ንዳል ሸዐብ ምን ተርብየት አጅያል ለአነብት

እብ ዑመር መሐመድ ዓሊ ኣቢብ

ሸዐብ ሐቴ ደውለት ሀለዮቱ እግል ለአትአክድ፡አጅያሉ ዎሮት ደርብ እንዴ ጸብጠ ተርየት አማን እግል ልትረቤ ቡ።ምነ አጅያል ዎሮት ጂል ሸክፈ ምን ገብእ፡ክም ወሓይዝ ኣድብር እብ ኢገበዩ ሌጠ ልትሀርበብ።ወእት ገበይ አማን እግል ትብለሱ ሒለት ወጅህድ ትሩድ ለአትሐዝዩ።ምነ እት ወክድ ሐጪር ለበክአየ ከገበይ ሻክፈት ለጸብጠየ፡እተ እግል ረዪም ለትአሰሰት ገበይ ተጠውር ወሙስተቅበል ባርህ እግል ለአቅብል ወልትበጸሕ የም ለአለቡ ማል ወነሐር ሌጠ እንዴ ኢገብእ እስትሽሃድ ቃሊመ ጠልብ።

ደውለት እብ መራሐመት፡ነሳሐት ወጎማት እት ሕድ ለትካተረ አግማም ሐቆ አለበ በዳሀ ሸክ አለቡ።ጂል ሓር እግለ ቀደሜሁ ለዐለ ምን ቀብብ፡ተጅርባቱ እጃብያቱ ወስልብያቱ ክም ተእሪኹ ምን ኢልትዐለም ምኑ፡ ክም ዕጨት እት ረአስ ቅራር ባቅለት ገብእ፡ ከውሒዝ ሐዋንማ ምን ገብእ እንዴ ሐፍረ ለአወድቁ ወለገብአ ሸማል እግል ልግለዩ ቀድር።ግም ቀዳም እግል ግም ሓር ዝናበቱ እብ ገበይ ሰኔት ምን ኢለአጸብጡ፡ተእሪኽ ቀዳም እኪቱ ወሰኔቱ እብ አማን ምን ኢለአወርሱ ክማ አምበል አሳስ ለትበኔት ቤት ዕምር ጥዉል አለቡ ገብእ።

እት ብንየት ጥዉር ድወል ወሀውየት ሽዑብ እት ዐውቴ ወሰርገል ለለአበጽሕ ምን ዓኢላት እንዴ አንበተ እት ተርብየት አጅያል ለትዐወተ ክምቱ ተእሪኽ እዲነ ስጁል ሀለ።ሐቆ አወላይ ወካልኣይ ሐርብ እዲነ እት ጨበል ሞእሻት እንዴ ትበደለየ ከለ ፈግረየ፡ዮም እት እዲነ እብ ተጠውረት ልትሰመየ ለሀለየ ድወል ቐርብ እት አግማም እበ ወደያሁ እስትስማርቱ እት ኢኮን እብ አርዛቕ ጠቢዐት ኢኮን ለትዐወተየ።

ዮም ክምሰል ድወል አወላይ ዐለም እቡ ልትሰመየ ለህለየ እት መናህጅ ተዕሊመን ወአትግነዖት ኣግማም ሰኒ ወአማን ሰበት ሸቀየ ተዐወተየ።ለቀደሜሀን እት ተጠውር ስሙያት ለዐለየ ወእብ አወላይ ወካልኣይ ሐርብ እዲነ ለኢተምተመየ እት እንተን፡ ዮም ምስለ ጥዉራት ድወል ለኢልትሀደገ እቡ ሰበብ እት ተርብየት አጅያል ሰበት ፈሽለያቱ።እብ ኣርዛቅ ጠቢዐት እት አወላይት ደረጀት እት ልትረተበ፡ሸዐበን እብ ሰፍረ ወድብር በዴ ሀለ።ግረ እንዴ አቅበለየ ህዬ እዴ ናይለ ሐቆሀን ለትበገሰየ ድወል ቐርብ ለአትቃምተ ወእበን እንዴ ልትዐቀበ ነብረ ህለየ።

ሕነ ኤረትርዪን አጅያል ቀዳም ምን ሙስተዕምሪን ወጠኖም እግል ለሐርሮ ለትፈናተ መራሕል ሓለፈው። ለዝያድ ምእት ሰነት ለነስአ ንዳል ሰነት 1991 እት ካቲማሁ ክምሰል በጽሐ ጨበል እዴነ እንዴ ነገፍነ ገበይ ዐማር ወተጠውር ወጠን ወገበይ ብንየት ተርብየት አጅያል እንዴ ጸበጥነ ቀጽ ቀደም እግል ነሄርር ዐለት እግልነ። ምናተ ጂል ቀዳም እንዴ እንርእዩ ሸክፈ ወለ ሰኒ ለሄርር ዐለ ክታር ትበተከ። ተእሪኽ እብ ቅሉቡ ትቀረአ፡ አናቱ ሌጠ ለአምር፡ አነ ሐይስ፡ እበ አነ እዋሌኮክምተ ሌጠ ጊሶ ትበሀለ።እብሊ አግማም ሓር ኢኮን ተርብየት፡አርድ እንዴ ጨበ ቱ ሙስተቅበሉ ጸልመተ።

ግም ቀዳም እግል ኣግማም ሓር እብ እኪት ክምሰል ትመቅረሐዩ፡አግማም ሓር ሙስተቅበሉ ምንኬን አብሑር እግል ልሕዘዩ ትበገሰ።ሰበት እለ ለዲብ መደት እስትዕማር ለዐለ ለትመክረሀ በደ ወፈነ ሸባባት ዝያድ እንዴ ትኬለመ ክም እሳት ዐልመት ዲብ ሕድ ለዐ ከልትመጣወሩ ተሐገለ።ምን ኣግሩዝ ሜርሓይ ለአለቦም አስክ ዓኢላት እብ ተማሙ ገበይ ልጁእ ካተረ።ሕክም ጃእር ናይ ዲክታቶር ህዬ እግለ መስአለት ዝያድ ኬለመየ።

እሎም ኣምበል እም ወአብ ለለጅአው አግሩዝ ወሸባባት ክምሰልሁመ እት ልጁእ ለትወለደው ውላድነ እተ ምን ዓዳትነ ወነባሪነ ሰኒ ወአማን ለለአኽተልፍ ቢኣት እቱ ሰበት ተሓበረው ለመጽእ ውሒዝ ምን ገልዮም ከርዑ አለቡ። እሊ እብ ኣምኣት ኣላፍ ለልትዐለብ እት ልጁእ ለነብር ሸዐብነ እግለ ምስሉ እት ዐለዮ ለህለ ኣግማም ሓር ዓዳቱ ወነባሪሁ እንዴ ሐበረዩ እብ ሀውየቱ ለልትሐበን ወለ ሸንን፡ ምስተቅበል ባርህ ለልትረአዩ፡ እበ እት ግራሁ ሓድጎም ለህለ ሸዐቡ ወወጠኑ ለለሐስብ ወለ ለአህተምም፡ እት አምዕላይ መንበሮሁ እብ መትአያስ ለኸድም እግል ልግበእ፡ ረበዮት እሊ አጅያል እሊ እግል ፈጅር እግል ልትበሀል ክም ኢወጅብ ኖሱ አትፋቃድ ኢለአትሐዝሁኒ። ክማ እት ለዐል ለትሀደገ እሊ ሻክፍ ወምን ድዋሩ እንዴ ፈግረ እት ምግብ ብዕድ ቢኣት ክሩይ ለሀለ አጅያል መገለዩ እንዴ ኢለአበዴ እት ደሐን ወመስኩበት ዐዱ እግል ልፈክር ወልሽቄ ምነ አውለውያት እግል ልትሀየቡ ለወጅብ በርናምጃት ሙጅተመዕ መደኒ ክም ራቢጣት፡ መነዘማት እንሳንየ ወጃልያት፡ ክምሰልሁማ አሕዛብ ስያሰት ምነ እብ አውለውያት እግል ልረቱቡ ለወጅብ ዋጅብ ወጠኒ ቱ።

እሊ ፊራሮ እሊ ህዬ ዝያድ እግል ልትዐወት ለአጅያል ብኑይ እቱ ለህለ ዓኢላት፡ እት ረበዮት ውላደን እግል ልትሐሰረ ወእግል ኖሰን ትስኔ ሰኒ እግል ልሽቀየ እት ክል ዓኢለት ኤረትርየ ሊካነ እንቀድም። ንዳል እግል ተጠውር ወቀየሮት ስያሰት፡ ንዳል ጀላብ ሕክም ዓድል ወ ዲሙቅራጥየት ወንዳል እግል ተጠውር ደውለት እብ ተርብየት አጅያል ሰበት ለአነብት።