Wp/tig/ክታብ - መዐደዩት - መጅሙዐት ገመል

መጅሙዐት ገመል

አስመሮም ጸጋብርሃን

ጀብሀት ቅብለት ምፍጋር ጸሓይ ሳሕል ሐቆ እንሰሓብ እስራተጂ ለተአሰሰት ስልስለታይ ሰዋትር ጀብሀት ሸዕብየት ተ። አባይ ዲብ ወክድ እንሰሓብ፡ መዲነት ነቅፈ እንዴ ጸብጠ ሳሕል እብ ግዲዱ እግል ልራቅብ ለዐለ እሉ ሸፋግ ዲብ ካልኣይ ወራር ዲብ ሐርብ እምዐሚዴ ተሀነአ። ሰበት እሊ ዲብ ሰልፍ 1979 እብ ጋድሞታት ክምሰልሁመ እብ በሐር - እብ ማርሰ ቴክላይ - እንዴ

ወደ ዲብ አግደ ድጌ ሰውረት እንዴ አተ፡ እግል ጀብሀት ሸዕብየት እብ ተማመ እግል ልደውሽሽ ዲብ ሳልሳይ ወራር ለከስተየ ጀብሀት ተ። ጀብሀት ሸዕብየት ላኪን ለህንዲዴ እት ልብል መጽእ ለዐለ አባይ ዲብለ ስልስለታይ አድብር ቅብለት ሳሕል እንዴ ሸፈ እብ ስሙድ ሐቆለ ዋጀሀዩ አባይ ዲብለ ጋድሞታት ክምሰል ልትሐደድ ገብአ። ለዴሽ ሸዕቢ ሻፍፍ እቱ ለዐለ ሰዋትር ህዬ እንዴ አንቀዕረረ ሌጠ ክምሰል ለአቀምቱ ገብአ። ጀብሀት ቅብለት ምፍጋር ጸሓይ ሳሕል ምስል ሕዱድ ሱዳን ሰበት ትጃፈር እግል ድጌ ጀብሀት ሸዕብየት ምስል ሱዳን ለአትራክብ ከጥ አግደ መንገአቱ ዐለት። ሰበት እሊ አባይ እግል ኢልብክኡ እንዴ ሰመድከ ለትትሓረብ እተ ጀብሀት ገብአት። ሰዋትር ቅብለት ሳሕል ምን ድዋራት ወድጋን አስክ ደምቦብየት ሕዱድ ሱዳን ለልትመደድ ዲበ ውቁል ስልሰለታይ አድብር ወአወድግ ለትበና ቱ ለዐለ። እብ ቃብል እሊ ለትበሀለ፡ አባይዴሽ ጀብሀት ሸዕብየት እግል ልከርድን ለመጽአ ዴሽ አባይ ለዋጅህ እቱ ሰዋትር እንዴ አሰሰ ሕድ ክምሰል ተዐቅብ ገብአ። እምበል እሊ ምን ጀብሀት ዲብ ሰዋትር ጀብሀት ሸዕብየት እንዴ ትጸገዐ ላሊ ወአምዕል ለልዐቅብ ዴሽ ወጽዋር ለተፈናተ ናይ ራድኢት ቅዋቱመ ግረ ዲበ በራር ጋድም ዕስኩር ዐለ።

ንዛም ደርግ፡ ምን ሳልሳይ አስክ ሓምሳይ ወራር እት ረአስ እሊ ሰዋትር እሊ ትሉሉይ ህጁማት ወደ። ሐቆሁመ ዲብለ ከላስ ሰውረት ኤረትርየአክተመት እንዴ ቤለ ረስሚ ለሸርሐ እቱ፡ ፋይሕ ሳድስ ወራርመ እግል እሊ ሰዋትር እሊ እግል ልስበር እግል አውረሐት ተሓረበ። ሕልሙ ላኪን ኢትሐቀቀ እሉ። እብ ቃብል እሊ ከሳር አዳም ወመምተለካት እንዴ ረፍዐ ተሐለለ። ዲብ ሰነት 1983 እግል ሳብዓይት ኢነት ለአትበገሰዩ ስቱር ወራር አግደ ዲብ ጀብሀት በርከ ወሐልሐል ለአመመ ምንመ ዐለ። ዲብ ጀብሀት ቅብለት ሳሕል ሸበህ ናይ መናወረት ሐረከት ዋዲ ዐለ።

ዲብ ጀብሀት ቅብለት ሳሕል ለዐለየ ውሕዳት ጀብሀት ሸዕብየት፡ ብርጌ 44፡ 23፡31፡ 4 ክምሰልሁመ ቦጦሎኒታት ስለሕ ክቡድ ዐለየ። ምናተ ዲብ እሊ

ኩሉ ወራራት ጀብሀት ሸዕብየት እምበል ከላሽን ምስል ፈዛዐት፡ ለመልኮ ብዕድ ስለሕ ድቁብ ይዐለ እሉ። ጥውር ጽዋር ንዛም ደርግ ምድር ለሐፍር፡ ደብር ለሃድሽ፡ ዕጨይ ለአነድድ፡መክሉቅ ለአሰርት ወሙናድል እግል ለአብዴ ላሊ ወአምዕል ክምሰል ዔደር ልክዕዩ ዐለ። መብደእ ሙናድል ላኪን እት አካኑ ዐለ። መብደእ ብለቅ እንዴ ፈንቀለ አርወሐት ዘርአ። ፈዛዐት ሙናድል እግል መሳጢር አባይ ለትቀንቅን ወትሰብር ሰበት ገብአት እግል አድብር ምክሔ እብ ስሙድ ዋጀሀ፡ ዲብ ሕምብረ አባይ እንዴ ትለወሸ ዐጃይብ ሸቀ። ዲብ እሊ ወክድ እሊቱ ህዬ ክታር እንሰ ዲብ ከብድ ደርግ ለአቴት።

* * *

ሐቆ ስቱር ወራር፡ እት አጎስት 1983፡ መጅሙዐት ገመል ጽልመት እንዴ ትገልበበት ትበገሰት። አንፋርለ መጅሙዐት ጸሃየዬ ትወልደ፡ ወረደ መጎስ፡ የማኔ ኪዳኔ ወዕንድኩር ዐለው። ለመጅሙዐት ወቀየ እግል ተአግዴ ሳዐት 8፡00 አምሱይ ትበገሰት። መስኡሎም ሙናድል አስመላሽ ገብረመስቀል (ወድ ሓብቲ)፡ ሰኒ ዲብ ልተምኔ ሳረሐየ። ለሄራር ምን እንክር ምውዳቅ ጸሓይ ደብር ደምቦብየት አስክ ሑድድ ሱዳን “ወሓጢት’’ እንዴ ትከሬካቱ ለዐለ። ዲብ ምተሐት ወሓጢት ክምሰል በጽሐው ዲብ ድዋራት ቅሮረ ሱዳን ለሸቄ እስትፋኖስ እዛዝ ለልትበሀል መለሀዮም ጨዓይ ገመል እንዴ አዳለ እሎም ጸንሐ። ለናይ ሜዳን ልባሶም እንዴ ቀየረው ክምሰለ እስትፋኖስ እዛዝ ላብሰ ለዐለ ጀላብየት ለበሰው። ጣግየት ወዕመትመ ወሰከው፡ ለልብሰቶም እግል ሸዐብለ ድዋራት ክምሰል ትመስል ሐቆለ አከደው ሄራሮም አተላለው። እስቲፋኖስ እዛዝ ዲብ መረሖም ገመሎም ዲብዋሉ አስክ እትጀህ ቅብለት ሱዳን ትወከለው። እስቲፋኖስ አስክ ባካት ቅሮረ ክምሰል በጽሐው ልትፈንቴ ምኖም፡ ምስል ሄረረው። ምኑ ላኪን ህቶም ወሓምሳዮም ገመሎም ሕዱድ እንዴ ተዐሮረው ምን ቅሮረ ኤረትርየ እንክር ድማን ረዪም ሄረረው። ቅሮረ እንክር ግብለት እንዴ አትለው እትጀህ ቅብለት ሐቆለ ሄረረው፡ ምን ሐዲስ መርበዮም ሸንከት ግብለት እንዴ በደለው፡ አስክ ምድር ኤረትርየ አተው። ጋድሞታት እንዴ በትከው ህዬ ዲብ ድዋራት ‘መብአ’ በጽሐው።

ምን ድዋራት ደምቦብየት ዲብ መብአ እግል ትብጸሕ ከሊል ወይአትሐዘ። ምን ምብጋሶም ገጽ ቀደም ለህለ ድፈዕ እንዴ በትከው ምን ልትዐደው፡ ገበይ አርበዕ ሳዐት ሌጠ ወገብአ። ምናተ፡ ገበይ ደሐን ሖለ ጊሰ ክምሰለ ልትበሀል፡ ድፈዕ አባይ ወሙናድሊን ዲብ ቅብለት ሳሕል ምን ጠረፍ እት ጠረፍ ቀበሊት ሰበት ዐለ፡ እበ ድፈዕ እንዴ ሐለፍከ ኣቲ ለልትቀደር ምንመ ዐለ፡ ግራሁ እብ ሸፋግ እግል ልትአመር ሰበት ቀድር ኢተሐረ። ዲብለ ሽቅል ሴፈ ሰበት ለትሐዜመ ገመል እንዴ መስክከ እግል ትሕለፍ ለልትቀደር ይዐለ።

መብአ በሐር ናይ ሖጻቱ፡ ሐቴ ሕጽሕጸት ዲብ በሐር ሖጸ እንዴ ወድቀት እግል ትርከበ ኢትቀድር። ከረ ጸሃዬ ዲብለ በሐር ሑጻ ትሰተው። ለአካን ጋድም ምልሆይ እብ ውሒዝ ለትሸርሸረ ምድር ቱ። እምበል ነኣይሽ ከተክት ዐቅበ ጽላል ለልትበሀል ይዐለ። ሰረፋሪፍ ካምሲን ምድገቱ ተ። ለአግደ መሐብዒ፡ ለእብ ውሒዝ ለትሳጠረ ይቡስ መሓዛት ዐለ፡ ንዛም ደርግ፡ ለዲብ ጀብሀት ቅብለት ምፍጋር ጸሓይ ሳሕል ለዐለ ድፈዓት አስክ ቅሮረ እብ ዴሽ ረግሐዩ። ዲብ ቀደም ሰዋትሩ ለትፈናተ ጅንስ አልቃም ዛርእ እቱ ሰበት ዐለ ህዬ ፈርሀት ይዐለት እሉ። እምበል እሊ ዲብለ ስልስለታይ ድፈዕ ዲብ ጀፈር ጀፈር ሐረከት ሙናድሊን ለታብዖ ወሐብሬ ለጀምዐወለለሀይበተጅሪበት ለበን ውሕዳት ዐይን ዐለየ። ምን ግረ ለትሰርሰረ መከናይዝድብርጌዳትመ ዝያደት ደማን ዐለ እሉ። እሊ እብ አዳም ወስለሕ ለትመለአ ሰውትር እንዴ ኢትሰመዕ ለልትዐዴ አዳም ኢኮን ሰሬረትመ ክምሰል ይዐለት ደማነት ዐለት እሉ። ለመጅሙዐትለ ገመል፡ ለትትሐረክ እቱ፡ ዲብ ቀበት ከጥ አባይ ለህለ ጋድሞታት ላኪን ምን ዓቅቢት ሑር ዐለ።

ጸሃዬ ወመጅሙዐቱ፡ ብዝሔ ጸቢጥ አካናት ወሐረከት ዲብለ ድዋራት ለዐለ ዴሽ አባይ ሕፍዘት አግደ ምህመት ዐለ። ሸዐብ ነዘሞት ወደረቦትመ ወቀይዮም ዐለ። ዲብለ ባካት ለዐለ ሸዐብ ትግሬ ሰበት ልትሃጌ፡ ወአንፋርለ መጅሙዐት ህዬ ትግሬ ብዙሕ ለአምሮ ይዐለው ላኪን ጀራርቦ። ዝያደት ክሎም ላኪን ዕንድኩር ወለገመልቶም ትግራይት ሰኒ ለልአምሮ፡ ሰበቡ ለገመል ወድለ ድዋራት ሰበት ቱ ዕንድኩር ህዬ ቀደም ለሀ ዲበ ድዋራት ሰበት ዐለ ወሸቀ።

መብኣ ሰኒ ምህም አካንተ ለዐለት። ዲብለ ድዋራት ማይ ዲበ ሌጣቱ ለዐለ። ዲብ ድፈዕ አባይ እንዴ ትጸገዐከ ኢገብአ ምንገብእ፡ ምን ቅሮረ አስክ እምሀሚሜ ማይ ይዐለ። እለ ምዕጥን ለዐለ እተ መብአ፡ ሰይድነ ኢብራሂም ለልትበሀል ናይለ ባካት እሙር እናስ ነብር እተ ዐለ። ሰይድነ ኢብራሂም እብ አምሩ ወበሰሩ እሙር ሰበት ዐለ አዳም እብ ብዝሔ ምን አባይ እንዴ ኢተርፍ አስክ መብአ ለአትቃብል ነብረ። ለሼክ ዐቢ ወእሙር ሰበት ዐለ፡ ቅርኣን ለቀርእ። ለለሐሞ ወለትፈናተ መሻክል ለቦም አንፋር አስኩ ለአውሀሉ ዐለው። ሰበት እሊ ህዬ ለአካን እብ ትሉሉይ አዳም ለልትሐረክ እተ ዐለት። ወልዱመ ክምሰለ ናይ አቡሁ እብ ቅድረቱወዕስመቱ ሰበት ልትሐሸም፡እት አካን አቡሁ ለሸቄ እቱ አውካድ ዐለ። ለሼክ እት ክል አምዕል ከሚስ ሐማይም ሰበት ልርኤ፡ከሚስ ዝያደት ክለን አምዔላት ብዝሔ አዳም ትትሐደር። ለዔማትለ ማይ ህዬ አዳም ብዞሕእት ልትነፈዕ እበ ልውዕል። ላሊ ላኪን አዳም ሑድቱ ለመጽእ። ለአካን እግል መጅሙዐት ገመል ሰኒ ምህም ዐለት። ማይ ወዝያደት ክሉ ህዬ አዳም እብ ብዝሔ ሰበት ህለ እተ ሐብሬ ለልትረከብ እተ አካን ገብአት። መጅሙዐት ገመል ሀለዮተ እንዴ ኢልትአመር ለትሐዝዩ ሐብሬ እግል ተአክብ፡ መካይደ

መትደጋግ ዛይድ ለለትሐዝዩ ጋር ለዐለ። ሰበት እሊ ለተዓርፍ እተ አካን ምነ ማይ ለዐለ እቱ ባካት ሰኒ ረዪም እግል ትግበእ ሐሬት። ማይ ተሐዜ ዲብ ህሌት ላሊ ገመለ ዲብ ዋሌ ትወርድ።

አንፋር መጅሙዐት ገመል፡ ምስል ውሕደቶም ለለአተስሎ እበ ሬድዮ ፒ.ኣር.ሲ. (PRC) ሬድዮ እትሳል ዐለት እለ።እለ ሬድዮ እለ ዔማት ሽቅለ ዐለ። ለሬድዮ ዐቢ ሰበት ቱ፡ አባይ ምን ገጽ አምዕል መጸአየ ምንገብእ፡ እንዴ ረፍዐወ ክምሰልምራዶም እግል ልትሐረኮ ሰበት ኢቀድሮ፡ ብቆት ሳደፈት ምንገብእመ፡ ዲብ እዴ አባይ ጀላብ እግል ኢትውደቅ፡ እንዴ ትቀበረት ቱ ለትውዕል። ክምሰል ደፈነት ጨበል ጀላብ እግል ኢልእቴ እተ እንዴ ሐድገወ ለገይሶ እቱ ወክድ፡ እብ ሐጺን ለትሸቀ ፍንቱይ ሰንዱቅ ዐለ እለ።እት ክል አምዕል አካናት ባድሎ ሰበት ዐለው፡ ላሊ ለአተስሎ እበ እንዴ ትመየው ጽብሕ ምድር እንዴ ቀብረወ ልውዕሎ ዐለው። እብ ሰበብ አመተ ኢተአመረት ሐረከት አባይ፡ ምነ እግል ሊሪሞ ሰበት ቀድሮ፡ ክምሰል አቅበለው፡ እብ ቀሊል እግል ልርኮበ ዐለ እሎም። ሰበት እሊ ሕፍረት እንዴ ሐፍረው ለአሰልፍ ለአፈጉሩ ጨበል ወሐር ለለአፈጉሩ ዲብ ሕድ እንዴ ኢለሓቡሩ በናቢን ከሩው ዐለው። ለሬድዮ ክምሰል ቀብረወ እበ ዲብ ደንጎበ ለአፍገረው ጨበል እንዴ አንበተው ደፉነ ወለአካን ለአትመሳሱለ። አባይ ዲበ ባክ እንዴ ትፈረረ ክምሰል አቅበለ እግል ኢትብዴ ምኖም እንዴ ቤለው እብ ኮምፓስ ቀዩሰ ወፍንቲት እሻረት ወዱ እለ፡ ክምሰል አቅበለ እብ ቀሊል ረኩበ።

ህቶም ክልዶል ዲበ ወዐለው እተ ኢልትመየው። ለልትሐረኮ እበ ገራቢት ወለሸቁ እቱ ባካት ዲብ ቃይሮቶም ሽቅሎም ሰርግሎ ለዐለው። ክል ምሴት ምስል ቅያደቶም ሐብሬ ልትባደሎ። በህለት ምስል ከረ ወድ ሓብቲ።

መብአ ፍንጌ እምሀሚሜ ወቅሮራ ተ ለህሌት። ፍንጌ ክልኢተል ለህሌት ነሳፈት ህዬ ሐድ 48 ኪሎ ምትር ትገብእ።መብአ ዲብ ሕምብረ አባይ ለህሌት አካን ሰበት ገብአት እብ ክሉ ጀሃት እብ መዐሳክር አባይ ለትከርደነት ተ። አግደ ድፈዕ አባይ ምን መብአ ብዙሕ ረዪም ኢኮን። ምን መብአ አስክለ መርከዝ ወቃው እዝ ለዐለት አውጌትመ ቅሩብ ቱ። ዲብ ቅሮረ ለዐለ መዐስከር አባይመ ምነ ብዙሕ ረዪም ይዐለ። እብሊ ሰበብ እሊ ለትፈናተ ወራታት ለወዴ ሸዐብ ወዴሽ አባይ እብሊ ጋድም እሊ ለአትቀባብሎ ለዐለው። መጅሙዐት ገመል ምነ ሐረከት ብዝሕት ለዐለት እቱ ድዋራት እንዴ ሬመት ዲብ አግባብ እንዴ ተሐበዐት ትውዕል ዐለት። አደሐ እብለትፈናተ አስባብ ድፈዕ ዐሳክር አባይ እንዴ በጽሐው ሐብሬ ለለአመጽኦ መነአዘማት ዐለው እለ።

ክሉ ሽቅል አንፋር መጅሙዐት ገመል እብ ላሊ ዐለ። ዲበ አካን ለአቱ ዲብ ህለው፡ ከምስለ እተ ድዋራት ለልትሐረኮ ዐሳክር ለብሶ ሰበት ዐለው፡ እብ ላሊ ዶል

ልትዳወሮ እብ ለብሰቶም ለግበእ ወእስእኖታቶም እግል ኢልትፈረጎ ለለአፈርህ ይዐለ። እግለ ገመሎም ምን ምውዓሎም እንዴ አሬመው፡ እተ ድዋራት እንዴ ቀየደው ጥሉቃሙ ልውዕሎ። ምናተ፡ ምን ቅብላት ለአትቃሙቱ። ክል ምሴት እግለ ረኩበ ሐብሬ እብሬድዮ እትሳል ልልእኮ ወመምሬሕ ልትከበቶ። ክእነ ሰበት ገአ ስካብ ላሊ ይዐለ እሎም። ለለዓርፎ እቱ ወክድ አደሐ ሌጣቱ። እብ ተር-ተረት ዋርድየት እት ፈግሮ ዑሩፋም ልውዕሎ።

አንፋር መጅሙዐት ገመል፡ ሽቅል ትሩድ ቅሩናም እንዴ አስመነው፡ ሐቆ ዐስር አምዕል፡ ሴፋሆም ትወሐ ምኖም። ሽቅሎም መታበዐት ትየልል አባይ ወአስክ ህጁም እግል መትዐዳይ ቅወት አባይ እብ አኪድ ደሊ ሰበት ዐለ፡ እግል ልፍገሮ ለለአሸፍግ ጋር ይዐለ እሎም። እሊ ህዬ ሐብሬ ሳብተት እግል ልርከቦ ሰበት ዐለ እሎምቱ። ሴፈ ሰበት አክለሰው ሌጠ ህዬ አስክ አካኖም እግል ለአቅብሎ ይሐዘው። እግል ዎሮት ምኖም፡ እግል ወረዴ መጎስ አስክ ቅሮረ ሱዳን እንዴ ጌሰ ምን እስቲፋኖስ እዛዝ ሴፈ እግል ለአምጽእ እሎም ትዋፈቀው። ምን ቅሮረ ሱዳን ዲበ ዐለ መክተብ ጀብሀት ሸዕብየት እግል ልብጸሕ ላዝም እብ ቅሮረ ኤረትርየ መትዐዳይ ለአትሐዜ ዐለ። ዲብ ቅሮረ ኤረትርየ መዐስከር አባይ ወውሕደት ዐይን ሰበት ዐለ መትደጋግ ዛይድ ለለሐዜ ሽቅልቱ ለዐለ። ለሰፈር ረዪም ወለገበይ ህዬ ሸምሸም ሰበት ገብአ፡ እግል ወድ መጎስ ናይ ኖሱ ብስር ለጠልብ ምኑ ጋር ዐለ። ዲበ ወክድ ለሀይ ቅብለት ሳሕል ሐፋነት ትርደት ሰበት ዐለት እተ፡ ለሬመ ሰፈር ምን ገጽ ላሊ ልትወጤ እሉ። አስክለ አባይ ዐለ እቱ ባካት ለሐልፍ ናይ አባይ ልባስ ዐስከሪ እንዴ ለብሰ ምን ገጽ ላሊ ልትሐረክ፡ አደሐ ህዬ ሄራር ዶል ለአተላሌ ህዬ ክምሰል ሸዐበ ድዋራት ጀላሊቡ ወስዴርየቱ ለብስ። ሴፈ ላኪን ይዐለ እሉ። ለዐለ እሉ ሴፈ ምን መልሂቱ ልትፈንቴ እት ህለ ምስል ድሩራመን ዐለው። ክምሰል ሐኑክ ወነብረ ለትገብእ እሉ ላኪን ሽከራት ለአተ እተ ብራሾ ማይ ዐለት እሉ። ኖሱ ዴደማን ርሑ፡ ሜርሓይ ገበዩ ወምስል ታመት ሰእየት ገጽ ቀደም ሄረረ። “ይእቀድሩ፡ እበይንዬ ከአፎ እንዴ ወዴኮ፡ እት መሻክል ሐቆ ትካሬኮ ህዬ?” ለልብል ፈርሆታት ምስል ሙናድል ዔብቱ ለዐለ። ሰኣል ሐቆ ብከ አርወሐትከ እንዴ ትሰአልከ ኖስከ ትበልስ እለ። ሙናድል ዲብ ተጃርቡ ኖስከ መታክል ዲብ ባልሕ ለትገይስ እቡ ብስር ባሰሮት ወቀዩ ነብረ።

ጸሃየ ወሰለስ ጸሩ፡ እት ረአስ ኦፋሆም ወድ መጎስ እበይኑ ሰበት ጌሰ ፈርሀት ዐለት እሎም። ላኪን ክልኤ ሰኒያት ምስል ይህለየ።ወድ-መጎስ ለገብአ መሻክል ልሳድፉ፡ ክፋል ናይለ ዲብ ንዳል ለሳድፍ መታክል እንዴ ወደው ነስአው። ሸቀላት ላኪን ኢተርፈዮም። እግል ወድ-መጎስ እተለሳረሐው እተ ላሊ ራድዮሆም እንዴ ፈትሐው፡ ለእት ጀብሀት ለዐለ ቃእዶም ሐብሬ እግል ለአትሐላልፎ እቱ አምሰው። ምን ቃእዶም፡ “አባይ እብ ክሱስኩም ሓብሬ

ራክብ ህለ፡ ገመል ለጸብጠው፡ ላሊ ላሊ ማይ ለወርዶ አንፋር ዲብለ ድዋራት ዲብ ልትሐረኮ ትረአው፡ ለትብል ሐብሬ ባጽሐቱ ህሌት” ለትብል ልእከት ትከበተው ምኑ። እለ ልእከት እለ ራሐት ለተሀይብ ይዐለት፡ ላኪን ኢረዐበው። ሰበቡ ክምሰለ ህቶም ምን አባይ ሐብሬ ለለአገረሆ አባይመ ሐብሬ እግል ልርከብ ክምሰል ለአተናሽዕ ኣምራቶም። ምናተ። እብ ዕንከ እንዴ ረኤከ ለኢልትወሔ ጋድሞታት፡ በሐር ወሐውጽ እንዴ ሐፍረ እግል ለአፍግሮም ቅድረት ክምሰል አለቡ እንዴ ጌመመው ሽቅሎም አተላለው። ለተአፈረሆም ሓጀት ገመሎም ምነ ዲበ ደዋይሕ ለህሌት ለትረሸደ ወዕላመቱመ ፍንቲት ሰበት ዐለት ቱ። እብሊ ህዬ ዝያደት እግል ልትደገጎ አባይ አክል አዪ ሽኩኮም ክምሰል ዐለ ምን ሐረከቱ እንዴ ፈሀመው ሽቅሎም እግል ለአተላኡ ቀረረው።ዝያደት ለለአፈርህ ሽእ ዶል ልትረኤ፡ ምነ እሙናም መነዘማቶም ሐብሬ ክምሰል መጸ።ም ደምነው።

ወድ መጎስ ለጌሰ እተ ላሊ ጸብሐት። ለሬድዮ ክምሰል በዲረ ዲብ ሕፍረተ ትደፈነት። አደሐ እግል ለአተስሎ ሰበት ኢቀድሮ እብ ሰበት ወድ መጎስ ዲብ ልትሻቀሎ፡ ዲብ ሕሊል ይቡስ ዲብ ክትክተተ እንዴ ትጸገዐው፡ ዲብ ልትሰሐቆ ሐረከት አባይ እግል ልራቅቦ ዲብ ዓቅቢት ወዐለው። ጸሓይ አስክ ትወድቅ ህዬ ለገብአት ምህም ሐብሬ ኢረክበው። ለአምዕል ለሀ ህዬ ለሬመት እት እንተ ለወዐለት መስለት እቶም። ምድር እግል ልምሴ እግሎምከክምሰል ምራዶም እግል ልትሐረኮ፡ ዲበ ትክ አኑን ጽልመት ለድዋራት ሰኒ እግል ልፈቱሹ ወመነዘማቶም እግል ልርከቦ ዕውድወድ ምድር ሰኒተምነዉ።

ዲበ ድዋራት 11 አምዕሎም ክምሰል ወደው ክመ ሐልፈየ አምዔላት እለ አምዕል እላመ ሳዐተ ክምሰል ተመት ምድር ጸልመተ። ለተሀየበቶም ሐብሬ ዲብ ወግም እንዴ ኣተው ህዬ፡ ድዋራቶም እብ መደጋግ ዛይድ ሐቆለ ታየነው፡ ሬድዮሆም እንዴ ፈትሐው ምስል መስኡሊኖም ትራከበው ደሀይ ሕድ እግል ልድለው። ሐቆሁለተትሐዜ ሐብሬ ጀላብ ግል ልርከቦ ዲብ ድዋራት መብኣ ተሐረከው ። ምስል ገሌ ምን መነዘማቶም እንዴ ትዋጀሀው ባካት ሳዐት አርበዕ ጽብሕ ምድር ዲብለ ምውዓሎም ለአቅበለው እተ መደት ህዬ፡ የማነፐሬተር፡ ምን ከረ ወድ ሓፍቲ፡ “አባይ እግል ልምጸአኩምቱ፡ ለህለ እኩም ሕርያን ህዬ ለእለ ጸበጥኩም እንዴ ጸበጥኩም ርሕኩም አፍገሮት ሌጣቱ” ለትብል ሻፍገት ርሳለት ትከበተ።

ከረ ጸሃየ እግል እለ ሐብሬ እለ ክምሰል ትከበተው፡ እንዴ ትጋመው እግል ልቀርሮ ሐቴ ዶል ትገሰው። ለርሳለት ምሴት ቀዳሚት ማጽአት ምን ትገብእ፡ ላሊ እበ አተው እበ አካን እግል ለአቅብሎ በክት ዐለ እሎም። ጽብሕ ምድር ሰበት ተሐበረው ላኪን እግል ልፍገሮ ለቀድሮ እበ አካን ይዐለት።እበ አባይ እግል ልትሸከኩ ለቀድር እትጀህ ሰበት ዐለው እብ ረዪሞም ሰበት ይዐለ ህዬ

ህቱ ክሉ ረአሱ ዲብለ ኢልታከዩ እትጀህ እግል ሊጊሶ ሐረው። ሕኔት ዲብለ አተው እቡ እትጀህ ገይሶ እብ ድዱ አስክ ግንራሪብ በሐር ገጾም እግል ልትሐረኮ ቀረረው። አባይ ግራሆም ሐቆ መጽአ ህዬ ለትገብእ ሐሬ ክምሰል ሳደፈት ትትአመር። ለነስአው ሕርያን እብ ጠረፍ በሐር እንክር ቅብለት እንዴ ጌሰው ሕዱድ ሱዳን መትዐዳይቱ ለዐለ። እብሊ መርበይ እሊመ ምንገብእ ዲብ ቅሮረ ኤረትርየ መዐስከር አባይ ሰበት ዐለ እንዴ ታበዐዮም እግል ለዐርዮም አውመ እት ሀግት እግል ለአትዮም ቀድር ዐለ።

ለገብእ ለገብአት ትግበእ እንዴ ቤለው፡ እብለ ሐሬ ለመጽአት ፍክረት፡ እግል ልትብገሶ ትዳለው። ለአግደ እት ሸቀላት ካርሆም ለዐለ ጋርወድ መጎስ ቱ። ቅሮረ በጽሐ ሚ ኢበጽሐ ለለአሙሩ ይዐለ እሎም፡ ዲብ ምግብ መታክል ሳደፈዩ እግል ኢልግበእመ ዲብ ልትሸከኮ፡ እግለ ሀላግ ለተአርሄ ሐብሬ ላኪን ይዐለት እሎም።ወጃቦም እተ ፈጅር ለሀ እግል ለአቅብልቱ ለዐለ። ህቶም ላኪን እበ ተሀየበቶም ሻፍገት ሐብሬ፡ ምነ አካን እግል ልትወርከው ትቀሰበው።ወድ-መጎስ፡ እብ ሰላም ዲብ ወድ-እዛዝ እንዴ በጽሐ ምን ለአቀብል አባይ እግል ኢልጽበጡ አዜመ ሀመቶም ወሰከት። እግል ዎሮት ምነ ምስሎም ሸቄ መነዘማትወድ-መጎስ መጽአ ምን ገብእ ቴለሉ እግል ልድሌ ወለህለው እቱ እትጀህ እግል ለሐብሩ እንዴ ትፋነው፡ ገመሎም ዲብ ዋሉ ጽብሕ ምድር ሸንከት ቅብለት ትወከለው። ምድር ክምሰል ጸብሐ ዲብ ግንራሪብ በሐር “ክሩፍ” እትለ ልትበሀል፡ ገርግር (ኮራል) ለብእተ አካን ሰበት በጽሐው እግለ ግርግር መሐብዒ እንዴ ወደው ገመሎም አብረከው ወድብ መሳጥር ናይለ ግርግር እንዴ ትላወሸው አጭፈረው።

ባካት ሳዐት ሐቴ አዳሕየት አባይ እግል ለዐርዮም ዲብ ልታከው፡ወድ-መጎስ እበ እማነት ለትከበተ ነፈር እንዴ ትመረሐ ሴፋሆም እንዴ ትሆገለ ዐረዮም። ምነ ሴፈ ወኬን ገጹ ክምሰል ረአው ዝያደት ትለወቀው።ወድብ-መጎስ ዲብ ጅማዐቱ ምን ልትሓበር ወሐር ሳዐት እትለ ኢገብእ ወክድ ላኪን ዐሳክር አባይ እብ እገር ወመካይን ዲበ ጋድም ትዘረአው። መጅሙዐት ገመል ህዬ ዲብ መሳድድ ትሩድ አቴት።

ለዐሳክር አሰር መጅሙዐት ገመል ሰበት በደ ምነ ዲብ ምግብ ዙንዙን ዲብ ልብሎ አንጎገው። መረሖም ለዐለ ናይለ ጀብሀት መስኡል ስለለ እንዴ መርሐዮም አስክ ጠረፍ በሐር አተጀሀ እቦም።ዎሮት ጃሱስ ወድ ዐድ ሰበት ዐለ፡ ዝያደት ክሎም ዲብ ምድር እንዴ ደነ እግል ለትኣስር፡ እግለ ዐሳክር ዲብ ሐንቴሀ ጸሓይ ለመራር ቀለዮም። እሊ በዐል አከይድስ ነፈር እሊ ሸንከትለ ጫፍራም ለዐለው ጅማዐትነ መጽአ ምንገብእ እሉ እንዴ ቀተልከ ወተሓረብከ እስትሽሃድ ክም ልትፈደል ከረ ጸሃየ ቀረረው። ጠቢዐት ሽቅሎም ሐብሬ አከቦት ወበሐስ ውድየት ለጠ ሰበት ዐለ ዘብጥ እግል ልፍተሖ ለሰምሕ ይዐለ።

እብሊ ሰበብ ለሽቅል ሰብር፡ ኢመትረባሽ ወልብ ከሪ ለጠልብ ዐለ። ዲብ ደንጎበ ሀለዮቶም ዲብ ብቆት ለካሬ አዋይን ሳደፈ ምንገብእ ላኪን ሕርያን ብዕድ ይዐለ እሎም። ከረ ጸሃየ ለምስኡል ስለለ ኬን ወእንሰር ልደወክ እት ህለ እንዴ ሮገው ታቡዑዎ ዐለው።

ዲብ ቀደምለ መጅሙዐት ገመል ሕብዓም እቱ ለዐለው አብዓት ግርግር ሰዐር አጥራፍ በሐር ለመስል አቀጥፍ፡ ግንደዔ ወሕጭም ዐለ። አባይ አሰሮም ለበደ ምኑ መጅሙዐት ገመል ለሰዐር እብ መልሃዮም ዲብ ካዩዱ አስክለ ግንራሪብ በሐር ለህለ ግርግር ትጸገዐው። ለዐለው እተ አካን ምነ አባይ ልደወክ እተ ለዐለ አካን ሸንከት ጠረፍ በሐር ሽውየ ርይም ለትቤተ። ለክምሰል መትንዕያይ ከልብ አሰር እንዴ ታይኖ ወነፋንፎ ለአትኣስሮ ለአንጎጉ ለዐለው ዐሳክር አባይ ወሜርሐቶም፡ ዲብለ በጽሐዉ ድዋራት እንዴ ደነው ዲብ ፈትሾ እግል ምድር ውሌዶም ቤለወ።በክቶም እንዴ ሰነ ካምሲን ሰበት አምበተ ለአትሸክኮም ለዐለ ኣሱር እግል ልርከቦ ኢትቀደረ። ዐሳክር አባይ ዲበ ጋድሞታት ምን አንጎጋይ ወኬን እንዴ ሐልፈው ዲብ አጥራፍ በሐር ኢሸአገው። ምን ቅብላት እግል ለአትቃምቶ ምንመ ጀረበው ለአካን መሐብዒ ለበ ኢትመስል። ለዐሳክር ልደወኮ እት ህለው መጅሙዐት ገመል ምነ ዐለት እተ ኩስኩስኢትቤ። ሐቆ እሊ ፍሬ ላኢትርከበ ምኑ ንዕየ፡ መካይን አባይ እትጀሁ አስክ ቅሮረ እንዴ ወደ እግል ለአንርር አምበተ። ለእብ ጸሓይ ልልህሶ ለዐለው ዐሳክር እንዴ ትጸዐነው አስክ ቅሮረ ተሀርበበው።

ላሊ እብ ግዲደ ዲብ ልሄሮ ወአምዕል ዲብ ሐንቴ ሰኒ መራር ጸሓይ ዲብ ጠረፍ በሐር እንዴ ተሐበዐው እብ ካምሲን ጨበል ልደፈኖ ለወዐለው አንፋር መጅሙዐት ገመል፡ ለዐሳክር ክምሰል ሬመው እሎም፡ ዲብለ ቀለውለወ ማይ በሐር ዲብ ለአቀምቶ ለማይ እግለ ወዐለው እተ ጸሓይ ወዕሳስ ለልአበርድወእግል ሕጽቤ ለነፍዖም እግል ልግበእ እሎም ተምነው። ላኪን እግል ወሪድ ለእግል ሲቶ ወሕጽቤ ገሮብ ክምሰል ኢገብእ፡ ለአምሮ ዐለው። ሐቆ ሳዐት አርበዕ አልዐስር ሸማል ብሩድ እብ ጀሀት በሐር እግል ጥሰሶም ሰበት አምበተ፡ እብ ብሼሽ ሐፋነት ዲብ በርድ ነፍስ ለትፈትዩ ቴለል መጽአ። ረዪም እንዴ ኢጸንሖ ህዬ ጽልመት ወብርድ ዔረው። እብሊ ህዬ መጁሙዐት ገመል ምነ ብሩድ አጥራፍ በሐር እንዴ ኢትሸፈጎ እግል ልትወርከው ክምሰል ዐለ እሎም ቀረረው። ለአደሐ ልደወክ ለወዐለ ሰኒ ለለአሙሩ ጃሱስ ጃእር፡ ለድዋራት ሰኒ ሰበት ለአምሩ እብ ስቱር ታብዖም እግል ኢለሀሌ እግል ለአክዶ ዐለ እሎም።ቂመት እግል ልርከብ እብ ክለ ቅድረቱ ለከድም፡ንዛም ደርግ አማንት ለከረ ዲቡ፡ ምኩሕ ነፈር ክምሰልቱ ለአምሮ ዐለው። ህቶም ራቁቡ ወህቱመ ራቅቦም ሰበት ዐለ አግደ ዕድዋን ሕድ ዐለው።ምን ገብእ እሉ እብ ምክሔ እንዴ አተናሰ እግል ልጽበጦም ክምሰል ለሐዜ ኢቀወው። ዲብ ሽቅሎም አግደ

ለልትዐዳወዎም ክምሰልሁ አንፋር ዐለው። ሰበት እሊ ምነ ጠረፍ በሐር እንዴ ኢልትብገሶ እብለ አርበዕ እትጀህ እንዴ ትፈንጠረው ለድዋራት ታየነው። ለለአፈርህ ሽእ ክምሰል ይዐለ ሐቆለ አከደው ህዬ እግለ ዐለው እተ ሰፍረ እግል ልሳሩ ሩዝ ጬፈው። እሊ ዲብ ወዱ ምስለ እት ጀብሀት ለዐለ መስኡሎም እብ ሬድዮ እት ለአተስሎ ከበር ሕድ ወደው። ሐቆ ድራር ህዬ፡ ገመሎም እት ዋሉ እንክር ምውዳቅ ጸሓይ ሸንከት ምርር ሱዳን ትበገሰው። ላሊ እብ ግዲደ ልሄሮ ትመየው። ጸሓይ ክምሰል ፈግረትመ ኢትገሰው። ሸበህ ዲብ ሐቴ አካን እግል መደት ሐጫር ዓረፈው። ዐራሪጎም እንዴ ለብሰው አምዕል እብ ግዲደ ልሄሮ ሐቆለ ወዐለው ማሲ ምድር ዲብለ መበገሲቶም በጽሐው። ወሓጢት ክምሰል በጽሐው፡ ገመል ዲብ በዐሉ ወህቶም ህዬ ዲብ ጅማዐቶም ተሓበረው።

ወቀይ ናይለ ግረ ከጥ አባይ ዲብ ሕንጎሰቱ እግል 12 ምዕል ወሽቅት ለዐለት መጅሙዐት ገመል እግል መቅደረት አዳም ወጽዋር ክምሰልሁመ አባይ ጻብጡ ለህለ አካናት እብ ድቀት ኖሰ እንዴ ጌሰት እግል ውቅልት ቅያደት ሐብሬ ምህመት እግል ትሀብ ቱ ለዐለ። ዲብለ ጅብሀት ሸዕብየት እግል ተሀርሰ ትዳሌ ለዐለት ትርድት ዐመልየት ፍገሪት እለ ፊራሮ እለ ቀላል ይዐለት። ዲብ መዳሊት ህጁም ወደውሸሾት ውቃው እዝ ወጀብሀት ቅብለት ሳሕል ሐብሬ መጅሙዐት ገመል ወሲቀት ዐባይ ዐለት።