወነኣይሽ እት ኩለ ለመዲነት ልትወዘዕ። ለመሽሮዕ ኩሉ ዐነድሩ ወዐወሊሁ ለልአትሐዜ አትሳናይ ሰበት ገብአ እቱ፡ መዲነት ዐሰብ ዮመቴ እብ ረካሰቱ ምን ገብእ ወመትወጃዱ ሰብአ ማይ ካፊ ወነዲፍ ሰቴ ሀለ።

እግል ኦሮ በርሚል ህዬ እብ ሕሳብ 90 ሰንቲም ልትሀየቦም። “ባካት ካምቦ አስመረ፡ መስከብ ‘ኦርባን’ ወከኒሰት-ማርያም፡ ዲብ መወቀል ሰበት ህለየ፡ ለሒለት መቶር ማይ ኢትበጽሐን፡ ምናተ ምን ሳምን ወክልኤ ሳምን በጽሐን ወሰትየ ህለየ። እሊ እግል ልትባለሕ እዳረት አቅሊም፡ እዳረት መዲነት ወፊራሮ ዐማር ጀብሀት ምፍጋር ጸሓይ ማል ብዞሕ ለፈግረ እሉ አትሳናት ዐነድር፡ ሸባቢክ ማይ (Valves)፡ ወብዕደት ብንየት ትሕትየት ናይ ማይ ገብአት፡ ወእብሊ ረህየት ዐባይ ርክብት ህሌት” ልብል አሰይድ ብርሃኔ። እት ከህረበት ህዬ፡ መዲነት ዐሰብ እትለ መደት በራደት ናይ 24 ሳዐት ክድመት ከህረበት ሰበት በ፡ ዲብ ሓለት ሰኔት ህሌት። ምናተ እት ወክድ ሐፋነት፡ ለከህረበት ለሀይብ ጀነሬተራት ሰበት ለሐፍን፡ ዶል-ዶል አትካራም ልትረኤ። እሊ ለገብእ እቡ ሰበብ ህዬ፡ ለሽሕነት ጠለብ ሰበት ትዘይድ ቱ።

“ዔማት ከህረበት ዐሰብ ምን ክልኦት ጀነሬተር ተ። እት ልትዐራረፎ ህዬ ክድመት ለሀይቦ። እግል ኩሉ ወራታት መንበረት ክም ተላጃት፡ ሙከይፋት አብረዶት፡ መርወሓት፡ መገጎታት፡ ለምባት መብረሀት ወአሽቃል መንበረት ብዕድ እቱ ህዬ ልትነፍዖ እቡ። ለክዳማት ከህረበት ህዬ፡ ምነ ብዕድ አማክን ዐድነ ለሔሳ ቱ እግል ልትበሀል ልትቀደር። ጣቀት ሸማልመ ጅርብት ዐለት ላኪን፡ ምስል መትደቃብ ናይለ ወለውል አጊድ ሰበት ከርበት፡ ክድመት ተሀይብ ኢህሌት” ወስክ አሰይድ ብርሃኔ ኪዳኔ።

እት ክዳማት ዓፍየትመ እግል ዐሰብ ወብዕድ አማክንለ አቅሊም ክድመት ለትሀይብ እስብዳልየት መርጅዕየት ዐባይ ህሌት። እምበልሃመ፡ ክልኤ ክሊኒክ ወሐቴ እስብዳልየት መጅተመዕ ህለየ። እተ ባካት ለልትረኤ ሕማማት ህዬ ምነ አቅሊም እንዴ ኢለሐልፍ፡ ልትሳሬ ክም ሀለ እብ ዕንታትነ ለረኤናሁ ጋር ቱ። እት ከዳማት ተዕሊም ህዬ ምዴርየት ዐሰብ፡ ክልኤ መድረሰት ካልኣይት ደረጀት፡ ክልኤ መድረሰት ምግባይት ደረጀት፡ ሐምስ መአንብታይት ደረጀት ወአርበዕ ረውደት ህለየ ዲበ። እለን መዳርስ እት ጥዉር መባኒ ክም ለአደርሰ ወኩሉ ኣላት ምህሮ ለትዐንደቀየ ክም ተን አሰይድ ብርሃኔ ወደሐ እግልነ። ምስል ወክድ ዲብ ተአትሳንየን ወትጠውረን ጊሰትመ ክም ተአትሐዜ አከደ እግልነ። “ለመዳርስ እት ብነእ ጥዉር ለልአደርሰ እት ገብአ፡ መድረሰት ወልደኣብ ወልዴማርያም ሰበት ከርበት፡ በደላሀ ብዕደት መድረሰት ጥውር ብኒት ህሌት። ለመዳርስ ብዕድመ ብናሁ ምን ገብእ፡ መራውሑ፡ ኣላቱ ወድዋሩ እግል ወራታት ደሪስ ወአድረሶት እት ደሐን ደረጀት ክም ሀለ ልትረኤከ። ብዝሔ ደረሳሀን እት ፈስል ምግባይ ቱ፡ ለልአስፍ ኢኮን። እግለ ሐፋነት ሓለት ጀው ህዬ መራዌሕ ሰበት ቦም፡ ደረሳነ ልዉቃም እት እንቶም ክም ደርሶ ጋብእ እሎም ቱ” ልብል መስኡል እዳረት ወማልየት ምዴርየት ዐሰብ አሰይድ ብርሃኔ ኪዳኔ።

ስወር፡ ክብሮም ጸሃዬ እምበል እሊመ ለመዳርስ ተለፉናት-ምድር፡ መክተባት ዲጂታል፡ መዕመል እተ ናይ 2ይት ደረጀት፡ ክምሰልሁመ ብንየት ትሕትየት ናይ ማይ ወብዕድ ከዳማት ኣቲ እለን ቱ። እት ክዳማት እትሳላት፡ መዲነት ዐሰብ ዲብ ጋድም ብሩር ሰበት ህሌት፡ ምን ሸርከት ኤሪቴል ለልሀይበ ታወራተ እት ባካተ ሰበት ሀለ፡ ናይ 08 በሀለት CDM፡ ሞባይል ወምድር ክድመት ተለፉናት ክምሰል በ፡ ምስሉመ ኩሉ ባካተ ሸበከቱ ዋድሐት ክምሰል ተ እብ ዕንታትነ ለረኤናሁ ጋር ቱ። እት መዲነት ዐሰብ ክልኦት ዐባዪ ሸዋሬዕ ህለው። እሎም ክልኦት ሸዋሬዕ ገሌሁ አትሳናይ ለልአትሐዝዩ ምንማ መስል፡ እት መብዝሑ አካናት ደሐን ቱ። ምን ሚነት ዐሰብ አስክ መጣር ለገይስ ሻርዕ ዐቢ እብ ተማሙ አትሳናይ እንዴ ገብአ ዲቡ ሰበት ትሸቀ፡ ክድመት መዋሰላት ሰኔት ለሀይብ። እምበልሁመ ምን አስመረ እንዴ ትበገሰ-ባጽዕ እንዴ ኬደ ዐሰብ ለልአቴ ከጥ ጽርግየ ረድምየት ሀለ። እት ቀላቅል ለትሸቄት ጽርግየ ሰበት ተ፡ ለሔሰት ረድምየት ወጠን እግል ኒበለ እንቀድር። ምናተ እት ሒን ከረም ወሓይዝ ሰበት ባትከ፡ መታክል እት መዋሰላት ትገብእ። ምናተ እግል ተአስንያመ ውጢት ወጣፍሐት ተ።

መዲነት ዐሰብ ምስል ሚነተ ሽእገት ሰበት ተ፡ መሳልሕ ብዞሕ ምነ ሚነት ትረክብ። ናይ ስያሐት ጀዛቢት ተ። እምበልሁመ ምን ድወል ብዕድ እብ በሐር ወበር ለልአቴ ዐፍሽ ብዳዐት ምኑ ሸዐብለ መዲነት ሰልፋይ መትነፈዓይ ቱ። እት ለዋው በሐር ፋዬሕ ሰበት ህለው፡ ምን አርዛቅ በሐሩ ለልትደረር አዳም’መ ሰኒ ብዞሕ ቱ።

እት ዐሰብ ለትረይሐከ ጋሪት ምን ተሀሌ፡ ለልትሐረስ ምድር ምንመ አለበ፡ እት ተጃረት፡ ጀለቦት ዓሰ ወብዕድ ወራታት እት ልትፈረሮ፡ ብዝሓም ምን ስካነ ኦሮትከ እብ ድራሩ እት ለዐይር፡ መናበረት በሲጠት ነብሮ። ዐሰብ ክም ሚነት ወመዲነት ህዬ እብ አክያራተ ለልትመትዖ ጽጎት፡ ግንሓት ወሰዳይት ሕጉዛም ህዬ ምን ዓዳትለ ስካን ሰበት ቱ፡ እት ምግቦም ባይት ለልትመዬ መዋጥን እብ ሕውናሁ ምን ኢገብእ፡ ለአብካት ላቱ ብዞሕ ቱ። ስካነ ወሓለት ጀው (ክሊማሀ) ህዬ ኩሎም ጥዑማም ቶም