Wp/tig/ቀርፈ

ቀርፈ ዎሮ ምን ፍቱያም ኖዕ ቀመም እት ገብእ እግል አዝቡን እት ስራይ ዓዳት ወመጥዐሚ ነብረ እንዴ ገብአ እት መንፈዐት ልውዕል ጸንሐ። አስክ እለ ህዬ ናይ ሳረዮት መቅደረቱ እግል ፈተሾት ድራሰት ትገብእ እቱ ክም ህሌት ልትአመር። እሊ እበ ለቡቱ ጥዑም ጼነ ወጠምጠም ፍቱይ ላቱ ቀመም ዲብ ዓፍየትናመ ለትፈናተ መናፍዕ ክምቡ ልትሸራሕ።

እግል ልብ፡ ዓፍየት ለሀይብ ወእት ዓፍየት ልብ ሰኒ ደወ ክምቱ ልትአመር። ድራሳት ክመ ለአክዱ ቀርፈ ዲብ አድሀሮት ደቅጥ ደም ወቅያስ ኮሎስትሮል ሰኒ ክምቱ፡ ገሮብነ ዲብ ደም ለልትረከብ ቅያስ ሱከር እብ ዋጅብ እግል ልራቅብ ክም ቀድር ህዬ ልትሸራሕ። እት ዎሮ ድራሳት እግል 12 ሳምን ክል አምዕል 120 ግራም ቀርፈ ንስአት ቅያስ ደቅጥ ደም እግል ለአንቅሱ ክም ቀድረ ትሸረሐ።

እምበል እሊ እት ቀርፈ ለልትረከብ ድድ ነድ ላተ ማደት እግል ልብ ምን ድዕፍ እብ ዳፍዖት እንዴ ተለ ምነ እግል ልሳድፍ ለቀድር ሕማም ልብ እግል ልዳፍዕ ክም ቀድር። እሊ ህዬ እግለ ዲብ ዓነድር ደም ልብ እግል ልሳድፍ ለቀድር አረር እብ አንቀሶት፡ መደረት ዲብ ልብ ክም ልድህር ትሸረሐ።

እት ዳፍዖት ወራቀቦት ሕማም ሹከሪ ሰዴ። ቀርፈ ካልኣይ ኖዕ ሱከሪ ለቦም አንፋር ዲብ ደሞም ለልትርከብ ሱከር ክም ልድህሩ ተአመረ። ቀርፈ እግለ ዲብ ደም ለልትረከብ ቅያስ ሱከር ለራቅብ ሆርሞን ኢንሱሊን ምን ቅሩብ ክም ልትደረርቱ ለወድዩ። እሊ ህዬ ለኢንሱሊን እብ በቃዐት ዲብ ሽቁል እግል ልትጸመድ ሰበት ሰድዩ ዲብ ገልጸጾት አው ራቀቦት ሕማም ሱከሪ በቃዓት ክም ለሀሌ እሉ ወዴ።

ቀርፈ ምን ሕበጥ ዳፍዕ። ሕበጥ ጠቢዒ በሊስ ዲብ ገሮብነ ለትጀሬ መደረት አው አረርቱ። ለሕበጥ ዳይም ዶል ገብእ ላኪን፡ እግል ልትሳሬ ክቡድ ላቱ ክም ሕበጥ መላጥ ገሮብ፡ ሕማም ልብ ወሕማም ሰረጣን እግል ልሰብብ ዲብነ ቀድር። ዲብ ቀርፈ ለትትረከብ ማደት ድድ ሕበጥ ህዬ እግለ ዲብ ገሮብነ ለመጽእ ሕበጥ እግል ትገልጽጹ ክም ቀድር እብ ሰብ መቅደረት ዓፍየት ልትሸራሕ። ምስል እሊ ቀርፈ ዲብ አምዓይት ለሳድፍ ሕበጥ እብ ዳፍዖት እግለ እብ ሰበብ መሻክል አምዓይት እግል ልሳድፍ ለቀድር ሕማም ዲብ ዳፍዖት ሰዴ። ቀርፈ ከባደት ገሮብ ለአነቅስ። እት ሱከር ለቡ ነበሪት ልብናተ ረቅበት እግል ለአንቅስ ቀድር። እግል ሽቁል ሜታቦሊዝም እብ አደቀቦት ዲብ ገሮብነ ለልትረከብ ካሎሪ እብ ብዝሔ እግል ነአስታህልክ ለለአቀድር ክም ነቲጀት ህዬ ከባደት ገሮብነ እግል አንቀሶት ክም ሰዴ ልትአመር። ቀርፈ ነሻጣት ዐቅል ለአተርድ ወወቅል። እብ ሰበብ ዕምር ወሰኮት፡ እት ዐቅል እግል ልሳድፍ ለቀድር መሻክል ዳፌዕ።