Wp/tig/ክታብ - መዐደዩት - ሸሂድ ደባበት ሰወገ

ሸሂድ ደባበት ሰወገ

ዘርኢት ወልዴየሱስ

“ወይ አነ ሶፍየ----” ለትብል ክርን ወለት-ረቢ(ክናየተ) እግል ክሉ ዲብ ሐንቴ ዕዛል ዕጨይ ሰክብ ለዐለ ሙናድል አደንገጸት። እብ ስጋደ እንዴ ገሌተ ትስዕመ እት ህሌት፡ ለብዕዳም ጸረ ምን ሕቅፈ ፈንትወ እት ህለው መጆብ ምን አፍ ከራይ ስገ ለገለው መስል ዐለ። ሐቴ ምነ ምክራዮም ለትቀዌት አንፋር ናይለ ቅዋት እንዴ ትበሀለት ዲብ ስጅል ምን ትአቴ ዐስር ዮም ዋድየት ሰበት ዐለት እብ አመተ ኢትአመረት ሰበት መጽአት ጸሮታተ መረ ትፈከረው። ዮም 23 ወሬሕ ክልኤ ናይ ሰነት 1984 ገጽ ምሴ፡ እት ባካት ወድ-ጋን ክምሰል በጽሐት ናይ ውላድ ስርየተ ሐብሬ ምን ኢልዐሌ ክምሰል ሽሂደት ወትሰጀለት።

ሶፍየ ምነ ክሪት ዲበ ለዐለት ስድት እብ መልህያመ ሹቅልት ሰበት ዐለት፡ ላመ እት ፈልሒት ለረአወ ጸረ እግል ትዓርፍ ምንመ ገመወ፡ ጎማቶም እንዴ ነክረት አስክ ዲብ ጅማዐተ ትትሓበር እብ አርወሐቱ ለጸንሐ አዳም ለሀሌ ትብል ይዐለት። እግል ትትሃጌ መቅደረት ምንመ ይዐለት እግለ፡ እንዴ ኢትዓርፍ ወላድ ፈሲለተ መን ሀለ ወመን አስተሽሀደ እግል ትፈርግ ተአትቃምት ሰበት ዐለት፡ ምን ጸረ መስእል ኢትጸበረት። አዳም እንዴ ሐደ መንበረት ናይለ ከቲበት ለዘት እንዴ ሰአነት። ላመ እብ አርወሐቶም ለጸንሐወ የታይም እንዴ መስለው ሰበት ትረአወ። ሰኒ ወአማን አርሐመወ። ክሎም እት ሀመት እንዴ ትሸመመው ትም ሰበት አብዝሐው፡ ሜርሓይ ፈሲለት ማቴዎስ፡ለሓለት እግል ልቀይር ሐዘ ገብእ፡ “ወለት-ረቢ-----ማይ ተሐጸበ። ቅያር ናይ ልባስ ረከብኮ ምን ገብእ እግል ሕዜ እግልክን ቱ” እንዴ ቤለ ሰበት ቀንጸ፡ ለገመው ምስሉ እት መስሎ ክሎም አሰሩ ቀንጸው።

ወለት-ረቢ ወሶፍየ በይነን ክምሰል ተርፈየ፡ “ስምኦንመ ማጽእ ዐለ። እብ በይንዬ ክምሰል ጸንሐክዉ ጃመመ መስኪናይ።” እንዴ ትቤ ህግያሀ እንዴ ኢትአተምም፡ “ሚ እትለሐዜ መጽአ?” እት ትብል እንዴ ሐርቀት ትሰአለት። ወለት-ረቢ “እት ክእነ ቴለል እብሊታት ትትሃገይ” ትብለ ለህሌት ሰበት መስለ ዲበ፡ “እሎም ናይ አስልሐት ክቡድ እትሊ ጀፈርነ ሰበት ህለው ቴለልኪ እግል ልድሌ መጽአ” እት ትብል ለህግየ ዲብ ትፈርህ አዝመት ምነ። ሶፍየ ወስምኦን ክምሰል ልትፋተው፡ ዕላቀት እግል ልውደው ክልዶል ልትሰአለ ክምሰል ዐለ እትሁጅክተ ሰበት ዐለት፡ እብ ክሱስለ ጋሪት መትሃጋይ እንዴ ኢገብእ፡ ወቅት ክምሰል ይሐሬት ለትፈሀመየ እት መስል አፉሀ ጸብጠት። “አዳም ባዲ ዲብ እንቱ፡ ዲብ እሊታት ፈደው።” ክምሰል ትቤ እበ ለሳደፈ ፈሸል እንዴ ሐርቀት

ትነዌ ክምሰል ህሌት እንዴ አንተብሀት ዲበ፡ “ክምሰልሁ ኢቲበሊ ሶፍየ። ሐርብ ዮም ትትዐወት ዲቡ ወዮም ትትፈለል። ሐሬ ህዬ እጅትመዕ እግል ልግበእ ቱ ልትበሀል ሀለ። ለአማን ህዬ ዲቡ እግል ትውደሕ ቱ” እንዴ ትቤ ህግየ እግል ኢትአተላሌ ጀረካነት እንዴ ረፍዐት ትበገሰት።

አምር ስምኦን ወሶፍየ ዲብ ዒታሮ እንቡት ቱ። ምህሮ ዐስከሪ እንዴ ደርሶ ተኣመረው። ስማኦን ሸባበቱ፡ ግርመቱ፡ አደቡ፡ ወቀዩ ወጠቢዐቱ አዳም ለፈትዩ እበ ረቢ ለሀበዩተ ክልቀቱ ተ። ምን አቡሁ ለተዐለመዩ ናይ ተክኒክ መቅደረት ሰበት ዐለት እግሉ ህዬ ዲብ መደትለ ምህሮ ለገብአ ነፈር ዕንቱ ለከሬ ዲቡ መፈተይ መንደላይ ዐለ። ሐቴ አምዕል ሶፍየ በይኑ ዲብ ሐንቴ ዕዛል ዕጨት ግሱይ ዲብ እንቱ ዶል ርኤቱ።ረ በክት ሰኒ እንዴ ሐስበቱ እግል ትትኣመር ምስሉ ሐዜት። አጊድ አፉሁ ለፈቴሕ ምንመ ይዐለ። እበ ምህነቱ እንዴ ትነፍዐት። “እለ ክለ ምህነት ሚ ዶል ቀደርካሀ? ወድ አስመረ እንተ?” ቴለቱ ስሕቅ እት ወዴ። ስምኦን ህግያሁ እብ ሰሓቅ እንዴ አንበተየ ዲብ ዐዳገ- ሐሙስ እንዴ ትወለደ፡ እት ባርጅመ(አስመረ) ክምሰል ዐበ፡ አስክ ታስዓይ ፈስል ክምሰል ደርሰ ሸርሐ እግለ። እንዴ ትለወቀት ተአተንስዩ ክምሰል ህሌት ሐቆ ኣመረ። ምን ንእሹ እብ መኪነት ወመቶር ሳይክል ልትዛወር ክምሰል ዐለ፡ እብ ክትር ዐሸም ስዋገት እግል ዐዱ መትጸባጥ ክምሰል አበ አቡሁ ምስል መስኡሊን መዋሰላት እንዴ ትፋሀመ ወድ 17 ሰነት እት ሀለ ርክሰት ሰዋገት ክምሰል አፍገረ እግሉ እበ ጥዑም መባልሱ እንዴ ዳግም እግለ ዲብ ልበ አካን ጸብጥ ክምሰል ሀለ ተአመረየ። እብ ልበ ወድ ታጅር ቱ እንዴ ትቤ ሰበት ሐስበት “መኪነት ወመቶር ሳይክል ዐለው እግሉም በህለት ቱ?” ቴለቱ። ለሰኣለ ለህጅኩ እግል ልዋስል ለአትናይት ዐለ። “ኣቤ፡ አቡዬ ወኪል ጋራጃት ሕኩመት ሰበት ዐለ፡ መኪነት እግል እርከብ መሐገዝ ይዐለ እግልዬ” ክምሰል ቤለየ፡ “እሊ ተንዚምነ ለአዳም ከአፎ ለአምሩ? አማኖም ቱ ዲብ አስልሐት ክቡድ እግል ልወዝዑከ” እት ትብል ለናይ ሰልፍ ህጅኮም እብ ሰሓቅ አግመለተ።

እት ሰፍጥ አመቅረብ፡ እብ ሕበር ለልትዐገሎ ዲበ ጢሾ(ረሕበ) እብ ክል እንክር ለልስሕበ ሰበት በዝሐ፡ ከርከር ምንመ ትቤ፡ “የሀው ልብ ንክሬ፡” ለትብል ህግየ ስምኦን እግለ ቴለል እብ ሸፋግ ቀየረቱ። ለህግየ ለነብረ እንዴ ኢትተምም “እግለ ነኣይሽ ጽባበት ንሕደግ እግሎም” ክምሰል ተ ስምኦን ህዬ ክልዶል ክምሰል ልትነፈዕ እበ ወላድ ፈሲለቱ ሰበት ለአሙረ ክል ዎሮት ከዲብ እዴሁ ለዐለት እንዴ ለውሽ ምነ ጢሾ እግል ልቅነጽ አንበተ። ሶፍየ ልብ ለከረ ዲበ ነፈር ይዐለ እት ኢኮን እት ጀፈሮም ምን ትትጸገዕ ገሌ ሳንያት ዋድየት ዐለት። ስምኦን እግል ልሰዐመ እት ሸፍግ ክምሰል ቀርበየ ህተ እንዴ

ተአድኦብብ እዴሀ ሌጠ ሀበቱ። ለእንዴ ትበአሰ ኢኮን ሐርቃመ ምን ገብእ እት ነብረ እዴሁ ለኢከሬ ስምኦን፡ አጊድ ሰበት ትደንገጸ፡ “ሶፍየ፡ ቴለል እኩይ ሳደፌኩም! እግል እድሌኪ ማጽእ ዐልኮ።” መረ ክምሰል ትሻቀለ እበ መትአያሱ እግል ለአርእየ ሐዘ። “ለልአመጽእ ጋር ይዐለ እግልከ!” ክምሰል ቴለቱ እግል ኬር ማጽአቱ ክምሰል ይህሌት ሰበት ትወድሐ እግሉ፡ “እግል እምጸእ ላቱ ላዝም ቱ። ፋቲ አነ ማሚ! ሐሬ ህዬ ምስል መልህያምከ አክል እሊ መትቀጻብ ኢልአትሐዜ” እንዴ ቤለ ድንን ወደ። ሶፍየ ክልሕ-ክልሕ ትከፈለት እት ኢኮን፡ እግል ትብለስ ዲቡ ሰበት ኢቀድረት እት ፍንጌሆም ትም ትከለቀት። ስምኦን ገጸ ስኒ ምንመ ኢርአዩ፡ ዲብ ቴለል እኩይ ሰበት ዐለት ሕብር ገሮበ ትረበበ። ዕንታተ ትሳረቀ። ረሐት እግረ ህዬ ጻሌዕ ዲብ እንቱ ክምሰል ረአዩ፡ ለሐርብ አክልአይ መክሩህ ክምሰል ዐለ ምነ እግል ልፍሀሙ ሰበት ቀድረ ሰኒ ረሐመ ዲበ። መልህያሙ ለአቀሙቱ ክምሰል ህለው ሰበት ፈሀመ “ክበሊ እግል እሳርሐኪ” እንዴ ቤለ ትበገሰ። “ደሐን ቱ አቅብል” ስርሐ ኢልአትሐዜ” እንዴ ትቤ ሐድገቱ ከክባባይ ገብአት። ስምኦን አሰረ እት ልሄርር “ሶፍየ ልብዬ ተአሚሩ ማሚ? እግል ዕላቀትነ ለልአዜ ለወዴክዉ ጋር ሚ ሀለ? አነ ለወዴከወ ይአመር” ሐቆለ ቤለ፡ እንዴ ዐረየ እብ እዴሀ ጸብጠየ። እግል ገሌ ሳንያት ትም እንዴ ወዴት ሐቆለ ገንሐቱ፡ “ስምኦን መልህያምነ ደባባት ካየደዮም ማሚ?”

“አምር፡ ፈጅር ናዬ በክት ምን ናዮም ለልትፈንቴ ኢኮን። ከእብሊ፡ አነ እግልሚ መስኡልየት ተረፍዒኒ ህሌኪ?” እት ልብል እግልሚ ተሐርቅ ዲቡ ክምሰል ህሌት እግል ትወዴሕ እግሉ ሐዘ።

“መስኡልየት ርፈዕ ወኢትርፈዕ አድሕድ ነአቅምት እግል ኢበለከ ሌጠ መጽአኮ። ቻው!” እንዴ ቴለቱ ሐድገቱ ከጌሰት። አስክ ምን ቅብላቱ ትትሐበዕ ትክ እንዴ ወደ ለአቀምተ ክምሰል ሀለ ሜርሓይ ፈሲለቱ--ግርማይ ተወልዴብርሃን (ወድ- ጎመ) ሰበት አንተብሀ ዲቡ መርከቡ እንዴ ጠፍጥፍ “እግል ውሒዝ እብ ሰብር ትትዐደዩ። ምስለ ሐርቀ ኢትሕረቅ።”ምንዲ ኢልብሉ ስምኦን ሐሩቀቱ እግል ልምልለክ ቀድር ይዐለ።

ምድር አክልሕድ እግል ልጽበሕ አንበተ። እብ ደረጀት ጀብሀት ለገብአ ተቅዪም ናይለ ጅሁም እግል መደት ስስ ሳዐት ምንመ ከልአ፡ ለልአመሽግ ላተ ይዐለ። እት ደንጎበ እበ ገብአ ተቅዪም። ለእብ እንክር ድማን እንዴ አፍይሐት አውጌት እግል ትእቴ ለትየመመት ናይ አስልሐት ክቡድ ከቲበት 42፡ ምነ እግል ሰኖታት ለዐስክከረት ዲቡ ቀዬሕ መሬት እንዴ ትበገሰት ረዪም ክምሰል ሄረረት እት ገበይ ደባባት ሰበት ከርበየ ምነ ወናይ ሕፈር መሻክል ሰበት ደንገረየ ለትሀየበየ ሀደፍ እግል ትሰርግል ኢቀድረት። ለሰር ላሊ እንዴ

ሀጅመት አውጌት ለጸብጠት ብርጌድ 23 (ዴሽ አገር) ምድር ቅሎዕ ክምሰል ወደ፡ ግራሁ እንዴ ሀበየ ለሀርብ ለትመየ ዴሽ አባይ፡ እንዴ ትወለበ ዲበ አስሐት ክቡድ እንዴ ትነፍዐ እት ብቆት ከረየ። ለሐርብ እብሊ ሰበብ እሊ ክምምሰል ፈሽለ ወዲብ ጅወ ኣቲ ለዐለ ቅዋት እት ብቆት ክምሰል ትከረ ዲበ እጅትመዕ ትቀየመ።

እጅትመዕ ክምሰል ተመ ረአይ ሃይብ ለኢልአመር ሙናድል ስምኦን እዴሁ ረፍዐ። “ረአይ ፍንቱይ ሀለ እግልዬ፡” ዶል ቤለ፡ ጉም-ጉም ልብል ለዐለ አዳም ህዬ ትም ወደ።

“ሹሀዳእነ ዲብ ማርሰ-ተክላይ ነሐምስ ክምሰል ህሌነ ለሐስቦ ህለው። አዜ ህዬ መርባቱ ኢልቀስን ምን አድግ ኢልሐይስ ክምሰለ ልትበሀል፡ እብ ከአፎ መርባትነ ነአቀስን ሌጠ እግል ንሕሰብ ሀለ እግልነ” ክምሰል ቤለ፡ ክሉ ሙናድል እብ ጣቅዒት ምድር ነቅለ።

ዮም 19 ወሬሕ ሰለስ 1984 አምዕል አትኒን ቅብለት ምፍጋር ጸሓይ ሳሕል እብ ጊም ግልቡብን ሰበት ዐለ፡ ምን ዕን አባይ ወቀዝፍ ጥያራት ለቴለል ሰኒ ዐለ። አክልሕድ ሰር-አድሐ አስልሐት ክቡድ ናይ ሸዕብየት ሰዋትር ዌረት እግል ልህጀም አንበተ። ምሴት ቀዳሚት አባይ ዲብ በራስ ሄሰት ዋዲ ትመየ። እበ ዐውቴ ለቀዳም ሳክር ሰበት ዐለ አድሐ ሐርብ ጽቡር ይዐለ። እት ቀበት ሰር-ሳዐት ዴሽ ሸዕቢ እግለ አባይ እግል መደት ሐምስ ሰነት ለሸፈ ዲቡ ሰዋትር እብ ቀናብል ሰበት ሀጅመዩ አባይ ለኢትትአመን ብቆት ገብአት ዲቡ።

ሶፍያ መርባተ ለትትፈዴ ዲበ መናሰበት ሰበት ረክበት እንዴ ጠሕረት ትጠለቀት። ስምኦን ለአቀምተ ለሀለ መስለ ዲበ ገብእ እብ ብጣረ እንዴ ገብአት ሕኒን አበለት። ሜርሓይ ፈሲለተ ማትዎስ ደበሳይ፡ “እንቲ ወለት፡ እት ምድር ትገፍትኢ” እንዴ ልብለ አፍልቡ እንዴ ትዘብጠ እት ምድር ድብ አበለ። አምሱይ ምድር ለህጁም እት ባካት ንያለ ክምሰል በጽሐ ሶፍየ ጸብጠ ተሐገለ። መትጸባጥ ደብር ንያለ እግለ ዲብ እምሀሚሜ ለዐለ አግደ መርከዝ ቅያደት ውቃው እዝ እት ብቆት ሰበት ከረዩ፡ ነስር ዐቢቱ ለዐለ። ሶፍየ ዲብ ረአስ ንያለ እንዴ ፈግረት እግለ ለሀርብ ለዐለ ዴሽ አባይ ወእግለ እተ ጋድሞታት ገብእ ለዐለ ሐርብ ደባበት እብ ደባበት ዶል አቅመተት እንዴ ትለወቀት። “ያሰላም ሐርብ በህለት እሊቱ!” እት ትብል እግለ አባይ ረግረገት ወድየ ለዐለየ ደባባት ጀብሀት ሸዕብየት እንዴ ተዐፌ ተሐበነት። እግል ሰለፍ ዶል ደባባት ቀደም ዴሽ አገር እንዴ ለሀጅም ትርኤ እት ህሌት ሌጠ እንዴ ኢገብእ፡ እብ ደሚረ ስምኦን ልትመከሕ ዲበ ለሀለ መስለየ ገብእ፡ “ያጅማዐ ንስዔ። ደባባት በድረያነ።” እንዴ ትቤ እበ ስጋደት አስክ ቀላቅል አራበደት።

አምሱይ እግለ ምን እምሀሚሜ እት ነሳፈት ሰማን ኪሎ ምትር ለዐለት አውጌት እግል ልህጀሞ ናይ መትነዛም ወቅት ሐጪር ሰበት ትረከበ፡ “ክልነ እብ ሕበር ሌጠ ንእቴ፡ ስሜተን እግል ንክሬቱ” ቤለ ሜርሓይ ፈሲለት ወድ-ጎመ። ሶፍየ ክምሰል ሰምዐቱ ዐውቴ ዲብ እድሀ ለጨቅመተ ሰበት መስለ ዲበ እብ ፈርሐት በረቴዕ ገብአት። ምድር ክምሰል ጸብሐ እግል ዐውቴ ለበሽር እት ክል አካን ለትፈንጠረ አስለሐት አባይ፡ ገናይዝ፡ ለነደየ ደባባት ወዐረባት፡ እት ልርኡ አስክ ቅብለት ምፍጋር ጸሓይ አሳደረው። ዲበ መሀለት ለኢልሀይብ ሰዐይ ሶፍየ ለእገር ለዋትድ ሖጸ መረ እትዑበ ምንመ ዐለ፡ እስትሽሃድ ሜርሓይ ፈሲለተ ሙናድል ማቴዎስ ደበሳይ ምን ልበ በዲ አበ።

ዮም 20 ለበዝሐ ዴሽነ አስክ ክራይ ለአሴርር ልሄርር እት ሀለ፡ እብ እንክር ድማን ለዐለ ዴሽመ ዐላኬብ፡ አስራይ፡ ወድ-ጋን፡ መስሐየት፡ ምልህቴ፡ መዳቅሕ፡ ቅሮራ---አባይ እንዴ ጀልፍ ልሄርር ሰበት ዐለ፡ ለህጁም አድሕድ ለጸብጠ ሐርብ ፋዬሕ ዐለ። ህጁም ክራይ ሳዐት ሰማን ናይ ምሴ ምንመ አንበተ ምን ሰለስ ሳዐት ለልሐልፍ ይዐለ። ምናተ፡ አባይ እንዴ ትነዘመ ጅሁም ሰበት ወደ ሐርብ ክቡድ ገብአ። ዲበ ምህም ሳዐት ጀብሀት ሸዕብየት አገር ወደባባት ምስል እንዴ ቀርነ ሰበት ተሓረበ። ዴሽ ወደባባት አባይ እግል ልውሐጦም ቀድረ። ምን እሊ ህጁም እሊ ለነገፈ ዴሽ አባይ አስክ ማርሰ-ተክላይ ለሀርብ ሰበት ዐለ። ለበዝሐ ዴሽ አባይ ትጸበጠ። ስምኦን ገይትኦም ቀደም እለ ርኢሀ ለኢልአምር ዐውቴ እንዴ ረክበ ፋሬሕ ምንመ ዐለ እስትሽሃድ ሜርሓይ ፈሲለቱ ወድ-ጎመ ክምሰል ሳደፈ ምን ዐደድ ወለዕል ተሀለገ። ለሐርብ እት ማርሰ-ተክላይ እብ ዐውቴ ዴሽ ሸዕቢ ክምሰል ተመ፡ ብዝሓት ደባባት፡መካይን መደርዓት ወየምአለቡ ዴሽ ትጸብጠ። አስልሐት ወቀናብል እተ ጋድሞታት ዝሩእ እት እንቱ ወገናይዝ አባይ ዲብ ቀበት በሐር ሰለል እት ልብል ልትርኤ ዐለ። ስምኦን እሊ ክምሰል ረአ ሕርየት ለቀርበት መስለት ዲቡ።

ሐርብ ክምሰል ጸሀ ሶፍየ ለእብ ባሩድ ወረብረብ ለተሐደደ ወሪደ እግል ተአጥልል ወእግለ ኡፉይ አምዒተ እግል ተአጽግብ መዐለባት እንዴ ነስአት ዲብ ግንራሪብ በሐር ጀግሐት። “ጀላብ እሊ ቱ እስትሽሃድ እንደፌዕ ወዐዛብ እንርኤ ለህሌነ?” እንዴ ትቤ እብ በይነ እንዴ ተሐስብ፡ እብ አመተ ይኣመረት፡ “እት ምድር ቱ አድሕድ ንግነሕ ለእንቤለኪ እት ኢኮን በሐር ላተ እንዴ ገንሐከ ፈርደተ ኢትበጼሕ” ቤለየ ስምኦን።

“ዎይ አነ ተልሄከ ዲብዬ! ኢትአምነኒ ትገብእ፡ አዜ እብ ልብዬ እፈቅደከ ዐልኮ፡

” ቴለቱ እግለ እንዴ ሐቅፈ ልስዕመ ለዐለ ስምኦን።

“ሚ ጋብአት እንቲ? እብ አዳም ኢትሰአሊ? አው ህዬ ሰብ አስልሐት ክቡድ እስትሽሃድ ሰርዖም መስለ ዲብኪ?”

“ዮም ላቱ አርኤኩነ ኢኮን። በዲርመ ግምሽ አፉነ አርሰሐነ” እንዴ ትቤ ዲብ ክምኩማሁ በአት።

“ደሐንቱ፡ ጠቢዐት ሐርብ ክምሰልሁ ተ” እንዴ ቤለ፡ ምስል ትገሰው። ግንሕ እንዴ ለአብለ፡ “አዜ ገድም መርባት አውኪር ሰበት አቅሰንኪ ልውቅት ህሌኪ፡” እንዴ ቤለ ህግየ ዶል አንበተ፡ “እለ ዐውቴ ታመት እግል ትግበእ ለእናስ(ለጀነራል) እግል ልትቀተል አው ህዬ እግል ልትጸብጥ ዐለት እግሉ ስምኦን ሑዬ” ቴለቱ።

“ጀነራል ሑሴን በህለትኪ ቱ?” “ኣቤ፡ ህቱ” ትቤ እንዴ ተሐራጥጥ።

“ኣላፍ ዴሸከ እንዴ አብዴከ፡ ክልኤ ደባበት እንዴ ጸብጥከ ሰከይ ምነ ወለዐል ሞት ሚ ህሌት?” እት ልብል በልሰ ዲበ እንዴ ልትማቀእ።

ሶፍየ ለሀራብ ቃእድ እግልሚ ክምሰል ፈቅደቱ እግል ተአፍህሙ ለሐዜት እቡ ሰበብ፡ ምነ እሰልፍ እት መክተቡ ለአተው ሙናድሊን ሰበት ዐለት ቱ። ህተ ወጅማዐተ ለመክተቡ እንዴ ፈትሾ ዕንዳቄታት(ክፉፍ) ናይ ሸሀዳእ ወድ- ክፍሌ ወወድ-ጊሌ ክምሰል ረክበት ሀደፈ ለሰርገለት ክምሰል ትሰምዐየ ሸርሐት እግሉ። እብ ቅሩተ ትትሃጌ ክመ ኢጸንሐት ህዬ፡ “ፈርድ ሙናድል እት እዴ አምሐራይ እግል ልብረድ ላቱ አከጀህ ቱ፡ ሕኔት እሊ ሞት ተሐይስ፡” ቴለቱ ሕርቅ እንዴ ወዴት።

ስምኦን እት ለቡ ጻብጡ ለዐለ እግለ ናየ ለሻብህ በሊስ ሰበት መጽአዩ፡ “ፈርድ ትበይ! ደባበት እብ ዐባየ እግል አባይ ለሰለምነ ህዬ ዲብ ተእሪክነ ሚ እንዴ ትበሀለ ወትከተበ?” ሐቆለ ቤለ ብሸራት ናይ ዐውቴ አስአለየ። “እብለ መናሰበት ህዬ እግል ትፍርሒ፡ ለስልብት ለዐለት ደባበትነ ምን ሐዲስ ጸብጥናሀ” ቤለየ እንዴ ልትሰሐቅ። እንዴ አትለ ህዬ፦

“ለዲበ ደባበት ለዐለ ሔሳስ ለበዐል አክየድስ እንዴ በልዐዩ ሰበት ሀርበ አስክ አዜ እት ሕሩቅዬ ሀለ” ቤለየ እብ ድግማን እንዴ ልትሰሐቅ።

“ሰፊሐት ሔሳስ እት አየ ትትረከብ?” ትቤ ሔሳስ እንዴ ልትራአየ።

ለደባበት ሐቴ ምነ ዲብ ሐርብ ስነይ ለሻረከየ ሰበት ዐለት ለሔሳስ ሸዐብ ዐሊ ግድር እግል ሳልሳይት ከቲበት ክምሰል ትበርዐ እቡ ዳገመ እግለ።

“ማል ውሕር ውሒዝ ገልዩ” ለትብል መሰል ክምሰል እላተ ማሚ? ቴለቱ።

ናይለ ሐልፈት አምዕል ዝክርያቶም እግል ለአትሐድሶ ለተዓደመው እት መስሎ ምን አስቦሕ መትዋጅሆቶም ለልፈርሖም ጋር ዐለ። ሶፍየ እተ ባካት ለዐለው ጅኑድ አሰፈወ ገብእ፡ “ስምዐኒ፡ እሊ ጥያራት አፎ ክእነ ምክራዩ ትቀዌት?” ቴለቱ እግለ እብ እስትሽሃድ አውኪር ለተሐረረት ዐስተር ቅብለት ምፍጋር ጸሓይ ሳሕል እንዴ ትገኔሕ።

“ሚ ቱ ትሰፍለልክዩ ለጥያራት?” እንዴ ቤለየ እበ መርከቡ ድርክ አበለየ። በኖም እግል ልግብኦ ሰበት ሐዘው ህዬ እብ እዴሀ እንዴ ጸብጠየ አስክ ለዋው በሐር ጌሰው።

“ለጥያራት ጊም ከርዐዩ እት ኢኮን ዲብኪ እንዴ ረሕመ ኢኮን።”

ህጅክ ለልአንብት እበ ህግየ እንዴ በዴት ምኑ ልትሓመጥ ሐቆለ ጸንሐ “ሶፊ፡ ሻም እት ግንሐት አድሕድ ልትፈረግ” ቤለየ።

ሶፍየ ሰኒ እንዴ ገንሐቱ፡ “ሚ በህለትካቱ? ልትፈሀመኒ ይሀለ፡” በልሰት።

“በሀለቼ፡ እግልዬ ክምሰል ትፈቲኒ እሰልፍ ዕንታትኪ አስአሌኒ።” ክምሰል ቤለየ እብ ሰሓቅ በረቴዕ ገብአት።

“ዮም ህዬ ህግየ በዴት ምንከ ከክእነ ትብል?”

“ምነ ጠቢዐት ለትከልቀ አማን ለትወዴሕ ሓጀት ሰበት ይህሌት፡ እግል ንትከበተ ሀለ እግልነ በስ፡” ቤለየ። ሶፍየ ገሌ እግል ሊበል ክምሰል ሐዘ ሰበት ፈሀመቱ፡ “ከአዜ ሚ እግል ቲበል ተሐዜ ህሌከ?” ምን ሰሓቅ እንዴ አስቀበት ሰኣል ቀደመት እቱ።

“ሐቆ ትፋቴነ ገድም ዕላቀት ንውዴ እብል ህሌኮ” እለ ወልደት ትውለድ እንዴ ቤለ እግለ ለኢትፈትየ ሰኣል ፌረቀየ ዲበ። ሶፍየ እንዴ ደነት ትም ብህለት ሐቆለ ጸንሐት ዲበ ጨበል ለጥሉል እብ እዴሀ እግል ትከብ አንበተት። እባሀ ሕስ ለበትከት ሰበት መስለት እቱ፡ እብ በይንዬ ህሌኮ ወለ ምስል አዳም?” እንዴ ቤለ ሀረሰየ። ሶፍየ ግንሕ እንዴ ቴለቱ፡ “በሊስ ላዝም እብ አፍ ሐዜካሁ? ኖስከ ዕንታት ልትሃጌ ትብል ዐልከ ማሚ?” ቴለቱ። ስምኦን ስሕቅ እንዴ ወደ፡ “ናይ ዮም ህጁም ላቱ ኖሱ ሰልጠ። ዮም አዳም ገብአኪ።”ሐቆለ ቤለ ቅርብ እንዴ ወደ እት ብሶተ ሰዐመየ። ፈርሐቱ እብ ዋዴሕ ሰበት ሸርሐ እግለ ምን ልበ ፋርሐት ምንመ ዐለት፡ “እንተ፡ ንዛም ውዴ፡ አዳም እግል ኢልግነሐነ ትደገግ። አዜ ትም እንዴ ትቤ ጊስ። ለቴለል ክምሰል ሀድአ መስኡሊንዬ እግል

አስእልቱ፡” እንዴ ቴለቱ እዴሁ ጨቅመት ወትበገሰት ምኑ።

ቅዋት አስልሐት ክቡድ 74፡ ሐቆ መትደውሽሽ ውቃው እዝ መረ ሰበት ትደቀበ፡ ምስል ዴሽ አገር እንዴ ገብአ ዲበ እተ መደት ለሀ ለተአሰሰት ጀብሀት ጋድሞታት እት ዮም 16 ወሬሕ አርበዕ ልትከሬ እት ሀለ ከቲበት 43 ሴዕ ደባበት ወክልኤ ረሻሻት ዐልየ እግለ። መሓዝ ደብዐት ልትዐደው እት ህለው ላኪን የምአለቡ ድድ ደባባት ወአዳም ላቱ አልቃም ዝሩእ ሰበት ጸንሐዮም ክልኤ ደባበት ምን ኖዕ ቲ-55 እንዴ ትዘበጠየ ምን ሽቅል በረ ገብአየ። ሐቆ ወቀይ ትሩድ ተኽሌ (አችዶ) ወአርአየ(ወድ ኣሞይ) ለመርሕወን ክልኤ ደባበት እግል ልትዐደየ ቀድረየ። ሐቴ ኤ.ፒ.ሲ ለትትበሀል ሄጅማይት ደባበት ክምሰል ተዐዴት እባሀን ዘብጥ አንበተየ። እተ ላሊ ለሀ እብ ዘርኣይ ደረስ ለልተመር ቅዋት አስልሐት ክቡድ(ብርጌድ 29 ናይ አባይ) አስክ ማርሰ- ተክላይ እግል ለአቅብል ምን ኖዕ ቲ-55 ላተን 52 ደባበት እንዴ ወሰከ ምስለ ዲቡ ለዐለየ ሰማን ደባበት ተሐበረየ። እሊ ዐደድ እሊ እግል መስኡል ከቲበት አስልሐት ክቡድ ናይነ ለዐለ ስብሃቱ (ድንሽ) ሰበት አትሻቀለዩ ሰዳይት እግል ትምጽኡ ጠለብ ቀደመ። ለጀሬት ትጅሬ እንዴ ቤለው ሰለስ ደባበት ምስል 60 ደባበት እግል ልትሓረበ አንበተየ። ዲበ ልብከ ለልአበዴ ብዝሔ ዘብጥ እሰልፍ ደባበት አችዶ መድፍዐ እንዴ ትዘብጠ ልትዐጸፍ እት ሀለ፡ ሐቆሀ ህዬ ደባበት ወድ ኣሞይ ሰበት ትዘበጠት ቱረት ናየ እግል ሊዙር ሰበት ኢቀድረ ግረ እግል ልብለሰ ትቀሰበ። ሜርሓይ ከቲበት 42 በረኸት ስምኦን(ፈንጂ) ለሰውገ ምን ኖዕ ቲ-55 ላተ ሐቴ ደባበት ወናይ 106 መድፌዕ እንዴ ጸብጠ ዲበ ሐርብ ተሓብረ። ድንሽ ክሉ ረአሱ ሰኒ ኢትሰምዐዩ። ዲበ ሃይሞት ለሀ ሑሁ ንኡሽ ክማም ሰበት ገብአ ዎሮቶም እግል ኢልአስተሽህድ እት ሸክ ገብአ። ምድር ክምሰል መሰ ሐርብ ሰበት በጥረ ምስለ ግልባብ ወዴ እግሎም ለጸንሐ ወድ አሕፈሮም አንሰሐበው። ምድር ክምሰል ጸብሐ እግለ ለቀም ለዘብጠየን ደባባት እግል ለፍግሮ ዶል መጽአው ምስል ጥያራት ገብእ ለወዐለ ሐርብ እግል ኖሱ ዐጃይብ ቱ። ምን ዮም 19 አስክ ዮም 22 ናይ ወሬሕ አርበዕ ዲበ እብ እንክር ምፍጋር ጸሓይ ምን ሸመር አድግ ለዐለ ህጁማት፡ ሶፍየ ብሶተ እንዴ ትዘብጠት ክምሰል ወድቀት ስምኦን ሴመ እንዴ ኢደሌ ገሮቡ ምን ኖሱ ልትሐተት ወልትሻቀል ወዐለ።

ሐርብ ብሩድ ሐቆለ አስመነ፡ እት ዮም 27 ናይ ወሬሕ አርበዕ ለትጸቤሕ ላሊ እብ እንክር ጋድሞታት ግራት(መሓዝ ዐገት) አክራናት ክቡድ ናይ ደባበት ትሰምዐ። እባሁ እግለ ሐርብ መርሖ ለዐለው ምስኡሊን ብዕድ ቴለል እንዴ ኢልትከለቅ፡ መባደረት እግል ልንስኦ ሰበት ቀረረው፡ ሜርሓይ ስርየት ጎይትኦም(ቻይኒዝ) ክልኢተን ከቲበት (43 እብ ድማን፡ 42 ድገለብ) አድሕድ

እንዴ ገንሐ እግል ልህጀመ እግል ድንሽ፡ ፈንጂ ወሰለሙን አማውር ሀበዮም። ደባባት ጀብሀት ሸዕብየት ምነ ሕቡዓት ዲቡ ለዐለየ አካናት ገጽ ቀደም ፈጊረን እት በሮርሐት ትጠለቀየ። እምበል እሊመ አዳሕየት ምድር እንጮጭሓይ ጸሓይ እት ገጾም ሰበት ዘብጠቶም እንዴ ፈጥነው እግል ኢልልከፎ ዐዋርድ ገብአ እቶም። አባይ እብ ድግማን ጋድሞታት ክምሰል ኢደንን እግል ልውደዉ ሰበት ቀረረው ህዬ፡ ሳዐት 10፡00 ደባባትነ እግል ደባባት አባይ እንዴ ሀጅመየ ገጽ እብ ገጽ እግል ልትሓረበ አንበተየ። እግለ ናይ ደባበት እብ ደባበት ሐርብ፡ ዴሽ አገር ዲበ እት ግራት ለልአሸብብ ዐነክል እንዴ ገብአ ሲነመት ለዐፌ እት ሀለ፡ እብ ክልኢቱ እንክር ዘብጥ ወነዲድ ደባባት ልትርኤ ዐለ። እተ ወቅት ለሀይ ሜርሓይ ስርየት ጨዓይ ናይ መን ክምሰል ተ እንዴ ኢልአከድ “ነደት፡ ነደት” ክምሰል አብዝሐ፡ ሜርሓይ ከቲበት ወድ-ገሬ “ውህር አነ! እብ ድዱመ ሀለ።” እት ልብል እብ ሬድዮ ሀለው አስአለዩ። ምነ እተ ዶል ለሀ ለነደየ ደባባት ጀብሀት ሸዕብየት አወላይት እምባዬ ለሰውገ ደባበት ዎሮት ኪሎ ሜተር ለኢሄረረት ሐዳስ ደባበት እት እንተ እግል ክልኢቱ ጀሀት እንዴ ኢትከድም ምስል ክሎም ዲበ ለዐለው ምሔርበት ነደት። ካልኣይት መሓሪ (ላዕጂም) ለሰውገ እብ ረአስ ድሙ ለልትበሀል ቅንብለት እንዴ ትዘበጠት ነደት።

አምሱይ ምድር ደባበት ስምኦን እግል ሐጺን ለትጠርቅ ቅንብለት ዘብጠተ። ስምኦን ቴለል ደባበቱ እግል ልድሌ እንዴ ቤለ፡ ባብ ሰዋግ እንዴ ፈትሐ ምንዲ ገንሐ ሰልቫትዮ እንዴ ትዘበጠ በንዚን እት ከደን ጀሕ-ጀሕ እት ልብል ርአዩ። ሸንከት ግረ እግል ልፍገር ፍሩሴኔ እንዴ ኬደ፡ ማርሸ ክምሰል ኣተ ዲበ፡ ቅንብለት ጁፈ ስጋዱ ገሌት። እዴሁ እት ስቴርሶ ወእግሩ ዲብ አችላቶሬ ካይደት ሰበት ዐለት ደባበት ስምኦን ሸንከት ግረ ሄረረት። የምአለቡ ቀናብል አባይ እንዴ ተአጀሌ ሄራረ አተላሌት። አገር ዴሽ፡ እሊ ተማሲል ለመስል ሐርብ ምን ቅብላት ለዐፍዉ እት ህለው፡ ለእት ቀበተ ለዐለው አርበዕ አንፋር አድማይ እግል ልመንክሎም አንበተ። እበ ቴለል እንዴ ትሻቀለው “ስምኦን፡ ስምኦን” እት ልብሎ ትላከው። ለይዐለት ንሳሉ በሊስ ሰበት ይሀበት ህዬ ምብራቕ(ኦፒሬተር) ቀደም ክሎም እንዴ ሰረት እግል መስኡል ከቲበት ፈንጂ፡ “ስምኦን እስትሽሁድ ዲብ ሀላቱ ደባበት ትገይስ ለህሌት፡” እት ትብል ሹቅልት ዲብ እንተ አስአለቱ።

ህግየ ምብራቕ ዐጃይብ ሰበት ገብአ ዲቡ፡ “ሽሂድ ከአፎ ደባበት ሰውግ?” እንዴ ቤለ እብ ሸፋግ ዲበ ደባበት እንዴ ዐርገ ዶል ረአ፡ እግል ልእመነ ለኢቀድር ዐጃይብ ሰበት ረአ እተ አካኑ ተወው ወደ።

ፈንጂ ደባበት ናይለ ፈትዩ መለሀዩ በንዚን እንዴ አትመመት ክምሰል ትበጥር ሰበት ፈሀመ እንዴ ሰረ ትከረ ምነ። ሐቆ እሊ ዲበ ሐቴ ታርፈት እግሉ ለዐለት

ንኣምን (አባጅጎ) ጻብጠ ለዐለ ደባበት አቅበለ። እስትሽሃድ ዐስር ዶል ምንመ መጽኡ ለኢገሜ ስምኦን ምስለ ግንዘቱ ራፍዐት ለዐለት ደባበት አማነት እንዴ ኢጠልም ሐድ ዐስር ኪሎ ምትር ሄረረ። ሐቆ እሊ ለደባበት በንዚን ሰበት አትመመት ምን ዳረት ሐርብ እንዴ ፈግረት እተ ጋድም ለበራር በጥረት።

ለቴለል እንዴ ኢልሀድእ ክብሮም (በከቴ) ደባበት ስምኦ ግረ ደብር እግል ለአዱረ እብ ሬድዮ አማውር ሰበት ተሀየበዩ፡ ግናዘት ስምኦን ዲብ ረአስ ስቴርሶ ወማርሸ እት ህሌት እብ በሰር እንዴ ሰወገ እግል ልወርክየ ቀድረ። ዲብ ሐርብ ጋድሞታት ግራት ለወዐለው ምሔርበት እሊ ዐጃይብ እሊ እብ ዕንንታቶም ክምሰል ረአው፡ “እብ አማን ሽሂድ ደባበት እት ሰውግ እብ ዕንታትነ ርኤናሁ!” እት ልብሎ፡ እግለ ምን ዐጃይብ ለልሐልፍ ቴለል እንዴ ልትፈከሮ ተሃጀከው እቡ።

ድንሽ ደባበት ስምኦን ግረ እንዴ ትፈግር ርኢሀ ሰበት ዐለ፡ ሑሁ ሀለ እንዴ ቤለ፡ እግለ ምን ኖዕ አንፊብያን ላተን ርዉካት ለዐለየ ደባባት እንዴ አፍገረ ምን ገጽ ምሴ ቴለል እግል ልድሌ ዲብ ካልኣይት ከቲበት ጌሰ። መስሬዕ ስምኦን ላተ ሓብየት(ሓዝነት) ዲብ እንተ ጸንሐቱ። ዲብ ጂብ ሑሁ ለጸንሐየ ክልኤ ሱረት እንዴ ነስአ ምኖም ወእግል እስትሽሃድ ሑሁ እብ ሐበን እንዴ ትከበተ፡ እግለ መስሬዕ እንዴ አትጋንዐ ወአትናየተ አስክ ከቲበቱ አቅበለ።