እት መበገሲሁ ለኣቅበላ ንዳል

እብ ዑመር መሐመድ ዓሊ ኣቢብ

ዮም ሐቴ ሰብተንምበር፡ሰንበት ዐባይ 58ይት ሰነት ዝክረት ምን መትአሳስ ሰውረት ኤርትርየ ተ ። ሰነት 1961 ሐቴ ሰብተምበር ኣወለይት ጠልገት ለፈግረት እቡ ሰበብ፡ ስያደት ወጥን ወሕርየት ሸዐብ ኤረትርየ ሰበት ትነዝዐያቱ ። ላ ክዉን ለዐለ በርለማኑ ፡ ወለ ትረፍርፍ ለዐለት በንዴረቱ ሰበት ትከሬት፡ ዎ እብ ንቃሽ ወ መፋሀመት ሐል ሰበት ኢትረከበ፡ ሸዐብ ኤረትርየ ስላሕ እግል ልርፋዕ ትቀሰበ ። ምስታዕምሪን ወ ሴድየቶም፡ እግለ እብ ኖስ ኖሱ እንዴ ትፋሀማ ነብር ለዐለ፡ ሸዐብ እግል ኖሶም ትጥዐም፡ እብ ደያናት ፡ ኣቃሊም፡ ቀባይል ወ መዋቅዕ ጆኦግራፍየት እንዴ ካፈለዉ፡ መሻቀዪሆም እግል ሊደዉ ላሊ ወአምዕል ሸቀው ። እብ ሰበቡ ህዬ ለተፍኪር ኣንደመሞት ኤረትርየ እት ኣቶብያ እግል ዶሉ ተዐወተ። ወክም ፍገሪት ወሰበብ፡ ንዳል ሸዐብ ኤርትርየ 30 ሰነት ነስአ።

ሸዐብ ትቃተለ፡ ኣምበል ፍርድ ወሕክም ዓድል ትሳጀነ፡ እት ክል ኣካን ትሸዕተረ ወትሸተተ። ሸባብ፡ ወሻባት አስክ ልጁእ ተንከረው። ደገጊት ድመን ተርፈ። ስጁን እብ ኣብርያእ ኤርትርዪን ትማለአ። ምናተ ሸዐብ ኤረትርየ፡ “ኣባይ ምን ፈግር እግል አባሬቱ” ሰበት ቤለ፡ እስትሽሃድ እንዴ ደፍዐ ፡ እግለ “እምበል ትርበተ ፡ ኣዳማ ኢሓዜ” ልብል ለዐለ ምስታዕምር ምን ቅርዱ ነቅለዩ ወ ሸማል ሕርየት ትነሸዐ። ወ እሊቱ ዮም ሐቆ ብዕዳት 28 ሰነት ለአምዕል ለንዳል እብ ስላሕ ኣትበገሰየ ልትዘከረ ሀለ።

እሊ እት ለዐል ለሀደገ እት አካኑ እት እንቱ፡ ዮም ሐቆ 28 ሰነት፡ እምበል ስሜተ ለትሰሜት “ሕርየት” ሸዐብ እት ኤረትርየ እብ ሰላም፡ ኣማን ወሕርየት እግል ልንበር ቃድር ይህለ። ዮም ኤረትርየ ክም ደውለት እት እዲና ምንማ ትትሰሜ፡ ምና ወክድ እት ሐንቴ እስትዕማር ለዐለቱ ለለአኬ ፡ ሸዐባ ስጁን መልአ፡ ኣብርየእ አምበል ፍርድ ወፍትሕ እት ዝንዛናት በለው፡ ሸባባተ ምና እት ወክድ እስትዕማር እበ ለትኬለመት፡ ፍንጌ ሞት ወሐዮት እት እንቶም ገበይ ልጁእ ትማጠው ። ኩሉ ሐቴ ገብአ፡ ምን ገሰው ሞት ወምን ሀርበው ሞት።

ሸዐብ ኤረትርየ እተ ወጠንዬ ወመስከበዬ ቱ ለልብሉ ሐረከት ትመነዐ ወስካብ ትከለአ። ኤረትርየ ምስል እሊ ኩሉ አርዛቀ ሰብአ ሕግላን እንዴ ትካረፈዩ ከደም ጸሩ ገብአ። ኤረትርየ እግል ኩሉ ሸዐበ ካፍየት ዲብ እንተ ምን አፍ-ሾመት ጨበት እቱ። ሸዐብ ኤረትርየ እት መደት ሕክም ሸዕብየት እንዴ ሰክበ ኢትረይሐ ወምን ትገሰ ኢጠፍሐ። ክም ኣባይ እብ ስላሕ ተዐቀበ፡ ምን አማክን ዕባዳቱ እብ ልጃም ሰለስል ትዋለ ወአምበል ፈናታይ እኪት ወ ወለት እም መ ረአ።

ዮም ሐቆ 58 ሰነት፡ ሕርየት እንዴ ሐዘ ለክፋሕ ሙሰላሕ ለአንበታ እታ አምዕል፡ እግለ ቀደም 58 ሰነት ለዐለ በርለማኑ፡ ጣፍሐት ለዐለት እዳረቱ፡ ኣማሕበሮት ቤት አብ ወጎማት ፍቲ አድሕድ ወውሕደት ልሰፍለል ሀለ።

ለእት ዘመን ምስታዕምሪን ለትረአ፡ መትካፋል እብ ሙርተፍዐት ወ ምንኸፈዳት፡ ዳያናት፡ ቀባይል ፡ ቅብብ ወአነ ምንከ ሐይስ እንዴ ሐልፈ እዴ ጸሩ እተ ለአትቃምት እተ ለህለ፡ “ ሕነ ሌጣ ነአምር፡ ኩሉ ለትበሀልካሁ ምን ኢትወዴ ምክራይከ እግል ነአቅዌቱ ለልብሎ ሔክመቱ ጥርዓኑ ወመጺጸቱ ሰበት ኢሰምዖ፡ ሸዐብ ኤረትርየ እት አርዱ ሰላም ሰበት ሐግለ ንዳል እብ ስላሕ ቅብላት ዛልም ለትጠልብ መርሐለት ባጽሕ ሀለ።

ክፋሕ ሙሰላሕ፡ ሞት ህሌት እቱ። ምን ለትፈትዩ ለፈንቴከ ሰበት ገብአ እብ ቀሎ-ቀሎ ኢልትአቴ። ላኪን ኩሉ ሐቴ ሰበት ገብአ ክማ እበን ምን ወድቅ እትከ ወምን ወድቅ እተ መደረት ለትሰብብ፡ እት ቀትሉከ በደል ተአትቃምት ምን ነፍስከ፡ ዕርድከ፡ ሸረፍከ ወአርድከ ምኑ እንዴ ዳፍዕ ምን መይት ትትፈደል። ዮም ለቀደም 58 ሰነት ለአምበተት ሰውረት እተ አወል ለአምበተት ምነ መርሐለት እቅብልት ክም ህሌት አኪድቱ።