Wp/tig/ክታብ - መዐደዩት - መበሽራይት

መበሽራይት መበሽራይት

ሽሞንዲ ዑቕባሚካኤል

ዔማት ሐብሬ፦ ሙናድል ባንዴረ ጠዓሜ፡ ተኽሌ ኢሳቅ፡ (ጃኮሞ)፡ ሙናድል ኢንጅነር መኮነን ፍስሃጽዮን

ሴድየት፦ ኮሎኔል ኪዳኔ እንድርያስ። ሌ/ኮ ቦኽረጽዮን (ኢፒኣርፒ)። ሜጀር ርእሶም አስገዶም(ፉንጃይ)

ዲብ ክፍለት 80ታት ቱ ለዐለ። ሐቴ ወለት ብርጣንየ ለሕሩር ምድር ኤረትርየ-

-ጀበሀት ሸዕብየት ትራቅቡ ለዐት አራዲ እግል ትግነሕ እት ሶዳን ክምሰል በጽሐት፡ እት ከርቱም ለዐለት ሰፋረት ብርጣንየ “ለምድር ሰበት ለአፈርህ ምን ኢትገይሲ ለሐይስ” እት ልብል እግል ለአፍሁመ ጀረበው። ህተ ላኪን ኢትከበተቱ። “አነ ምንለዐል ክሉ መስኡልየት አርወሐቼ እረፌዕ” እንዴ ቴለቶም አስክ ሜአዳን ኤረትርየ ትበገሰት።

ህተ እሲት ሜርሓይ ሕዝብ ዐመል ብርጣንየ ለዐለ ነይል ጎርደን ኮኖክ ዐለት። እተ መደት ለሀ ብእሰ እግል ሕዝብ ዐመል እንዴ ወከለ ርኢስ ውዘረእ እግል ልግበእ እግል መጃገረት ልትዳሌ ዐለ። እለ እሲት እት ሜዳን ክምሰል አቴት ለትከበተወ አንፋር ጀብሀትት ሸዕብየት አላት እትሳል ሰበት ሀበወ እቡ እንዴ ትነፍዐት ዲብ ናይ ቤተ ተለፎን ጸብጠት። ብእሰ እንዴ ረክበት ህዬ ምን ሜዳን ተሃጌት ምስሉ። ዲብ አየ እንዴ ገብአት ተአተስል ዲቡ ክምሰል ህሌት ዶል ትሰአለየ፦

“ዲበ ጀብሀት ሸዕብየት ለትራቅቡ ምድር እንዴ ገብአኮ፡ አንፋር ናይለ ተንዚም ለሀበዉኒቱ ኣላት እትሳል እንዴ ትነፍዐኮ ዘብጥኮ ዲብከ” እት ትብል በልሰት ዲቡ። እግል ልእመነ ኢቀድረ። አማን ክምሰል ቱ እግል ለአክድ ለትፈናተ ሰኣላት ትሰአለየ።

ኮኖክ፡ ምስል እሲቱ ክምሰል ተሃገ እምበል እብ ቴለለ ምትሻቃል፡ እበ ቴለል ለፈሀመዩ ጋር አክልሕድ እግል ልትአመር ምንመ ኢቀድር። እብ ሰበብ በሀል አቶብየ ምነ መስከብ ሸፈቲት ለልአመሩ ምድር ተለፎን ዶል ልትዘብጥ ዲቡ እግለ ወድ እንግሊዝ ላቱ ስያሲ ልእከት ዓድየት ይዐለት።

እት ሰነት 1988 ዐውቴ መትደውሻሽ ናደው ወሀጊግ ጀበሀት ነቅፈ ክምሰል ተአከደ፡ ለእሙር መትመራምራይ ተእሪክ ወሰሓፊ ላቱ ባሲል ዴቬንሰን ለዐውቴ ስነት ‘ድየን ብየንፉ’ እንዴ ቤለ እብ ገበይ ቢቢሲ እግል ዐለም ለአስእል እት ሀለ፡ እበ ዲብ ሜዳን ኤረትርየ ለዐለ ኣላት እንዴ ትነፍዐ ቱ እግለ

ከበር ለአትሐላለፈ። እሊ ኣላት እሊ ላኪን ዐውል ቃሊ ወተዐብ ለጠልብ ዐለ።

እሊ ጋራት እሊ እግል ምሔርባይ ባንዴረ ጠዓሜ እት መለፋት ፊቃዶ ግረ በልሰዩ። እት ሰነት 1978፡ ዎሮት ምነ አስክ ቅስም ተዕሊም ብሌቃት ልሄሮ ለዐለው 800 መንደሊታት ዐለ። ለሄራር ሰኒ ትሩድ ዐለ። እት ፍንጌለ ልሄሮ ለዐለው ሸባባት “ርያሊስቲክ” ለትትበሀል ሬድዮ ሀለው እንዴ ረፍዐ ምስሎም ልሄርር ለዐለ ምሔርባይ ልቡ ሰልበ።

“እት ገበይ ክሉ ረአሱ እሊ ሬድዮ ኢትነፍዐከ እቡ። ሚ ገብአ?” እት ልብል ትሰአለዩ።

“አበ እግልዬ፡ ምን ኣመረ ሕጃር አትመመ ገብእ።” “እሊ ዲብ ገመል ጽዑን ለሀለ ህዬ ሚ ቱ?” “ሕጃር ቱ። ምናተ ናየ ኢኮን።”

ባንዴረ እግለ ሬድዮ እንዴ ትከበተዩ ዲብ ባልሱ ገንሐዩ። እንዴ ፈትሐ እግል ልግንሑ ምነ ሙናድል እጃኣዘት ትሰአለ። ለሙናድል በዲር ትሸከከ ወሐሬ ህዬ አምነዩ ገብእ እግል ልፍትሐ አጀዘ እግሉ። ባንዴረ ምን በሕ እንዴ ትበገሰ ኢኮን እግል ልፍትሐ ለትሰአለ። በዲር ዲብ ሸርከት ሬድዮ ፍሊፕንስ ናይ አለትሮኒክ አትሳናይ ዳርስ ዐለ። ለነቃሰት ቀላል ሐቆ ገብአት እግል ለአስንየ ክምሰል ቀድር ዳምን ዐለ። ክምሰለ ለጌመመዩ ለምሽክለት ቀላል ሰበት ዐለት አጊድ አስነየ። ለእግል ሰልፍ ዶል ምሔርባይ ራፍዐ ዲብ እንቱ ለርአየ ቅወተ ሕድት ላተ ሬድዮ ቅዋት ተሕሪር ሐቆ ገሌ ሰኖታት ዲብ ሳሕል እንዴ ገብአት ምስለ እት ሎንደን ለሀለ ነፈር እግል ተአትሃጌ እበ ትቀድር ኣለት እንዴ ትበደለት ክምሰል ረአየ ዝክርያቱ ትቅብ ቤለ ዲቡ። “ለእግል ኖስ-ኖስነ እግል ተአትራክበነ ትቀድር ለይዐለት ሬድዮ እብለ ትበደለት!” ሐስበ እንዴ ልትፈከር።

ሙናድል ባንዴረ፡ እት ሰነት 1984 ዐውቴ መትደውሻሽ ውቃው እዝ ሐቆለ ሰምዐ። እግል ከረ ብቃት ወእተ መደት ለሀ ለአስነዩ ርያሊስቲክ ለልትበሀል ሬድዮ ፈቅደ። ምን ብሌቃት እንዴ ኢልትሳረሕ አምር ኤለትሮኒክስ ክምሰል ሀለ እግሉ ለአትአመረቱ ህታተ። ለመናሰበት ለሀ ተድሪብ ክምሰል አትመመ ክለ ሐያት ንዳሉ ዲብ አትሳናይ ሬድዮታት እግል ለሓልፈ መንግአት ለፈትሐት ሰበት ዐለት “ዝክርያት ውቃው እዝ” እሊ ሌጠ ይዐለ።

ብዞሕ ኣላት ኣትሳላት ዲበ ሐርብ ክምሰል ትሰለበ ዶል ተአመረ ለመቅደረት ታመት ለይዐለት እግሉ ሬድዮ እት ፎቃይ ምሔርባይ ርፎዕ ለዐለ ራድዮ እብ

ብዝሓት ወለሔሰየ ክምሰል ትበደለ ሐቆ ሴዕ ሰነት ግረ እንዴ አቅበለ ትቅብ ወደ ዲቡ። እተ መደት ለሀ ቅዋት ተሕሪር ስትራተጅዪን ለኢገብአየ ኖዕ ሐዋን ሬድዮታት ልትነፈዕ ዐለ። ለሬድዮታት ለሀይ ሲትዘን ባንድ(CB) ልትበሀል። ለረዋዲ እብ ሑድ ሐድ እንዴ በዜሕ ወለሐይስ ገይስ ዐለ። ርያሊስቲክ፡ ኣርጀይ-20፡ ኣርጀይ 20ኢ፡ ኣርጀይ-27፡ ታንክ(ኣርጅ-38)፡ ኣርጅ-50፡ ናይ

27 ሜገሄርዝ ሰበት ዐለ ሬድዮታት ነአይሽ ናይ እትሳላት ዐለ። ግረ እሊ ኣርጀይ-380፡ ሃንዲክ፡ ዞድያክን፡ ስታር-----ወምን አባይ ለትሰለበ እብ ዶል ዶሉ እንዴ ልትወሰክ ጌሰ። እምበል እሊመ እት ክፍለት 70ታት ምግባያት ሬድዮታት እትሳል ክምሰል ከረ ፒኣርሲ-77 ዐለየ። እሊ ኖዕ እሊ ለአግደ ኣለት እትሳል አባይ ሰበት ዐለት ተንዚምነ ምን አባይ እንዴ ሰልብ ምን ሕዲነ ረዋዲ እትሳላት እግል ልትባለሕ ቀድረ። መቅደረት ውቅል ድግምጋም(Frequency) ለቡ ብዕድ ሬድዮታትመ እግል ንተውብ ቀድረነ። “ኢረት” ለልትበሀል አንወዕ ሬድዮታት ምን በዲሩ ለተንዚም ልትነፈዕ እቡ ጸንሐ። ምናተ፡ እብ አጫቤዕ ለልትዐለበ ዐለየ። እግል “ኢረት” ለልአምር ኦፔረተር ሰበት ይዐለ ህዬ እት መንፍዐት እግል ልውዐል ኢቀድረ። ሐሬ ላኪን ከመንዶስ እት ህለው ለትነፍዖ እበን ለዐለው ክምሰል ከረ ሙናድል ስዩም ጋሪቫልዲ ወጸሩ ሑዳም ሙናድሊን እግል መታብዐት እትሳላት አባይ እግል ልትነፍዖ እበን አንበተው። “ኢረት” ለልትበሀል ኖዕ ምን መደት ተሕሪር መዳይን እንዴ አንበተ እግል መደት ሐጫር እግል ናይ ጅወ እትሳላት እት መንፍዐት እግል ልውዐል እንቡት ምንመ ዐለ እት ወቅት ሐጪር እብ ብዕድ ረዋዲ እትሳላት ሰበት ትበደለ ብዞሕ እት ክድመት ኢወዐለት።

እብ ዐባዪ ሬድዮታት መልእክ እግል ለተሓልፍ ለቀድረ ላቱ ምስል ምጽአት ራካል ለልትበሀለ ሬድዮታት ቱ። ለራካል ስኳዲካል ለልትበህለ ለዐለ እግለን ከጥ ጨቢብ ወብዞሕ ለኢናስብ ምንመ ቱ ሰንያት ሬድዮታት ተን። እት መደት ሰልፍ ሰለስ ራካል ሌጠ ዐለየ። እለን ሬድዮታት ዲብ ዐደን፡ ዓለ ወብሌቃት እንዴ ትወተደየ ክድመት እግል ለሀበ አንበተየ።

መአንባት ክድመት እትሳላት እት ወራታት ቅዋት ተሕሪር ተቅዪር ዐቢ አምጽአ። ራካል ዲብለ ገብአት ሳሰት እንዴ ገብአከ አንቴናከ እንዴ ወቀልከ ምስለ ገብአት ክምሰልሀ ላተ ራካል እግል ትትራከብ ምሽክለት ለአለበ ስትራተጅያይት ሬድዮ ዐለት። ለነኣይሽ ሬድዮታት ላተ ብዞሕ ድግምጋም (Frequency) ምንመ በን ለልትዐጻጸፍ በህለት እንዴ ልትጣዌ ኢገይስ። ሰበት እሊ ዲበ ለሐሬካሀ አካነት እንዴ ገብአከ እትሳል እግል ትውዴ ኢቀድር። እትሳል እግል ትውዴ እት ምድር ውቁል እግል ትፍገር ትትቀሰብ። አው ህዬ እትሳል እንዴ ትከበተ ለልሓልፍ ምግባይ መርከዝ እግል ለሀሌ ህሌት እግሉ።

መራክዝ እትሳላት አባሐኒ እት ግብለት። ዜሮ ሐቴ ወአምበ እት ባካት ሰሜናዊ በሕሪ። እምበ በቕሊ ዲብ ዐንሰበ። ደበኖ ወቦቢ እት ምውዳቅ ጸሓይ። ጭልመ እት ሐልሐል። በቅለ። ዐይገት ወሀገር እት ሳሕል----እት ለዐል ለተሀደገ መሻክል እግል ልባልሖ እንዴ ትበሀልው ዲብለ ትፈናተ አካናት ውቁል ለተከልው መራክዝ ጀበሀት ሸዕብየት ዐለው። እምበል እሊመ እትሳላት ከፈፍል ዴሽ እግል ለአትራክብ እግል መደት ሐጫር ለልተከል መራክዝ እትሳላት ዐለ።

እበ ዐባዪ ሬድዮታት ለገብእ እትሳላት ላኪን ዝያደት ፋኢደት ዐለት እግሉ። እት ጅወት ኤረትርየ ሌጠ እንዴ ኢገብእ፡ አስክ መዳይን ዐባዪ ናይ ሶዳን፡ ሶማል፡ ቤሩት፡ ሶርየ፡ ወብዕዳት ቃራት ለአትራክብ ዐለ። መጦር ዐቦት እሊ ኣላት መትራካብ እት ሰነት 1977 እንዴ አንበተ እግል ብዝሓም ኦፔሬተራት ናይ ሞርስ-ኮድ ምህሮ ልትሀየብ ዐለ። ለምህሮ ዲብ ፈሕ ሐቆ ተአንበተ እንዴ ኢተምም እት ቤት ምህሮ ጸማይም ከረን አተላለ።

ክድመት እትሳላት እግል ወቀሎት ገብእ ለዐለ ንዳል እግል ዐወቶት ምነ ወቅት ለሀይ እንዴ አንበተ፡ ምህሮ ልትሀየብ ምንመ ዐለ፡ ዝያደት ዲብ 80ታት ፈይሐ። ለእብ ሰለስ-አርበዕ ኢረት ወሰለስ ራካላት ለአንበተ ሽቅል ምን ተሕሪር መዳይን ወሐር ለከፍየ ዐድድ ፒኣርሲ 74 ምን አባይ እንዴ ልትሰለበ ክምሰል ትኬለለየ። እት ከፈፍል ዴሽ እግል ልትወዝዐ ቀድረየ። ለእት ምግባያት ሬድዮታት በዜሕ ለዐለ ለኣይክ እግል ለአንቅሱ ቀድረ።

ዲብ ተአሂል ሞርስ-ኮድ ምነ ሳድፍ ለዐለ መታክል ሕዲነ ናይለ ረዋዲቱ። ለዲብ ፈሕ ሙናድል ኤርምያስ ለአደርሶም ለዐለ። ሙናድሊን እምበል ኣላት “ዳዳድ”እት ልብሎ ልትላመዶ ዐለው። ወዳሐት ሰበት ይዐለት ህዬ መሻክል ሳድፎም ዐለ። እሊ መሻክል እሊ ለፈሀመው እት መርከዝ ምግባይ ለዐለው ሰብ መቅደረት ገሌ እግል ልባስሮ ጀረበው። ከረ በረቔ፡ የወሃንስ ወባንዴረ ክርን እግል ተሓልፍ ለትቀድር(ቶን አሲለይተር) እንዴ ሸቀው ጀረበወ። ፍገሪት ሰኔት ክምሰል ትረከበት ምነ ህዬ አጠወረወ ወዲብ ሽቅል ክምሰል ትውዕል ወደው።

እትሊ መጃል እሊ ናይ ኣላት ሕዲነ ወምሻክል እት ኢኮን፡ አክል እሊ ናይ አዳም ምሽክለት ይዐለት። ምን ቤት ምህሮ ተክኒክ አስመረ፡ ቤት ምህሮ ቴሌኮሚኒኬሽን አዲስ አበበ፡ ቅወት በሐር፡ ጃምዐት አዲስ አበበ፡ ሩስየ፡ ሀንጋሪ፡ ጀርመን ወብዕድ አካናት ለትደሐረው አንፋር እብ ዶል ዶሉ እት ሰውረት ፈግሮ ዐለው። አስነዮት ረዋዲ ሌጠ እንዴ ኢገብእ፡ ምህሮ አስነዮት ኤክስረይ ወብዕድ ኣላት ሕክምነ፡ ኣላት ሙሲቀት፡ ቢ-ኤም 21፡ ሰዋሪኽ ኣላት ብሉፕሪንተር። ፎቶ-ኮፒ--- ዲብ ኮሚሽን ኤለክትሮኒክስ ዐንበርበብ ወብዕድ

አፍርዐት አስነዮት ተሀየበ። ለእግል እዛዐት ክርን ገቢል እንዴ ትበሀለየ ለአተየ ኣላት ለከስስ ተአሂልመ እብሎም ሙናድሊን ተሀየበ።

ለዲብ ዮም ሐቴ ናይ ወሬሕ ሐቴ ሰነት 1979 ሽቅለ ለአንበተት ሬድዮ ክርን ገቢል እንዴ ኢትትወተድ ለምን አባይ ለትሰለበየ ፓይ-125፡ ሞቶሮለ ናይ 100 ዋት፡ እተ ክምሰልሁመ እብ ዝቤ ለመጽአት ያሱ ለትትበሀል ሬድዮ-እት ጀርመን ላኪን ሶመርኮምፕ-ለትትበሀል ስናዐት የባን እት ሰአነት 1978 ኖሶም እግል ልሽቀወን ትጻገመው። ያሱ ሲንያር ኣምፕሊፋየር ክምሰል ገብአ ዲበ መቅደረተ እት ደረጀት 200 ዋት እንዴ ትወቀለት እት አካናት ሕዱድ ናይ ሳሕል እግል ተአስሜዕ ቀድረት።

ምነ ሬድዮታት እትሳል እግል ልሽቀው ከድሞ ለዐለው ሙናድሊን መኮነን ወባንዴራ ቶም። ዲብ ብስራት ወንጌል ናይ እዛዐት ሬድዮ ተጅሪበት ለዐለት እግሉ። ዲብ ቅስም ሽቅል እዴ ይሙም ለዐል ኢንጅነር ምሕረትኣብ፡ እተ ክምሰልሁመ ተኽስቴ ባይሬ ወብዕዳም ክምሰል ትወሰከው ዲቦም መቅደረት አዳም ትተረደት።

እሎም ሰብ መቅደረት ላቶም ሙናድሊን ቀደም 1976፡ ለቀይሶ እቡ ኣላት ይዐለ እግሎም። ጥያራት ቀናብል ዶል ለክፈ እግለ ናይ ኮፐር ኖዕ እንዴ ጀመዐው ክምሰል መትላጥኢ ልትነፍዖ እቡ ዐለው። ምን ሰነት 1976 ላተ ሐል ትረከበ። ከረ የማኔ ገብርኣብ እት ሜዳን እንዴ አተው ለመሻክል ክምሰል ረአው። ምን ኣሜሪከ ወብዕድ ድወል እግል ቅያስ ለነፌዕ ኣላት አምጽአው። ምነ ዶል ለሀይ ወሐር ለእብ በስር ኖሶም ከድሞ ለዐለው ሙናድሊን ለከርበ ኣላት መቀየሲ እንዴ ትነፍዐው ከለሉ እግል ለኣምሮ ቀድረው።

ለክልኦት ፈሬዕ ከምክም ለዐለ ቅስም አስነዮት ሬድዮ--ፈሬዕ ዐመልያት ወተክኒክ--እሰልፍ ምስል ረሕበ - ናይ ቅስም ሽቅል እዴ ለትመቃረሕ ዐለ። ለሽቅሉ ምስል እትሳላት እንዴ ቀርብ ሰበት ጌሰ ህዬ። ሐቆ አወላይ ሙእተመር ዲበ ገብአ ተቅዪር ምስል ቅስም እትሳላት ትየመመ። እት ሰነት 1980 ህዬ ለቅስም እንዴ ፈይሐ እንዴ ልትሐረኮ ለልአስኑ አጋር መስንየትመ ትየመመው ወእግል ልሽቀው አንበተው።

ለአጋር መስንየት ካልኣይት ደረጀት ምህሮ ለከለሰው አው ህዬ እት መድረሰት ሰውረት ሳምናይ ፈስል ለበጽሐው ገብኦ እት ህለው። እት ሜዳን እብ ክሱስ አስነዮት ረዋዲ ናይ ስስ ወሬሕ ምህሮ ለነስአው ቶም። ክምሰል ፍገሪት ናይ እሊ ምህሮ እሊ ለመስንየት ዲብ ዴሽ እንዴ ትየመመው። ለከርበየ ረዋዲ እተ ዶለን እንዴ ለአሰኑ፡ አስክ መርከዝ ምግባይ እንዴ ትለአከየ እንዴ ሰነየ አስክ ለአቀብለ በዴ ለዐለ ወቅት እት ወቀይ እግል ልውዐል ቀድረ።

ዲብ ሰነት 1986 ፍንቲት ኣለት እትሳላት መጽአት። እለ ኣለት እለ እብ ተለፎን ወተሌክስ ምስል ክሉ መዳይን ዓለም ተአትራክብ። ስሜት ናይ እለ ኣለት “ስታቴክስ” ትትበሀል። ክምሰለ ዲብ በሐር ለተምሆልል ዶንክ ለትትነፈዕ እቡ እድናያይ ናይ ተለፎን ሸበከት (Telephone Telex Net work)ክምሰል ህሌት ወክድመት እግል ተሀብ ክምሰል ትቀድር ዶል ተአመረ እብ ዝቤ ክምሰል ትመጽእ ገብአ። “ስታቴክስ” ምን ቴሌበርከት ለትትበሀል መአሰሰት ስዊድን ትዛበወ። እለ ኣለት ክቱብ ወክርን ለተአትሐላልፍ ወእት በሐር ወምድ እግል ትሽቄ ለትቀድር ኣላት ተ። ኢንጅነር መኮነን ፍስሓጼን ወባንዴረ እግል ልውቶደ ሰለስ አምዕል ነስአ ምኖም። ስታቴክስ ምን ዐንበርበብ ናይ ሳሕል አስክ ስቶክሆልም፡ ለንደን፡ ኒውዮርክ፡ ቶክዮ---ወእሉ ለመስል ምድር እብ እትሳል እግል ተአትራክብ ትቀድር። ዐባዪ በዋቢር በሐር እብለ ኣለት እለ ምን በሐር ምስል ምድር ልትራከበ። ለአግደ መንፍዐተ ህዬ ምንለ ገብአት ጀሀት እጃዘት ንስአት ኢልአትሐዜከ። ምስለ ለሐዜካሁ ተለፎን ናይ መክተብ ልግበእ ወቤት እግል ትትራከብ ትቀድር። ሬድዮ እትሳል ላተ ምስለ ኢትአምረ መአሰሰት እግል ትትራከብ ብዞሕ እግል ተአትምሙ ለወጅብ ጋራት ሀለ።

እግለ ተንዚም ለልአትሐዜ ኣላት ምን ካርጅ እንዴ ትዛቤከ እግል ተአምጽኡ መሻክል ብዞሕ ሳድፍ ዐለ። እት ሱግ እብ ዋዴሕ መዓወለት እግል ትውዴ ሰበት ኢልትቀድር። ምስል ዐባዪ መአሰሳት ውፋቅ እንዴ ወዴከ ክምሰል መጽእ ገብእ ዐለ። እሊመ ኢልትአመር በህለት ኢኮን። ለኣለት ክምሰል ትዛቤከ እግል ተኣምረ መፋሀመት ወመዋጅሀት ለአትሐዜ። ሙናድል ባንዴረ እግለ ሲኒካል-ራካል ልለትበሀለ ኣላት ልትዛበየን እት ሀለ እባሁ እብ ክሱስ መትነፍዖተን ድራሰት ነስእ ዐለ። እት ካርጅ ውፋቅ እንዴ ገብአ ተአሂል ሰበት ልትይሀየብ ለኣለት አስክ አየ ክምሰል ትገይስ ቅዉይ ይዐለ።

ምን ካርጅ ለልትዛበዉ ኣላት አስክ ሜዳን እት አምጽኦት ናይ ጀበሀት ሸዕብየት ላተ አንጀሎ ለትትበሀል ዶንክ ዶረ ሰኒ ዐቢ ዐለ። ለኣለት እት ሚናት ድወል ግዋሬ ክምምሰል ተሐደረ። አንጀሎ ህዬ እግለ ኣላት ዲበ ተንዚም ለራቅቡ ግንራሪብ እንዴ ትጸግዐት ተሐድሩ ዐለት።

ዐድድ መቅደረት ናይለ ተንዚም ምን ዶል እት ዶል ኣላት ጥዉር ክምሰል ለአቴ ገብእ ዐለ። ሰበት እሊ ናይ ዳተ(Data net work) ሸበከት እትሳላት መጽአት። ቴሌፕሪንተር፡ ምስል ሞደምን ለትትበሀል መትከበታይት ወኔድኣይት HF ሬድዮ ዐባይ እንዴ አትጻበጥከ። ናይ ምድር ረዪም ንዛም አትሐላልለፎት ለኣይክ ተአንበተ። እብ አሳስ እሊ እት ፍንጌ ነቅፈ፡ አፍዐበት፡ ካርቱም ወበርሶዳን ናይ ክቱብ መልእክ እግል ልትሐላለፍ መንግአት ትፈትሐት። እብ ክርን እፔሬተራት ጪጭ እት ትብል ልትሐላለፍ ለዐለ ለኣይክ። እበ

ሐሬ ለመጽአ ተክኖለጂ እት ቀበት ሳንያት መልእክ ብዞሕ እግል ልትሐላለፍ ቀድረ።

ጀብሀት ሸዕብየት መጦርለ እት 80ታት ለረከበቱ ዐውቴታት ዐስከሪ ምነ እት ካርጅ ነብር ለዐለ ገቢልነ ትረክቡ ለዐለት ሰዳይት ወእበ ምን አባይ ለሰልበቱ መምተለካት እብ ኖዕ ምን ገብእ ወእብ ብዝሔ ኣላት ብዞሕ እግል ትምለክ ቀድረት። ለዲብ ሰነት 1988 ምን ሳሕል አስክ ዐባዪ ዔማታት አክባር እብ ሰዳይት ሰትላይት ምህም ሐብሬታት እግል ተሓልፍ ለትሰምዐት ኣለት ሰትላይት- ተለፎን መቅደረት ጀብሀት ሸዕብየት እብ ዕጹፍ ክምሰል ትወቀለት ለበሸረት ዐለት። እለ ኣለት እለ “Iternational Satilite Telephone(Inmarsat)” ትትበሀል። እለ ኣለት ንኢሽ እት ገብእ እብ ቀሊል እግል ትትረፍዕ ለትቀድር። እብ ገበይ እድንያይት ሰትላይት ምድር ወበሐር እግል ተአትራክብ ትቀድር። እት ሜዳን ምን ተአቴ እግል ሰልፍ ዶል ለዐጃይብ ወቀይ ምሔርበት እብ ከሊመት ባሲል ዴቪንሰን እት ሀወእ እግል ትንሸሩ ቀድረት።

እሊ ዐውቴ እሊ ለሰምዐ ገቢል፡ እበ ለትረከበት ሰርገል ዐስከርየት ፈሬሕ ወለትለወቅ እት ሀለ፡ ሙናድል ባንዴረ ላተ እብ ፈርሐት ናይ ክልኤ ሰርገል እግል ልትፈንጠሽ ሐዘ። ሸዐብነ “ተንዚምነ ምን አቡዐሸረ ዲብ ቢኤም ወ130 ሚ.ሜ በጽሐ” እንዴ ቤለ ፈርሐቱ እት ሸሬሕ፡ ሙናድል ባንዴረ ህዬ “ምን ሪያሊስቲክ እት ሰትላይት ተለፎን!” እት ልብል ለሐልፈ ተእሪክ ትዘከረ።

ዲበ ወቅት ለሀይ እት ሎንደን ለዐለው ወካይል ጀብሀት ሸዕብየት “ሰውረት ኤረትርየ እት ለሰጀለተ ዐውቴ እግል ተአክዶ ምን ተሐዙ እብሊ ዕልብ ተለፎን ዲብ ባሲል ዴቪንሰን እንዴ ዘብጥኩም እግል ተአክዶ ትቀድሮ።” እግለ መሐጠት አክባር ሐበረው። ቢቢሲ ህዬ እበ ለተሀየበዮም ዕልብ ክምሰል ዘብጠው ባሲል ትከበተዮም።

“ዲብ አየ እንዴ ገብአከ ትትሃጌ ምስልነ ህሌከ?” “እት ጀበሀት ሐርብ!”

“ሚ ትርኤ ህሌከ?”

“የም አለቡ መምተለካት ዐስከሪ፡ አሲሪን አቶብየ’ አሲሪን ውላድ ሶቬት ”

“ሚ ጅንስ ኣላት እትሳል እንዴ ትነፍዐከ ትትሃጌ ምስልነ ህሌከ?” “ሐቴ ንኢሽ ኣለት እትሳል ሀበዉኒ። እበ እትሃጌ ምስልኩም ህሌኮ።”

ባሲል ዳርስ ወናይ ተእሪክ መትመራምራይ ዐለ። እብ ደረጀት ዐለም እሙር

ሰበት ዐለ ህዬ። እበ ተእሪካይት ኣለት እንዴ ትነፍዐ ለአትሐላለፈዩ አክባር ሰርገል ዴሽነ ሸዕቢ ሸከ ለወደ እቡ ይዐለ። ዐለም ለዐውቴ እግል ትእመኑ ቀድረት ወወቀይ ሰውረትነ ከብቴ ረክበ። ንጋረት ዐውቴነ ላተ ኣለት። እግል ሸዐብ ዐለም እብ ዓመት ወገቢልነ ህዬ እብ ፍንቱይ ብሸራት ወቀይነ አስአለት።