Wp/tig/ቆምየት ረሻይደ

ቆምየት ረሻይደ

thumb

thumb

ምን ግብለት ጀዚረት ዐረብ እንዴ ትበገሰ፡ እት ግንራሪብ በሐር ቀየሕ ኤረትርየ ምን ገጽ ሐር ለሰክነ ሸዐብ ቆምየት ረሻይደ፡ እብ ደረጀት ወጠንመ ምን እንረኤ፡ መትመዳዱ ዲብ አቅሊም ቅብለት በሐር ቀየሕ ቱ። ምን ድዋራት ባጼዕ እንክር ቅብለት አስክ ምዴርየት ቅሮረ፡ ምን ባጽዕ እንክር ግብለትመ አስክ ባካት ገደም፡ እት ለዋው በሐር ዲብ ልትናከሶ፡ ክምሰልሁመ እት ጀዛይር ደህላክ እት ደገጊት ክምኩም ነብር።
ክም ህግየ እሙ ዐረብ ለልትሃጌ ሸዐብ ቆምየት ረሻይደ፡ ኩሉ እት ደያነት እስላም ለልአምን እት ገብእ፡ እት ርዕዮ ወተጃረት ለትአተንክብ መናበረት ቡ። ሑድ ምኑ ህዬ እብ ጀለቦት ዓሰ ልትናበር። ምን ሐሪጭ ብልቱብ ለትትበሸል ቅጨት ዐቡደ እብ ሐሊብ እንሰ፡ ስገ ወዓሰ ምነ ልሙድ ነበሪቶም ዲብ ገብእ፡ ሩዝ ወቅጨት ፊኖ’ማ ምን ወክድ ቅሩብ እት ለሙዱ ልሄርሮ ለህለው ሙነት ቱ።
እት ታሪክ እሊ ሸዐብ፡ ሰኒ ቀዲመት ላተ ምን ጭገር አጣል ወአባጌዕ ለትትጣነብ ቤት ወዱ ነብረው። እለ ቤት እለ ሻዕር ትትበሀል። ሻዕር ምን መአስ እንሰ ለትሸቀ እብ አሻም ለትጋረመ ‘ግራፍ’ ለልቡሉ ስፌ ገኖ እቡ ለአትጋሩመ።
ምናተ እሊ አብያት ገዲም ዲብ በድል መጽእ ለሀለ፡ ወምስል መግዕዝ ስብክ ወስግም ለገይስ ቴንዳትመ ለእሙር መፈረግ አብያት ቆምየት ረሻይዳ ቱ። እለ ቴንደት ረሻይደ ስሜት ፍንቲት በ- መጠረ ህዬ ትትበሀል። ኸይመት ህዬ ለካልእ ስሜታ ተ። ጥናበ ምን በረ ጎማ (ላስቲክ) ጸዕደ ወምን ከርስ ህዬ ለትፈናተ ሓባር ለብእቱ ሸለትት ግሩም ቱ።
እለ ቤት እለ ንኢሽ ወቀሊል አግቡይ ንድቀት ለብእታ ተ፡ እት ምግዓዝ ቀሊል፡ ወእት ከብደ ለሀለ ዐፍሽመ፡ ሑድ ቱ። ምነ እሙር ናይ ዓዳት አግርበት ቤት ቆምየት ረሻይደ እግል ንሳሜ፡ ድስ-ጣሳ፡ ዝብድየት፡ ዐሙር፡ መኽበዝ በሀለት መቅሎ ቅጫ፡ ግርበ-ማይ፡ ክምሰልሁመ ሽራዕ መምህጽ ወተብል ቶም።
እሊ ዐፍሽ እሊ ህዬ፡ ዲብለ ምን ቅራብ አጣል ለልትሳፌ መዝወጥ (መስወድ) ልትአከብ። እት ወክድ መግዕዝ ኩሉ ለዐፍሽ እንዴ ተሐየበ፡ ሜዛኑ አክል-ሕድ እንዴ ትካፈለ፡ እት ክልኦት ስምጥ ገመል፡ እግል ልትጸዐን፡ ለሰዴ ‘ግራፍ’ ለልትበሀል ምን ገኖ እንሰ ለትሸቀ እንጋረፊን ሀለ። ሑየት ህዬ፡ ምን ሸለትት፡ ሽፈፍ ወሰዐር ሽሙይ እንዴ ትሸቄት፡ እት ወክድ መግዕዝ፡ አንስ ወአጀኒት እተ ቀሐተ እግል ልጥፍሖ ከልግዐዞ ትሰዴ። ለናይ ዓዳት ልብሰት ቆምየት ረሻይደ እብ ዓመት፡ እት አንሳት ህዬ እብ ፍንቱይ፡ ምነ ብዕዳት ቆምያትነ ፍንቲ ልቤለ ሕብር ወሸክል ብእተ። እት ዘበን ቅዱም፡ አንሳት ኖሰን ለትፈናተ ሓባር እት ሰብቀ ወለፍቀ፡ ቀሚሽ ወድየ እት ህለየ፡ እትሊ ወክድ እሊ ላኪን፡ ምን ካርጅ ስፉይ እት እንቱ ለልትገረህ ፋዬሕ ወጸሊም ሕብር ለቡ ዕባያት እብ ቶቡ ለብሰ ህለየ።
ለመፈረግ ልብሰት ወለት ረሻይደ ላኪን፡ እምበል ዕንታት፡ ኩለ ደምቀት፡ ገጽ ወስጋድ ለከድን እብ ክልኤ ፈርደት ለትሸቄት (በሀለት ፈርደት ሐር ረአስ ለትአለብስ፡ ክምሰልሁመ ፈርደት ቀደም ህዬ ገጽ ለትገልብብ መቅለመት ተ)። ምን ወለት 7 ሰነት እንዴ አንበተት፡ እግል ትትገልበብ ተአነብት። ምንተሐቱ ላኪን ስርዋን ናሽብ፡ ክምሰልሁመ ዞቲ ወድየ። ለልምድት ልብሰት ሰብ-ተብዕን ረሻይደ ጀላብየት ረያም፡ እት ረአስ ስርዋን ፋዬሕ እት ገብእ፡ እት ረአሶም ዕመትመ ወዱ። ስርዐት ዕሬ እት ረሻይደ እት ቆምየት ረሻይደ፡ ክልኦት ነፈር እንዴ ትበአሰው፡ ኦሮቶም ምን መይት፡ ቃትላይ፡ ውቀት እንዴ ኢነስእ፡ ለቀባይል በንበን ገብአ ምን ገብእ፡ ምን ቀባይል ቅቱል ወቃትል፡ በረ ላተ ሳልስ ቀቢለት ዲበ እንዴ ጌሰ፡ ክትል ጠልብ። ሰበቡ ህዬ፡ ለቃትል ደማነት እግል ልርከብ ወፍንጌ ክልኤ ለቀቢለት ቀደም ስርዐትለ ዕሬ፡ ለገብአ ናይ አቅሰኖት መርባት በአስ እግል ኢልቅነጽ እንዴ ትበሀላቱ። ሐቆ እሊ ለክልኤ ቀቢለት ዕለት እንዴ አስረየ፡ እግለ በአስ ወቀትል ለከስስ ሐቃይቅ ምን ክልኢተን ለጀሃት ክም ሰምዐው፡ ለሀድጎ እቱ። እት ዕሬ ክም ቀርበው ህዬ፡ ለቃትላይ እብ ዜረኖትለ ሳልሳይት ቀቢለት፡ እት ገጽ ሽማገሌ ናይለ ክልኤ ለቀድየት ከስሰን ቀባይል በጥር። እበ ሽማገሌ ለትሀየበዩ ፍርድ በሀለት ድፍዕየት ከሕሰ ልትከበት።
እት ዘበን ቅዱም ድየት እብ እንሰ ትትሐከም ዐለት። አዜ ላኪን፡ ድየት እምበል እብ ሰላዲ፡ እብ ሸክል ብዕድ ትደፈዕ ኢህሌት። ቃትላይ እበ ሽማገሌ ለትሐከመት እቱ ድፍዕየት ድየት እንዴ ትከበተ፡ ዲብለ ተሐደደ እሉ ወቅት እግል ዓይለት ማይት ክም ደፌዕ እንዴ ገብአ፡ ስርዐትለ ዕሬ ቀትል እብ ዐፎ ተምም።
እሊ ንዛም አስከቦት ደም ቀባይል ቆምየት ረሻይደ፡ ለልትነፍዖ እቡ ንዛም ዕሬ እት ገብእ፡ ምን ስኒን ቅዱም አስክ እለ ገይሰ እቡ ለህለየ ንዛም ቱ።