Wp/tig/ኢመርሕ ወኢተሌ

እብ ዑመር መሐመድ ዐሊ ኣቢብ

ኢመርሕ ወኢተሌ፡
ሰብ አከይ መቅርሕ አንበጠ ጥራይ ካፍል፡
መሰል ቀዳምያም ብዲር ጻንሐት ምን አስል፡
እብ ሸታት ወፈንጨጋር ዐድ ከአፎ በቅል፡
ቅብብ ወደራሸቆት ኢለአነብር ምስል፡

ኢመርሕ ወኢተሌ፡
አነ ሐይስ ለልብል፡
እብ ሀመሌ ለትገይስ እብ ቀላል ኢተአቀብል፡

ኢመርሕ ወኢተሌ፡
ሓይስ! ሓይሰት ለወዴቱ እንዴ ኢፋርግ ወኢለዓሬ፡
በዐል ዱምት ኢለሐልብ ወእደይ ጹቡጥ ኢዋሬ፡
እለ ናይነ ድቦተ ኢትምጸእ ወኢትዕዴ፡
እት ከደነ ንትበአስ ወሐቴ ኢነአወቄ፡
ሕነ ውፋቅ ሰአነ ወዐድ ክም ታኩ ትትሄዴ፡፡

ኢመርሕ ወኢተሌ፡
አስክ ሚዶልቱ እት ዐለዮ እግል ንንበር፡
አሕድ እንዴ እንቀብብ ወአሕድ እንዴ ንትዓየር፡
ጎማቶም አትመመው ለሰብ ሽወ ወጎንደር፡
ወሕነ መቅርሕ ሰአነ ምሴ ወፈጅር ንትፈንጠር።

ኢመርሕ ወኢተሌ፡
እሊ ሎ……ሀይ ለአትሓውን ወሎሀይ እሊ ምን ቀብብ፡
ወወጠን ቀሪም ምን ተሐግል እንዴ ትበዴ ወተዐርብ፡
ዐድ ጭዊት ጎማቱ ሰኔት ኢለአትቃርብ፡
ጭንግዕ ፍቱሕ ገብአነ ለገጽ ወልወል ገርብ፡
ኢመርሕ ወኢተሌ ሚ ዶል ሰኔት ለሐስብ።

ኢመርሕ ወኢተሌ፡
ኣቤ! ሰብ አከይ መቅርሕ አንበጠ ጥራይ ካፍል፡
መሰል ቀዳምያም ብዲር ጻንሐት ምን አስል፡
እብ ሸታት ወፈንጨጋር ዐድ ከአፎ በቅል፡
ቅብብ ወደራሸቆት ኢለአነብር ምስል፡

ኢመርሕ ወኢተሌ፡
አነ ሐይስ ለልብል፡
ወሓይስ ሓይሰት ለወዴቱ ዐድ ለተአበቅል፡
እብ ሀመሌ ለትገይስ እብ ቀላል ኢተአቀብል። (2)

እብ ሐሰን ስሌማን ክፍሌገርጊስ። አፎ ኢንትጋሜ፡
የሀው አፎ ኢንጋሜ ዲብ ሐዋዊን ንትሓሜ፡
ወጠን ታርፍ እግል ዋኒን ወሕነ አድሕድ ይእሰሜ፡
እብ ሀመሌ ለትገይስ ኢትአቀብል እብ ወሼሌ።
መሰ’ለ መርዓት ገብአነ እግል ህዳይ ትዳሌ፡
ለብእስ እንዴ ኢትርኤ ለመኸደት ተአዳሌ፡
ሚ ህሌት እት እዴነ ለእለ ምንሕድ ንትጋሌ፡
ፈናቴነ ምን አድሕድ ወአቤነ ንታሌ፡
አምበል በዓል ኣኬ በዓል አስኔ ኢትርኤ፡
እት ምድር ጋነ እነብር ወኢፈቴነ ነአትሓሌ፡፡
እለ ናይነ በናተ ላመ ተሓመ ልትዓሬ፡
ቀበጽናሁ መስከብነ ክም ዓርባይት ንትዋሌ፡
ልጁእ ገብእ ዋከትነ ወእስእን ሐጺን ንትጋሬ፡
በነ ተርፈት ዋልዳይት ዕንበዓ ቀጥር ወዘሬ፡
ወሴድያይ ሰአነ ለዋልድ ምን ተዐብ እግል ለአባሬ፡
ከደን ሰወ ውላዶም ለሀይ ከለህይ እት ለዐሬ።
ዐድ ተርፈት ብራቃ ወከደን ሰወ አዳመ፡
ዐድ ሕማም ጸብጠየ ወኢተአመረ ሕማመ፡
ለህለ ዲበ ኢሰክበ ወኢአቅበለየ ለአሬመ፡
ሐውየ ንዕኖ ንትጋሜ እትፋኔክም አዜመ፡፡

እብ ኢብራሂም ዐሊ መንፈዖት
ኣምበል ዘንብ እመይት ወአምበል ዐገብ ንትሰጀን፡
ስጁን ኣምበል ፍርድ ለቅዊት ምክራዩ፡
ሞተ ገብእ ሚ ህለ እብ ሕያዩ፥
አዳሙ እንዴ ጃምም ኢከለሰ ብካዩ፡
ኢሰአ ወኢጸብረ በዝሐ አኖካዩ።
እ’ለ ጌሰ አለቡ ወአካን ፍላን ሀለ፡
እብ አሰርባብ ኢትረከበ ወእብ አሰር ምን ተለ፡
ዕን ኢረኤቱ ወእብ ቤለው ኢደለ፡
ምክራዩ ትቀዌት እብ ጃእር እንዴ ትገለ።

ሖል አሰር ሖል ፈረጅ ዲብ ንታኬ፡
ጃእር እት ንትረጄ ወእግል ጽሙም እት ነሓኬ፡
አክራነ እንወቅል ወእብ ዐዳለት ንትላኬ፥
አምበል አሰፍ ልትሐለፍ ሕረም ወአግሩዝ ልትባኬ፡
እለ ናይና!! ኢተአትቃርብ ታ ወኢተአትፋቴ።
እለ ሓለትነ ከአፎ ገብእ ትትባሰር፡
አምበል ዘንብ እመይት ወአምበል ዐገብ ንትኣሰር፡
እበ ጌሰ ኢንትሰአል ወእበ ሀለ ኢንትሐሰር፡
እት ረቢ ሸኬነ ኻልቕ ምድር ወዐስተር።
ሀሩር ብእተ ከብድነ ወከአፎ ትበርድ፡
ዘመን እስትዕማር ሓለፍነ እብ ቅጨፍ ወሕረድ፡
ወእት ዘመን ሕርየት እሰር ወኢትፍረድ፡
ንዛም ህግደፍ ምን ቅርዱ ልንደድ፡
አርሄ ኢለአምር አምበል ስደድ፡

እብ ዐዳለት ንጣልብ ሸዐብነ ሕጠር፡
እሊ ሕክም ጃውር እት ቀደሙ ንብጠር፡
መሳጂን ረአይ ወደሚር ኣካኖም ትትአመር፡
ለሞተ ረቢ ልርሐሙ ወለ ሀለ ልፍገር፡
ዘመን ሽተፍ ወቅጨፍ ዕምሩ እግል ልሕጨር።
እብ እብራሂም ዓሊ መንፈዖት

________

እብ ሐሰን ስሌማን ክፍሌገርጊስ፡
ከአፎ ልስኔ ንዳልክም?
ሞተ ሞተ ትብሉነ ወህቱ እት ጎንደር ገናድል፡
ሞቱ ሌጠ ትታከው ዔብ ኢትብሎ ወክጅል፡
እንትም ትወዱ ርጋዙ ወህቱ ልድሕር ወጸንብል፡
እንትም ካፍሎ ከራሲ ወህቶም ነብሮ ምስል።

ከአፎ ገርም ንዳልክም ንዳል ግሳይ እት ቅንቤት፡
ከአፎ ቀልል ንዳልክም ንዳል ድግም ወሕሜት፡
ንዳል ቤለ ቤለው ሐሰት በጥረት ወትገሴት፡
ንዳል ክእነ ምን ገብእ ለሸባብ እግልሚ ወበዴት፡

ወንዳል ክእነ ምን ገብእ ለሕርመት ኣግልሚ ወበኬት፡
ሚዶል ጸግበት ምን ህግየ ለእዝን እክም አተንሴት፡
አሳሚለ ሓዛብክም ምን ሕልቅምነ ኢትከሬት፡
እብ ቀባይል ትትሃገው ወእላተ ለአኬት፡
ዐጄ ዐድከ እት ትብሎ ወዐድ ስማ ትኬት፡
ወዲንዬ ዲንከ እት ትብሎ ኣምዕል ጸብሐት ወመሴት።

ሞተ ወሐየ ዲብ ትብሎ እት ክል አካን ትትጋሰው፡
እንትም አድሕድ ዲብ በልዖ ለሕርየት ትታከው፡
ለእለ አለብክም ዲብ ካፍሎ ወምን ሕድ እንዴ ትትጋለው፡
ለዐድ ጋበት ጋለየ እንትም እንዴ ትትቃሰው።
ምስኪን እሉ ሸዐብነ በደ ምኑ ሜርሓዩ፡
ሜርሓይ ሓር ኢትረከበ ወቀዳም ብዲር ጠልመዩ፡
ጋሪቱ ክም ፈግረ እት ስጅን ዐቢ ከረዩ፡
እኩይ ሰኔት ሚ ወዴ እት እኪት እግል ኢንሕመዩ፡

ወኤረትርየ ለወልደቱ ረቢ ውፋቅ ከልአዩ።
ሞተ ሞተ ትብሉነ ወህቱ እት ጎንደር ገናድል፡
ሞቱ ሌጠ ትታከው ዔብ ኢትብሎ ወክጅል፡
እንትም ትወዱ ርጋዙ ወህቱ ልድሕር ወጸንብል፡
እንትም ካፍሎ ከራሲ ወህቶም ነብሮ ምስል፡

ሞተ ሞተ ትብሉነ ወህቱ እት ጎንደር ገናድል፡
እንትም ትወዱ ርጋዙ ወህቱ ልድሕር ወጸንብል።