Wp/tig/ክታብ - መዐደዩት - ሔሳስነ ትበለዐ

ሔሳስነ ትበለዐ

ዘርኢት ወለዴየሱስ

“ኢትአንዱደ፡ እንዴ ሰሐብስነ እግል ነአፍግራቱ።” ለልብል አማውር ሜርሓይ ፈሲለት ደባባት ምንዲ ኢልትሐላለፍ እግል ልውደዩ ለሐስበ ጋር ዐለ። ለዲብ ሕፍረት እንዴ አቴት ዲፈረንሳሌሀ ለትሰበረ ምን ኖዕ አንፊብያን ላተ ደባበት፡ አባይ እግል ኢልስለበ በሀጀት ባይአቱ ዐለት። “አባይ ሕኔት ሰልበ እግል ትንደድ ሀለ እግለ” እንዴ ቤለ ሳልቫተዮ እንዴ ፈትሐ እግል ለአንድደ ዱሉይ ዐለ።

እግል ልደውሸሽ ሕሱብ ለዐለ አባይ ኢትደውሸሸ። ሽሙይ እንዴ ገርገረ ለሀጅመዉ ምሔርበት እግል ልውሐጥ ለሃፍት ዐለ። ለእብ ቀናብለን ውቃው እንዴ ደውሸሸየ ግረ ዐውቴ ሰብአን ሜልከት ጋድሞታት ቅብለት ምፍጋር ጸሓይ ሳሕል እግል ልውደየ ለትበገሰየ ደባባት ጀብሀት ሸዕብየት ተሕሪር ኤረትርየ ዲበ ለሐስበያሁ እንዴ ኢበጽሐ ተሀንአየ። ደባበት ክብሮም(በከቴ) አባይ እግል ልጽበጣቱ አው ሰብአ እግል ለፍግራቱ ለቴለል ሰኒ ስዱድ ዐለ።

ደባበት ምሒርባይ አባይ እግል ልስለበ ክሉ ረአሱ ክብትት ኢኮን ለዐለት። መሪር ወኢክቡት ለግበእመ እት ኢኮን እብ ቃኑን ሐርብ ላተ ሳደፈ። እት ሰነት 1977 ጽዋር ሰውረት እንዴ ኢልትደቀብ እት ማይ-ዐጣል ምነ ትሰለበየ አርበዕ አንፊብያኣን ሐቴ ሰበት ዐለት ክምሰል ሬክባይ ዕን ለትትርኤ ደባበት ሕሽምት ዐለት። እለ እት ምድር ወማይ ለትሄርር ደባበት ምነ እብ ስስ እግረን ለልትአመረ ስናዐት ሩስየ እንዴ ገብአት ምን ሰነት 1980 አስክ ሰነት 1984 ሙናድል ክብሮም ገብሩ(በከቴ) እት ሰውገ ዲብለ ትፈናተ ሕሩባት እንዴ ሻረከት ዐውቴታት ለሰጀለት ደባበት ስርግልት ዐለት።

ሐቴ ምነ ዲብ ሐርብ ስነይ ለሻረከየ ደባባት ሰበት ዐለት፡ ምህመተ እንዴ አትመመት ምን ድዋራት ግሉይ(ገሉጅ) እንዴ ትበገሰት እግል ጋድሞታት በርከ ወዐነክል ሳሕል እንዴ ጣየመት ዒታሮ ተአቴ እት ህሌት እበ ለትሰጀለት ዐውቴ ሰኒ ርሽድት ዐለት። እግል ብዕድ አመቱ ለኢትአመረት ህጁም እግል ትዳሌ ሰበት ዐለ እግለ ህዬ እት ጋራጅ ሕሽክብ አትሳናይ ናይለ ናቅስ ምነ ለዐለ ሓጃት እንዴ ገብአ ዲበ እግል ሽቅል ዱሊት ዐለት። ሰነት 1984 እብ ዐውቴ አንበተት። ለዲብ ጀብሀት ቅብለት ምፍጋር ጸሓይ ሳሕል ሻፍፍ ለዐለ ‘ውቃው እዝ’ እግል ልትድውሸሽ ሰበት ትሰተተ። እት ዮም 19 ናይ ወሬሕ ክልኤ ሰነት 1984 ክልኤ አምፊብያን ምስል ከቲበት 43 ናይ አስልሐት ክቡድ እብ ድገለባይ እንክር እግል ልህጀመ። ለምን በርከ ለመጽአየ ህዬ እበ ለሬመ እንክር ድማናይ እንክር(ጋድሞታት) ምስል ከቲበት 42 ናይ አስለሐት ክቡድ እንዴ ተሓበረየ እግል ልእተየ ትቀረረ።

ጀብሀት ቅብለት ምፍጋር ጸሓይ ሳሕል እብ እንክር ቅብለት ምን ቅሮረ አስክ ቀጣን ሐድ 100 ኪሎ ምትር ለሪሙ ስልስለታይ ሰዋትር፡ ምን ምውዳቅ ጸሓይ አስክ ምፍጋር ጸሓይ ህዬ ምን አልጌነ አስክ ማርሰ ታክላይ 70 ኪሎ ምትር መትደሃር ለቡ ምድር ምዱድ ዐለ።

እብ አሳስ ስታት ናይለ ህጁም፡ ዮም 22 ናይ ወሬሕ ክልኤ ሰር-ላሊ ብርጌድ

23 ስርየት ሐቴ አውጌት እንዴ ሀጅመት ክምሰል ጸብጠተ፡ ለናይ ደባባት ከቲበት ጽብሕ ምድር እግል ትትወሰክ ዲበ ስቱት ዐለ። ከቲበት 42 ናይ ደባባት፡ እንዴ ትዳሌት እት ጽልመት ምን ብሌቃት ትበገሰት። ለእግል ሰኖታት ምን ባካት ጸብረ ወቀይሕ መሬት ለልትበሀል ሰዋትር ሕሩካት ለኢልአምምረ ደባባት ወዐረባት ገበይ እንዴ ኢበትከ እግል ልክረበ ሰበት አንበተየ አክልሕድ እግል ልሄረ ኢቀድረየ። ዲብ ቀበት ጽልመት ሐራስ ለደባባት ክምሰል። ዕዉር ምክራይ እግረን ሰበት በዴት ምነን እብ ዋጅብ ኢሄርረየ። ከራብ ናይለ ደባባት ወዐረባት እት ልትኬለም ሰበት ጌሰ ለስታት እግል ልትነዘም ኢቀድረ። አድብር ቀርኒ እንዴ ኢበጽሖ ወቅት ገይስ ክምሰል ሀለ ሰበት ትፈሀመዮም አንፋር ናይለ ስርየት ሹቁላም እት እንቶም “እበ እት እዴነ ህሌት ንሽፈግ” እንዴ ቤለው ምንመ ትበገሰው ህቶም ወመስኡሊኖም ምን አድሕድ ሰበት በደው ለገብአት ምስዳር እንዴ ኢነስኦ ምድር እንዴ ጸብሐ ጸሓይ ዐሬት እቦም።

ምድር ክምሰል ጸብሐ ለሰር ላሊ እንዴ ሀጅመት አውጌት ጻብጠት ለዐለት ስርየት ሐቴ። አባይ ሴድያይ ክምሰል አለበ ሰበት አግረሰ ላሊ እብ ግዲደ ሰኬ ምነ ክምሰል ኢትመየ፡ እብ ደባባት፡ ዐርባት መደርዓት ወአስልሐት ክቡድ እንዴ ትነፍዐ አሰረ እግል ለአራብድ አንበተ። ለከቲበት ላሊ እብ ግዲደ ለካየደቱ ጋድሞታት ወሰቦት፡ ምን ሐዲስ እት ተአቀብል እግል ትሻግጉ ክቡድ ምንመ ዐለ፡ ፍርራስ ሸባባት እንዴ ትደፌዕ ክል-ዎሮት ከእበ ትረተዐት እግሉ ገበይ እግል ለአንሰሕብ እት ኢኮን ብዕድ በስር ይዐለ። አባይ አሰረ እት ለሃፍት እበ ባዶብ ዲብ ተአንስሕብ እተ ሰዋትረ ለቀዳም እግል ተአቅብል ትቀሰበት።

ለዲብ ሀደፎም እንዴ ኢበጽሖ ላሊ ከረበ እንዴ ትመየው ምድር ለጸብሐ ዲቦም አንፋር ከቲበት 42 ናይ አስልሐት ክቡድ፡ እብ ሐሩቀት ተናን እንዴ ፈግረ ምኖም እለ ወዱ ትቀዌት እቶም። እት ደንጎበ ለአባይ ልትነዐዩ ለዐለ ዴሽነ ሰዳይት እግል ልርከብ እንዴ ትበሀለ ግልባብ ለወድየ እግሉ ሰለስ አንፊብያን ወክልኤ ናይ 100ሚ.ሜ ደባባት እግል ልርድአ አስክ ገጽ ቀድም ትጠለቀየ። ርዪም ሐቆ ሄረረየ፡ እግለ ፈጅር እብ ግዲደ መን አክልዬ ልብል ጻቤሕ ለዐለ አስልሐት ክቡድ ናይ አባይ ሰበት ረአየ ምን ረዪም እግል ልልከፈ ዲቡ አንበተየ። አባይ እተ አምዕል ለሀ እብ በክት ሰበት ተዐወተ መዕንውየቱ ሰኒ ውቅል ዲብ እንተ ልትሓረብ ዐለ። እት ክእነ ቴለል ሐቴ አምፊብያን ናይ ጀበሀት ሸዕብየት አባይ እንዴ ዘብጠየ ነደት። ለልሀጅም ለዐለ ዴሽ አባይ ምን ረዪም ሰዳይት ደባባት ትገብእ እግሉ ሰበት ዐለት ሜዛኑ ውቁል ምንመ ዐለ፡

ደባባት እበ ወደያሁ ለክፍ ሄራሩ እግል ልህንአ ሰበት ቀድረየ፡ ለበዝሐ ክፋል ናይ ብርጌድ 23 እብ እንክር ድገለብ እንዴ ትጸግዐ እግል ልሕልለፍ ቀድረ። ሰሩ ገሌ ላኪን ዲበ ደባባት ለዐለየ እቱ እንክር ሰበት ትጸግዐ አስክ ህቱ ለሐልፍ ሐርብ ደባበት እብ ደባበት አተላለ።

እት ክእነ ሓለት ክብሮም አካናት እት ቃይር እንዴ ለሐርብ ዲብ ሕፍረት ሰበት አተ ደባበቱ ዲፈረንሳሌ እንዴ ትሰበረ ምነ በጥረት። እንዴ ፈግረ ክምሰል ገንሐየ ደባበቱ ከራበ ክብድት ክምሰል ዐለት ወእተ ሓለት ለሀ ሐቴ እግል ልውዴ ክምሰል ኢቀድር ሰበት ፈሀመ። ሳልቫታዮ እንዴ ፈትሐ እግል ለአንድደ ቀረረ። ህቱ ወሐኪም ናይለ ከቲበት ምስል እንዴ ገመው ሜርሓይ ፈሲለቶም ክምሰል አስአለው። “ጽንሖ፡ ቀደርነ ምን ገብእ እንዴ ሰሐብነ እግል ነአፍግራቱ!” ሰበት ቤለዮም እብ ሰአየት ትጸበረው። እት ወቅት ሐጪር ለሐርብ እንዴ ልትደቀብ ወለቴል እንዴ ልትሰደድ ሰበት ጌሰ እንዴ ሐድገወ ግረ አንሰሐበው።

እምበል ፈሸል ናይለ ዐመልየት። መትሰላብ ናይለ ደባበት መጦርለ እት ጋድሞታት ክራይ ወአውጌት እብ ፈራሰት ወኤማን እንዴ ልትሓረቦ ለአስተሽሀደው ፍራስ እት ገሀይ ሸመዮም። ምን ክሉ ወኬን ህዬ ዲብ ሕቅፍ ናይለ ደባበት እግል ወቅት ረዪም ለሸቀው መጅሙዐት፡ ምን ሰዋገ እንዴ አንበትከ ክብሮም(በከቴ)፡ ከፋሊ፡ ጥላገ፡ ወለት ጃንሆይ፡ ወድ መንገሸ እብ

ሐሩቀት ተናን ፈግረ ምኖም።

ለሳደፈት ነቃሰት እግል ቀየሞት ወሰይሖት ወሬሕ እብ ተማሙ መከሐደ ወንቃሽ ገብአ። እምበል እሊመ ለበብሶም፡ ሳቡኖም ወብዕድ አግርበቶም ሰበት ተርፈ። እበ እት መቅጠኖም ለዐለ ልባስ ወሬሕ ወደው። ክብሮም እብ ብርድ አርወሐቱ ሰበት ፈግረት ምነ ላሊ ለብሱ ለዐለ ኪስ እግል ልትነጄ ሐርብ እግል ልትአንበት እት ረቢ ልትድዔ ዐለ። እብ ፍንቱይ እት ቀበት ደባበቱ ለሐድገዩ ዐፍሹ ዶል ፈቅድ እት ሀመት ለአቴ ወእብ በይኑ ለአስተንትን።

አምዕል ሐቴ፡ አስቴር ለትትበሀል መልህየቶም እት ሀመት ክምሰል ዐለት ሰበት ኣመረት። “በከቴ” እት ትብል ሐቆለ ነቅመቱ። “ስፍሩይ ህሌከ መስለኒ፡ አፎ መሸግከ?” ቴለቱ። ወልብ እንዴ ቤለየ “ስፍሩይ ይህሌኮ” ቤለየ ሽክሖ እንዴ ወዴ። ምናተ፡ እት መደት ተሕሪር ስነይ ለዐለት ጽጋብ ፈቅደ ገብእ፡ “ምን እንሰፍሬመ ሚ እግል ንውዴ? ሸዐብ ምን አፍ አጀኒቱ እንዴ ትባልሐ ለሀቤናተ ሰፊሐት ሔሳስነ እግል አምሐረ ሐደግናሀ” እት ልብል ክምሰል በልሰ ዲበ ህታመ ምስሉ ለትዋፈቀት እት መስል፡ ለክልዶል ጽብሕ ትሸቄ ምነ ለዐለት ሰፊሐት እንዴ ፈቅደት “አማንካቱ፡ ረቢ ቅስመትነ ኢወደየ እት ኢኮን ክልነ ተዐሸምናሀ” ቴለቱ። ምነ ለትሰለበት ደባበት ዝያደት ለሔሳስ ለሐረቀየ እት መስል እብ ገሀይ አስተነተነት።

ቃእድ ናይለ ጀብሀት ወመስኡል ውቁል ዴሽ አባይ ለዐለ ብርጌደር ጀነራል ሕሴን አሕመድ እበ ለረክበየ ዐውቴ እንዴ ሰክክረ፡ ለትሰለበት(የድል ውጤት) ለሰመየ ደባበት፡ ለአስተሽሀደው ፍራስ ወገሌ ነኣይሽ አስልሐት እት ረአስ እሕድ እንዴ ከወነዩ “የለ ሰዉሩ!” እት ልብል የም አለቡ ስወር ነስአ ምኑ። እት ወሬሕ ክልኤ ለረክበየ ዐውቴ ንኢሽ እግል ለዐይድ እንዴ ቤለ እት ዮም

19 ናይ ወሬሕ ሰለስ ገጽ ምሴ፡ ዴሹ እግል ለአትፋጌዕ ንዋይ እንዴ ሓረደ እግል ሄሰት ትዳለ። ለሄሰት ህዬ ድስ ወዴት እግሉ ገብእ?

ውቃው ካልኣይ ዶል እግል ልትዘበጥ ቱ ክምሰል ትበሀለ፡ ቅዋት አስልሐት ክቡድ ለአምጽአዉ ተስዬሕ ዐለ። ህቱ ህዬ ደባባት እብ ገጽ ላሊ ዕዉራት ሰበት ተን ለህጁም አድሐ እግል ልግበእ፡ ደባባት ወዴሽ መጦር አድሕድ እግል ልህጀሞ፡ ዴሽ እተ ጋድሞታት እግል ኢልትዐብ እት ረአስ ደባባት እንዴ ገብአ እግል ልሄርር መቅደረት ክምሰል ህሌት ወእሉ ለመስል ረአይ ወተስዬሕ ተሀየበ። ለህጁም ለሰርግል አፍካር ወአብሳር ብዞሕ ትቀደመ። ዮም 19 ናይ ወሬሕ ሰለስ ክሉ መትዳላይ እንዴ ተመ እግል ሐርብ ልትበገሶ እት ህለው፡ ክሎም ሙናድሊን እት ገጾም ናይ ድመል ወምርወት አሻይር ልትርኤ ዐለ። መርባት እግል ልፍደው ህዬ ነዉ ዐለው። ክብሮም ኖዕ ማክ ላተ ዐረብየት እንዴ ሰውግ 120 ሚ.ምትር መድፌዕ እንዴ ልስሕብ ለአቴ እት ሀለ፡ “ዮም ዐውቴ አው እስትሽሃድ” እት ልብል ለአትሳቅር ወንየቱ እግል ልራቅብ ቀድር ይዐለ።

ህጁም ሳሜዕ ናይ ጀበሀት ሸዕብየት ምን አልጌነ እንዴ አንበተ እግለ እት አውጌት ወክራይ ለዐለ ዴሽ አባይ እንዴ ደውሸሸ ለአሳድር ሰበት ዐለ፡ ዴሽ አባይ ለበዝሐ ክፋሉ ዲብ ማርሰ-ተክላይ እግል ልትጀመዕ ትቀሰበ። እት ደንጎበ ክምሰል ልትፈለል ሰበት ኣመረ እንዴ ትከምከመ አስክ ማርሰ-ግልቡብ እግል ልህረብ እት ልብል ደባባት ጀብሀት ሸዕብየት እት ምግቡ ሰበት አተየ ዴሽ እት አድሕድ ተሐበረ። እትለ መደት እለ ለሐርብ እደይ እብ እደይ ገብአ። እትለ ምህም ላተ ዐመልየት አባይ እት ፍንጌ ዴሽነ ሰበት ትሸመመ ፈነጥር ገብአ።

ሳዐት ሐቴ ናይ አድሐ ህጁም ዴሽ ሸዕቢ እብ ዐውቴ እንዴ ኢተምም፡ ክብሮም ምን መኪነት እንዴ ትከረ አስክ አባይ ለሐድገየን ደባባት አራበደ። እተ ወቅት ለሀይ ለአባይ ለሰልበየ ደባበቱ እት ግንራሪብ በሐር እንዴ ትሸንን ጸንሐቱ። እባሁ እት ቀበተ እንዴ አተ ሰኔት ህሌት ሚ እኪት እግል ለአክድ መቶረ እንዴ ሀረሰ እተ ጋድም እግል ለአትሸውረ አንበተ። መልህያሙ “አብሽር በከቴ” እት ልብሎ ወእብ እደዮም እት ወትውቶ፡ መጦሩ ፈርሐው ወትለወቀው። ክብሮም ለሐርብ እንዴ ኢተምም ክምሰልሁ እግል ልውዴ እሱፉ ምንመ ዐለ፡ ለቀደም ወሬሕ ዲብ ቀበተ ለሐድገዩ ሳቡን ወክሹክ እት እዴሁ እንዴ ረፍዐ እግል ልርአዩ ልትጸበር ለዐለ ሰበት ኢርአ እተ አካኑ ተወው ወደ። ለምን ዐሊ ግድር እንዴ ረፍዐዩ ለመጽአ ሔሳስ ይዐለ። “ጸርነ ገድም ዐውቴ ትደረሮ

እት ኢኮን፡ ለግሁፍ ሔሳስነ እንዴ በልዐዩ ሀርበ!” ቤለ ክርንቱ እንዴ ወቀለ። እግለ እብ በክት ምን እዴ ዴሽነ ለፈግረ ብርጌደር ጀነራል ሕሴን አሕመድ እንዴ ሰትት።