Wp/tig/ክታብ - መዐደዩት - ኢትቅሰን ውቃው

ውቃው ኢትቅሰን

ኢትቅሰን ውቃው

ብንያም ፍስሃጽዮን

ፈብራይር 1984፡ ሳዐት 4፡3፡ ጽብሕ ምድር ክልኦት ሸምበል ዐሳክር ደርግ ዕስኩራም እተ ለዐለው “ክራይ”፡ ቀናብል ወርሳስ ዘልም እተ ዲብ ህለ፡ ለናይ ጠቢዐት ጽልመት ለትገልጽጽ ጽልመት እት ኢኮን፡ በርሀት ሕርየት መስለ ይዐለ።ገበይ ረያም ለሄረረው ሙናድሊን ሐቴ ቦጦሎኒ ናይ ብርጌድ 58፡ እግል አባይ አመተ ኢተአመረት ዘቡጡ እት ህለው። ናይ ሐርብ ንየት እት ኢኮን ረዪም ስዖታት ክምሰል ኢሄረረው ተዕበት ኢትሰመዐቶም። ክምሰል ዲብ ሕፉን ድስ ለአተ ቅርጡጥ ዕንቦበ ርሳስ እት ረአስ አዳም ተበብ ዲብ ልብል ክምሰል ትሰመዐ፡ አባይ እበ ሳደፈ አመቱ ኢተአመረት ህጁም እንዴ በህረረ፡ ሐድ መቅድረቱ እግል ሊዴ እብ ከላሽን ወማሽንጋን እግል ልዳፍዕ ጀረበ። ለስዖታት እንዴ ሄረረ አባይ እግል ልጨርሕግ ወምንኬኑ እግል ልሕለፍ ለትበገሰ ሙናድል እግል ልትዓደሉ ላኪን ኢቀድረ። ለሐዋኒት ጀርቤ ክምሰለ ደብነ ምነ አለበ ዐስተር ለልትቃጠር ጠሹሽ እንዴ ገብአ እተ ዶሉ ሀምደ። ለእብ አመተ ኢተአመረት ለተዐድወነ አባይ፡ መምተለካቱ፡ ገናይዙ ክምሰሁመ ክልኦት ዐስከሪ ተረግ እንዴ አበለ ዕውር ሕደግ ወሐንኪሽ ገብአ ወትፈንጠረ። ሙናድል ህጁሙ እብ ዐውቴ ሐቆለ አትመመ ለትሰለበ መምተለካት ወብዕድ ወሳይቅ ዲብ አከቦትት ገብአ። ሰበቡ፡ ከጥ ማርሰ ቴክላይ-አውጌት እግል ልድበእ እት ኢኮን ክልኦት ሸምበል አባይ እግል ልደውሽሽ ናይ ደንጎበ ሀደፉ ይዐለ። ምናተ ለቴል ክምሰለ ጌመመዩ ይዐለ። ለናይ ሰልፍ ወቀየ እንዴ አትመመት እግል ብዕድ ወቀይ ዱሊት ለዐለት ቦጦሎኒ፡ ሱድፈት “አንስሕብ” ለልብል ትእዛዝ ተሀየበየ። “እንሰሓብ ከፎ?” እግል ክሉ ሙናድል ዝያደት ህዬ እግል መስኡሊን ለአትፈከረ አዋምር ዐለ። ዲብለ ናይ ህጁም አካን ሰማን ሳዐት እንዴ ሄረረውቶም ባጽሓም ለዐለው። እግል ለአንስሕቦ ገብአው ምንገብእ አክለ ሄረረው እግል ለአቅብሎቱ። ሀላክ ናይለ ወደዉ ህጁም እንዴ ኢልትወሰክ እቱ ናይ ሐድ 16 ሳዐት ሄራር። ለምሽክለት ናይ መግዕዝ ወተዐብ ሌጠ ይዐለ፡ መነገፎ ናይለ ቦጦሎኒ እብ ግዲደ እት ኢኮን።

* * *

አምዕል ሐቴ ቀደም ናይ 22 ፈብራይር ህጁም፡ ዲብ ሐሊበት መክተብ ዐስከሪ ጀብሀት ሸዕብየት፡ ምን ቦጦሎኒ ወለዐል ለዐለው ቅያደት ዴሽ እት ረአስ ውቃው እዝ እብ ሰበትለ ገብእ ህጁም፡ እብ አንፋር ስለለ ጀብሀት ተፋሲል ሐብሬ ህዩብ ዐለ። ለህጁም ገጽ እብ ገጽ ሌጠ እግል ልግበእ ኢተሐረ። መጦርለ ናይ ገጽ እት ገጽ ለተአሸክት ቅወት ዲብ አግደ ናይ መርከዝ ቅያደት

ወቃው እንዴ አቴት ህጁም ለወትወዴ ብርጌድ እግል ተሀሌመ ብስር ናይለ ህጁም ዐለ።

ዲብ ደውሸሾት ውቃው እዝ እግል ልሻርከ ለተሐረየ ውሕዳት፡ ብርጌድ 23 እንዴ ተሐልወሸት ዲብ ከርስ መርከዝ ቅያደት ወቃው “አውጌት” እግል ትእቴ፡ ወብዕዳት ውሕዳት ገጽ እብ ገጽ እግል ለአሽክተ፡ ሐቴ ቦጦሎኒ ናይ ብርጌድ 58 ህዬ ከጥ ማርሰ ቴክላይ-አውጌት እግል ትብተክ ዐለ ሀደፈ። ሀደፍለ ናይለ ህጁም እግል አባይ እንዴ ደውሸሽከ ዲብ ናይ አማውር መርከዝ ውቃው ዲብ አውጌት መትራካብ ዐለ። ዲብ አውጌት ለተአቴት ብርጌድ 23 ክምሰልሁመ ናይ ብርጌድ 58 ሐቴ ቦጦሎኒ እብ አንፋር ዐይንጀብሀት እንዴ ትመረሐየ ዲብለ ህጁም ገብእ እተ አካን ሸሐገየ።

* * *

እብ ሽሂድ ሙናድል ስፋፍ ወገብረሂወት ዘሞ (ወድ ልቄ) ለትትመረሕ ናይ ብርጌድ 58 ቦጦሎኒ፡ አስክ ሀደፈ ትትወከል እት ህሌት ክሉ መዳሊታ እትምምት ዐለት። እለ ቦጦሎኒ እብ ጀሀት ድማናይት ጀብሀት ቅብለት ሳሕል ለህለ አባይ ለኢራቅቡ ድዋራ ፋዲ እንዴ አቴት፡ ዲብ ባካት ክራይ ሻፍፍ ለዐለ ክልኦት ሸምበል እንዴ ደውሸሸት፡ ከጥ ማርሰ-ቴላይ አውጌት እግል ትድበእ ዐለትምህመተ። ለሀደፍ፡ ዲብ አውጌት ወድዋራተ ህጁም ለገብአ እቱ ውቃው እዝ፡ ምን ማርሰ ቴክላይ ሰዳይት እግል ኢልርከብ ክርዐት፡ ምን ናይ ሐርብ መንጠቀት እግለ ሀርበ ጽዋር ወዴሽ አባይ ህዬ አስክ ማርሰ ቴክላይ እግል ኢልጅረጥ እንዴ ሐነቅከ ጸቢጥ ዐለ።

ምን ድዋራት ፈሕ ወዜሮ እንዴ ትበገሰት ዲብ ጋድሞታት ክምሰል ትከሬት፡ መልሀቴ ዲበ ልትበሀል ሕሊል ለተአከበት ቦጦሎኒ፡ እግል እሊ ረዪም እንዴ ሄረርከ ለትወድዩ ህጁም ለተሐረ እቡ ሰበብ፡ ናይ ሄራር እገር ተጃርብ ሰበት ዐለ እላ ቱ። አስክ ሀደፈ መለርሑወ ህዬ ሙናድል ጸሃየ ተወልዴ ለብእቶም አንፋር ስለለ ናይለ ጀብሀት ዐለው።

ሳዐት 6፡30 ሐቆ አድህር ለረያም መሳፈት እብ ናይ እስተንቡረት ምስዳር ተአምበተት። መራቀበት ጀላብ እግል ትትወጤ ስዕ ፈሳይል ለዐለው እለ ቦጦሎኒ እብ ጋድም እብ ስዕ ሴር ትበገሰት። ለሄራር እብ ጋድሞታት ስዖታት ረዪም ለነስእ ሰበት ዐለ፡ ለለትዕብ ክምሰል ገብእመ ሸክ ይዐለ።

ለፋይሕ ጋድም ለበዝሐ እቱ ሰፈር፡ ገሊል ለልትበሀል ዲብ ሒን ሐጋይ ለየብስ ወድብ ሒን አውል ለወሼዕ እብ ብዝሔ ለልትረከብ እቱ ዐለ። ሒን ሐጋይ ሰበት ዐለ ህዬ እሊ ሰዐር ምስለ ዲብ አቅሩዱ ለልትከወንሖጸ እንዴ ትወሰከ፡

ለቦጦሎኒ ትከልቁ ለዐለት አጭፋር፡ አባይ እግል ኢልስምዑ አፍረሀ። ምናተ፡ አባይ ምነ አካን ረዪም ሰበት ዐለ፡ ለጭፍር እት ረአስለ ቦጦሎኒ ለከልቁ ብቆት ይዐለት።

ቦጦሎኒ አርበዕ ሳዐት ክምሰል ሄረረት፡ እግል መደት ሳዐት እግል ተዓርፍ ትቀረረ። ሰበቡ ህዬ ለሄራር እብ ጋድም ሰበት ዐለ፡ ለመርሑወ አንፋር ስለለ ጀብሀት አየ ክምሰል በጽሐው ወከም ክምሰል ተረፈዮም እግል ለአክዶ ዐለ እሎም። ለዲብ ሰፈር አምሰው ሙናድሊን መደት ሐጫር ሐቆ ዓረፈው ሽውየ እብ ስምጦም ገብአው። ሙናድል ጸሃየ ወአንፋር ስለለ ጀብሀት፡ ምስል መስኡሊን ቦጦሎኒ ሽሂድ ስፋፍ ወወድ-ሊቄ እንዴ ገብአው እብ በጣጢር ዲብ ለአነውሮ እብ መደጋግ ከሪጠት እንዴ መደው መካሪትለ ምድር ገንሐው። ለሰፈር ዲብለ መሐበሪ(እሻረት) ለአለቡ ጋድም ምልሆይ ሰበት ዐለ ዲብ ከሪጠት ወኮምፓስ እግል ልእመኖ ላዝምቱ።

ሐቆ ሐቴ ሳዐት፡ ቦጦሎኒ ምነ ዓረፈት እተ አካን እንዴ ቀንጸት ሄረረ እግል ተአተላሌ ትከማከመት። እተ ወክድ ለልሀይ ዲብ አውጌት ዘብጥ ድቁብ ወሓባሪ ርሳስ ትልጭ ትልጭ እግል ሊበል አምበተ።“ጅማዐትነ ህጁም አምበተው” ለልብል ናይ ፈርሐት ሀገጊት ምነ ዲብ ሰፈር ለዐለ ሙናድል ትሰምዐ። እለ እብ ብሪራይ ወሙናድል ተኽለ ልብሱ (ወድ ልብሱ) ዲብ ትትመረሕ አውጌት እንዴ አቴት እት ረአስ ውቃው ህጁም ለጠለቀት ብርጌድ፡ ዲብለ ትሰተተት ናይ ዜሮ ሳዐት አክል ሕድ ሳዐት12፡50 ላሊ እት ረአስ አባይ ህጁም ጠለቀት።አክራናት መዳፍዕ እግለ ቦጦሎኒ ዲብ ሀደፈ እንዴ በጽሐት መልህያመ እግል ትምሰል ረመጨየ። ለመትረማጭ ላኪን ‘ማነህ’ ለትብል ክርን ለተከርዑ መስለት። መረሖ ለዐለው አንፋር ስለለ ክርን አባይ ክምሰል ሰምዐው ክምሰል አርዌ ዲብ ምድር ትሰተው። ቦጦሎኒ እብ ተማመ ሜርሐተ እንዴ ተሌት ዲብ ምድር አክረረት።

“አንቴ ማነህ” አንፋር ስለለ እብ ህግየ አምሐርኛ ረድ ፍዕል ሀበው።

“አንቴ ማነህ” ለዐሳክርመ ሻፍግ በሊስ ሀበው።

“ማን ነህ፡ ማን ነህ…? እብ ክልኢቱ ጀሃት ለትደጋገመ ሰኣል ዐለ። ሐቆሁ ላተ ምን አትቃመቶት ቀበሊትብዕድ ሴመ ይዐለ። ለቦጦሎኒ ለልታከየ ምህም ሀደፍ ሰበት ዐለ፡ ሄረረ ለለዐንቅፍ ለገብአ መታክል እግል ትክሀል ለልትቀደር ይዐለት። እበገብአ በሰር ዲብ ምህምተ እግል ተሳድር ዐለ እለ። “ሚ ኒዴ?” ለልብል ሰኣል እግል ትብለስ ህዬ ላዝም ዐለ። ለዲብ ሰፈር ትከበተዎም ዐሳክር ደርግ፡ አንፋር ስለለ እግል ልግብኦ ክምሰል ቀድሮ ናይለ ገበይ መረሖ ለዐለው አንፋር ስለለ ጀብሀት ሸዕብየት ጌማም ዐለ። “ወቅትነ እግል ኢንቅተል ለታብዕዎም

ሙናድሊን እንዴ ሐደግነ እሎም ኒጊስ” ለትብል ፍክረት አቅረበው አምፋር ወቅያደት ናይለ በጠሎኒ። ምን እሊ ወኬን ህዬ ሕርያን ብዕድ ይዐለ እግሎም።

ምን አንፋር ናይለ ቦጦሎኒ ልግበእ ወምን አባይ ናይ ዐዳወት ምስዳር ይዐለት። ለሀደፍ ዐቢ ልታከየ ለዐለ ቦጦሎኒመ ዲብ ሐርብ እግል ትእቴ ሀደፈ ይዐለ። ሰበት እሊ፡ ለመታክል እግል ልክለቆ ኢገብአው ምንገብእ ብዕድ መቅድረት ክምሰል አለቦም ለትጌመመው ዐሳክር፡ ሐምስ ለገብኦ፡ ሙናድሊን እንዴ ሐድገው እሎም ቦጦሎኒ ሄራረ አተላሌት።

ቦጦሎኒ ሐቆ ናይ ሰማን ሳዐት ለልአትዕብ ሄራር፡ ዲብለ ክልኦት ሸምበል ሓቅፍ ለዐለ ዐነክል ወከረቢት ክራይ በጽሐት። አንፋር ስለለ ለእንዴ መርሐው ክራይ ለአብጸሐወ ቦጦሎኒ፡ክልኤ ሸምበል ሒለት አባይ ለጸብጠየ አካን እብ ዋድሕ እንዴ ሐበረው ወቀየ እግል ትሰርግል ሐድገወ። ቅያደት ቦጦሎኒመ አየ ፈሲለት እበየ ተሀጅም፡ ሐቆ ህጁም ለተርፍ ወቀይ፡ ብዕድ እግለ ህጁም ለትከስስ ሐብሬ እንዴ ሀበው አዳለወ።

ጽብሕ ምድር ሳዐት 4፡30 ዲብ ክራይ ሻፍፍ ለዐለ ክልኦት ሸምበል አባይ ለደውሽሽ ህጁም ህዬ አምበተት። ሙናድሊን ለእግል ልጽቦጡ ለዐለ እሎም አካናት እግል ልብጸሖ ወቅት ኢነስአ ምኖም። አባይ እግል ልዳፍዕ ለወደዩ ጀርቤፋሽል ፍሬ ኢትሰርገለ ዲቡ። መምተለካቱ ወማይታሙ እንዴ ሐድገ ልትፈንጠር እት ህለ፡ ምድር እግል ልጽበሕ ክምሰል ቀርበ ለበሽር ቅሎዕ እግል ልትረኤ አምበተ። አባይ እንዴ ንሔት ለአካን ለጸብጠት ቦጦሎኒ እምበል ናይ ዎሮት ነፈር ጅረሕ ለሳደፈተ ከሳር ይዐለት፡ ሀደፈ ሐቆለ አትመመት ህዬ አባይ እንዴ ሐድገዩ ለሀርበ መምተለካት እግል ተአክብ ለዐል ወተሐት ትቤ። ዲብ ክእነ ቴለል ሳዐት ሰቡዕ እስቡሕ፡ለኢተሐሰበ ከበር ትሰመዐ። ሐርብ ዲብ ደንጎበ እብ ናዩ ቃኑን ክምሰል ገይስ ለለአሽር ትእዛዝ። እብ ቅያደት ጀብሀት እግል ልትከበት ለኢቀድር ላኪን ህዬ ላዝምእት ዐመል እግል ልውዐል ለዐለ እሉ “አንስሓብ” ለልብል ትእዛዝ።

ዲብ መርከዝ ቅያደት ውቃው ለአቴት ወድብ አውጌት ህጁም ለከስተት ብርጌድ 23፡ ሰኒ እንዴ አሳደረት እግል አባይ ፍንጥርቱ ምንመ ዐለት፡ ናይ ገጽ እትገጽ ህጁም ክምሰለ ልትሐዜ ሰበት ኢትቀደመ ለብርጌድ ብቆት ሀንጦጠለት እተ። እሊ ሐደስ እሊ አባይ ምን መደውሻሽ አንገፈዩ ሌጠ እንዴ ኢገብእ ኤማን እንዴ ሀበዩ እት ረአስለ ብርጌድ ህጁም እግል ልጠልቅ አትናየተ። ገጽ እብ ገጽ ለገብአ ህጁም ክምሰል ኢትሰርገለ ለአከደ አባይ፡ እግለ ዲብ አግደ መርከዙ ለአቴት ብርጌድ ራዳት እንዴ ነድአ እግል ልደውሸሸ ትበገሰ።

‘ውቃው እዝ’ እንዴ ደውሸሸው እብ ዐውቴሆም እግል ልትሳረሮ ለሐስበው ብርጌድ 23፡ ለሐስበዉ እንዴ ኢለአተሞ እብ ክሉ እንክራት ህጁም ዴሽ አባይ ጠለቀ እቶም። ምን ቀደሞም፡ግራሆም ወእብ ስምጥ ርሳስ ክምሰል ዔደር እግል ልትከዔ እቶም አምበተ። ዲብ ከርዶን አባይ ፍንጌ ሞት ወሐዮት ተሐነው። ደባባት አባይ እግለ ረከበያሁ ለኢተሐሰበት በክት ትነፈዐየ እበ። እግለ ራድኣይ ለይዐለ እሉ ሙናድል እብ ስልስለት እግል ለሃጭቀ ዲብ ልትገናበየ ወልትሻወረ ትረአየ። ሙናድል እስትሽሃድ ዲብ አንፉ መጸአዩ። ብዕድ ሕርያን ሰበት ይዐለ እሉ ህዬ አርወሐቱ ከላስ ተሐለልኮ አስክ ትብሉ ስሙዱ አተላለ። ለበዝሐው አንፋርለ ብርጌድ ህዬ ዴሽ አባይ እንዴ ካየደው እት መልህያሞምወመስከቦም ተሓበረው። ሐቆ አምዔላት አርወሐቶም እት ትሴንግ ለአቅበለው ሙናድሊንመ ሑዳም ይዐለው።

እለ ብቆት እለ ክምሰል ሳድፈት፡ ለዲብ ድዋራት ክራይ ለዐለው ክልኦት ሸምበል እንዴ ፈንጠረት ከጥ ማርሰ ቴክላይ አውጌት ለበትከት ቦጦሎኒ ብርጌድ 58፡ ዲብ ብቆት እግል ኢትእቴ እብ ሸፋግ እግል ተአንስሕብ እብ መስኡሊን ጀብሀት ሐብሬ ተሀየበተ። ጸሓይ ፋግረት ዐለት።ለናይ እንሰሓብ አማውር ሕርያን ሰበት ይዐለ እሉ ህዬ፡ እብ አደሐ እግል ልግበእ ላዝምቱ ለዐለ። ሄራር እብ በርሀት ጸሓይ ህዬ ዲብለ አባይ እብ በይኑ ልብሕተ ዐስተር እብ ጥያራት ሐርብ እግል ልከንትየ በክት ሀዪብ ዐለ። ለቦጦሎኒ ለትሄርር እቡ ምድር ለትትሐበዕ እቱ አካናት ለአለቡ ጋድም ጥሉቅ ሰበት ዐለ፡ ተአቴ ዲብ ህሌት ሰኒ ዳልየቱ ዐለት። እንሰሓብ መጽአ ምንገብእመ ለተአቀብል እቡ እሊ ሕጌ ለአለቡ ጋድም ክምቱመ እሙር ዐለ። እብሊ ደማን ለአለቡ ጋድም፡ ብዕጦሎኒ ካምለት እግል ተአፍግር ጀረቦት እምበል ብቆት ብዕደት መስለሐት ክምሰል አለቡ ምን ሰልፉ እሙር ዐለ። አባይ ዲብ ሕጌ ለአለቡ ጋድም እብ ጥያራት እግል ልትነዐዮም ምን ማርሰ ቴክላይ እብ ክቡድ ስለሕ ወደባብ እግል ልረሽርሾም ቀድራመ ምንገብእ ደባባት እንዴ ከስአ እብ ሰለስል ደባብ እተ ፋይሕ ጋድም እግል ልለምጮም በክት ዐቢ ዐለ እሉ። ለእንሰሓብ ዲብ ብቆት ዐባይ ለሀንጦጠለት እቱ ሕጌ ወገለብ ለአለቡ ምድር ሰበት ዐለ በገ፡ ፈርሀት ዐባይ ከልቀ። ሰበቡ እንሰሓብ ወድብ አካንከ መታካይ ዎሮት ከብቆት ዐለ እሉ። ዲብ ለገብአ ልግበእ ቴለል ላኪን እንሰሓብ ላዝም እግል ልግበእ ዐለ እሉ። እብ ከአፎ? በሊስ ለልታኬ ምህም ሰኣል ቱ።

ለቦጦሎኒ እበ አቴት እበ ሰማን ሳዐት ለትነስእ ገበይ እግል ትፍገር ትቀድር ይዐለት። ቦጦሎኒ ካምለት አደሐ ዲብ ጋድም በራርጠለቆት ብቆቱ ዋድሐት ዐለት። አርወሕ ሙናድል አክል ዐስር ዐስከሪ አባይ ሰበት ተ ዕንታትከ እንዴ አቀመጭከ ለተአቴ እቱ ሕርያንመ ይዐለ። ሰበት እሊ ህዬ፡ ቦጦሎኒ እንዴ

አምርሐው ክራይ ለአተው አንፋር ስለለ ለዐለው እተ አካን ክምሰል ረሐት እዴሆም ለአሙረ ሰበት ዐለው፡ እግል አርወሐት ናይለ ቦጦሎኒ ደማን ለለሀይብ ፍክር አቅረበው። ለቀርበ ረአይ እት ፍዕል እንዴ ኢልተርጀም ላኪን እብ ቅያደት ጀብሀት እግል ልትአየድ ዐለ እሉ። ለፍክር እግል ቅያደት ጀብሀት ክምሰል ተሐበረ “እብ ሸፋግ እት መዓል ልውዐል” ለልብል ረድ ፍዕል ተሀየበ። ለተእዪድ ረክበ ረአይ አስክ መስሐየት አንሰሐቦት ለልብልቱ ለዐለ። መስሐየት አቅረት ዐቢ ለብእተ ምን ማርሰ ተክላይ ሸንከት ግብለት ምውዳቅ ጸሓይ እት በሐር ለትቀርብ አካን ተ። አዳም ኢኮን መካይንመ እግል ለዐሽግ ለቀድር ውሒዝ ለሻለዐዩ ሐፈር ዐቢ ዐለ እተ። ምን ቅያደት ናይለ ቦጦሎኒ ሽሂድ ስፋፍ ህዬ፡ ቀደም ለሀ ክምሰል ነፈር እምዳድ ዲብ ድዋራት መስሐየት ሰበት ዐለ፡ ለአካን ሰኒ ለአመረ ዐለ። አንፋር ስለላመ አውካድ ብዙሕ ሰበት አትቃበለው እበ ሰኒ ለአሙረ። እምበል እሊመ አባይ ደውሸሸ ምንገብእ አስክ አጥራፍ በሐር ገጹ ለለሀርብ ተረርፍ ዴሽ እግል ራቀቦት ሽሂድ ስሌማን ሓምድ ለመረሐ ገመል ለጸብጠት መጅሙዐት ስለለ ቀደም እለ እብላሊ ዲብ እለ አካን እለ ልእክት ዐለት።

“ገበይ ከም ሳዐት ገብእ?” እግል በገስ ክምሰል አተፈቀው ቅያደት ቦጦሎኒ ለአቅረበው ሰኣል ዐለ። አንፋር ናይለ ቦጦሎኒ እብ ተዐብ እዙያም ሰበት ዐለው፡ ሰፈር ረዪም እበዎሮትእንክር፡ ለሐስበዉ ዳይ ሰበት ኢሰርገለው ህዬ እበ ካልእ ዲብ አንፋረ ቦጦሎኒ ሽዑር እኩይ ከልቀ። ሰፍረ ወጽምእመ ምኑ ለልትኬለም ዐለ። “እግልነ ምን አርበዕ ሳዐት ለለሐልፍ ይዐለ” ቤለው አንፋር ስለለ ጀብሀት። ለክልኦት አው ሰለስ እንዴ ገብአው ገይሶ ለዐለው ቦጦሎኒ ምስል ክሉ ጽዋረ ወመምተለካተ እብ አርበዕ ሳዐት እግል ትብጽሑ ለልትሐሰብ ይዐለ። ብዕድ ሕርያን ሰበት ይዐለ ላኪን በገስ ገብአ። ቀደም በገስ ለበጦሎኒ እግል ተአንስሕብ ክምቱ እብ መስኡሊነ ሐብሬ ተሀየበየ። “ጥያራት፡ ደባባት፡ ዘብጥ ክቡድ ስለሕ ወረሻሻት እግል ልሳድፈነ ሰበት ቀድር ክል ሙናድል አመት ርሑ እት ወዴ ልሄርር” ትበሀለ።

ቦጦሎኒ፡ ምን ጥያራት ወስለሕ ክቡድ ክምሰልሁመ አባይ ዐረየ ምንገብእ ክምሰል ድፈዕ ትትነፈዕ እቡ ትበሀለ እት ኢኮን መሰሓየት ምን ድጌ ሰውረት ዝያደት እት አባይ ለቀርበ ምድርቱ። ምን መልሀቴ ሐቆ ናይ ሰማን ሳዐት ሄራር፡ ዲብ ክራይ ለዐለ ዴሽ አባይ እንዴ ደውሸሸውቶም ወሱክ ሳዖታት አስክ ግብለት ምውዳቅ ጸሓይ ሸንከት በሐር ገጾም ለአተላሉ ለዐለው። ምን መሰሓየት እንክር ቅብለት፡ አባይ በዋቢር ሐርብ ለለአጸጌዕ እቱ ወመምተለካት ዐስከሪ ለለሐድር እቱ ማርሰ ተክላይ ህለ። ምን መሰሓየት አስክ ማርሰ ተክላይ እብ እገር ዲበ ትትበገስ እት ናይ ሰማን አው ሴዕ ሳዐት ሪም ሌጣቱ ለህለ

እሉ። ለቦጦሎኒ በገ ምነ ትበገሰት ምኑ ድጌ ሰውረት ዲብ ትትሸተት አስክ በሐር ገጸ ትሄርር ዐለት። ለዎሮት ሕርያን መነገፎ ህቱ ሰበት ዐለ።

ሄራር ዲብጋድሞታት ዲብ ቀደሞም እንዴ አሻተተ ልታከዮም ለዐለ ሙናድሊን ናይለ ቦጦሎኒ፡ ተዐቦም እንዴ ኢለዐልቦ እግል በገስ እት ኢኮን ብዕድ ሕርያን ይዐለ እሎም። አንፋር ስለለ፡ ቀደም ለመረሖ ወምን ግረ ለተርፈ እግል ኢለሀሌ እንዴ ራቅቦ እግለ ሰፈር ወጀሆ ዐለው። አብራክ ሙናድሊን እብ ኤማን ገጽ ቀደም ዲብ ለአሳድር ትረአ።አባይ ግራሀ ቦጦሎኒ እግል ኢለዐሬ እብ ክሉ ጀሃት መራቀበት ትድርት ገብአት። ለቦጦሎኒ ክሉ መምተለካተ እት መርከበ እንዴ ትሆገለት ሌጠ ገበየ አተላሌት።እብ ተዐብ ፈነጥር ዲብ ገብእ ህዬ ታረፈት። እብ ፍንቱይ ጾር ክቡድለዐለ ምስሎም ሙናድሊን ዐፍሾም ምን መሸንገሎም ዲብ ወድቅ ሕድቱ ተርፈት። አንፋር ስለለ ላኪን ለተርፈ ዲብ ለአትመንቅሾ ወእግለ ወድቀ ዐፍሽ ዲብ ለሀርሶ ዐረው።

ቦጦሎኒ፡ ለእግል አንፋር ስለለ አርበዕ ሳዐት ለነስአት ገበይ ሙጀርሒነ እንዴ ጾረት ሐቆ ሰቡዕ ሳዐት እብ ሰላም መስሓየት አቴት። ሳዐት ክልኤ ሐቆ አድህርቱ ለዐለ። ዲበ ለሐዙወ አካን ክምሰል በጽሐው እሻረት መንገፎ ትሰመዐቶም።

መስሐየት ማይ ክምሰል ባቱ ትትአመር ለዐለት። ምናተ እተ መደት ለሀ ቦጦሎኒ ለበጽሕ ብዝሔ አዳም ክምሰል አተ እተ ክምሰለ ሰእየት ለገብአት እተ ኢገብአት። እግል ክሎም ክትልኪ ህሌነ እንዴ ቤለው ለሰአወ ሙናድሊን ሕልቅሞም እንዴ አጠለለት አርወሕ ዲብ በልስ እቶም ኢትረኤት። ለዐለ እተ ማይ ሑድ ህዬ ትጨመመ። ሐቆሁ እምበለ ከናፍር ለለአጠልል ለብዕ፡ ሕልቅም ለለአረወ ማይ ተሐገለ። እብ ጽምእ ሕልቅመ ናሽፈት ለዐለትቦጦሎኒ፡ አካነት ድፈዕ ሰበት ረክበት ሌጣቱ ክምሰል ዐውቴ ለሐስበተ። ዲብ መስሐየት እንዴ ገብአከ ምን አባዩ እብ ስሙድ እግል ልዳፌዕለቀድር ሰበት ዐለ።

“ማይ ወሴፈ ለጸዐነየ መካይን መጸአኩም ሰበት ህለየ ትከቦተን” ዲብለ ስዱድ አውካድ ምን ሕሩር ምድር ምን ቅያደት ጀብሀት ለትነሸረ ከበር፡ ከበር ረህየት ቱ ለዐለ። ቦጦሎኒ ላኪን አደሐ ምን መስሐየት እንዴ ትብገሰት ዲብ ማይ ወሴፈ ለአምጸአየ መካይን እግል ትብጸሕ ትቀድር ይዐለት። አሰልፍ ዲበ አካን ለበጽሐው አንፋር ስለለ እግል ልትከቦተን ትብገሰው። ሽሂድ ስሌማን ሓምድ ለመረሐ መጅሙዐት ስለለ፡ ለማይ ወሴፈ ለጸዐነየ አመካይን ክምሰል ረክበወን እግል መስኡሊን ቦጦሎኒ በሸርው።

“እለ ምን ገብእ ለመካይን ልቅረባነ፡ ሕናመ እግል ንትከበተን” ቤለው መስኡሊን ናይለ እብ ተዐብ ሽልትት ለዐለት ቦጦሎኒ። ምስለ ዐለ እቶም ተዐብ፡ ሰፍረ ወጽምእ፡ እብ ተውሳክ ሰፈር ረዪም ለቀድሮ ሰበት ይዐለው።ምነ መካይን

ማይ ወነብረ እንዴ ረክበት ርሕ እግል ትብለስ ትታኬ ለዐለት ቦጦሎኒ እግል ልቅረበ ትብገሰየ። ቦጦሎኒ ህዬ ሐቆ ሐምስ ሳዐት፡ ምድር ክምሰል ዐወድወደ ምን መስሐየት ትብገሰት።አርዌሕ ለጾረው ሙናድሊን ወማይ ወሴፈ ለጸዐነየ መካይን ዲብ ደንጎበ እተ ጋድም ሕድ ትቃበለው። ምን ሐርብ ወመለገት ለፈግረት ርሕ ህዬ ማይ ወነብረ ረክበት። አስክለአሰልፍ ህጁም እግል ሊደው ለትበገሰው ምነ መልሀቴ ህዬ ትወከለት። - “ኢትቅሰን ውቃው… ልሰዕ ዲብ መሸንገልከ ህሌነ” ዲብ ትብል።