Wp/tig/ክታብ - መዐደዩት - ዐጃይብ ወድ-ጎመ

ዐጃይብ ወድ-ጎመ

ዳዊት የውሃንስ

መዳግማይ፡ ብርሃኔ መንገስ

ዲብ ቅብለት ሳሕል ዕስኩር ለዐል ዴሽ ደርግ ምስለ ልባሱ ለአክደር ክምሰል አንበጠ ዲበ ጋድሞታት ምን ለዐሽል ሓምሳይት ሰነቱ ዋዲ ዐለ። ሕነ ዲበ አድብር ለውቁል ሓጣም ሰበት ዐልነ ዐስተር ምን አግያማት ዶል ትቀውዕ እብ ክሻፈት በሐር ቀየሕ እንዴ ተአምሖጥጥ ትርእየ። ዲብ ግረ አባይ ለልትከረየ ወቀንጸ ጥያራት ወሂሊኮፕተራት ሰረፍሪፈት እንዴ ለሀርሰ፡ ኬን ወእንሰር ለትሻወር ደባባት ወመካይን፡ ምን ድፍዖም አስክ ግረ ለልአትቃብሎ ዐስከር አቅመቶት ልሙድ ጋር ዐለ። ሰዋትር አባይ እተ ጀብሀት ምን ቅብለት አስክ ግብለት እት ነሳፈት 100 ኪሎ ምትር ለትመደደ እት ገብእ፡ መትድሃሩ ህዬ ሐድ 70 ኪሎ ምትር ለገብእ ዐለ። አነ ክምሰል ሙናድል እግለ ምድር ፋዬሕ እንዴ ጸብጠ እሙዱድ ለዐለ ዴሽ አባይ ሐቴ አምዕል ምነ አስልሐት ድቁብ ወደባባት እንዴ ተዐንደቀ ማልኩ ለሀለ ምድር አረይ እንዴ ገብአ ክምሰል ልትሐየብ ዳምን ምንመ ዐልኮ፡ ዐመልየት ገልጸጾቱ ወለትጠልቡ እስትሽሃድ ላተ ሰኒ ክቡድ ክምሰል ገብእ ሐስስብ ዐለኮ።

ዲብ ምሴት ዮም 22 ወሬሕ ክልኤ ሰነት 1984፡ እት ረአስለ እት ጀብሀት ቅብለት ሳሕል እግል መደት ሐምስ ሰነት ሻፍፍ ለዐለ ዴሽ እስትዕማር አቶብየ-

-“ውቃው እዝ”- ህጁም እግል ልግበእ ክም ቱ፡ ዲብ ወቅት ሐጪር ህዬ እግል ክለ ለጀብሀት እንዴ ደውሸሸነ ማርሰ ተክላይ እግል ንብጸሕ ክምሰል ዶል ትሸርሐ እግልነ ላቱ። መረ ተዐጀብኮ። ቀደሙ ሕልም እንዴ ገብአ ልትሰምዐኒ ለዐለ ዲብ አማን ትበደለ። ዲበ ህጁም እግል እሻርክ ክምሰል ቱ ሰበት ኣመርኮ ህዬ ክምሰል በክት ዐቢ እንዴ ሐሰብክዉ እብ ፈርሐት ትሳረርኮ። አነ ዕዱ ቅዋት ደባባት ዐልኮ። ለናይ ዜሮ ሳዐት(ዘብጥ ለልነብት ዲበ) ናይ ዮም 22 ወሬሕ ክልኤ፡ አክልሕድ ሳዐት ሰለስ ክምሰል ተ አስአለዉነ። ክርን ደባባትነ እግል ኢልትሰመዕ፡ ዴሽ ለአጌራይ ዘብጥ ክምሰል አንበተ እግል ንሕለፍ አማውር ተሀየቤነ። ምድር ረዪም እንዴ ሄረረ ዲብ ሕቅፍ አባይ ክምሰል ትጸግዐ ህጁም እግል ልውዴ ለትየመመ ገሌ ክፋል ፋርስ ዴሽነ፡ አመቅረብ እንዴ ትበገሰ ቀጣን ልለትበሀል ምድር እንዴ ካየደ፡ ዲብ ከጥ አባይ ክማም ገብአ። ለናይ ዜሮ(ናይ እንባተት) ሳዐት ክምሰል ተመት አጋር ዴሽ ክል-ዎሮት ከእበ ትየመመየ ዲብ ዴሽ አባይ ህጁም አንበተ። ዲብ ክሉ ለእንክራት ጅሌል ክምሰል ዕራይ እግል ልትካሬ ወቀናብል እግል ልትፈናቀሕ አንበተ። ምድር ባሮት ጸላም ዘልመት ዲቡ። ሕነ ለሰብ ደባባትመ እንዴ ትበገስነ አስክ ድፈዕ አባይ ንሄርር ዐልነ። እብ ድፈዕ አባይ እንዴ ትለወሸ ግረ ለዶረ ዴሽነ ሸዕቢ

እግለ አግደ ደጀን ናይ አባይ ላቱ አውገት ወድዋራተ እት ሐንቴ መራቀበት ኣተዩ። ምናተ፡ ለሐርብ ክምሰለ ለትበገሰዩ እግል ልሄርር ኢቀድረ። እበ ጀብሀት ገጽ እብ ገጽ እግል ልህጀም ለአንበተ ዴሸነ ክምሰለ ፋግር ለዐለ ኤታን እግል ልደርክ ኢቀድረ። ለናይ ጀብሀት ህጁም ሰበት ኢትሰርገለ። ለእብ ግረ አባይ ለዶረ ቅዋትነ ዲብ ብቆት አባይ ለከሬ ቴለል ትከለቀ። መጋዌሕ አባይ ለቴለል ሰበት ፈሀመዩ፡ ፍንጡር ለዐለ ዴሹ፡ ደባባቱ ወረሻሻቱ እንዴ ከምከመ እግለ ምን ኬን ከጥ አባይ ለዶረ ወለተሀየበቱ ምህመት እንዴ ሰርገለ እግል ዐውቴ ናይለ ገጽ እብ ገጽ ለሀጅም ለዐለ ዴሽነ ልትጸበር ለዐለ ቅዋትነ እት ከቢን እንዴ ኣተዩ እግል ልደምሩ ትባደረ። ቅዋትነ ህዬ እብ እንክሩ ዐውል ቃሊ እንዴ ደፍዐ ምነ ከርዶን እግል ልፍገር ትቀሰበ።

ሐቆ እሊ ሐርብ እሊ፡ አባይ እበ ረክበየ ዐውቴ ሐዋኒት እንዴ ሰክረ እት ለአደፈርስ ወለትፎፈል ወሬሕ ወደ። ምን ተጅሪበቱ አጊድ ለደርስ ዴሽ ሸዕቢ እበ ለስደፍዩ ፈሸል ሀሮር ጋብእ እቱ ምንመ ዐለ፡ ኤማኑ እንዴ ኢልትሀርበእ ሰበብ ናይለ ፈሸል እግል ለኣምር ተቅዪም ሳብት ወደ። ዲበ ለገብአ ተቅዪም ክሉ ሙናድል ካልኣይ ዶል ህጁም እንዴ ወደ መርባቱ እግል ለአቅስን ጠልበ። ሀደፍ ናይለ ዲብ ጋድሞታት አውጌት ለአስተሽሀደው ምሔርበት እት መባጽሑ እግል ለአብጽሕ እብ ንየት ዐባይ ገለድ እንዴ አተ ትበገሰ። እግል መደት ወሬሕ ህዬ እግል ካልኣይ ህጁም ክሉ ለልአትሐዜ መትዳላይ ወደ። ምሔርባይ ምንለ ሐልፈ ጌገ እንዴ ደርሰ፡ እብለ ትወቀለት መቅደረት፡ ኤማን ወበታከት መርባት ፍራስ እግል ለአቅስን እግለ ካልኣይ ህጁም እብ አኖካይ ትጸበረዩ።

ሜርሓይ ፈሲለትነ ግርማይ( ወድ-ጎመ) ልትበሀል ዐለ። ወድ-ጎመ ገዲም ወበዐል ተጅሪበት ሰዋግ ደባበት ዐለ። በዲር ሰዋግ ዐባይ መኪነት እንዴ ዐለ፡ ዎሮት ምነ ሒለት ቅዋት ደባባት እግል ለአተርዶ እንዴ ትበሀለው ምን ቅስም መዋሰላት ዲብ ቅዋት ደባባት ለትቀየረው ዐለ። ወድ-ጎመ እብ ደአሉ ወሰሓቁ በዲር ዲብ ቅስም መዋሰላት ወሐሬ ዲብ ቅዋት ደባባት ሰኒ ፍቱይ ወእሙር ምሔርባይ ነብረ። ምን ክሉ ወኬን ህዬ እብ ፈራሰቱ ወኤማኑ ልትአመር። እብሊቱ ህዬ መስኡል ውቁል እንዴ ኢገብእ ስሜቱ እምርት ለዐለት። እት ፍንጌ አራግ ወሐወልዕ ለትትረከብ “እብ እሳት አቅስን” ለትትአመር ዕንክለት እብ ስሜቱ “ዕንክለት ወድ-ጎመ” ለትብል ስሜት ተንበለት።

ወድ-ጎመ እበለ ሳደፈ ፈሸል አወላይ ህጁም ውቃው እዝ ወእብ ክሱስለ ለአስተሸሀደው መልህያሙ ሰኒ ገሀ ወትነከደ። እተ አምዔላት ለሀን ገጹ ተናን እንዴ ፈግረ ምኑ፡ ምን ነብረ ሴመ ወምን ሰሓቅ ወትልህየ አስቀበ። መርባት አውኪር እንዴ አቅሰነ ህዬ ክምሰል ኢልዓርፍ ዲብ ገጹ ባይን ዐለ። ሀሮሩ እት ልቡ እንዴ ወደዩ ጅማዐቱ እት ለአትመቃሬሕ ዶር ዐቢ አውፈ። ዲብ ካልኣይ

ህጁም መርባትነ እግል ነአቅስን እብ ፈራሰት ወኤማን እግል ንትሓረብ ህዬ ተዐቢኣት ትሩድ ወዴ ዐለ። ወድ-ጎመ ክሉ ለልብሉ እብ ዐመል ለወዴ ወእግል መልህያሙ መሰል ሰኔት ለገብእ መስኡል ሰበት ዐለ፡ ጎማቱ ወምክሩ ዲበ ዴሽ መትሰምዕ ምሔርባይ ዐለ። አምዕል ሐቴ ዲብ እጅትመዕ ፈሲለትነ(ጋንታነ)። “እስትሽሃድ መልህያምነ ግምሽ ኢበዴ። እግል ልግበእ ለቀድር ክሉ እግል ንውደዩ ቱ። ለልትጠለብ እስትሽሃድ እግል ንድፈዕ ዱሉያም እግል ንግበእ ለአትሐዜ። እስትሽሃድ ሌጠ እንዴ ኢገብእ መቅደረትነ ወምህነትነ እብ ዐመል እግል ነአርኤ ሀለ እነ። ጀላብ ዴሽነ አጋር እግል ንትወፌ ወጀብ። ዲብ እሊ ካልኣይ ህጁም ወቃው እዝ ሚ ክምሰል ሕነ እግል ነአርእዩ ወገቢልነ ዐውቴ እግል ነአድርሩ ሀለ እግልነ” እንዴ ልብል ክእነ ክም ዮም ትዘከረኒ።

ወድ-ጎመ ሜርሓይ ፈሲለት ሌጠ እንዴ ኢገብእ፡ ምስሉመ ሰዋግ ናይ ሐቴ ምን ደባባት ፈሲለትነ ዐለ። ናጅሕ፡ ገዲም፡ በዐል ተጅሪበት ወምኩሕ ሰበት ዐለ፡ ደባበቱ ዲበ ሐርብ ተእሪክ እግል ልሽቄ እበ ለአትዳልየ ወራዕየ አስመነ። ዮም 19 ናይ ወሬሕ ሰለስ 1984 ቀደም አዝህር ዴሽ እት መዳልይ እግል ልግበእ አማውር ተሀየበ። ሰር-አምዕል ህዬ “ትበገስ” ለልብል መምሬሕ ተሀየቤነ። ሐቆ እሊ፡ ክል ዎሮት ከአስክለ ተሀየበቱ ምህመት ትበገሰ። ዴሽነ ለአጋር ዲብ ለአራብድ፡ ዲብ ሰዋትር አባይ ክማም እንዴ ገብአ፡ ሰሩ ገሌ ህዬ ሐወርም እንዴ ዳብአ እግለ ለሀርብ ዴሽ አርበደ እት ወዴ፡ ሰሩ ገሌ እብ ግረ እንዴ ዶረ ኮናት ነዳይት እት ገብእ፡ ሰሩ ህዬ እብ ምግብ እንዴ በትከ እት ወቅት ሐጪር እግል ዴሽ አባይ ፈረትክ ወደዩ። ቅዋት አስልሐት ክቡድ እብ እንክሩ ዲብ ዴሽ አባይ ወአስልሐቱ፡ ቀናብል እንዴ ፌርቅ አባይ ኖስ- ኖሱ አድሕድ ክምሰል ኢሰዴ ወደዩ። ጀብሀት ቅብለት ሳሕል እሳት አላየመት ዲበ። ዴሽ አባይ ሀድፍ ሞት ወመትጸባጥ ገብአ። ለተርፈ ህዬ ግረ እግል ልህረብ አንበተ። ቅያደት ዴሽ ደርግ ዴሾም እንዴ ነዘመው እግል ልትሓረቦ ኢቀድረው።

ዲበ ገብእ ለወዐለ ሐርብ ፈሲለትነ ክምሰል ክለን ብዕዳት ፈሳይል ዲብ ጋድሞታት ቅብለት ሳሕል ዴሽ ውቃው እዝ ትትገልድ ወዐለት። ወድ- ጎመ እግለ ራዕየ ለአስመነ ደባበቱ እንዴ ልትፌተት እበ ወፈሲለቱ እንዴ ለአትመቃሬሕ፡ እግል አጋር ዴሽ እንዴ ለሐልፍ፡ እብ ፈራሰት ወኤማን አምዕል እብ ግዲደ ዐጃይብ እንዴ ሽቄ እግለ ጅግሉብ ዴሽ ደርግ አረይ ዲብ ወድዩ ወሰዋትሩ እንዴ ለሃግግ ወዐለ። ዴሽነ አውጌት ክምሰል በጽሐ ዴሽ አባይ ናይ ሞት ወሐዮት ሰበት ገብአት ዲቡ እንዴ ሰብተ እግል ልጋብህ ጀረበ። ምናተ፡ ለዲብ አወላይ ህጁም እበ ጀረ መታክል ጥሕር ለዐለ ቅዋት አስልሐት ክቡድ ናይ ዴሽነ ሸዕቢ ኬርዓይ ይዐለ እግሉ። አውጌት ዲብ ሐንቴ ዴሽነ ክምሰል አቴት ቅዋት ክቡድ አስልሐት ፔትሮል ወቀናብል እንዴ ጸዐነ አስክ ክራይ ሄረረ።

ክራይ ወድዋራቱ፡ እት ፍንጌ አውጌት ወማርሰ-ተክላይ ለልትረከብ ዐነክል ውቁል ለቡ አባይ እንዴ ሰብተ እግል ልጋብህ ዲቡ ለቀድር ስትራተጅያይ ምድር ቱ። ሰበት እሊ፡ ዴሽ ሸዐቢ እንዴ ለሀጅም አባይ ህዬ ናይ ዳፍዖት ህጁም እት ወዴ ናይ ሞት ወሐዮት ሐርብ እትገብእ ሳዖታት ሐልፈ ወምድር መሰ። ዲበ ጽልመት ሐራስ፡ ልትፌረቅ ለዐለ አስልሐት ዲብ ዓያድ ለልትለከፍ ርሽታት እት መስል ትልጭ-ትልጭ ልብል ዐለ።

ዲበ ላሊ ለሀ ክእነ ክምሰል ዮም ልትዘከረኒ፡ መስሬዕ ወድ እስማዒል ዕንድቅቱ ለዐለት፡ ዲብ መኪነት ሲሲፒ ለትጸዐነ ዙ-23 ሚ.ሜ ረሻሽ ዲብ ሰዋትር አባይ አክልሕድ እንዴ ዘብጥ ሰኒ ለአደሜዕ ሰበት ዐለ፡ ቅያደት ዴሽነ እንዴ ደጋግሞ። “በሎም ሌጠ፡ ጅለፎም፡ እገርከ ምን ዝናድ ኢትሀርሱ” እንዴ ልብሎ ልትሰምዖ ዐለው። ቀናብል እንዴ ፌትት እምበል ዕርፍ ዴሽ አባይ ለዐጭድ ለትመየ ረሽራሽ፡ ሐቆ መትባዳል ብዞሕ ናይ ለክፍ እብ ቅንብለት ደባበት እንዴ ትዘበጠ ህቱ ወለመስሬዕ ሀል ሀል እት ልብሎ ርኤናሆም። መስሬዕ ወድ እስማዒል ለልሐብን ወቀይ እንዴ ወዴት አስተሽሀደት። ለሐርብ ላተ ላሊ እብ ግዲደ እምበል ዕረፍ አተላለ። ምድር ቅሎዕ ወዴ እት ሀለ፡ ዴሽነ ሸዐቢ ሕጁም ስርጉል እንዴ ሀረሰ፡ እግለ ስትራተጅያይ ዐነክል ጻብጥ ለትመየ አገሙደ ዴሽ አባይ እንዴ ደውሸሸ አስክ ማርሰ-ተክላይ ደረከዩ። አስሩ እንዴ ለአሳድር ህዬ ዐጭዱ አስብሐ። ዶር ደባባት ወረሻሻት ዴሽነ ሸዐቢ ዲበ እት ባካት ክራይ ለገብአ ሐርብ መረ ምህም ዐለ። ዶር ወድ-ጎመ፡ ምልህያሙ ወደባባቶም ህዬ ክምሰል በዲሩ ውቁል ዐለ።

ምን ሞት ወመትጸባጥ ለፈግረ ዴሽ ውቃው እዝ እንዴ ልትደረከ ዲበ እግል ትህረብ ምኑ ለኢትቀድር ግንራሪብ በሐር ክምሰል በጽሐ። ቅያደት ዴሽ ደርግ እብ በሀጀት ዐንበልበለው። ዴሽነ አስሮም እንዴ ልትፌተት ዲበ ድዋራት ሰበት በጽሐ። አባይ እተ ጠረፍለ በሐር ባቡር በሐር እንዴ አትጸግዐ ዴሹ እግል ለአድሕን መቅደረት ይዐለት እግሉ። እት ክእነ ሓለት፡ ለዲብ ሚነት ማርሰ- ተክላይ እንዴ ትጅምዐ ሰፊነት ልትጸበር ለዐለ ተረርፍ ቅዋት ዴሽ አባይ ሰአየት እንዴ በትከ እት ለአሎብጥ፡ ቃእድ ውቃው እዝ ብርጋዴር ጀነራል ሐሰን አሕመድ እግለ ለተርፈ ደባባት ወመካይን እንዴ ከምከመ፡ እበ ጠረፍለ በሐር ሸንከት ግብለት ሀርበ። ቅያደት ዴሽነ ሸዐቢ “አባይ መምተለካት እንዴ ነስአ እግል ኢልሀረብ እንዴ ሸፈግኩም ክርዕዉ” ለልብል አማውር ሓለፈው። ለምን ክራይ አባይ እንዴ ለጀልፈ አስክ ማርሰ-ተክላይ ለበጽሐየ ደባባት ዴሽ ሸዐቢ። እትጅሀን ሸንከት ግብለት ምውዳቅ ጸሓይ እንዴ ቀየረየ። እግለ ለሀርብ ለዐለ ዴሽ እግል ልትካረፈ ትባደረየ። ለገበይ ረያም ወእብ ድበብ ለትመልአት ሰበት ዐለት። ደባባትነ እብ ሰበብ ሐፋነት ትለልዐየ። ሰረን ገሌ ማይ ሰበት አክለሰየ ሄራረን ለአትካርመ እት ህለየ። ሰረን ገሌመ እግል ልሄረ ሰበት ኢቀድረየ መቶራተን እግል ለአቅስነ ትቀሰበየ።

እተ ሓለት ለሀ ለእግል ደባበቱ ምን ለዐል አርወሐቱ ራዕየ ለአስመነ ተጅሪበት ዐባይ ለቡ ሰዋግ ወሜርሓይ ፈሲለት ወድ-ጎመ፡ እግል ቴለል እኩይ እት ጀሪካን ካዝኑ ለዐለ ማይ ሰበት ዐለ እግሉ፡ ደባበቱ ማይ እንዴ መልአየ። እበ እሙር መጋይሱ እንዴ ልትፌተት፡ እግለ አግቡይ ለእኩይ እንዴ ሻገገዩ አሰር ዴሽ አባይ አሳደረ። እግለ እብ ዐረባት መደርዓት ወደባባት እንዴ ተለ ለሀርብ ለዐለ ዴሽ አባይ እብ ቀድሙ እንዴ ከርፈዩ መዳፌዕ ደባበቱ አስኩ እንዴ አግነሐየ ከርዐዩ። ሰረን ገሌ ደባባትነ እንዴ ዐርየ መጦር ወድ-ጎመ አባይ እግል ልክርዐ ትጻገመየ። እምበለ ብርጋዴር ጀነራል ሕሴን አሕመድ እንዴ ጸብጠየን ለሀርበ ሑዳት ደባባት ወመካይን፡ ክሉ መምተላካት ውቃው እዝ ስረትክ እንዴ ገብአ ተርፈ።

ወድ-ጎመ ዲብ ጠረፍ በሐር እንዴ በጥረ። “እግለ መጽአው ሜርሐት ገድም ያጅማዐ፡ ፍሬኩም ረአው፡ እግል እሊ ክሮዕ ለሀለ ዴሽ መምተለካቱ ወአርወሐቱ ትሰሎሙ” እንዴ ቤለ ምን ደባበቱ ትከረ። ለክርዱን ለዐለ ጃእር ዴሽ አባይ ምን ዐርባቱ እንዴ ትከረ እንዴ ኢፈቴ እግል ፋርስ ዴሽነ እዴሁ እግል ለሀብ ትቀሰበ። እት ፍንጌለ ለትጻበጠ ዴሽ አባይ፡ ዎሮት እግል ልትሐረክ ለኢቀድረ፡ ዐስከር ለትከለለዉ ገናድ ዐስከሪ ዐለ። ከረ መሐመድ ለልትበሀሎ መልሀይነ እንዴ ሰዐው እግለ ገናድ ዐስከሪ እንዴ ልተንከቦ እግሉ ዲብ መስኡሊነ አምጽአዉ። ክምሰል ትሰአለዉ ናይብ ቃእድ ውቃው እዝ ኮሎኔል ግርመ ተሰመ ክምሰል ቱ ተአመረ።

ግርማይ (ወድ-ጎመ) እብ መትደውሻሽ ውቃው እዝ ወህቱ ለወደየ ፈራሰት እንዴ ልትሐበን። እት ቀደም ደባበቱ እንዴ በጥረ እግለ ቴለል እንዴ ለአቀምት፡ ዕሙር ለጸንሐ ዶሽከ ናይለ ደባበት እንዴ ትፈርገዐ ጥለግ እግል ልትፌረቅ አንበተ። እበ ለኢትጸበርናሀ ብቆት እግለ ፋርስ ሕርየት ላቱ ወድ-ጎመ ሐቴ ምነ ጥለግ እት ረአሱ ዘብጠቱ። ወድ-ጎመ እት ቀደምለ ተእሪክ ለሸቀ እበ ደባበት ወለፈትዮም ምለህያሙ እት ምድር እብ እንቅራሩ ትለከፈ። አርወሐት ወድ-ጎመ እግል አድሐኖት አዳም ክሉ ምንመ ትባደረ ምዝባጡ እኪት ሰበት ዐለት እግል ልድሐን ኢቀድረ። ሐርብ ክምሰል ተመ ለሳደፈ እስትሽሃድ ወድ- ጎመ ምን ዐደድ ወለዐል አግሄነ። ምን ክሉ ወኬን ህዬ እብ ናይነ ጠልገት ሰበት ትዘብጣ ቱ። ለብቆት ለአጅረ መድፈዐጂ ዶሽከ፡ እበ ለሳደፈቱ ምሽክለት ሰበት ዞለ፡ አርወሐቱ እግል ልቅተል መንዱቅ እግል ልንሰእ ትባደረ። መልህያሙ እንዴ ጸብጠዉ እደዩ አስረዉ። ህቱ ላተ ለፈትዩ መልሀዩ ወመስኡሉ ሰበት ቀትለ፡ እብ ሀላግ እት መጅኑን ትቀየረ ወሃፈተ።

ወድ-ጎመ ምህመቱ እንዴ አትመመ አስተሽሀደ። ለመድፈዐጂ ዶሽከ ላተ ለብቆት ክሉ ረአሱ እግል ልትከበተ ኢቀድረ። መዕነውየቱ ሰበት ተምተመት፡ መስኡሊን ክሎም እግል ለአትሳጅዕዉ ጀረበው። “አማነት ወድ-ጎመ እግል

ኢትጠለም እንተ ወቀዩ ወወቀይከ ዶል ትሸቄ ሌጣ ቱ እግል ንትዐወት ለእንቀድር፡” እት ልብሎ ብዞሕ ሰበት ተሃገዉ፡ ሸበህ እግል ልግበእ ቀድረ። ሐቆ እሊ ህቱመ እብ አትናያት ናይ መስኡሊኑ ሰአየት ሰበት ወደ። አማነት ናይለ ፈትዩ መስኡሉ ወመልሀዩ እንዴ ረፍዐ አክል አርወሐቱ ወአክል ወድ-ጎመ እግል ልሽቄ ተዐንደቀ። ሐቆ ዎሮት ወሬሕ ህዬ ዲበ እት ግራት ለትትበሀል አካን ለገብአ ሐርብ ደባበት እብ ደባበት እብ ፈራሰት ወኤማን አስተሽሀደ።